Imarisai

Imai

Jehovap Nalunaajaasui

Oqaatsit toqqakkit Kalaallisut

 KAPITALI 9

Ussernartut akiortariaqarpavut

Ussernartut akiortariaqarpavut

ARLAATA eqqunngitsumik iliornissannut usserniarnikuuaatit? Immaqa ima oqarsimassaaq: “Saperputit!” Imaluunniit oqarsimassaaq taamaaliorneq nuannersuusoq ajortuliornerunngitsorlu. Tamanna misilinnikuuiuk? — Arlaata eqqunngitsuliortinniarsarigaangatigut oqartoqartarpoq taakku “ussiisuusut”.

Usserneqaraluarutta qanoq iliussaagut? Nakkaannassaagut eqqunngitsumillu iliorluta? — Tamanna Jehovap Guutip nuannarinavianngilaa. Nalunngiliulli kina nuannaangaalissasoq? — Saatani Diaavulu.

Guutip Saatani akerarivaa, aamma uagut akerarivarput. Takusinnaanngilarput anersaajummat. Kisianni taassuma takusinnaavaatigut. Ullut ilaanni Jiisusimut, Ajoqersuisorsuarmut, oqaluppoq usserniarlugulu. Jiisusi qanoq iliornersoq takoriartigu. Taamaalilluta nalunnginniassagatsigu qanoq iliussanerluta usserniarneqarutta.

Suut Jiisusip kuisikkami immaqa eqqaamalerpai?

Saatani Jiisusimut usseerianngitsiarnerani Jiisusi Jordanip kuussuani kuisippoq. Taamaalilluni takutippaa Guutip piumasaanik iliortuaannarusulluni. Biibilimi allaqqavoq imermiit qaqimmat Jiisusimut ‘qilaat qulaagut ammartut’. (Matthæusi 3:16) Tamanna isumaqarunarpoq Jiisusip Guutimiinnikuunini eqqaamasinnaaleqqikkaa.

Jiisusilu kuisereerami inoqajuitsumukarpoq eqqaamalikkani eqqarsaatigiartorlugit. Ullut 40-t  unnuallu 40-t inoqajuitsumiippoq. Inoqajuitsumiinnermini nerisaqanngivippoq, piffissallu ingerlanerani kaattorujussuanngorpoq. Taamaalimmat Saatani tikiuppoq ussernialerlugulu.

Diaavulup ujaqqat qanoq atorpai Jiisusi usserniarlugu?

Jiisusimut ima oqarpoq: “Guutip ernerippatit ujaqqat makku timiusanngoqqukkit.” Taama oqarmat nererusuummersimassaqaaq! Jiisusip ujaqqat timiusanngortinnissai sapinngilaa? — Aap, sapinngilaa. Qanoq ililluni? Guutip ernerimmani taamaattumillu allat sapigaannik iliorsinnaalluni.

Illit ujarak timiusanngortissagaluarpiuk Diaavulup taamaalioqqusuuppatit? — Jiisusi kaappoq; ataasiaannarluniluunniit taamaaliornissaa ajorami? — Jiisusip nalunngilaa ajortuliussalluni piginnaanini taama atussagunigit. Jehovap piginnaanerit tamakku tunniutinngilai imminut atorniassammagit; inunnulli ikiuinissamut atugassaapput Guuti ilinniarsinnaaniassammassuk.

Jiisusip Saatani oqarfigaa Biibilimi qanoq allaqqasoqartoq: “Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.” Jiisusip nalunngilaa nerinissaminngarnit Jehovap nuannarisaanik iliuuseqarnissaq pingaarnerusoq.

Diaavululi misileeqqippoq. Jiisusi Jerusalemip naalaffianukaappaa, qutsissorsuarmullu pisillugu. Saatanilu ima oqarpoq: ‘Guutip  ernerippatit taava maanngaanniik pissigit. Allassimavormi Guutip inngiliisa paariumaaraatsit ajoquserneqannginniassagavit.’

Sooruna Saatani taama oqartoq? — Jiisusi navianartumik iliornissaanut usserniaramiuk. Jiisusilli aamma tassani tusaajumanngilaa. Ima oqarpoq: “Allassimavortaaq: ‘[Jehova] Guutit misilissanngilat.’” Jiisusip nalunngilaa eqqunngitsuusoq inuunermik navianartorsiortitsilluni Jehovamik misiliinissaq.

Kisiannili Saatani tunniutiinnanngilaq. Maanna Jiisusi qaqqamut portusoorsuarmukaappaa silarsuarmilu naalagaaffiit tamaasa taakkualu alutornassusiat qimerloortillugit. Saatani Jiisusimut ima oqarpoq: “Tamakku tamaasa ilinnut tunniutissavakka pallorfigigumma.”

