Imarisai

Saqqaata tullia

Imai

Jehovap Nalunaajaasui

Kalaallisut

Asasamik toqusoqaraangat

Aliasunnera qanoq nammassinnaavara?

Aliasunnera qanoq nammassinnaavara?

„MISIGIS­SUTSIK­KA nunusariaqarlugit as­sut misigisimavunga,“ Mike ataatami toqunera eq­qarsaatigalugu taama oqar­poq. Isumaqarsimavoq nunuguni anguter­palus­sutsi takutis­sal­lugu, kingor­nali paasivaa kuk­kusimal­luni. Taamaat­tumik ikin­ngum­mi aatani an­naam­magu qanoq siun­nersus­sal­lugu Mikep qularutigisiman­ngilaa. Mike oqalut­tuar­poq: „Ukiut marlus­suit matuma sior­natiguusuup­pat tuiatigut pat­talaarlugu oqarfigisimas­sagaluar­para: ’Angutitut pigit.’ Taliatigul­li at­torlugu oqarfigaara: ’Misigis­sutsitit nunus­san­ngilatit. Nunun­ngik­kuk­kit qaangiaar­nerus­savat. Aneq­qugum­ma anis­saanga, maaniigin­naq­qugum­malu maaniigin­nas­saanga. Misigis­sutsivil­li ersersin­nis­saat ersis­sutigis­san­ngilat.’“

Aam­ma MaryAnne, uiminik an­naasaqarsimasoq, misigisimasimavoq misigis­sutsini nunusariaqarlugit. „Al­lanut maligas­saal­luar­niangaarama al­laat misigis­sutsima pis­susis­samisoor­tut ersersin­nis­saan­nut im­minut nangar­tarsimavunga,“ nas­suiaavoq. „Naggataatigul­li paasiler­para nakuusutut takutin­niarsarinera iluaqutiginagu. Pis­sutsit atuk­kak­ka eq­qarsaatigeq­qis­saar­pak­ka im­minul­lu oqarfigalunga: ’Pisariaqar­tik­kuk­ku qianiarit. Nakuuniarsariun­naar­niarit. Misigis­sutsitit nununagit aniatin­niak­kit.’“

Tas­sa Mike MaryAnnelu tamarmik ima siun­nersuip­put: Aliasunnerit nunoqinagu! Ilumoor­pul­lu. Sooq? Misigis­sutsit anias­sap­pata aliasun­neq pisariaqarmat. Misigis­sutsinik aniatitsineq tatineqar­nermik oqilisitsisin­naavoq. Misigis­sutsinik ersersitsinerit pis­susis­samisoor­tut paasin­nin­nermik eq­qor­tumil­lu ilisiman­nin­nermik ilaqar­pata, misigis­sutsit eq­qor­tumik isigineqarsin­naas­sap­put.

Soorunami kik­kut tamarmik aliasun­nermin­nik as­sigiim­mik ersersitsineq ajor­put. Pis­sutsil­lu as­sigiin­ngitsut, soorlu tas­san­ngaan­nar­tumik imaluun­niit sivisuumik nap­parsimareer­nermi toqusimaneq, qimagaasup misigis­sutsik­kut qisuariar­neranut sun­niuteqarsin­naap­put. Ataaserli qular­nan­ngilaq: Misigis­sutsinik nununeq timik­kut misigis­sutsik­kul­lu ajoqutaasin­naavoq. Aliasun­nerup aniatin­nis­saa peq­qin­nar­neroqaaq. Qanorli ilil­luni taamaalior­toqarsin­naava? Biibilimi atoriaan­naasunik siun­nersuuteqar­poq.

Aliasunneq qanoq ililluni aniatinneqarsinnaava?

