SILARSUUP naggatissaanik oqaluttunik tusarnikuuit? — Ullumikkut inuppassuit tamanna oqaluuserisarpaat. Ilaasa upperaat nunarsuaq sorsunnermi qaartartorsuanik atomitortunik suujunnaarsinneqassasoq. Isumaqarpilli Guutip nunarsuatta kusanangaaqisup suujunnaarnissaa akuerissagaa? —

Ilumoorpoq Biibilimi ‘silarsuup naggatissaa’ eqqartorneqarmat. Biibilimi ima allassimavoq: ‘Silarsuaq nungussaaq.’ (1 Johannesi 2:17) ‘Silarsuup naggatissaani’ nunarsuaq aserorneqassasoraajuk?  — Naamik, Biibilimi allassimavoq Jehovap nunarsuaq “najugaqarfissanngortillugu” pinngortikkaa, tassa inuit nunarsuaq najugarisinnaassagaat nuannaarutigalugulu. (Esaja 45:18) Tussiaat 37:29-mi ima allassimavoq: “Iluartut nuna kingornutissavaat najugaqassallutillu tassani naassaanngitsumik.” Biibilimi aamma allassimavoq nunarsuaq naassaanngitsumik atassasoq. — Tussiaat 104:5; Oqaluussisartup oqaasii 1:4.

Nunarsuarmi peerutinngisaannassappat taavami qanoq paasisariaqarpa ‘silarsuaq nungussasoq’? — Noap nalaani pisimasut ikiortigalugit paasisinnaavarput. Biibilimi tamanna ima nassuiarneqarpoq: “Silarsuaq taamanernisaq imermit qarsunneqarluni piujunnaarpoq.” — 2 Petrusi 3:6.

Tassa ulersuarmi silarsuaq tamakkerluni piuneerunneqarpoq. Taamani Noap nalaani annattoqarpa? — Aap, Biibilimi allassimavoq Guutip ‘ulersuaq iluaatsut silarsuaannut nalliutitikkamiuk Noa allallu arfineq-marluk asattuukkai’. — 2 Petrusi 2:5.

Silarsuaq suna Noap nalaani piuneerunneqarpa?

Sunamiuna silarsuaq taamani peeruttoq? Nunarsuaq imaluunniit inuit ajortut? — Allassimavoq ‘iluaatsut silarsuaat’, tassa inuit ajortut. Aamma Biibilimi allassimavoq Noa ‘oqaluussisoq’. Sunaasoraajuk Noap oqaluussissutigisaa? — Inuit mianersoqquai ‘silarsuup taamanernisap’ piuneerunneqarnissaanik.

Jiisusip ajoqersukkani ulersuaq pillugu oqaluukkamigit inuit naggatissap nalliutilernerani ulapputigisaat eqqartorpai. Ajoqersukkat ima oqarfigai: “[Ulluni] taakkunani ulersuaq sioqqullugu nerillutik imerlutillu nuliartaarlutillu uinitsitsisarput ulloq Noap umiarsuarmut ikiffia tikillugu; aatsaallu paasisaqalerput ulersuaq nalliummat tamaasalu nungutillugit.” Nangilluni Jiisusi oqarpoq inuit tamatuma asserluinnaanik iliussasut silarsuup matuma naggatissaa qanillippat. — Matthæusi 24:37-39.

 Jiisusip taama oqarnerani paasivarput ulersuaq sioqqullugu inuusimasunut pisimasut ilinniutigissagivut. Eqqaamaviuk kapitali 10-mi atuaripput inuit taamani qanoq issimasut? — Angutit ilaat peqqarniipput navianartorujussuullutillu. Jiisusili oqarpoq inuit allarpassuit soqutigisaqanngitsut Jehovallu Noa aqqutigalugu tusarliussaa tusarumanagu.

Taava piffissaq nalliummat Jehovap Noa oqarfigaa inuit ajortut tamaasa ulersuarmi suujunnaarsinniarlugit. Immap nunarsuaq tamaat ulissavaa allaat qaqqarsuit qaangerlugit. Jehovap Noa umiarsuarmik sanaqquaa. Karsersuartut iluseqarpoq, soorlu assiliartaani quppernermi 238-miittumi takusinnaagit.

Guutip Noa oqarfigaa umiarsuaq ima angitigissasoq Noa ilaquttanilu uumasorpassuillu tassani isumannaatsumiissinnaallutik. Noa ilaqutaalu suleruloorput. Orpiit angisoorpassuit uppitippaat umiarsualiornerminnilu atorlugit. Ukiorparpassuarni suliaraat umiarsuarmi angeqimmat.

