Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 16: Isak nuliarluartoq

Oqaluttuaq 16: Isak nuliarluartoq

ARNAQ assilissamiittoq kinaasoq nalunngiliuk? Rebekkamik ateqarpoq. Angullu ornitaa tassaavoq Isak. Isakip nuliassaraa. Tamanna qanoq pisimava?

Isakip angutaata ernini ajunngitsumik nuliartaartikkumavaa. Kana’anip nunaata arnartaasa ilaannik nuliaqqunngilaa, Kana’animiut guutipilussiortuummata. Taava Abrahamip kiffani qaaqquaa oqarfigalugulu: ’Eqqarlima najugaannut Karanimut aallarit erneralu Isak nuliarsartillugu.’

Erniinnaq Abrahamip kiffaata qatigattuut qulit tiguai ungasissumullu aallarluni. Nuna Abrahamip eqqarliisa najugaat qanilligamiuk puilasuliap eqqaanut unippoq. Ualingaatsiarpoq, taamaalineranilu arnat illoqarfimmeersut puilasuliamut imertartarput. Taava Abrahamip kiffaa Jehovamut qinuvoq: ’Arnaq uannut immitsisoq qatigattuunillu imertitsisoq taannaagili Isakip nuliassaa.’

Rebekkap Isak ornikkaa

Sivitsunngitsoq Rebekka imertarluni takkuppoq. Kiffap qinnuigimmani immiseqqulluni, immippaa. Taava aamma qatigattuut imerusoqisut tamaasa imertippai. Tamanna assoroornarpoq qatigattuut imernikkaaqimmata.

Rebekka inermat Abrahamip kiffaata aperaa ataataa qanoq ateqarnersoq. Aamma aperaa angerlarsimaffianni unnuisinnaanerluni. Oqarpoq: ’Ataataga Betuelimik ateqarpoq, uagutsinnilu unnuisinnaavutit.’ Abrahamip kiffaata nalunngilaa Abrahamip qatanngutaata Nakorip Betuel ernerigaa. Taamaattumik seeqqummerpoq Jehovalu qutsavigalugu Abrahamip eqqarliinut ingerlatimmani.

Unnummat Abrahamip kiffaata Betuel Rebekkallu qatanngutaa Laban oqaluttuuppai suna siunertaralugu tikilluni. Akuersipput Rebekkap aallaqatigissagaa Isakilu uigilerlugu. Rebekka aperineqarami qanoq oqarpa? Akuersivoq; aallaqatigiumavaa. Taava aqaguani qatigattuunut qaqipput Kana’anillu nunaanut angalanissaq sivisooq aallartillugu.

Unnuakkut apuupput. Rebekkap angut narsami angalaartoq takuaa. Tassaana Isak. Rebekka takugamiuk Isak nuannaalerpoq. Anaanaa Sara ukiut pingasut tamanna sioqqullugu toqusimavoq, tamannalu suli aliasuutigaa. Isakilli Rebekka asasorujussuanngorpaa, nuannaaqqilerporlu.

1 Moses 24:1-67.