Oqaluuserissallugu oqilial­lan­narsin­naavoq. Itsaq ataataaner­paap Jobip meeq­qani qulit tamaasa an­naagamigit alianar­tunil­lu al­lanik inut­tut eq­qugaagami kingor­na ima oqarsimavoq: „Inuunera qatsuteqaara. Maan­na naam­magit­taal­liuutik­ka nununagit aniatis­savak­ka tar­nik­kut narrujuum­misimas­sutik­ka  tamak­kerlugit oqaatiginiarak­kit.“ (Job 1:2, 18, 19; 10:1) Jobip isumakuluutini nunusin­naajun­naarsimavai. Aniatin­nis­saat pisariaqar­tilersimavaa; ’oqaatigisariaqarsimavai’. Tuluk isigin­naar­titsis­susior­tar­toq Shakespeare isigin­naar­titsis­susiamini Macbeth-imi ima al­las­simavoq: „An­niaatit oqaaser­taleruk. Aliasun­nermi oqaaser­taler­neqan­ngip­pat uum­mat ulik­kaarluin­nas­saaq qar­torar­toorlunilu.“

Aap, ikin­ngum­mut naam­magit­tarluni misigin­neqataal­lunilu tusar­naarumasumut misigis­sutsinik oqalut­tuarin­nin­neq aliasun­nermik oqilisitsisin­naavoq. (Us­satit 17:17) Misigis­sutsinik misigisimasanil­lu oqaaser­talersuineq tamak­kunin­nga paasin­nin­nis­samik sanarfin­nin­nis­samil­lu amerlasuutigut oqilisitsisar­poq. Ikin­ngutivil­lu asasaminik an­naasaqareersimaguni qaangersimal­lugulu al­laat atoriaan­naasunik siun­nersorsin­naavaatit qanoq ilil­lutit pis­sutsit pitsaaner­paamik nam­mas­sin­naagitit. Anaanaq meeq­qaminik an­naasaqarsimasoq oqalut­tuar­poq ar­namik al­lamik taamatut misigisaqarsimasumik oqaloqatigin­nin­neq iluaqutaasoq: „Nukit­tual­lan­naqaaq paasil­lugu al­la uat­tul­li misigisaqarsimasoq ajoqutis­sarsinanilu qaangersimal­lugu, inuunerminilu ingerlal­luaq­qilersimal­luni.“

Biibilimi assersuutit takutippaat misigissutsinik allattuineq aliasunnermik ersersitsinissamut iluaqutaasinnaasoq

Taavami misigis­sutsit oqaluuserinis­saat nuan­narin­ngik­kaan­ni? Saulip Jonathanil­lu toqunerata kingor­na David up­pum­mik erinarsuusiorsimavoq aliasun­nini ersersil­lugu. Up­put taman­na pif­fis­sap ingerlanerani Biibilimut ilaalersimavoq nas­saas­saal­lunilu Samuelimik al­lak­kat aap­paan­ni. (2 Samuel 1:17-27; 2 Israelik­kut 35:25) Ilaasa misigis­sutsitik al­lal­lugit aniatik­kuminar­tin­nerusar­paat. Uil­lar­neq oqalut­tuar­poq qanoq misiginini al­las­simal­lugu ul­lualuil­lu qaangium­mata atuarsimal­lugit. Paasisimavaa aliasun­nerminik sanarfiiniar­nermini iluaqutigalugu.

Misigis­sutsinik aniatitsineq, oqaloqatigiis­sutiginerisigut al­lat­tor­nerisigul­luun­niit, aliasun­nermik oqilisitsisin­naavoq. Aam­ma paatsoor­ner­nik piiaaqataasin­naavoq. Anaanaq meeq­qaminik an­naasaqarsimasoq oqalut­tuar­poq: „Uigalu tusar­par­put aap­pariit meeq­qamin­nik an­naasaqareerlutik avis­simasut, uagul­lu kis­saatigin­ngilar­put taamatut pinis­sar­put. Taamaat­tumik kamaam­meraangat­ta aap­par­pul­lu pisimasumut pisuutik­kusuum­meraangatsigu tamatigut oqaloqatigiit­tar­pugut. Isumaqar­punga taamaalil­luta im­mitsin­nut qanit­tuararsuan­ngorluta.“ Misigis­sutsit oqaloqatigiis­sutigisaraan­ni paasinarsis­saaq naak as­sigiim­mik an­naasaqarsimagaluarluni im­maqa aap­paq al­laanerusumik aliasut­toq.

