Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 47

Qanoq nalunngilarput Harmagedoni qanillisoq?

Qanoq nalunngilarput Harmagedoni qanillisoq?

NALUNAAQUT sunaasoq nalunngiliuk? — Kapitali 46-mi nalunaaqut Guutip tunniussaa pillugu atuarpugut, tassa neriusaaq. Tamanna takussutissaavoq Guutip silarsuaq tamakkerlugu ulersuaqartitseqqinngisaannarnissaanut. Jiisusip apustilii aamma nalunaaqummik takorusupput. Tamanna Jiisusip qaqugu takkuteqqinnissaanik silarsuullu matuma naggatissaata qaqugu qanillinissaanik takutitsissaaq. — Matthæusi 24:3.

Jiisusi qilammi takussaasussaanngimmat nalunaaqummik kunnginngorsimaneranut takussutissaqartariaqarpoq. Taamaattumik Jiisusip ajoqersukkani eqqumaffigisassaannik, maani nunami takuneqarsinnaasunik, oqaluttuuppai. Tamakku pippata paasissavaat qilammi naalakkersuilersimasoq.

Jiisusip ajoqersukkat nalunaaqummik eqqumaffiginninnissaata  qanoq pingaaruteqartigineranik paasitippai ima oqarluni: “Figenequt orpiillu allat tamaasa isigeriarsigit. Pilutanittut takuniariaraangassigit immissinnik paasereertarparsi aasaq qanillisoq.” Aap, aasalernera takuneqarsinnaavoq. Aamma Harmagedoni qanillisoq takuneqarsinnaavoq, Jiisusip pissutsit eqqartugai pippata. — Lukasi 21:29, 30.

Jiisusip figenequt eqqartoramiuk sumik ilinniartinniarpaatigut?

Quppernermi uani tullianilu assiliartaasut Jiisusip pissutsinut Guutip naalagaaffiata qanillineranut  nalunaaqutaasussat ilaattut eqqartugai takusinnaavatit. Taakku tamarmik pippata, Guutip naalagaaffiata Kristusi naalakkersuisoralugu naalagaaffiit allat tamaasa piiassavai. Qanoq Guutip naalagaaffia taamaaliussasoq kapitali 46-mi paasivarput.

Quppernerni taakkunani assiliartaasut isiginnaaqqissaariakkit, taava oqaluuserilaassavavut. Taakku pillugit Matthæusi 24:6-14-imi aamma Lukasi 21:9-11-mi atuarsinnaavutit. Aamma malugeriaruk normulersorneqarsimammata. Normut taakku aamma assiliartaanut nassuiaataasut immikkoortut aallartinneranni takusinnaavatit. Maanna nalunaaqut Jiisusip eqqartugaasa immikkoortui assigiinngitsut eqqartussavavut ullumikkullu eqquunnersut paasiniarlugu.

(1) Jiisusi ima oqarpoq: ‘Sorsuuppaluttunik tusaasarumaarpusi sorsuttunillu tusagaqartarumaarlusi. Inuiaat pikitsitsiumaarput inuiannut naalagaaffillu naalagaaffimmut.’ Sorsunnerit pillugit tusagaqartarpugut? — Sorsunnersuaq siulleq 1914-imit 1918-imut sivisussuseqarpoq sorsunnersuullu aappaa 1939-mit 1945-mut. Taakku sioqqullugit sorsunnersuaqarsimanngisaannarpoq! Maannali silarsuarmi tamarmi sorsunneqarpoq. Ullut tamarluinnaasa aviisini fjernsynimilu sorsunnerit eqqartorneqartarput.

(2) Jiisusi aamma ima oqarpoq: ‘Sumi tamani kaannersuaqartarumaarpoq.’ Nalugunanngilat inuit ilaannaat naammattunik nerisartut. Ullut tamaasa inuit tusindillit naammattumik nerineq ajoramik toqusarput.