Eqqaamaviuk Noa sumik allamik sulerinersoq ukiorpassuarni umiarsuaq sanatillugu? — Oqaluussivoq inuit mianersoqqullugit ulersuaq takkutissammat. Tusarnaartoqarpa? — Naamik, taamaallaat Noap ilaqutai. Inuit allat allarpassuarnik ulapputeqarput. Eqqaamaviuk Jiisusip inuit sunik ulapputeqarnerarnerai? — Nerineq, imerneq katinnerlu ulapputigaat. Imminnut ajortuusorinngillat Noallu tusarnaarnissaa piffissaqarfiginagu. Qanormi pippat? —

Noa ilaqutaalu umiarsuarmut ikimmata Jehovap matu matuaa. Inuit umiarsuup silataaniittut suli ulersuarnissaa upperinngilaat. Tassanngaannarli qilammit siallertorsuanngorpoq! Ullumikkut siallertarneratut inngilaq. Naamik, tassa soorlu qorlortoq! Erniinnaq arlalinnik atituunik kuussuaqalerpoq. Orperujussuit ujarassuillu qisumineeqqatut ujaraaqqatullu kuugussaapput. Inuimmi umiarsuup  silataaniittut? — Jiisusi ima oqarpoq: ‘Ulersuaq nalliuppoq tamaasa nungutillugit.’ Umiarsuup silataaniittut toqupput. Sooq? — Tassa eqqumaniannginnamik. Tusarnaanngillat! — Matthæusi 24:39; 1 Mosesi 6:5-7.

Sooq nuannisarnissaannaq eqqarsaatigissanngilarput?

Eqqaamajuk Jiisusi oqarmat taamani inunnut pisimasoq ilinniutigisinnaagipput. Suna ilinniutigisinnaavarput? — Eqqaamalluagassaq ataaseq tassaavoq: Inuit ilaat ajorluinnartumik iliorsimanngikkaluarlutik toqupput. Toqupput Guuti taassumalu iliuusissaata tusarnissaannut piffissaqannginnamik. Taakkutut iliorusunngilagut, ilaa? —

Isumaqarpit Jehovap ulersuarnikkut silarsuaq piuneeruteqqissagaa? — Naamik, taamaalioqqissanani neriorsuivoq. Ima oqarpoq: ‘Neriusaara nuissanut pisippara, taannalu nalunaaqutaassaaq kingorna imersuit ulersuanngorlutik pinngortitat tamaasa nungutissanngikkaat.’ — 1 Mosesi 9:11-17.

Qularutigissanngilarput Jehovap ulersuarnikkut silarsuaq piuneeruteqqissanngikkaa. Soorlumi tusareerit, Biibilimi allassimavoq silarsuaq manna piujunnaassasoq. Guutip silarsuaq piuneerukkuniuk kikkut asattuutissavai? — Isumaqarpit tassaassasut inuit assigiinngitsunik ulapputeqarnermit Guutimik tusarusunngitsut? Tassaassappat Biibilimik atuarnissaminnut ulapippallaartut? —

 Uagut Guutimit asattuunneqartunut ilaarusuppugut, ilaa? — Ilaquttavut Noakkutut ikkaluarpata tamatta Jehovap annaakkusutaanut ilaalluta nuannissagaluarpoq, ilaa? — Silarsuup naggatissaani annassagutta paasisariaqarparput qanoq ililluni silarsuatoqaq piuneerutissagaa silarsuassanilu nutaaq naapertuilluartoq pilersissagaa. Maanna tusassavat qanoq ililluni taamaaliussasoq.

Tamanna Biibilimi akineqarpoq Danielimik allakkat, kapitali 2, versi 44-mi. Tassani nalerput eqqartorneqarpoq. Ima allassimavoq: “Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.”

Paasiviuk? — Biibilimi allassimavoq Guutip naalagaaffiata silarsuup matuma naalagaaffii tamaasa piuneerutissagai. Sooq taamaaliussava? — Guutip kunnginngortitaa naalakkumanngimmassuk. Kunnginngortitaa kinaagami? — Tassa Jiisusi Kristusi!

Jiisusip Kristusip, Guutip kunngitut toqqagaata, Harmagedonimi silarsuaq manna piuneerutissavaa

Jehova Guuti pisinnaatitaavoq nammineq aalajangissallugu naalagaaffik qanoq ittoq naalakkersuissasoq, erninilu Jiisusi kunngissatut toqqarsimavaa. Qanittukkut Jiisusi Kristusi, Guutip naalakkersuisuatut, silarsuup matuma naalagaaffii piuneerunneqarpata siulersortaassaaq. Biibilimi Saqqummersitat kapitali 19, versi 11-16-imi Jiisusip taamaaliornissaa allaaserineqarpoq. Uani assilissami takusinnaavat. Sorsunneq Guutip silarsuarmi matumani naalagaaffinnik tamanik suujunnaarsitsiffissaa Harmagedonimik taaneqarpoq.

Tassa Guuti oqarpoq nunarsuup naalagaaffii tamaasa piuneerutissallugit. Oqarpa uagut ikiussagitsinni? — Naamik. Biibilimi Harmagedoni ‘Guutip Ajugaqanngitsup ullussarsuani sorsunnissamik’  taaneqarpoq. (Saqqummersitat 16:14, 16) Harmagedoni Guutip sorsunnissaraa, Jiisusi Kristusilu qilammiorpassuarnut sorsuttussanut siuttuutissavaa. Qanittukkut Harmagedonissasoraajuk? Tamanna paasiniariartigu.

Ullussaq Jehovap inunnik ajortunik piiaaffissaa kiffartortiminillu annaassiffissaa pillugit atuariarta: Ussatit 2:21, 22; Esaja 26:20, 21; Jeremia 25:31-33; Matthæusi 24:21, 22.