Aliasun­nermik oqilisitsisin­naasoq al­la tas­sa qianeq. Biibilimi oqaatigineqar­poq ’qiaf­fis­saqar­toq’. (Nalunaajaasup oqaasii 3:1, 4) Asasamik toqusoor­neq qiaf­fis­saasar­poq. Sor­pas­suit takutitsip­put aliasul­luni qianeq aliasun­nerup qaangeriar­tor­nis­saanut pingaar­torujus­suusoq.

Ar­naq inuusut­toq oqalut­tuar­poq anaanani toqum­mat ikin­ngutimi ar­nap qanoq ilil­luni ikiorsimagaani: „Ikin­ngutima najor­tuaan­nar­paanga. Qiaqatigisar­paanga. Oqaloqatigisar­paanga. Am­mal­luin­narlunga misigis­sutsin­nik oqalut­tuut­tarsin­naasimavara, taman­nalu uan­nut pingaar­torujus­suuvoq. Qianis­sara kan­ngusuutigisariaqarsiman­ngilara.“ (Takuuk Rûmamiut 12:15.)  Tas­sa qianis­saq kan­ngugisariaqan­ngilaq. Soorlu takoreerip­put Biibilimi as­sersuutis­sar­pas­suaqar­poq angutit ar­nal­lu — aam­ma Jesus Kristusip — aliasun­nermin­ni kan­ngusun­natik qiasimanerinik. — 1 Moses 50:3; 2 Samuel 1:11, 12; Juánase 11:33, 35.

Aliasuttut kulturinit tamaneersut tuppallersarneqarneq qujamasuutigisarpaat

Im­maqa pif­fis­sap aalajangersimasup iluani misigis­sutsitit siumut ilisimajuminaat­tar­put. Ilimagin­ngil­luin­narlugu qis­sasersin­naavutit. Uil­lar­neq pisiniar­til­luni (uini pisiniariar­toqatigikulasarsimagamiuk) tas­san­ngaan­naq qis­saser­tarsimavoq, ingam­mik uimi mamaril­luagai ileq­qumisut tiguleraangamigit. Im­minut naam­magit­tarfiginiarit. Misigis­san­ngilatit qul­litit nunusariaqarlugit. Tamak­ku aliasun­nermut ilaap­put pis­susis­samisoor­tut pisariaqar­tul­lu.

Imminut pisuutinnerit akioruk

Soorlu siuliini eq­qaaneqareersoq asasamin­nik an­naasaqar­tut ilaat im­minut pisuutin­nermik ar­torsar­tin­neqar­tar­put. Itsaq Jakob aalajaatsoq taamatut misigisimasimas­saaq sal­loqit­tar­neqarluni up­pilersin­neqarami er­nini Josef ’nersum­mit qaasut­tumit’ toqun­neqarsimasoq. Tas­sami nam­mineq Josef aal­lar­tis­simavaa qatan­ngutaanik takusaajar­tor­til­lugu. Taamaat­tumik im­minut avoq­qaarisimas­saaq, im­maqalu eq­qarsarluni: ’Soormiuna Josef kisiat aal­lar­tik­kiga? Sooq aam­ma qaasut­tunik nersuter­pas­sualim­mut aal­lar­tip­para?’ — 1 Moses 37:33-35.

Im­maqa misigaatit arlaatigut sumigin­naanerit toqusoor­nin­nut pisooqataasimasoq. Paasiguk­kuli im­minut pisuutin­neq — pis­sutis­saqaraan­ni pis­sutis­saqan­ngik­kaluaraan­niluun­niit — aliasun­nermut qisuariar­nerusoq pis­susis­samisoor­toq, iluaqutigis­savat. Aam­ma tamatumani misigis­sutsit taama it­tut kisimi pigisariaqan­ngil­lat. Im­minut pisuutit­tutut misiginerup aam­ma al­lanut oqalut­tuarinis­saa pisariaqarsin­naasar­poq.

