Imarisai

Imai

Jehovap Nalunaajaasui

Oqaatsit toqqakkit Kalaallisut

Oqaluttuaq 30: Orpigaq ikumasoq

Oqaluttuaq 30: Orpigaq ikumasoq

MOSES allaat Horebip qaqqaa tikillugu savanut paarisaminut ivigassarsiorluni angalavoq. Tassani takuaa orpigaq ikumasoq nungukkiartoranili!

Mosesi orpikkap ikumasup eqqaaniittoq

’Eqqumiissusia,’ Moses eqqarsarpoq. ’Orneriarlara takulluarniarlugu.’ Ornilermagu nipi orpikkamit tutsiuppoq, oqartoq: ’Qanilleqinak. Aloqutitit piikkit, nuna illernartoq qeqarfigigakku.’ Inngili aqqutigalugu Guuti oqaluppoq, taamaattumik Mosesip kiinnani ulippaa.

Taava Guuti oqarpoq: ’Innuttama Egyptenimi naalliussusiat takuara. Taamaattumik aniguisikkumaarpakka, illillu aallartissavakkit innuttakka Egyptenimit aniseqqullugit.’ Jehovap innuttani Kana’anip nunaanut alianaatsumut ingerlanniarpai, tamaani najugaqassammata.

Mosesili oqarpoq: ’Uanga pingaartuunngilanga. Qanoq ilillunga taamaaliorsinnaassaanga? Taamaalioraluarumalu Israelikkut oqarfigissavaannga: "Kia aallartippaatit?“ Qanoq taava oqassaanga?’

’Ima oqassaatit,’ Guutip akivaa, ’"JEHOVAP, Abrahamip Guutiata, Isakip Guutiata Jakobillu Guutiata, ilissinnut aallartippaanga.“’ Jehovalu nangilluni oqarpoq: ’Tassa atera naassaanngitsumik.’

’Oqarumali illit aallartikkimma upperissanngippannga, qanoq iliussaanga?’ Mosesip oqarfigaa.

’Sunaana tigumiarpiuk?’ Guutip aperaa.

Mosesip akivaa: ’Ajaappiaq.’

’Nunamut naluguk,’ Guuti oqarpoq. Mosesilu taamaaliormat ajaappiaq pulateriaarsunngorpoq. Taava Jehovap Moses tupinnartuliamik allamik takutippaa. Oqarpoq: ’Assat saannut manguguk.’ Moses taamaaliorpoq, assanilu amoqqikkamiuk takuaa aputitut qaqortigisoq! Assaa pupissutut isikkoqarpoq. Taava Jehovap Moses pissaanilerpaa pingajussaanik tupinnartuliornissaanik. Kiisalu oqarpoq: ’Taama ittunik tupinnartulioruit Israelikkut upperissavaatsit uanga aallartikkikkit.’

Taava Moses angerlarpoq, Jetrolu oqarfigaa: ’Nunaqqatinnut Egyptenimiittunut aallarlanga qanoq ingerlanersut takusassagakkit.’ Taava Jetrop Moses inuulluaqquaa, Mosesilu Egyptenimut aallarpoq.

2 Moses 3:1-22; 4:1-20.