SORLEQ nuannarineruiuk, sulillutit pinnguarlutilluunniit? — Soorunami pinnguarneq ajunngilaq. Biibilimi allassimavoq Jerusalemip niueriartortarfii ‘nukappiaqqanik niviarsiaqqanillu pinnguartunik ulikkaarumaartut’. (Zakaria 8:51990) Ajoqersuisorsuup aamma meeqqat pinnguartut isigalugit nuannaraa.

Jiisusi nunamut pinngikkallarami ima oqarpoq: ‘Guutimiippunga suliortuullunga. Taassuma saani nuannaartuarlunga.’ Aamma ima oqarpoq: ‘Inuit qitornaat nuannaarutigaakka.’ Aap, soorlu oqaluuserereeripput, Ajoqersuisorsuup inuit tamaasa, aamma meeqqat, soqutigai. — Ussatit 8:30, 311900.

Ajoqersuisorsuaq nunamut pinngikkallarami sumik nuannarisaqarpa?

Jiisusi nammineq meeraagallarami pinnguartarsoraajuk? — Ilimanarpoq. Atuareernitsitulli Jiisusi  qilammiikkallarami ‘suliortuuvoq’. Isumaqarpoq Jehova suleqatigigaa. Taavami nunamiikkallarami? Tassani aamma suliva? — ‘Sanasup ernera’-nik taaneqartarpoq. “Sanasoq”-milli aamma taaneqartarpoq. Tamatumani suna paasivarput? — Takutippaa Josefip, Jiisusi perorsaramiuk, sanasutut ilinniartissimagaa. Taamaalilluni Jiisusi nammineq sanasunngorpoq. — Matthæusi 13:55; Markusi 6:3.

Jiisusi sannarissuusimassasoraajuk? — Qilammi ‘suliortuusimagami’ pikkorissimassaaq. Aamma nunami sannarissuusimassaaq, ilaa? — Sanasup taamani suliassarpassui eqqarsaatigilaariakkit. Jiisusip nalunanngitsumik nammineq orpik uppiteriarlugu killortarsimassavaa, minnerusunngorlugu pilattortarlugu,  kippai nammallugit angerlaallugit nerriviliaralugillu, issiaviliaralugit allanullu atorlugit.

Ilimagaajuk Jiisusip suliffini nuannarigaa? — Illit nerrivinnik, issiavinnik allanillu inuit atorsinnaasaannik kusanartunik sananeq nuannarissasoraajuk? — Biibilimi allassimavoq ‘suliat nuannaarutigineqarsinnaasut’. Sulineq pinnguarnikkut anguneqarsinnaanngitsumik nuannaartitsisarpoq. — Oqaluussisartup oqaasii 3:22.

Sulineq qaratsamut timimullu iluaqutaavoq. Meerarpassuit issiaannartarput fjernsynertuarlutik videospilertuarlutilluunniit. Pualavallaalertarput nukeqarpiarnatillu. Nuannaarpiarneq ajorput, allanillu nuannaartitsineq ajorlutik. Qanoq iliussaagut nuannaalerniarluta? —

Kapitali 17-imi ilinniarparput allanik tunisineq allanillu ikiuineq uagutsinnik pillualersitsisartoq. (Apustilit Suliaat 20:35) Biibilimi Jehova ‘Guutimik pilluartumik’ taaneqarpoq. (1 Timotheusi 1:11) Jiisusi pillugu Ussatini allassimasoqarpoq Guutip ‘saani nuannaartuartoq’. Sooq Jiisusi nuannaarpa? — Nammineq tamanna pillugu ima oqaaseqarpoq: “Ataataga suliuarmat uangattaaq sulivunga.” — Johannesi 5:17.

Jiisusi nunamiikkallarami sanasutut suliuaannanngilaq. Jehovap Guutip immikkut ittumik suliassissimavaa. Nalunngiliuk sumik? — Jiisusip sunaanersoq nammineq ima oqaatigaa: “Guutip naalagaaffianik iivangkiiliu . . . tusarliussassaraara; tamanna pillugu aallartitaavunga.” (Lukasi 4:43) Jiisusi oqaluussigaangat inuit ilaatigut oqaluuserisai upperisarpaat, allanullu oqaluusereqqittarlugit. Assersuutigalugu arnaq Samariamiu taamaaliortoq soorlu uani assimi takusinnaagit. — Johannesi 4:7-15, 27-30.

Jiisusi nunamiikkallarami marluk assigiinngitsut suut suliffigai?

