Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 26

Sooq eqqortumik iliornissaq sapernarpa?

Sooq eqqortumik iliornissaq sapernarpa?

SAULUSI taamani ajortuliormat kina nuannaarpa? — Tassa Saatani Diaavulu. Aammali juutit upperisarsiornikkut siuttui nuannaarput. Saulusi Ajoqersuisorsuarmut ajoqersuganngormat Paulusitullu nalunnginneqalerluni upperisarsiornikkut siuttut uumigilerpaat. Aap, ilaannikkut Jiisusip ajoqersugaanut eqqortumik iliornissaq sapernarsinnaavoq.

Paulusi eqqortumik iliorami qanoq pineqarpa?

Palasiuneq Ananiamik atilik ilaanni peqqusivoq Paulusi kiinaatigut tillunneqassasoq. Ananiap Paulusi allaat parnaarussaatinniaraluarpaa. Paulusi Jiisusimut ajoqersuganngorami atugarliortinneqangaarpoq. Ilaanni inunnit ajortunit unatarneqarpoq, ujararujussuarnillu milloorlugu toqunniaraluarpaat. — Apustilit Suliaat 23:1, 2; 2 Korinthimiut 11:24, 25.

Inuppassuit Guutip iluarinngisaanik iliortinniassavaatigut. Apeqqutit tulliuttut uku eqqarsaatigeriakkit: Ajunngitsuliorneq qanoq pingaartitsigiviuk? Ima pingaartitsigiviuk ajunngitsuliortuaannassallutit allat tamanna  pillugu uumigissagaluarpatsilluunniit? Ajunngitsuliortuaannassagaanni sapiissuseqartariaqarpoq, ilaa? —

Imaassinnaavoq ima eqqarsartutit: ‘Kisiannimi sooq inuit ilaasa uumigissavaannga iluamik piguma? Nuannaarutigiinnarsinnaannginnamikku?’ Aap, taama isumaqarnarsinnaagaluarpoq. Inuit Jiisusi ajunngitsulioraangat amerlanertigut nuannarisarpaat. Ilaanni illoqarfimmiut tamarmik illup isersimaffigisaata matuata silataanut katersuupput. Aggiapput Jiisusip napparsimasorpassuit ajorunnaarsissimammagit. — Markusi 1:33.

Ilaannikkulli inuit Jiisusip ilinniartitsissutai nuannarineq ajorpaat. Inuit ajunngitsumik ilumoortumillu ajoqersortuaannarpai, ilaasali  ilumoortumik oqaluttarmat uumigaat. Ullut ilaanni illoqarfimmi peroriartorfigisimasaani Nazaretimi taamatut pisoqarpoq. Jiisusi synagogimut, inersuarmut juutit Guutimik pallorfiginnillutik katersuuffigisartagaannut, iserpoq.

Tassani Allakkat tunngavigalugit oqalugiarluarpoq. Aallaqqaammut inuit nuannarilluarpaat. Taama pikkoritsiginera tupigusuutigaat. Upperiuminaatsippaat angutip taassuma inuusuttup namminneq illoqarfimminni peroriartorsimanera.

Jiisusili nuannarinngisaannik oqaaseqarpoq. Oqaluttuaraa Guuti inunnut juutiunngitsunut immikkut ittumik ajunngisaarsimasoq. Inuit synagogimiittut tamanna tusaramikku kamalerput. Sooq kamalerpat? — Kamalerput isumaqaramik inunnit allanit pitsaanerullutik Guutillu kisimik immikkut ajunngisaarfigisinnaagaatik. Allaammi Jiisusi taama oqaaseqarmat uumigilerpaat. Nalunngiliuk taava qanoq iliorniarsarisut? —

Biibilimi ima allassimavoq: ‘Jiisusi tigullugu illoqarfimmit anisippaat. Qaqqallu sinaanut ajakattarpaat nakkartinniarlugu toquniassammat. Jiisusili taakkunannga aniguivoq.’ — Lukasi 4:16-30.

Sooq Jiisusi toqunniarsaraat?

Illit taama pineqarsimagaluaruit Guuti pillugu oqaluussiffiginiarlugit inunnut taakkununnga uteqqissimassagaluarpit? — Taamaaliussagaanni qunusuilluinnartariaqarpoq, ilaa? — Ukiorli ataaseq qaangiummat Jiisusi Nazaretimut uteqqippoq. Biibilimi ima allaqqavoq: ‘Synagogianni ajoqersulerpai.’ Jiisusi sallusuissut pillugu oqaluussiuarpoq inuit Guutimik asanninngitsut qunuginagit. — Matthæusi 13:54.