Saatanip silarsuarmi naalagaaffiit tamaasa Jiisusimut tunniussinnaagamigit? Pigigamigit? — Jiisusip akerlilinngilaa. Naalagaaffiit Saatanip pigisimanngitsuuppagit Jiisusi oqarsimassagaluarpoq. Tassa Saatanip nunarsuarmiittut nunat tamaasa naalagaaffigai. Biibilimi Saatani ‘silarsuup matuma naalagaaneranik’ taaneqarpoq. — Johannesi 12:31.

Sooruna Saatanip nunarsuarmi naalagaaffiit tamaasa Jiisusimut tunniussinnaagai?

Qanoq oqassagaluarpit Diaavulup neriorsorpatit arlaannik tunniumallutit pallorfigilaaginnarukku? — Jiisusip nalunngilaa Diaavulup pallorfiginissaa eqqunngitsuliornerusoq, sumilluunniit neqeroorfigitikkaluaraanni. Taamaattumik ima oqarfigaa: “Nigorit, Saatani! Allassimavormi: ‘[Jehova] Guutit pallorfigissavat taannalu kisiat kiffartuullugu.’” — Matthæusi 4:1-10; Lukasi 4:1-13.

Qanoq iliussavit ullut arlaanni usserniarneqaraluaruit?

Aamma uagut ussernartorsiorsinnaavugut. Arlaannik taasaqarsinnaavit? — Ataatsimik taasaqalaassaanga. Oqariarta anaanat kaagimik mamarunartumik unnummut iffiorsimasoq oqarporlu unnugu aatsaat pisinnaasutit. Kisianni mamarunartittorujussuuat, ussernartorsiortutut misigissaatit. Anaanannut naalassavit? — Saatanip kissaatiginngilaa naalassasutit.

 Jiisusi eqqaamajuk. Kaassuataarpoq kisianni nalunngilaa Guutimut naalannissaq pingaarnerusoq nerinissaminngarnit. Anaanavit oqaasii naalakkukkit takutissavat Jiisusi assigalugu.

Immaqa ullut ilaanni meeqqat angisuut iisartakkanik iisitinniaalussavaatsit. Immaqa ima oqassapput ‘nuannaalersissavaatsit!’ Kisiannili imaassinnaavoq ikiaroornartuusut. Taakku napparsimalissutaarujussuarsinnaapput; allaat  toqussutaasinnaallutik. Aamma imaassinnaavoq arlaata sikaritsimik tunigaatit oqarlunilu: ‘Pujortarnissat saperpiuk?’ Kisianni sikaritsit aamma ajoqutaasarput. Taava qanoq iliussavit? —

Jiisusi eqqaaqqissavat. Saatanip Jiisusip inuunera navianartorsiorteriaraluarpaa naalaffimmit qutsissumit pisseqquneratigut. Kisianni Jiisusi naaggaarpoq. Qanoq iliussavit arlaata ulorianartumik iliornissannut kajumissaarpatit? — Jiisusip Saatani tusaajumanngilaa. Uaguttaaq ajortumik iliortitsiniaasut tusaasassanngilavut.

Sooruna Guutimik pallorfiginninnermi assilissanik allanillu atuineq eqqunngitsuliornerusoq?

Ullut arlaanni immaqa arlaata assiliaq ilinnut pallorfigeqqussavaa. Biibilimili allaqqavoq taamaaliortussanngitsugut. (2 Mosesi 20:4, 5) Imaassinnaavoq illit atuarfinni tamarmik taamaaliortussaasut. Immaqa allaat oqarfigineqarsinnaavutit naaggaaruit atuarfimmi atuaqqusaajunnaassasutit. Taava qanoq iliussavit? —

Eqqortuliornissaq ajornannginnerusarpoq aamma allat taamaalioraangata. Kisianni artornarsinnaavoq allat eqqunngitsumik iliornissamut uteriiserpata. Immaqa oqassapput iliuuserisatik taama ajortiginngitsut. Kisianni Guuti qanoq oqarpa? Tassa pingaarnerpaaq. Taassumami nalunngilaa suna pitsaanerpaanersoq.

Qanorluunniit allat oqaraluarpata Jehovap ajorisaanik iliunngisaannassaagut. Taava Jehova nuannaartittuassavarput, Diaavulullu iluarisaanik iliussanata.

Allassimaffinni ukunani atuaqqissinnaavugut qanoq ussernartut akiorsinnaanerivut: Tussiaat 1:1, 2; Ussatit 1:10, 11; Matthæusi 26:41 aamma 2 Timotheusi 2:22.