SIUTITUUMIK oqaluttumik tusarnikuuit? Immaqa oqassaatit: ’Naagga. Uumasut oqalussinnaanngillat.’ Biibilimi siutitooq oqaluttoq oqaluttuarineqarpoq. Qanoq pisimasoq tusariartigu.

Inngili

Israelikkut Kana’anip nunaanut isertussanngulerput. Balakip, Moabip kunngiata, Israelikkut qunugai. Taamaattumik angut peqqusersooq Bileamimik atilik qaaqquaa Israelikkut perloqqujartoqqullugit. Balak neriorsuivoq Bileam aningaasarpassuarnik tuniumaarlugu, taamaammat Bileam siutituujutiminut qaqivoq Balak ornillugu.

Jehovap Bileam innuttaminik perloqquseqqunngilaa. Taamaattumik inngili takisuumik panalik aallartippaa aqqusinermut qeqariartoqqullugu Bileam unitsikkumallugu. Bileamip inngili takusinnaanngilaa, siutituulli takusinnaavaa. Taamaattumik siutituup inngili saneqqunniartuaraluarpaa, kiisalu aqqusinermut aqupilluni. Bileam kamaqaaq, siutituujutinilu ajaappissaminik unatarlugu.

Taava Bileam siutituujutimi oqaluukkaani Jehovap tusartippaa. ’Sugakkit taama unatarpinga?’ siutituup aperaa.

Bileam siutituumiittoq

’Qinngasaaramma,’ Bileam oqarpoq. ’Panamik tigumiaqaraluaruma toqoqqajaqaakkit!’

’Taamaaliorfigisarakkit?’ siutituup aperaa.

’Naagga,’ Bileam akivoq.

Taava Jehovap Bileam inngilimik panalimmik aqqusinermi qeqartumik takusinnaalersippaa. Inngili oqarpoq: ’Sooq siutituutit unatarpiuk? Maanngarpunga unitsinniarlutit, Israelikkunnik perloqqusiartussannginnavit. Siutituujutit uniinnanngitsuuppat, kapisimassagaluarpakkit toqullutit, siutituujutilli uumatillugu.’

Bileam oqarpoq: ’Ajortuliorpunga. Sianiginnginnakku aqqusinermi qeqartutit.’ Bileam ingerlanissaanik inngilip akueraa, Balakilu ornippaa. Israelikkut perloqquniaraluarpai, Jehovalli Israelikkut pingasoriarluni pilluaqqutippai.

4 Moses 21:21-35; 22:1-40; 23:1-30; 24:1-25.