Ilaanni sabbatiusoq Jiisusi synagogimiimmat angut toqungasumik assalik, tassa nukillaarsimasumik assalik, tassaniippoq. Jiisusi angutip ajorunnaarsinnissaanut pissaaneqarpoq, ajorunnaarsitsineranilli takunnittut ilaat isorisassarsiorput. Ajoqersuisorsuaq maanna qanoq iliorpa? — Siullermik ima aperai: ‘Savaateqartuugussi sabbatimi itersaliamut nakkartoq taava qaqissavisiuk?’

 Aap, sava qaqissavaat, aamma sabbatimi, naak ulloq taanna suliaqaqqusaanngikkaluarlutik. Taava Jiisusi nangilluni ima oqarpoq: ‘Suli ajunnginneruvoq inuk sabbatimi ikiussallugu, inummi savaminngaanniit pingaarneruvoq!’ Soorunami taanna angut Jiisusip ikiussavaa ajorunnaarsillugu!

Maanna Jiisusi oqarpoq angutip assani isaatissagaa taamaaliormallu assaa ingerlaannaq ajorunnaarpoq. Angut pillualerpoq! Isiginnaartummi allat? Aamma nuannaalerpat? — Naamik, Jiisusi suli uumiginerulerpaat. Qimagupput qanorlu toqunnissaanut isumaqatigiinniarlutik! — Matthæusi 12:9-14.

Aamma ullumikkut taamaappoq. Qanorluunniit ilioraluarutta kikkut tamaasa nuannaartissinnaanngilavut. Aalajangertariaqarpugut kikkut nuannaartikkusunnerunerlugit. Jehova Guuti erneralu, Jiisusi Kristusi, nuannaartikkusukkutsigit tamatigut ajoqersuutaat malillugit iliortariaqarpugut. Kiali uumigissavaatigut? Kia eqqortumik iliorniarnerput sapernarsisikkusuppaa? —

Tassa Saatanip Diaavulup. Aammali allaqarpa? — Diaavulup salloqittagaasa aamma uumigissavaatigut. Jiisusip upperisarsiornikkut siuttut taamani inuusut ima oqarfigai: “Ataataq ilissi nagguigisarsi tassa Diaavulu, ataatassilu pilerigisai naammassiumavasi.” — Johannesi 8:44.

Inuppassuaqarpoq Diaavulup nuannarisaanik. Jiisusip taakku ‘silarsuarmik’ taavai. Jiisusip ‘silarsuaq’ oqaluuserisaa sunaasoraajuk? — Johannesip iivangkiiliuani, kapitali 15, versi 19-imi Jiisusi ima oqarpoq: ‘Silamiut ilagigunisi pisik asaqqajarpaat; ilaginnginnamisili, uangali silamiunit qinerassi, taamaattumik silamiut uumissorpaasi.’ (1936)

Silarsuaq tamanna Jiisusip ajoqersugaanik uumissuisoq tassaavoq inuit Jiisusip ajoqersuutaanik maleruaanngitsut tamarmik. Sooq silarsuup Jiisusip ajoqersugai uumigai? — Eqqarsaatigilaariaruk. Kia silarsuaq aquppaa? — Biibilimi ima allaqqavoq: ‘Silarsuaq tamarmi Ajortumut  naalatsigitippoq.’ Ajortoq tassaavoq Saatani Diaavulu. — 1 Johannesi 5:19.

Takusinnaalerpiuk eqqortumik iliornissaq sooq taama sapernartigisoq? — Tassa Saatanip taassumalu silarsuaata eqqortumik iliornissaq sapernartunngortittarpaat. Aammali alla pissutaavoq. Eqqaasinnaaviuk? — Atuakkami matumani kapitali 23-mi paasivarput tamatta ajorteqarluta inunngortugut. Ajorti peeruppat Saatanilu taassumalu silarsuaa aamma peeruppata nuannissaqaaq, ilaa? —

Silarsuaq manna peerneqarpat eqqortumik iliorusuttut qanoq pineqassappat?

Biibilimi neriorsorneqarpugut ‘silarsuaq nungussasoq’. Tamanna isumaqarpoq inuit Ajoqersuisorsuarmut ajoqersugaanngitsut tamarmik peerutissasut. Naassaanngitsumik inuusinnaatitaassanngillat. Kikkummi naassaanngitsumik inuussappat? — Biibilimi ima nangilluni allassimavoq: ‘Guutip piumasaanik iliortoq naassaanngitsumik atassaaq.’ (1 Johannesi 2:17) Aap, eqqortumik iliortuinnaat, tassa ‘Guutip piumasaanik iliortut’, Guutip silarsuassaani nutaami naassaanngitsumik inuulissapput. Taamaattumik sapernartarsinnaagaluartoq eqqortumik iliortuaannarusuppugut, ilaa? —

Eqqortumik iliornissap sapernarsinnaanera pillugu allassimaffiit uku atualaariartigit: Matthæusi 7:13, 14; Lukasi 13:23, 24; Apustilit Suliaat 14:21, 22.