Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 59: David qimaasariaqartoq

Oqaluttuaq 59: David qimaasariaqartoq

DAVIDIP Goliat toqoreermagu, Israelikkunni sakkutuut naalagaata Abnerip David Saulimukaappaa. Saulip David iluarisimaaqaa. Sakkutuunut naalaganngortippaa kunngillu illuani najugaqalersillugu.

Kingorna, sakkutooqatigiit filisterinut sorsoreerlutik utermata arnat appipput: ’Saulip tuusintillit toquppai, Davidilli qulinik tuusintillit.’ Saulip David sinngagilerpaa ataqqineqarnerummat. Saulilli ernerata Jonatanip sinngaginngilaa. Taassuma David asaqaa, Davidillu Jonatan asavaa. Neriorsoqatigiipput ikinngutigiittuassallutik.

Kunngip Saulip naaligaq naakkiartoq

David kukkilattariallaqqissuuvoq, tusarnaassallugulu Saulip nuannarisaqaa. Ullulli ilaanni sinnganermit Saul ajoqisumik iliorpoq. David kukkilattariartillugu Saulip naalikkani tiguaa naalillunilu, oqarluni: ’David iikkamut paagutissavara!’ Davidili qussuppoq, naalikkallu eqqunngitsoorpaa. Kingorna Saulip David naalikkaminik naaleqqikkaluarpaa aammali eqqunngitsoorlugu. Davidip paasilerpaa mianersoqqissaartariaqalerluni.

Saulip neriorsuutaa eqqaamaviuk? Oqarpoq angut Goliatimik toqutsisoq panimminik nuliartaartikkumaarlugu. Saulip David kiisami oqarfigaa panini Mikal nuliartaarisinnaagaa, aatsaalli akeqqami filisterit ilaannik 100-nik toqutsippat. Sunaaffali Saul neriuttoq filisterit David toqussagaat! Toqunngilaalli, taava Saulip panini Davidimut nuliartaaritippaa.

Ullut ilaanni Saulip Jonatan kiffanilu tamaasa oqarfigai David toqukkumallugu. Jonatanilli ataatani oqarfigaa: ’David ajoquseqinagu. Ajortuliorfiginngisaannarpaatit. Tassami, iliorneri tamarmik ilinnut iluaqutaasarput. Navianartorsioqaaq Goliat toqukkamiuk, takugakkulu nuannaarputit.’

Daavi naalikkamit qussuttoq

Saulip ernini naalappaa, neriorsuillunilu David ajoqusissanngikkini. David utertinneqarpoq, Saulilu illuani kiffartorfigeqqilerpaa siornatigutut. Ullulli ilaanni, David nipilersortillugu, Saulip David naalikkaminik naakkiaqqippaa. David qussuppoq, naaligarlu iikkamut kappuppoq. Tassa pingajussaa! Davidip paasivaa qimaasariaqarluni!

Unnuaq taanna David illuminut angerlarpoq. Saulili angutinik aallartitsivoq toqoqqullugu. Ataatami pilersaarutigisaa Mikalip nalunngilaa. Taava uini oqarfigaa: ’Unnuaru qimaanngikkuit aqagu toqusimassaatit.’ Unnuaq tamanna Mikalip David ikiorpaa igalaakkut qimaanissaanik. Ukiut arfineq-marluk missiliorlugit David sumi tamaani toqqortortuaannartariaqarpoq Saulimut nassaareqqunani.

1 Samuel 18:1-30; 19:1-18.