Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 56: Israelimi kunngi siulleq

Oqaluttuaq 56: Israelimi kunngi siulleq
Samuelip Sauli kunngitut tanikkaa

TAKUUK Samuelip angut niaquagut uuliamik kuigaa. Taamaalilluni takutinneqartarpoq inuk kunngitut qinigaasoq. Jehovap Samuel oqarfigisimavaa Saul niaquagut uuliamik kueqqullugu. Uuliaavoq immikkut ittoq tipigissoq. Taamaalioraangata oqartarput inuk taninneqartoq.

Saul kunngiunissaminut ajukkuppoq. ’Uanga Benjaminikkuuvunga, Israelimi ikinnerpaasut,’ Samuel oqarfigaa. ’Suna pillugu oqarpit uanga kunngiussasunga?’ Jehovap Saul iluaraa anneruniartuunngimmat pingaakujuttuunngimmallu. Tamanna pillugu Jehovap kunngitut qinerpaa.

Saulili angutaanngilaq piitsoq mikisorluunniit. Pisuunik ilaqutaqarpoq, pinneqalunilu angisuujuvoq. Israelikkunnit tamanit anneruvoq! Aamma Saul oqilasuujuvoq nukittuujullunilu. Inuit nuannaarput Jehovap taanna kunnginngortimmagu. Tamarmik nillerrapput: ’Kunngi inuummersorli!’

Israelikkut akeraat aatsaat taama pissaaneqartigilersimapput. Suli Israelikkunnik ajoqusiisaqaat. Saulip kunnginngortitaanerata kingunitsiannguagut Ammonip kinguaavisa sorsukkiartorpaat. Saulili sakkutoorpassuarnik katersuivoq Ammonillu kinguaavinut ajugaalluni. Inuillu nuannaarutigaat Saul kunngiummat.

Ukiut ingerlaneranni Saulip Israelikkunnut siulersortaalluni akeqqatik ajugaaffigeqattaartarpai. Saul sapiitsumik erneqarpoq Jonatanimik atilimmik. Jonatanilu ikiortaalluni Israelikkut akiuunnerpassuarni ajugaasarput. Israelikkut akeraasa suli filisterit ajornerpaartaraat. Ullut ilaanni filisterit tuusintilipparujussuit Israelikkunnut sorsukkiartorput.

Samuelip Saul oqarfigaa utaqqeqqulluni Jehovamut pilliissagami, imaluunniit tunissuteqassagami. Samuelili muluvoq. Filisterit saassussinissaat Saulip aarleqqutigaa, taamaattumik nammineerluni pilliivoq. Kiisami tikiukkami, Samuelip Saul oqarfigaa naalanngissimanerarlugu. ’Jehova inummik allamik Israelimut kunnginngortitsissaaq,’ Samuel oqarpoq.

Kingorna Saul naalanngeqqippoq. Taava Samuelip oqarfigaa: ’Jehovamut naalanneq savamik pitsaanerpaamik tunissuteqarnermit pitsaaneruvoq. Jehova naalannginnakku Jehovap Israelikkunnut kunngiujunnaarsissavaatit.’

Tamanna ilinniarfigilluarsinnaavarput. Paasitippaatigut Jehovamut naalanneq qanoq pingaartigisoq. Takutippaalu inuk ajunngitsoq, soorlu Saul, allanngorluni ajortunngorsinnaasoq. Uagut ajortunngorumanngilagut, ilaa?

1 Samuel kapitalit 9-miit 11 ilanngullugu; 13:5-14; 14:47-52; 15:1-35; 2 Samuel 1:23.