(3) Jiisusi nangilluni ima oqarpoq: ‘Sumi tamani nappaassuaqartarumaarpoq toqoraataasunik.’ Nappaassuit taakku ilaat tassaavoq ‘spaniamiut nappaataat’. Ukiup ataatsip ingerlanerinnaani inuit 20 millionit missaasa toqussutigaat. Ullumikkut inuit suli amerlanerit aids-imik toqquteqartarput. Aammattaaq kræfti, uummalluutit allallu ukiut tamaasa inuppassuit toqqutigisarpaat.

 (4) Nalunaaqutip immikkoortuisa ilaat alla tassa: ‘Sumi tamani nuna sajuttarumaarpoq.’ Nuna sajukkaangat qanoq pisoqartarami? — Nuna ima sajutsigisinnaavoq allaat illut nakkaassinnaallutik sequmillutik, inuillu ajunaarlutik. 1914-imiilli ukiumut amerlasoorpassuariarluni nuna sajuttarpoq. Nunap sajunnera pillugu tusagaqarnikuuit? —

(5) Jiisusip nalunaaqutip immikkoortuisa ilaat alla eqqartugaa tassaavoq ‘ajussuseq ingasatsikkiartussasoq’. Taamaattuminguna nakuusernerit tillinniarnerillu taama amerlatigisut. Sumi tamani inuit illuminnut tillinniartoqarnissaa annilaangatigaat. Aatsaat taama silarsuarmi ajussuseqartigalunilu pinerlunneqartigaaq.

(6) Nalunaaqutip immikkoortuisa ilaat pingaartoq Jiisusip ima eqqaavaa: ‘Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.’ (Matthæusi 24:14) ‘Iivangkiiliu’, isumaqartoq nutaarsiassaq nuannersoq, upperigukku allanut oqaluttuarerusussavat. Taamaalioruillu nalunaaqutip immikkoortuisa ilaannik eqquutitseqataassaatit.

Inuit ilaat oqartarput pissutsit Jiisusip siulittuutigisai qangalili pisartut. Tamakkuli tamarmik silarsuarmi sumi tamani ataatsikkut pisut siornatigut takuneqanngisaannarpoq. Nalunaaqut qanoq isumaqartoq paasiviuk? — Isumaqarpoq pisartut tamakkorpassuit takulerutsigit taava silarsuaq ajortoq peerneqangajalersoq Guutillu silarsuassaa nutaaq qanillisoq.

Jiisusip nalunaaqut eqqartoramiuk piffissaq aalajangersimasoq eqqartorpaa. Ima oqarpoq: ‘Qinugitsi qimaanissarsi ukiukkut peqqunagu.’ (Matthæusi 24:20) Tamanna qanoq isumaqarsoraajuk? —

Ukiukkut ajunaarnersuaqartillugu qimaassagaanni angalaneq ilungersunassagunarlunilu navianartorsiornassagunarpoq, ilaa?  — Aap, qimaasinnaagaluaraanniluunniit ilungersuanassaqaaq. Ukiukkut silarlutsillugu toqusoqassappat, immaqa silagittartillugu qimaanissamut ulapippallaaramik alianassaqaaq, ilaa? —

Jiisusip ukiukkut qimaaneq eqqartoramiuk sumik ilinniartinniarpaatigut?

Jiisusi oqarmat qimaanissamut ukiornissaa utaqqeqqunagu ilinniartitsissutiginiagaa paasiviuk? — Ilinniartinniarpaatigut Jehovamik asanninnitsinnik taassuminngalu kiffartorfiginnerusunnitsinnik ersersitsinissaq kinguartitissanngikkipput. Nalunngilarpummi Harmagedoni qanillisoq. Kinguartiterigutta kingusinaaratarsinnaavugut. Taava ulersuup siorna inuusimasut iliorneratut iliussaagut; taakku Noap oqaasii tusarsimavaat umiarsuarmulli ikinatik.

Maanna oqaluuserissavarput Harmagedonereerpat qanoq pisoqarnissaa. Tusassavarput Jehova tamatsinnut ullumikkut imminik asannittunut imminullu kiffartortunut qanoq iliussanersoq.

Allassimaffiit allat Harmagedonip qanillinera pillugu atuarsinnaasatit ukuupput: 2 Timotheusi 3:1-5; 2 Petrusi 3:3, 4.