ISRAELIKKUT ajornartorsiuleraangamik Jehova torlulaffigisarpaat. Jehovap akisarpai siulersuisunik sapiitsunik tunisarlugit ikioqqullugit. Biibilimi siulersuisut taakku taaneqartarput eqqartuussisunik. Eqqartuussisut Josua siullersaraat, kingornagullu eqqartuussisut ilaat tassaapput Otniel, Ehud Sjamgarilu. Israelikkunnilli ikiuisut ilaat marluk arnaapput Deboramik Jaelimillu atillit.

Debora Barakimut oqaluttoq

Debora pruffiitiuvoq arnaq. Jehovap pisussanik ilisimatittarpaa, taassumalu inuit Jehovap oqaasiinik oqaluttuuttarpai. Aamma Debora eqqartuussisuuvoq. Nunami qattunertuumi palmip aalajangersimasup ataani ineqarpoq, inuillu ornittarpaat ajornartorsiornerminni ikioqqullutik.

Taamanikkut Jabin Kana’animi kunngiuvoq. 900-nik qamussuaateqarpoq sorsuutinik. Sakkutooqatigiivi ima pissaaneqartigaat Israelikkut ilarpassuinik pinngitsaaliillutik Jabinimut kiffanngortitsisimallutik. Kunngip Jabinip sakkutuuisa naalagaraat Si′sera.

Ullut ilaanni Deborap eqqartuussisoq Barak aggeqquaa oqarfigalugulu: ’Jehova oqarpoq: "Angutit 10.000-it ilaseralugit Taborip qaqqaanukarit. Tassani Si′sera ilinnukartikkumaarpara. Taassumunngalu sakkutoorpassuinullu ajugaatikkumaarpakkit.“’

Barakip Debora oqarfigaa: ’Aallassaanga aappariumagumma.’ Deborap aapparaa, Barakili oqarfigalugo: ’Ajugaanissaq illit nersornaatigissanngilat, Jehovap Si′sera arnap assaanut tunniussammagu.’ Taamalu pivoq.

Barak Taborip qaqqaanit aterpoq Si′serap sakkutuui naapikkiartorlugit. Tassanngaannaq Jehova qarsutsineqartitsilerpoq, sakkutuullu akeraasut ilarpassui ipipput, Si′serali qamussuarminit niuvoq qimaallunilu.

Baraki, Jaeli, Siseralu

Kingornatigut Si′sera Jaelip toqqanut tikiuppoq. Iseqquaa, immummillu immillugu. Tamanna uernalissutigaa, erniinnarlu itisuumik sinilerpoq. Taava Jael toqqup paagutaanik tigusivoq angutillu ajortup niaquanut kappullugu. Kingorna, Barak tikiummat, Si′sera toqungasoq takutippaa! Takusinnaavat Deborap oqaasia eqquuttoq.

Taava kunngi Jabin aamma toqutaavoq, Israelikkullu eqqissigallarput.

Eqqartuussisut 2:14-22; 4:1-24; 5:1-31.