ASSILISSAT takoriakkit. Tamarmik immikkut takutippaat perluit Jehovap Egyptenimut nalliutitai. Assilissami siullermi takusinnaavat Niilip kuussua Aronip ajaappissaminik anaagaa. Taamaaliormat kuussuup ernga aanngorpoq. Aalisakkat toqupput kuussuarlu tipittorsuanngorpoq.

Egyptenimiut perluit naalliuutigaat

Taava naratsit Niilip kuussuanit Jehovap qaqitippai. Sumi tamaaniilerput — iffiorfinni, igani, inuit siniffiini — sumiluunniit. Naratsit toqummata Egyptenimiut katersorpaat qaleriissarsuakkuutaarlugit, nunallu tipittorsuannguutigai.

Taava Aronip nuna ajaappissaminik anaavaa, nunallu pujoralai ippernanngorput. Ippernat Egyptenimi perluit pingajussaraat.

Perluit sinneri Egyptenimiut kisimik naalliuutigaat, Israelikkut naalliuutiginngilaat. Perluit sisamassaraat niviugassuit Egyptenimiut illuinut tamanut isaasut. Perluit tallimassaat uumasunik eqquivoq. Egyptenimiut nersutaataasa savaataasalu savaasaataasalu ilarpassui toqupput.

Taava Moses Aronilu arsakunik tigusipput silaannarmullu nalullugit. Tamakkua inuit uumasullu ajualissuanngortippaat. Tamanna perluit arfinileraat.

Tamatuma kingornagut Mosesip assani qilammut isatsippaa, Jehovalu kallertitsillunilu nataqqornartitsivoq. Egyptenimi aatsaat taama ingasatsigisumik nataqqornarpoq.

Perluit arfineq-pingajussaraat pillertat ujamerissat. Pillertanik taama amerlatigisunik takusoqarsimanngisaannarlunilu takusoqaqqinngisaannarpoq. Nataqqornat aserunngisaat tamaasa pillertat nerivaat.

Perluit qulingiluassaraat taarneq. Ullut pingasut nuna tamarmi taartorsuuvoq, Israelikkulli najugaanni qaamavoq.

Naggataatigut Guutip innuttani oqarfigai savaasaaqqap savaaqqalluunniit aava matserfinnut tarnuteqqullugu. Taava Guutip inngiliata Egypten aqqusaarpaa. Aak takugaangamiuk inngili illumi tassani toqutsineq ajorpoq. Illunili matserfii aattaqanngitsuni tamani Guutip inngiliata inuit uumasullu angajulliliaat toquttarpai. Tamanna tassaavoq perluit qulingat.

Perluit kingullersaat pereermat Faraop Israelikkut aallaqquai. Guutip innuttai aallarnissaminnut piareersimapput, unnuarlu tamannarpiaq Egyptenimit aallakaapput.

2 Moses kapitalit 7-imiit 12 ilanngullugu.