BIIBILIMI atuagaqarpoq Rutimik allakkanik taaguuteqartumik. Allakkat taakkua ilaqutariit ukiuni Israelimi eqqartuussisoqarfiusuni inuusut pillugit oqaluttuarput. Rut arnaavoq inuusuttoq Moabikkut nunaanneersoq; Guutip innuttaanut Israelikkunnut ilaanngilaq. Guutili ilumoortoq Jehova ilisarileramiuk Rutip assut asalerpaa. No’omi arnaavoq utoqqasaaq Rutimik Jehova pillugu ajoqersuussisoq.

No’omi Israelikkuuvoq. Uinilu erninilu marluk Moabikkut nunaannut nuussimapput Israelimi nerisassaaleqineqalermat. Taava ullut ilaanni No’omip uia toquvoq. Kingorna No’omip ernerisa arnat Moabikkuusut Rutimik Orpamillu ateqartut aappartaaraat. Ukiulli qulit qaangiummata No’omip erneri marluusut toqupput. No’omi ukuaalu aliasoqaat! No’omi qanoq iliorniassava?

No’omi aalajangerpoq ungasissumut aallassalluni nunaqqatiminut uterluni. Rutip Orpallu ilagiuarumavaat, taava ingerlaqatigilerpaat. Ingerlatsiareeramilli No’omip ukuani saaffigai oqarlunilu: ’Angerlamut uterniaritsi anaanasilu najorlugit.’

No’omip ukuani inuulluaqqullugit kunippai. Taava qialerput No’omi asaqigamikku. Oqarput: ’Naagga! Inuiaqatinnut ilagissavatsigit.’ No’omilli akivai: ’Uterniaritsi, panikka. Iluanaarnerussaasi angerlarussi.’ Taava Orpa uterluni aallarpoq. Rutili taamaaliunngilaq.

No’omip saaffigaa oqarluni: ’Orpa aallarpoq. Illittaaq uterniarit.’ Rutilli akivaa: ’Inassanngilarma qimaqqullutit! Najuinnarlakkit. Sumut aallaruit ilagissavakkit, sumilu najugaqaruit tassani najugaqassaanga. Inuiaqatitit inuiaqatigaakka, Guutillu Guutigaara. Sumi toquguit tassani toqussaanga, tassanilu ilineqassaanga.’ Rut taama oqarmat, No’omip angerlaqqujunnaarpaa.

Kiisami arnat taakku marluk Israelimut apuupput. Tamaanilu najugaqalerput. Rut ingerlaannaq narsami katersuilluni sulilerpoq katersuiffiummat. Angutip Boasimik atillip narsaatimini karrinik katersuisippaa. Boasip anaanaa nalunngiliuk? Tassaavoq Rahab Jerikomeersoq.

Ullut ilaanni Boasip Rut oqarfigaa: ’Tusarpakkit No’omimut qanoq ajunngisaartigisutit. Nalunngilakkit ataatat anaanallu nunaviillu qimakkitit aallarlutillu inuit siornagut ilisarisimanngisatit najulerlugit. Qanortoq Jehovap ajunngisaarfigilisit!’

Rutip akivaa: ’Inussiarnerfigeqaarma, naalagaq. Tuppalleqaanga taamatut oqaluffigigamma.’ Boasip Rut nuannareqaa, sivitsunngitsorlu katipput. No’omip tamanna pilluaatigeqaa! No’omili suli pilluarneruvoq Rut Boasilu ernertaaqqaarmata, Obedimik atilimmik. Obedip David erngutaraa, taannalu kingorna assut tusartassavarput.

Rut No’omilu

Biibilimi Rutimik allakkat.