Pingaaruteqar­porli paasis­sal­lugu qanorluun­niit al­lat asatigigaluarutsigik inuunerat aqus­sin­naan­ngin­natsigu, aam­malu asasavut ’periarfis­sanut nalaatsor­ner­nul­lu’ ser­nis­sorsin­naan­ngik­kivut. (Nalunaajaasup oqaasii 9:11) Aam­mami ajor­tumik isumaqan­ngilatit. As­sersuutigalugu qanigisat siusin­nerusuk­kut nakorsiar­tis­siman­ngin­nak­ku imaap­pa nap­parsimaler­nis­saa toqunis­saaluun­niit kis­saatigisimagit? Soorunami naamik! Taava toquneranut il­lit pisuuit? Naamik.

 Anaanap panim­mi biilimik ajunaar­nerata kingor­na im­minut pisuutin­nermi ajugaaf­figinis­saa ilik­karsimavaa. Oqalut­tuar­poq: „Aal­lar­tis­simagak­ku im­minut avoq­qaarivunga. Kisian­ni paasiar­tuler­para taamatut misiginis­saq isumaqan­ngil­luin­nar­toq. Kuk­kunerun­ngilarmi ataataa ilagitil­lugu pisas­saqar­til­lugu aal­lar­tis­sal­lugu. Pisimasoq alianaqaaq, nalaatsor­nerin­narluin­nak­kul­li pivoq.“

’Oqaatigisimasariaqaraluak­kak­kali iliuuserisimasariaqaraluak­kak­kalu amerlaqaat,’ im­maqa oqarumas­saatit. Im­maqa taman­na ilumooraluar­poq, kisian­ni arlar­put kina oqarsin­naava ataatatut, anaanatut, er­ner­tut panit­tul­luun­niit kuk­kus­suteqan­ngivis­simal­luni? Biibilimi ilumoor­tumik matumin­nga eq­qaasin­neqar­pugut: ’Tamat­tami qas­siinik naak­kiut­tar­pugut; oqalun­nik­kut naak­kiun­naveersoqar­pat, taan­na angutaavoq iluarluin­nar­toq.’ (Jâko 3:2; Rûmamiut 5:12) Taamaat­tumik naam­mal­luin­nan­ngitsuuner­put piviusuusoq akuerisariaqar­par­put. Iluaqutaan­ngilaq iliuuserisimasariaqaraluak­kat eq­qarsaatigiuas­sal­lugit — toqusoor­nermil­lu qaangiiniar­nermik sivitsor­titsisin­naavoq.

Isumaqaruil­li im­minut pisuutin­nis­samut pissutissaqavillutit, aam­malu im­minut pisuutin­nerit isumaliutersuutaan­naan­ngitsoq, taava im­minut pisuutin­nin­nik al­lanit tamanit mil­lisitsisin­naaner­paaq eq­qarsaatigiuk — tas­sa Guutimit isumak­keerfigineqar­nis­sat. Biibilimi ima neriorsoq­qis­saar­neqar­pugut: „Ajor­tuliat naatsorsuutigis­sagaluaruk­kit kina atas­sagaluar­pa taava, [Jehova]? Il­lil­li isumak­keerfigin­nit­tar­putit.“ (Tus­siaat 130:3, 4) Pif­fis­saq uter­tis­sin­naan­ngilar­put arlaan­nil­lu al­lan­nguil­luta. Guutili qin­nuigisin­naavar­put kuk­kus­sutigisimasatsin­nik isumak­keerfigeq­qul­luta. Taman­na iluaqutigis­sagatsigu? Aap, Guutip isumak­keerfiginiarluta ’iluaatsunil­lu sunik tamanik piiaaf­figiniarluta’ neriorsorsimap­patigut, taava aam­ma uagut im­minut isumak­keerfigisariaqas­san­ngin­ner­pugut? — Us­satit 28:13; 1 Juánase 1:9.

