ULLUMI nerivit? — Kina nerisassiorpa? — Immaqa anaanat, immaqaluunniit alla. Sooruna Guuti nerisavut pillugit qujaffigissassagipput? — Nerisassat Guutip pinngortitarimmagit. Soorunami aamma nerisassiortoq uagutsinnullu sassaallertoq qujaffigisassavarput.

Ilaannikkut uagut pilluta iliuuseqartut qujaffiginissaat puiortarparput, ilaa? Ajoqersuisorsuaq nunamiikkallarmat ilaasa qujaffiginissaa puiorpaat. Taakku tassaapput pupissut ilaat.

Nalunngiliuk pupinneq sunaanersoq? — Pupinneq nappaataavoq ajortorujussuaq. Tamatuma allaat timip neqaata ilaa katagartissinnaavaa. Taamani Jiisusi nunamiikkallarmat pupissut inunnut allanut ungasissumiillutik inuusariaqartarput. Pupissullu inuk alla qanilliartortoq takuguniuk suaartariaqarpoq qanilleqqunagu. Taamaaliortarput inoqatitik qanillivallaarpata nappaammik tunillannginniassagamikkit.

Jiisusilli pupissut inussiarnerfigai. Ilaanni Jerusalemip tungaanukartilluni illoqarfeerannguaq aqqusaarpaa. Illoqarfik qanillilermagu pupissut qulit naapigiarpaat. Tusarsimavaat Jiisusi Guutimit pissaanermik tunineqarsimasoq nappaatinik tamalaanik ajorunnaarsitsinissamut.

Pupissut Jiisusi qanillivinngilaat. Ungasinniarpaat. Upperaalli pupissuujunnaartissinnaagaatik. Ajoqersuisorsuaq takugamikku torlulaffigaat: ‘Jiisusi, ajoqersuisoq, ikiortigut!’

 Inuit napparsimasut nalligisarpigit? — Jiisusip nalligisarpai. Nalunngilaa pupinneq qanoq ajortigisoq. Angutit ima akivai: “Palasinut takutikkiartoritsi.” — Lukasi 17:11-14.

Jiisusip pupissut qanoq ilioqquai?

Sooruna Jiisusip taamaalioqqugai? Jehovap innuttani pupinneq pillugu inatsimmik tunisimammagit. Inatsisini allassimavoq Guutip palasiisa ilaata pupissup amia misissussagaa. Palasip pupissoq oqarfigissavaa napparsimajunnaarpat. Nappaataarukkunilu inuit peqqissut akornanni inooqqilersinnaavoq. — 3 Mosesi 13:16, 17.

Pupissulli taakku suli napparsimapput. Jiisusip oqarneratut palasimukarpat? — Aap, ingerlaannaq palasimukarput. Upperaat Jiisusip nappaataarutsissagaatik. Qanormi pisoqarpa?

 Aap, palasimukartillutik ajorunnaarput peqqissilluinnarlutillu! Jiisusip pissaaneqarnera upperigamikku akilerneqarput. Qanoq pilluartigisimassappat! Qanoq iliorsimassagaluarpat qujamasunnertik takutinniarlugu? Aap, illit qanoq iliorsimassagaluarpit? —

Pupissup uuma qanoq iliornissani eqqaamavaa?

Ajorunnaartut ilaat ataaseq Jiisusimut uterpoq. Jehova unnersiutigilerpaa nersulerlugulu. Taamaaliornermigut eqqortumik iliorpoq, Guutimmi pissaanerata ikiuineratigut ajorunnaarsitaavoq. Ajoqersuisorsuup isigaasa saavannut pallorpoq qutsavigalugulu. Jiisusip ajorunnaarsitsineranut taama qujamasutsigaaq.

Taakkumi allat qulingiluat? Jiisusi ima aperivoq: ‘Ajorunnaartut quliunnginnerpat? Naammi taakku qulingiluat? Ataasiinnaq Guuti nersorniarlugu uterpa?’

Aap, ilumoorpoq. Pupissut ilaata ataasiinnaap Jehova nersorpaa uterlunilu Jiisusi qutsaviginiarlugu. Angut taanna Samariamiuugaluarpoq, nunami allamioq. Allat qulingiluat Guutimut Jiisusimulluunniit qujanngillat. — Lukasi 17:15-19.

 Angutit taakkua ilaat kina assigaajuk? Samariamiutut iliorusuppugut, ilaa? — Allanit ajunngitsuliorfigineqarutta suna eqqaamassavarput? — Aap, qujanissarput eqqaamassavarput. Inuppassuit tamanna puiortarpaat. Qujanerli ajunngitsuliorneruvoq. Taamaaliortarutta Jehova Guuti erneralu Jiisusi nuannaartissavavut.

Qanoq pupissoq Jiisusimut utertoq ilaarsinnaaviuk?

Eqqarsaleraangatta allat uagutsinnut ikiuinerpassui eqqaalertarpavut. Napparsimanikuuit? — Immaqa pupissutut taakkunatut qulitulli napparsimatiginikkuunngikkaluarputit. Immaqali nuarujussuarnikuuvutit imaluunniit naarlorujussuarnikuullutit. Isumasorneqarnikuuit? — Immaqa nakorsaammik tunineqarsimassaatit imaluunniit allamik ikiorneqarsimassaatit. Peqqissiartulerniassagavit ikiorneqarnerit nuannaarutigaat, ilaa? —

Angutip Samariamiup Jiisusi qutsavigaa ajorunnaarsimmani, tamannalu Jiisusip nuannaarutigaa. Ilimagaajuk anaanat ataatallu iliuusaannut qutsavigigukkit aamma nuannaalissasut? — Tamanna ilimanarluinnarpoq.

Sooruna qujasarnissaq pingaaruteqartoq?

Inuit ilaasa ullut tamaasa sapaatilluunniit akunneri tamarluinnaasa ikiortarpaatsit. Immaqa suliffigigamikku taamaaliornertillu nuannaralugu. Taamaakkaluartorli qujaffiginissaat puigortassanngilat. Atuarfimmi ilinniartitsisuit ilungersorlutik ikiortarpaatsit amerlasuunik ilikkagaqarniassagavit. Tassa suliffiat, taamaakkaluartorli  nuannaassapput qujaffigigukkit ikiormatsit ilinniartillutillu.

Ilaannikkut suunngitsunnguamik allanit ikiorneqartarpugut. Mappiunneqarnikuuit? Nerisillusiluunniit nerisassanik isaassiffigineqarnikuuit? Allaat taama suunngitsigisumut qujassalluni ajunngitsuliorneruvoq.

Eqqaamasarutsigu nunami maani inunnut qujasarnissarput, ilimanarportaaq Ataatatsinnut qilammiusumut qujasarnissarput eqqaamasassagipput. Jehovamut qujassutissarpassuaqarpugut! Inuunermik tunivaatigut ajunngitsorpassuarnillu inuunitsinni nuannaarutigisinnaasatsinnik. Pissutissaqarluarpugut Guuti nersussallugu ullut tamaasa ajunngitsumik eqqartorneratigut.

Qujaneq pillugu Tussiaat 92:2-mi, Efesosimiut 5:20-mi, Kolossemiut 3:17-imi aamma 1 Thessalonikamiut 5:18-imi atuarsinnaavugut.