JOSEFIP paaserusuppaa angajuni qulit suli misigittaatsuunersut uummataallu manngernersut. Taava oqarfigai: ’Kilitsissiaavusi. Nunatta saassukkuminarneruffii paasiniarlugit aggerpusi.’

’Naagga, taamaanngilaq,’ oqarput. ’Angutaavugut peqqusersuitsut. Qatanngutigiippugut. Aqqaneq-marluugaluarpugut. Ilarpulli ataaseq toqunikuuvoq, nukarlerlu ataatatsinniippoq.’

Josefip upperinngitsuusaarpai. Ilaat Simeonimik atilik parnaarussaatippaa, ilaalu nerisassanik tunivai angerlartillugillu. Oqarfigaali: ’Uterussi, nukarlersarsi nassassavarsi.’

Kana’anip nunaanut apuukkamik qatanngutigiit ataatartik Jakob pisimasunik tamanik oqaluttuuppaat. Jakob aliasoqaaq. ’Josef peerutereerpoq,’ torlulavoq, ’Maannalu Simeon peqanngilaq. Ernera nukarleq Benjamin tigussanngilarsi.’ Nerisassaatitilli nungulermata Jakobip akuerisariaqalerpai Benjamin ilagalugu Egyptenimukarnissaannik nerisassanik peqqissinnaaqqullutik.

Josefip qatanngutini aggersut takuai. Nuannaaqaaq nukkani Benjamin takullugu. Soorunami arlaannaataluunniit naluaa angut pingaartoq taanna Josefiusoq. Josef iliuuseqalerpoq qatanngutini qulit misilinniarlugit.

Kiffani peqquai puui nerisassanik immeqqullugit. Naalli nalugaluaraat, imertarfiutini siilviusoq Benjaminip puuanut ilineqartippaa. Tamarmik aallareermata sulili ungasissumut pinatik, Josefip kiffaminut aatippai. Angugamikkik kiffat oqarfigaat: ’Sooq naalakkatta imertarfiutaa siilviusoq tillippisiuk?’

’Imertarfiutaa tillinngilarput,’ qatanngutigiit oqarput. ’Ilatsinni imertarfik nassaarissagussiuk, inuk taanna toqunneqarli.’

Taava kiffat puut tamaasa ujarlerfigaat, imertarfillu nassaaraat Benjaminip puuani, soorlu assilissami takusinnaagit. Kiffat oqarput: ’Ilissi aallarsinnaavusi, Benjaminilli ilagissavaatigut.’ Qatanngutai quliusut qanoq iliussanerpat?

Tamarmik Benjamin ilagalugu Josefip illuanut uterput. Josefip qatanngutini oqarfigai: ’Tamassi angerlarsinnaavusi, Benjaminili tamaaniiginnassaaq inussiaatigilissagakku.’

Juda oqalulerpoq: ’Nukappiaraq nassarnagu angerlaraluaruma ataataga toqussaaq, asaqigamiummi. Uanga inussiaatigiliinnannga, nukappiararlu angerlartiinnarlugu.’

Josefip paasivaa qatanngutini allanngorsimasut. Misigittaatsuujunnaarsimapput uummataallu manngerunnaarlutik. Josefip qanoq iliuuseqarnissaa takoriartigu.

1 Moses 42:9-38; 43:1-34; 44:1-34.

Josefip qatanngutai unnerluutigineqartut