Kamanneq ajugaaffigiuk

Kamap­pit — im­maqa nakorsat, nap­parsimasunik paarsisut ikin­ngutitil­lu imaluun­niit al­laat toqusimasoq kamaal­lugit? Aam­ma taman­na toqusoor­nermi qisuariar­neruvoq nalingin­naasoq. Im­maqa kaman­nerit ar­torsar­nin­nut ilaavoq pis­susis­samisoor­toq. Atuak­kior­toq ima oqarsimavoq: „Aatsaat kaman­nerup eq­qumaf­figineratigut — nak­kaan­narfigineratiguun­ngitsoq, kaman­nerul­li akuerineratigut — sun­niutaanit ajor­tumit aniguisoqarsin­naavoq.“

Kaman­nerup ersersin­nis­saa iluaqutaasin­naavoq. Qanorli ilil­luni? Kamarujus­suar­tar­nerit aaq­qiis­sutaasin­naan­ngil­lat. Biibilimi mianersoq­qus­sutigineqar­poq sivisuumik kaman­nerup navianar­nera. (Us­satit 14:29, 30) Im­maqa ikin­ngum­mik paasin­nit­tumik taman­na pil­lugu oqaloqateqar­neq tup­pal­lersaatis­sarsif­fiusin­naavoq. Inuit ilaat isumaqar­put ilungersuutilaarlugu timigis­sar­neq kaman­nermik mil­lisitsisin­naasoq. — Takujut­taaq Evfisumiut 4:25, 26.

Naak misigis­sutsit eq­qarsaatigalugit am­masuunis­saq un­neq­qaris­suunis­sarlu pingaaraluar­toq pis­susis­samisoor­poq mianersoq­qus­suteqas­sal­luni. Misigis­sutsinik ersersitsineq aam­ma tamak­kunin­nga inun­nik al­lanik nam­mak­kersuineq an­ner­tuumik as­sigiin­ngis­suteqar­put. Kaman­nermut pakatsinermul­lu al­lat pisuutin­nias­sal­lugit pis­sutis­saqan­ngilaq. Misigis­sutsivit tamak­kerlugit oqalut­tuarinis­saat eq­qumaf­figiuk, inus­siar­niitsumil­li pis­suseqar­nak. (Us­satit 18:21) Aliasun­nermik oqilisitsis­sutis­saal­luar­toq al­la maan­na sam­mis­savar­put.

Guutimit ikiorneqarneq

Biibilimi ima neriorsoq­qis­saar­neqar­pugut: „[Jehovap] qanip­pai neriuutaarus­simasut, an­naat­tar­pai sapiis­suseerutitaasimasut.“ (Tus­siaat 34:19) Aap,  Guutimut qanimut at­taveqar­nerit qanigisan­nik ikin­ngutin­nil­luun­niit toqusoor­ner­pit qaanger­nis­saanut tamanit an­nermik iluaqutigisin­naavat. Qanoq ilil­luni iluaqutaasin­naagami? Atuagas­siaaq­qami matumani siun­nersuutit atoriaan­naasut tamarmik Guutip oqaasianik, Biibilimik, tun­ngaveqar­put tamatumun­ngaluun­niit naaper­tuul­lutik. Maleruaruk­kit ingerlaq­qin­nis­san­nut iluaqutigisin­naavatit.

Qinunerul­lu pingaaruteqas­susia suusupagineqas­san­ngilaq. Biibilimi ima kajumis­saar­neqar­pugut: „Naner­tuutigisat [Jehovamut] tun­niuguk, taava isumagiumaar­paatit.“ (Tus­siaat 55:23) Ikin­ngum­mut paasin­nit­tumut misigis­sutsinik oqalut­tuarin­nin­neq iluaqutaasin­naap­pat, taava ’Guutimut tamanik tup­pal­lersaasumut’ uum­mam­miunik aniatitsif­figin­nin­neq oqilial­laataanerungaas­san­ngin­ner­pa? — 2 Korintumiut 1:3.

