INUIT nunamit sunik katersuisut takusinnaavigit? Katersugaat kanernertut ipput. Qaqortuupput saattukujuujullutillu. Kanernerunngillalli; nerisassaapput.

Israelikkut mannanik katersuisut

Qaammat ataasiinnangajak qaangiuppoq Israelikkut Egyptenimit aallarneranniit. Maanna puilasuitsumiipput. Naasut nerineqarsinnaasut amerlanngitsuinnaat tassani naasarput, taava inuit naammagittaalliorput oqarlutik: ’Uffa Jehovap Egyptenimi toqussimagunisigut. Tassanimi nerisassaqartarpugut naammattunik.’

Taava Jehova oqarpoq: ’Nerisassanik qilammit nakkaatitsiumaarpunga.’ Jehovalu taamaaliorpoq. Aqaguani ullaakkut qaqortut nunap qaavaniittut takuleramikkik Israelikkut imminnut apersuupput: ’Suut-uku?’

Moses oqarpoq: ’Tassaapput nerisassat Jehovap ilissinnut tunniussai.’ Inuit taavaat MANNA-nik. Igutsaat tungusunnitsuutaannit kaagiliatut mamassuseqakannerput.

’Tamassi immikkut nerisassasi naammatsillugit katersussavasi,’ Mosesip inuit oqarfigai. Taava ullaat tamaasa taamaaliortarput. Seqinerli kiatsileraangat mannat suli nunamiittut aattarput.

Moses oqarportaaq: ’Mannanik aqagussamut toqqorsisoqartassanngilaq.’ Inuilli ilaasa naalanngilaat. Qanoq pisoqartoq nalunngiliuk? Aqaguani mannat toqqugaat quperlorsimapput tipittorsuanngorsimallutillu!

Sapaatilli akunnerata ulluisa ilaanni mannanik marloriaammik katersuisassasut Jehovap oqarfigai. Tassa ullut arfernanni. Jehovalu oqarpoq ilaat aqagussamut toqqoqqullugit, ullut arfineq-aappaanni mannanik siallersitsiniannginnami. Mannat ullut arfineq-aappaannut toqqugaat quperloqaratillu tippanneq ajorput! Aamma tamanna tupinnartuliorneruvoq!

Ukiut Israelikkut puilasuitsumiiffii naallugit Jehovap mannanik nerisassaqartittarpai.

2 Moses 16:1-36; 4 Moses 11:7-9; Josva 5:10-12.