Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 45

Guutip naalagaaffia suua? Qanoq takutittarparput tapersersorlugu?

Guutip naalagaaffia suua? Qanoq takutittarparput tapersersorlugu?

QINNUT Jiisusip ajoqersukkaminut ilinniartitsissutigisaa nalunngiliuk? — Biibilimi atuariartigu. Matthæusi 6:9-13-imi allaqqavoq. Tassa qinnut inuppassuit ataatarpuumik taasagaat, tassanilu ilaatigut ima qinnuteqarpoq: “Naalagaaffiit tikiulli.” Nalunngiliuk Guutip naalagaaffia sunaanersoq? —

Kunngeqarfiuvoq, tassa naalagaaffik kunngimit aqunneqartoq. Guutillu naalagaaffigigamiuk Guutip aalajangerpaa kina tassani kunngiussanersoq.

Guutimmi kina kunngissatut toqqarpaa? — Tassa ernini Jiisusi Kristusi qilammiittoq. Naalakkersuisunit inuit qinigaannit pitsaaneruvoq. Nalunngiliuk sooq? — Tassa Jiisusip Ataatani, Jehova, asagamiuk. Taamaattumik eqqortuliortuaannarusuppoq.

 Jiisusi Betlehemimi inunngunngikkallarmat, Biibilimi siulittuutigineqarpoq tassani inunngussasoq Jiisusilu Guutimit kunngitut toqqarneqarumaartoq. Soorlu Esaja 9:5, 6-imi atuarsinnaagipput. Tassani allassimavoq: “Naalungiarmi uatsinnut erniuvoq, erneq uatsinnut tunniussaavoq, naalagaassuserlu tuimiugissavaa. Aterissavaalu . . . Eqqissinermut Naalagaaneq. Naalagaassusia angissaqaaq eqqissinerlu atajuassalluni.”

Naalagaassuseq tuimiugissagaa isumaqarpoq naalakkersuinermut akisussaaffeqassasoq. Jiisusi ‘Naalagaanermik’ taaneqarpoq. Jiisusi aamma kunngikkormiuuvoq Jehovap, kunnginit tamanit qutsinnerpaap, ernerimmani. Jehovap Jiisusi naalagaaffimmini, ukiuni tusindini nunarsuarmut naalakkersuisussami, kunngissatut suliakkerpaa. Soorlu kapitali 36-mi atuaripput, 144.000-it Jiisusi ilagalugu naalakkersueqataassasut. (Saqqummersitat 14:1, 4; 20:6) Jiisusi kuisereerami “ima oqaluussisalerpoq: ‘Allamik isumataaritsi, Qilaap Naalagaaffia qanillimmat.’” — Matthæusi 4:17.

Sooruna Jiisusi oqartoq “Qilaap Naalagaaffia” qanillisoq? — Taama oqarpoq nammineq akornanniikkami kingornalu qilammiit kunngitut naalakkersuissagami. Taamaattuminguna Jiisusi aamma oqartoq: ‘Guutip naalagaaffia akornassinniippoq.’ (Lukasi 17:21) Jehovap kunngia ima qanitsigerusussinnaaviuk allaat attorsinnaallugu? —

Suliassaruna pingaartoq suna suliarissallugu Jiisusi nunamukarsimasoq? — Jiisusip tamanna nammineq akivaa ima oqarluni: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.” (Lukasi 4:43) Jiisusip nalunngilaa kisimiissimasuuguni tamakkiisumik oqaluussinissani sapissallugu. Taavami qanoq iliorpa? —

Suliassaq suna suliarissallugu Jiisusi nunamukarsimava?

Jiisusip oqaluusseqatissani toqqarpai ilinniartillugillu qanoq iliussasut. Ilinniartitai siulliit tassaapput  aqqaneq-marluk apustilitut toqqagai. (Matthæusi 10:5, 7) Apustililli kisimik oqaluussinissamut ilinniartinneqarpat? Naamik, Biibilimi allassimavoq Jiisusip suli amerlanerusut ilinniartikkai. Ilaanni ajoqersukkat 70-it allat marlukkuutaarlugit aallartippai. Inuit qanoq oqarfigissagamikkit? — Jiisusip ima oqarfigai: ‘Inuit ima oqaluussiffigiuarsigit: “Guutip naalagaaffia ilissinnut qanillivoq.”’ (Lukasi 10:9) Taamaalillutik inuit Guutip naalagaaffianik ilinniarput.

Jiisusi sioqquterujussuarlugu Israelimi kunnginngortoq illoqarfimmut siutituup piaraanik qimusserluni tikittarpoq inuit takuniassammanni. Jiisusi taamaaliorpoq naggammik Jerusalemimut tikikkami. Jiisusimi Guutip naalagaaffiani kunngiusussaavoq. Inuimmi kunngitut ilassissavaat? —

Jiisusi siutituumik qimusserluni aggerami inuppassuarnit ilassineqarpoq, amerlanerillu qallersaatitik aqqusinermut siornanut siaartiterpaat. Allat orpiit avalequtaannik killuipput aqqusinermullu siaruarterlugit. Taamaalillutik takutippaat Jiisusi kunngererusullugu. Amerlanersaat qiimmatsallutik nillerput: “Pilluaqqusaali kunngi taanna, [Jehovap] aqqani tikiuttoq!” Upperisarsiornikkulli siuttut ilaasa Jiisusi oqarfigaat ajoqersukkani nipangeqqussagai. — Lukasi 19:28-40.

Sooq inuit uku Jiisusi kunngererusukkunnaarpaat?