Jiisusip suliani qanoq isigaa? Isumaqarpit suliani nuannarigaa? — Ima oqarpoq: “Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.”  (Johannesi 4:34) Mamarinerpaasat unnukkorsiutigerusuttarpiuk? — Taava nalussanngilat Jiisusip Guutip suliareqqusaa qanoq nuannaritigigaa.

Guutip ima pinngortippaatigut nuannaalertarluta suliassap qanoq suliarinissaa ilikkaraangatsigu. Sulinermik nuannaaruteqarneq Guutimit uagutsinnut tunissutaavoq, Guuti taama oqarpoq. Meeraanerniilli sulineq ilinniarukku taava tamanna inuunerit tamaat iluaqutigissavat. — Oqaluussisartup oqaasii 5:18.

Soorunami tamanna ima paasisariaqanngilaq meeraq inersimasutut sulisinnaasoq. Inuilli tamarmik arlaannik suliaqarsinnaapput. Ataatat anaanallu immaqa ullut tamaasa aningaasarsiorlutik sulisarput illit ilaquttatillu inissaqarniassagassi nerisassaqarniassagassilu. Aamma soorlu nalunngikkit suliassaqartorujussuusoq angerlarsimaffik torersuutinniarlugu ipiitsuutinniarlugulu.

Illit ilaquttatit ikiorniarlugit iliuuseqarsinnaavit? — Immaqa nerrivilioqataasinnaavutit, errueqataasinnaallutit igitassanillu igitsiartoqataasinnaallutit. Aamma init torersarsinnaavat. Immaqa ilaat suliarisalereerpatit. Suliaq taamaattoq ilaqutariinnut tamanut iluaqutaallunilu nuannaarutaavoq. Takoriartigu qanoq.

Sooq pinnguareeraangavit pinngussavit inissinnissaat pingaaruteqarpa?

Assersuutigalugu pinngussatit pinnguarereeraangakkit inaannut ilineqaqqittussaapput. Sooq tamanna pingaaruteqarsoraajuk? — Torerpasinnerusarami. Aammali ajutoortoqannginnissaanut iluaqutaavoq. Pinngussatit inissinngikkukkit ullut ilaanni anaanavit tigummiaanik ulikkaarluni natermiiginnartitatit tummartoorsinnaavai. Immaqa naaffigalugit ajoqusissaaq. Immaqa allaat napparsimmavimmut unittariaqassaaq. Ajussagaluaqaaq, ilaa? — Pinnguareerlutit torersaaguit allanut tamanut iluaqutaassaaq.

Meeqqat aamma allatut ittunik suliassaqarput, assersuutigalugu atuarfimmi ilinniagassat. Atuarfimmi atuarneq ilinniarneqartarpoq.  Meeqqat ilaasa atuarneq sapernanngitsutut nuannivissutullu isigisarpaat allalli sapernartutut isigisarlugu. Immaqa aallaqqaataani sapernartutut isigigaluarpat, atuffarissillutilli nuannarissavat. Atuarsinnaaguit soqutiginartorpassuarnik paasisaqarsinnaavutit. Aamma nammineq Guutip atuakkiaa, Biibili, atuarsinnaassavat. Taamaattumik ilinniagassanik peqqissaarussineq iluaqutaasorujussuuvoq.

Inuit ilaat sapinngisartik tamaat sulinaveersaartarput. Immaqa inunnik taama ittunik nalunngisaqarputit. Guutilli sulisinnaasutut pinngortimmatigut suliamik nuannaarutiginninnissaq ilinniartariaqarparput. Ajoqersuisorsuup sulinissaq qanoq nuannaritigaa? — Nuannaringaaramiuk mamarinerpaasamisut isigaa. Suliaa sunaagami? — Jehova Guuti pillugu qanorlu naassaanngitsumik inuusoqalersinnaanera pillugu oqaluussisarpoq.

Apeqqut una suliamik nuannaarutiginninnissamut iluaqutigisinnaavat: ‘Sooq iluaqutaava tamanna suliarineqarpat?’ Nalunngikkukku sooq suliassaq pingaaruteqartoq taava suliarissallugu sapernannginneruvoq. Suliarilluaruk suliassaq qanoq annertutigigaluarpat annikitsigigaluarpalluunniit. Taava nuannaarutigissavat, soorlu Ajoqersuisorsuup nuannaarutigigaa.

Biibili sulinermut eqqortumik isiginnittaaseqalernissamut iluaqutigisinnaavarput. Atuakkit: Ussatit 10:4; 22:29; Oqaluussisartup oqaasii 3:12, 13 aamma Kolossemiut 3:23.