Imarisai

Imai

Jehovap Nalunaajaasui

Oqaatsit toqqakkit Kalaallisut

Oqaluttuaq 62: Davidikkunni ajornartorsiutit

Oqaluttuaq 62: Davidikkunni ajornartorsiutit

DAVIDIP Jerusalemimi naalakkersuilernerata kingorna, sakkutuui akeraanut Jehovap ajugaasaqattaartittarpai. Jehova neriorsuisimavoq Kana’anip nunaa Israelikkunnut tunniukkumaarlugu. Kiisalu, Jehova ikiortigalugu, nuna neriorsorneqaatigisartik tamaat pigilerpaat.

David naalakkersuisuuvoq ajunngitsoq. Jehova asavaa. Taamaattumik Jerusalem tigusarereerlugu siullermik angerutsip illerfia Jehovap pia tassunga aggiuppaa. Naalaffiliorumavorlu inissaanik.

Kingornagulli David annertuumik ajortuliorpoq. Davidip nalunngilaa inuup allap pigisaanik tillinneq ajortuliornerusoq. Unnuilli ilaanni illussaarsuami qaliata qaavaniitilluni takulerpaa arnaq pinnersorujussuaq. Tassa Batseba, uialu Davidip sakkutuuisa ilagaat Uriasimik atilik.

Batseba ajuutigingaaramiuk Davidip illussaarsuarminukaatippaa. Uia sorsuttuniippoq. Davidip innaqatigaa, kingornagullu Batsebap paasilerpaa naartulluni. David annilaangalerpoq. Sakkutuut naalagaat Joab oqqersuiffigaa Urias sakkutuuni sallersaniiteqqullugu, toqutaaniassammat. Urias toqummat Davidip Batseba nuliartaaraa.

Jehovalli David kamaateqaa. Jehovap pruffiitini Natan aallartippaa David ajortuliaanik oqaluttuuteqqullugu. Natanip David oqaluukkaa takusinnaavat. Davidip ajortuliani peqqissimissutigeqaa, taamaattumik Jehovap toqunngilaa. Jehovali oqarpoq: ’Taama ajortulioravit inoqutinni ajornartorsiuteqartassaqaatit.’ Taamatorluinnarlu pisoqarpoq!

Natanip Daavi siunnersoraa

Siullermik Batsebap ernera toquvoq. Taava Davidip angajulliliaata Amnonip qatanngutissani arnaq Tamar tiguaa pinngitsaalillugulu arneriffigalugu. Davidip ernerata Absalomip tamanna kamaatigingaaramiuk Amnon toquppaa. Kingorna Absalom iluareqqusaarami inuppassuarnit tapersersorneqalerpoq, imminullu kunnginngortilluni. David Absalomimut sorsunnermi ajugaavoq, Absalomilu toqunneqarpoq. Ilumut, David ajornartorsiuteqartaqaaq.

Tamakku pitillugit Batsebap Salomon ernertaaraa. David utoqqanngormat napparsimalerlunilu ernera Adoni′ja imminut kunnginngortinniaraluarpoq. Davidilli palasimut Sadokimik atilimmut Salomon taneqquaa, takutillugu Salomon kunnginngortussaasoq. David 70-inik ukioqarluni toquvoq. Ukiut 40-t naalakkersuivoq, maannali Salomon Israelimi kunnginngorpoq.

2 Samuel 11:1-27; 12:1-18; 1 Kunngit 1:1-48.