Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 35

Toqugutta makititaasinnaavugut!

Toqugutta makititaasinnaavugut!

ISUMAQARPIT toqugaluarutta Jehovap toqusunit makiterusussagaatigut, tassa inuulerseqqilluta? — Angutip ajunngitsup Jobimik atillip taamaaliornissaa qularinngilaa allaallu tamanna qilanaaralugu. Ilaanni Jobi toqulersoraluni Guutimut ima oqarpoq: “Torlorfigiumaarparma, uangalu akiumaarpakkit.” Jobi oqarpoq Jehovap kipitsavigigaani imaluunniit makitikkusuttorujussuugaani. — Jobi 14:14, 15, NV.

Jiisusi Ataatamisut, Jehovatut Guutitut, ippoq. Ikiornissarput kissaatigaa. Angutip pupissup ilaanni Jiisusi ima oqarfigaa: ‘Piumaguit ajorunnaarsissinnaavarma,’ Jiisusilu ima akivoq: “Piumavunga.” Angullu pupissoq ajorunnaarsippaa. — Markusi 1:40-42.

Jehovap qanoq takutippaa meeqqat asallugit?

Nalunngilarput Jiisusip meeqqat asagai. Ataataatalu, Jehovap, ilinniartitaraa taamaattumik Jehovap aamma meeqqat asavai. Qangarsuaq marlunnik pisimasoqarpoq Jehovap kiffani ikiorlugit meeqqat toqusut inuulerseqqikkai. Eliap Jehova qinnuigaa arnap ajunngisaarfiginnitsimi  ernera makiteqqullugu. Jehovalu taamaaliorpoq. Jehovap aamma kiffani Elisa aqqutigalugu nukappiaraq uummarteqqippaa. — 1 Kunngit 17:17-24; 2 Kunngit 4:32-37.

Jehovap taama asatigigaatigut paasillugu nuanneq, ilaa? — Inuutillutaannaq eqqarsaatigisanngilaatigut. Aamma toqussagutta eqqaamassavaatigut. Jiisusi oqarpoq Ataatami inuk asaguniuk inuk taanna toqugaluarpalluunniit inuusutut isigisaraa! (Lukasi 20:38) Biibilimi allassimavoq ‘toqulluunniit inuunerulluunniit, maannakkut ittulluunniit piumaartussalluunniit avissaartissinnaanngikkaatigut Guutip asannissusianit’. — Romamiut 8:38, 39.

Jiisusip nunamiikkallarami takutippaa Jehovap meeraaqqat asagai. Eqqaamajunnarsivat Jiisusip meeqqat piffissaqarfigalugit Guuti pillugu oqaluttuukkai. Nalunngiliulli Guutip Jiisusi meeqqanik toqusunik makititsinissamut pissaaneqartikkaa? — Maanna tusassavat Jiisusip ilaanni niviarsiaraq 12-inik ukiulik makitikkaa. Taanna angutip Jairusimik atillip panigaa.

Jairusi nulianilu panitsillu, meeratuartillu, Galilæap Tasersuata eqqaani najugaqarput. Ullut ilaanni paniat napparsimangaalerpoq, Jairusillu takusinnaavaa toqussasoq. Jiisusi eqqarsaatigilerpaa tusarsimagamiuk Jiisusi angutaasoq naleqanngitsoq napparsimasunik ajorunnaarsitsisinnaasoq. Jairusi anivoq Jiisusi ujariartorlugu. Tatsip sinaani inuit ajoqersorai nanivaa.

Jairusi inuit akornatigut ingerlavoq Jiisusillu isigaasa saannut pallorluni. Ima oqarfigaa: ‘Paninnguara napparsimasorujussuuvoq. Aggerlutit paniga ikioriartulaarsinnaaviuk?’ Erniinnaq Jiisusip Jairusi malippaa. Inuppassuit ajoqersuisorsuarmik takunnerusullutik aggersimasut aamma malinnipput. Ingerlatsiareermatali Jairusikkormiut ilaat tikiupput imalu oqarfigalugu: ‘Paniit toquvoq! Taamaattumik Ajoqersuisoq aggertariaaruppoq.’

 Jiisusip qanoq oqarnersut tusaavaa. Nalunngilaa Jairusip meeratuami annaanera qanoq aliatsaatigitigigaa. Taamaattumik ima oqarfigaa: ‘Sioorassanngilatit. Guuti upperiinnassavat, taava paniit annassaaq.’ Jairusip angerlarsimaffianukarasuarput. Tassani ilaqutaat ikinngutaallu katersuusimapput qissallutillu. Niviarsiarannguaq annaagamikku tamarmik aliasungaarput. Jiisusilli ima oqarfigai: “Qiaqinasi, toqunngilaq siniinnarpoq.”

