Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 8: Nunami inorujussuit

Oqaluttuaq 8: Nunami inorujussuit

TAKORLOORUK angut angingaarami qilaamut aporsinnaasoq naapissallugu! Qanoq eqqarsassagaluarpit? Kakkaak angimmat! Qanga ilumut nunami inorujussuaqarsimavoq. Biibilimi oqaatigineqarpoq inngilit qilammit nunamut pisimasut taakkua ataatagigaat. Tamanna qanoq pisimava?

Inorujussuit nakuusertut

Eqqaamassavat inngilipiluk Satan tamatigut eqqissiviilliortitsisartoq. Guutip inngilii allaat tammartinniarpai. Taava inngilit ilaasa Satan naalalerpaat. Guutip qilammi imminnut suliareqqusai suliarisarunnaarpaat. Nunamut aqqarput, allanngorlutillu inunngorput. Suna pillugu taamaaliornerpat?

Biibili oqaluttuarpoq Guutip ernerisa arnat kusanartut nunamiittut takuleramikkik inooqatigiumalleraat. Taamaattumik nunamut aqqarput arnallu aappartaaralugit. Tamanna iluanngilaq, Guutimmi inngilit qilammiittussanngorlugit pinngortippai.

Inngilit nuliaallu qitornaqalerput nalinginnaanngitsunik. Inunngoramik immaqa allaassuteqanngillat. Alliartortuarpulli. Annerujartuinnarput nukittoriartuinnarlutillu. Kiisa inorujussuanngorput.

Inorujussuit taakku ajortuupput. Taamatullu angitigigamik nukeqartigalutillu inunnik assut ajoqusiisinnaasarput. Ajortumik pinninniaannanngillat. Aammattaarli inuit allat pinngitsaaliniartarpaat immissut ajortigisunngortinniarlugit.

Enok toqusimavoq, sulili nunami ataatsimik ajunngitsumik inoqarpoq. Tassaavoq Noa. Taassuma Guutip imminut naammasseqqusai naammassiuaannarpai. Taamaattumik Guutip iluaraa.

Ullut ilaanni Guutip Noa oqarfigaa inuit iluaatsut tamaasa piuneeruttariaqalerini. Guutilli Noa, ilaqutai uumasullu ilarpassui annaakkumavai. Maanna tusassavat qanoq ililluni taamaaliorumaartoq.

1 Moses 6:1-8; Jûtarse 6.