Ullut tallimat tamatuma kingorna Jiisusi tigusaavoq Pontiusi Pilatusimullu, Romamiut sinnerlugit naalakkersuisumut, sassartitaalluni. Jiisusip akeraasa Jiisusi imminut kunngitut taasarnerarpaat Romamiullu naalakkersuinerannut akerliunerarlugu. Pilatusip aperaa qanoq tamanna isumaqarfigineraa. Jiisusip erseqqissarpaa naalakkersuinerannik arsaarniarnagit. Pilatusi ima akivaa: “Uanga naalagaaffiga silarsuarmit matumannga pinngilaq.” — Johannesi 18:36.

Tamatuma kingorna Pilatusi anivoq inuppassuarnullu oqarluni takusinnaanagu Jiisusi eqqunngitsuliortoq. Inuilli Jiisusi kunngererusukkunnaarpaat. Allaat iperagaanissaa kissaatiginngilaat. (Johannesi  18:37-40) Taava Pilatusip Jiisusi oqaluuteqqippaa, qularutiginagulu Jiisusi eqqunngitsuliorsimanngitsoq. Naggammillu Jiisusi aneqatigaa inunnullu ima oqarluni: “Takussagissi kunngersi!” Inuilli suaartarput: ‘Peerli, peerli, nappakkamut kikiattoruk!’

Pilatusi ima aperivoq: ‘Kunngersi nappakkamut kikiattussanerpara?’ Palasiunerit akipput: “Kaasari kisiat kunngigaarput.” Eqqarsaatigilaariaruk! Palasit ajortut inuit Jiisusimut tunussitikkaat! — Johannesi 19:1-16.

Ullumikkut amerlasuutigut taamanikkutut ippoq. Inuit amerlanersaasa Jiisusi kunngererusunngilaat.  Immaqa oqartaraluarput Guuti upperalugu, kisianni Guutimit Jiisusimilluunniit oqartussaaffigineqarusunngillat. Guutip naalagaaffia pinnagu namminneq maani nunarsuarmi naalagaaffeqarusunnerupput.

Uagummi? Guutip naalagaaffianik ilinniaraangatta naalagaaffiatalu suliarisassarpassuinik nuannersunik ilinniaraangatta qanoq sunnerneqartarpugut? — Jehova asalertarparput, ilaa? — Qanoq ililluta takutissinnaavarput asagipput, naalagaaffialu tapersersorumallugu? —

Sooq Jiisusi kuisippa, Guutillu qanoq takutippaa akueralugu?

Jiisusip ilaarneratigut taamaaliorsinnaavugut. Jiisusimi qanoq iliorpa takutinniarlugu Jehova asallugu? — Jiisusi ima nassuiaavoq: ‘Tamatigut iluarisaanik iliortarpunga.’ (Johannesi 8:29) Aap, Jiisusi nunamut pivoq ‘Guutip piumasaa malillugu iliorumalluni’ aamma ‘suliassarititaa naammassiniarlugu’. (Hebræerit 10:7; Johannesi 4:34) Tusassavallu Jiisusi oqaluussilinnginnermini qanoq iliortoq.

Jiisusi Johannesi Kuisisumukarpoq kuussuup Jordanip eqqaanut. Imermullu pigamik Johannesip imermut morsutsippaa nuisillugulu. Kuisippoq. Nalunngiliuk sooq Jiisusi Johannesimut kuisittoq? —

Sumi Guutip naalagaaffianik oqaluussisinnaavugut?

Jiisusip nammineq Johannesi taama peqqugamiuk. Qanormi nalunngilarput Guutip aamma tamanna kissaatigigaa? — Nalunngilarput Guutip  nammineq taanna eqqortuliornerarmagu. Jiisusi imermit qaqimmat Guuti qilammit ima oqarpoq: “Illit tassaavutit ernera asasara, nuannarisaraakkit!” Guutip aamma anersaani illernartoq tuitut Jiisusimut aqqartippaa. Jiisusip kuisinnermigut takutippaa inuunini naallugu, tassa naassaanngitsumik, Jehova kiffartuunnissaa kissaatigalugu. — Markusi 1:9-11.

Suli peroriartorputit. Perorneruguilli Jiisusi ilaarlugu kuisissavit? — Jiisusi ilaartariaqarparput Biibilimi allassimagami ‘maligassamik qimatsivigigaatigut, tumini atuarlugit malinnaaqqulluta’. (1 Petrusi 2:21) Siunissami kuisikkuit takutissavat Guutip naalagaaffia tapersersorlugu kissaatigigillu oqartussaaffigissagaatit. Kuisinnerli naammanngilaq.

Aamma Jiisusip oqaasii maleruassavavut. Assersuutigalugu oqarpoq ‘silarsuarmut ilaassanngitsugut’. Silarsuarmi iliuutsit akuuffigivallaarutsigit Jiisusi naalassavarput? Jiisusip apustiliisalu tamakku ingalassimavaat. (Johannesi 17:14, NV) Taavami susarpat? — Guutip naalagaaffianik allat oqaluussiffigisarpaat. Tamanna soqutigineruaat. Uagut aamma taamaaliorsinnaavugut? — Aap, taamaaliorsinnaavugut. Taamaalioruttalu Guutip naalagaaffiata tikiunnissaanik qinnuterput ilumoorullugu takutissavarput.

Allassimaffiit tulliuttut quppikkit atuarlugillu tassani oqaluttuarineqarmat qanoq ililluta takutissinnaagipput Guutip naalagaaffia tapersersorlugu: Matthæusi 6:24-33; 24:14; 1 Johannesi 2:15-17; 5:3.