Qinugut­ta oqilial­laan­nas­san­ngilagut, aam­mali Guuti ’qin­nutinik tusar­tar­toq’ neriorsuisimavoq kif­fani ilumoorlutik qinugaangata anersaaminik il­ler­nar­tumik tunisas­sal­lugit. (Tus­siaat 65:3; Lúkarse 11:13) Guutip anersaavata il­ler­nar­tup imaluun­niit pis­saanerata sulis­sutigin­nit­tup ul­lut ataasiak­kaarlugit anigor­nis­saan­nut ’pis­saanermik angingaar­tumik’ tunis­savaatit. (2 Korintumiut 4:7) Puius­san­ngilat Guutip kif­fani aalajaatsut ajor­nar­torsiutinik nalaatamin­nik sunil­luun­niit qasusuil­lutik atuinis­saan­nut ikiorsin­naam­magit.

Ar­naq panim­minik an­naasaqarsimasoq oqalut­tuar­poq uinilu aliasun­nermin­ni qanoq ilil­lutik qinusar­neq iluaqutigisimagitsik. „Un­nuk­kut angerlarsimatil­luta aliasun­nerup ar­torsar­tip­pal­laaleraangatigut qinoqatigiit­tar­pugut,“ oqalut­tuar­poq. „Panip­put ilaginagu siul­ler­paamik soqatigiin­nialerat­ta — ilagiin­nut ataatsimiigiar­nialerat­ta aam­malu ataatsimeersuariar­nialerat­ta — nakus­satseq­qul­luta qinuvugut. Ul­laak­kut makik­kaangat­ta piviusul­lu alianar­tut ar­torsar­tip­pal­laaleraangatigut Jehova ikioq­qul­luta qin­nuigisar­par­put. Sooq piner­poq kisimiil­lunga il­lumut iser­nis­sara ajor­nakusoor­tis­simavara; taamaat­tumik kisimiil­lunga angerlaraangama Jehova qin­nuigisar­para eq­qis­sisimanis­san­nut ikioq­qul­lunga.“ Ar­nap aalajaatsup taas­suma qularutigin­ngil­luin­nar­paa qinusar­nini iluaqutigisimal­lugit. Aam­ma il­lit qin­nutin­nut akineqar­nit­tut misigisin­naavat ’eq­qis­sinerup Guutip piata sianiner­nit tamanit an­nerungaar­tup uum­matin­nik eq­qarsaatin­nil­lu ser­nis­suinera’. — Filípimiut 4:6, 7; Rûmamiut 12:12.

Aap, Guutip ilumut ikiorsin­naavaatigut. Apustili kristumiu Paulus al­las­simavoq Guutip ’an­nikil­liuutivut tamaasa pil­lugit tup­pal­lersas­sagaatigut, nalingin­nar­nik an­nikil­liuutil­lit uatsin­nut tup­pal­lersaam­mik Guutip uatsin­nut tup­pal­lersaatigisaanik tup­pal­lersarsin­naan­ngor­til­lugit’. Ilumoor­poq Guutimit ikior­neqar­nit­ta an­niaat peersin­naan­ngik­kaa, kisian­ni ator­nis­saa oqin­nerulersis­sin­naavaa. Taamaalil­luta oqan­ngilagut qiajun­naarumaar­tutit imaluun­niit toqusoq puiorumaarit. Aliasun­neril­li qaangersin­naalis­savat. Pitsaaneruleruil­lu, atoreersimasatit iluaqutigalugit al­lat as­singusumik an­naasaqarsimasut ikior­nialeruk­kit paasin­nin­nerul­lutil­lu misigin­neqataanerus­saatit. — 2 Korintumiut 1:4.