Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 14: Guutip Abraham misilikkaa

Oqaluttuaq 14: Guutip Abraham misilikkaa

ABRAHAM uani qanoq iliulersoq takusinnaaviuk? Saveqarpoq, soorlulu ernini toqunniaraa. Sooruna? Siullermik Abraham Saralu qanoq ilillutik ernertaartut paasiniariartigu.

Abrahamip Isak pilliutigigaa

Eqqaamajuk Guutip neriorsorai ernertaarumaartut. Tamannali ajornartutut ikkaluarpoq Abraham Saralu utoqqaaqimmata. Abrahamilli upperaa ajornartutut ikkaluartut Guutip sapinngikkai. Taava qanoq pisoqarpa?

Guuti neriorsuereermat, ukioq ataaseq ingerlavoq. Taava Abraham 100-nik ukioqarluni Saralu 90-inik ukioqarluni, ernertaarput Isakimillu atserlugu. Guutip neriorsuutini eqqortippaa!

Isakili inersimasunngulermat Abrahamip uppernera Jehovap misilippaa. Torlorfigaa: ’Abrahamiaa!’ Abrahamillu akivaa: ’Maaniippunga!’ Taava Guutip oqarfigaa: ’Ernerit tiguuk, ernituat, Isak, aallarlutillu qaqqamut ilinnut takutitassannut. Tassani ernerit toqussavat pilliutitullu pilliutigalugu.’

Abrahamip ernini asaqigamiuk oqaatsit taakku aliatsaatigeqai. Eqqaamassavallu Guuti neriorsuisimasoq Abrahamip qitornai Kana’anip nunaani najugaqalerumaartut. Tamannali qanoq pisinnaava Isak toquppat? Abrahamip paasinngilaa, taamaattorli Guuti naalappaa.

Qaqqamut pigami, Abrahamip Isak qilersorpaa pilliivimmullu sanaaminut ilillugu. Taava savik tiguaa ernini toqunniarlugu. Toqunnialeraali Guutip inngiliata torlorfigaa: ’Abraham! Abrahamiaa!’ Abrahamillu akivaa: ’Maaniippunga!’

’Nukappiaraq sunnguamilluunniit ajoqusissanngilat,’ Guuti oqarpoq. ’Maanna ilisimalerpara upperfigigamma, erninnik, ernituannik, erliguutinnginnamma.’

Abrahamip Guutimut uppernerata angissusia! Upperaa Jehovamut ajornartoqanngitsoq, allaallu Jehovap Isak toqusunit makitissinnaagaa. Guutilli siunertarinngilaa Abrahamip Isak toqussagaa. Taamaattumik Guutip sava orpikkanut eqqaaniittunut naatitippaa, Abrahamilu oqarfigaa taanna pilliutigissagaa ernerminut taarsiullugu.

1 Moses 21:1-7; 22:1-18.