Inuit Jiisusi taama oqartoq tusaramikku illalerput, nalunngilaammi toqusoq. Soormitaavaana Jiisusip sininneraraa? — Suminguna inuit ajoqersorniarai? — Oqaluttuunniarpai toqu sininnertut itisuutut ittoq. Ajoqersorniarpaalu Guutip pissaanera ikiortigalugu toqusoq makitissinnaallugu, sinittumik itersaanertut ajornanngitsigisumik.

Jiisusip Jairusip panianik uummartitsinnera sumik ilinniarfigaarput?

Illumiittut tamaasa Jiisusip anisippai, apustilini Petrusi, Jaaku Johannesilu niviarsiaqqallu ataataa anaanaalu kisiisa pinnagit. Inimullu niviarsiaqqap innangavianut iserpoq. Assaa tiguaa imalu oqarluni: “Niviarsiaraq, nikuigit!” Erniinnarlu nikuippoq angalaalerlunilu! Angajoqqaavi nuannaartorujussuupput. — Markusi 5:21-24, 35-43; Lukasi 8:40-42, 49-56.

 Eqqarsaatigilaariaruk. Jiisusip niviarsiaraq uummartissinnaaguniuk allanuttaaq taamaaliorsinnaannginnerpa? — Taamaaliussasoraajuk? — Taamaaliorumaarpoq. Jiisusi nammineq oqarpoq: ‘Piffissaq nalliukkumaarpoq ilivermiittut tamarmik nipinnik tusarumaarfissaat, aniumaarpullu.’ — Johannesi 5:28, 29.

Jiisusi inunnik toqusunit makititserusussasoraajuk? — Biibilimi allamik oqaluttuaqarpoq takutitsisumik taamaaliorusulluinnarneranik. Tamanna illoqarfiup Nainimik atillip eqqaani pisimavoq. Takutippaa inuit asasaminnik annaasaqarlutik aliasukkaangata Jiisusi qanoq misigisartoq.

Ilisiartortunik ingerlaaqatigeeqarpoq. Arnap ernini annaasimavaa. Tamannalu sioqqullugu uillarsimavoq, maannalu meeratuaa toqusimavoq. Erloqisorujussuuvoq. Toqusoq illoqarfimmit akiarlugu anninneqarmat Nainimiorpassuit ingerlaqataapput. Arnaa qiavoq tuppallersarneqarsinnaananilu.

Ullorli taannarpiaq Jiisusi ajoqersugaalu Nainip tungaanut ingerlapput. Illoqarfiup isaaffiata eqqaani uillarnerup erneranik ilisiartorlutik ingerlaaqatigiit naapippaat. Jiisusip anaanaq qiasoq takugamiuk nalligingaalerpaa. Arnap aliasungaarnera qamuuna attortissutigaa, ikiorusulerpaalu.

Misiginneqataarpaluttumik aalajangersimasumillu arnaq oqarfigaa “qianak” tusarnaartilerlugu. Toqusoq ornimmagu eqqarsarsimassapput suniaraajuna. Ima oqarpoq: “Inuusuttoq uumaa, oqarfigaakkit: Makigit!” Erniinnarlu inuusuttoq ingippoq oqalulerlunilu! — Lukasi 7:11-17.

Takorloorsinnaaviuk arnaa qanoq misigisoq? Qanoq misigissagaluarpit asasat toqusimasoq uummaqqittuuppat? — Jiisusip ilumut inuit asagai ikiorusuttorujussuugaalu takuneqarsinnaavoq, ilaa? — Eqqarsaatigeriaruk Guutip silarsuassaani nutaami toqusunik  makititaasunik tikilluaqqusinissarput qanoq nuannertigissasoq! — 2 Petrusi 3:13; Saqqummersitat 21:3, 4.

Jiisusip arnap meeratuaanik toqusunit makititsinera sumik ilinniarfigaarput?

Taamanikkussamut toqusunit makittut ilaat tassaassapput meeqqat inersimasullu ilisarisimasavut. Ilisarissavavut, soorlu Jairusip soorunami panini ilisarigaa Jiisusip uummartimmagu. Inuit allat makittussat ukiut hundredellit imaluunniit tusindillit toqungareersimassapput. Guutip puiorsimanngilai naak qangarsuaq toqusimagaluartut.

Jehovap Guutip erneratalu, Jiisusip, taama asatigimmatigut nalunagu nuanneq, ilaa? — Ukiorpaaluinnannguit inuussasugut kissaatiginngilaat. Kissaatigaat naassaanngitsumik inuussasugut!

Toqusunut neriuut tupinnangaartoq pillugu aamma atuariakkit: Esaja 25:8; Apustilit Suliaat 24:15; 1 Korinthimiut 15:20-22.