Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 39

Guutip ernini puiunngilaa

Guutip ernini puiunngilaa

JIISUSI ikinngutini Lazarusi toqummat qiavoq. Jiisusi anniartitaammat toqummallu Jehova qanoq misigisimassasoraajuk? — Biibilimi eqqaaneqarpoq Guuti arlaannik pisoqarnera pissutigalugu aliasussinnaasoq. — Tussiaat 78:40, 41; Johannesi 11:35.

Takorloorsinnaaviuk Jehovamut ernini asasani toqummat qanoq artornartigisimassasoq? — Jiisusilli qularinngilaa Ataatami puiussanngikkaani. Taamaattumik toqunissami siuninnguatigut ima oqarfigaa: “[Inuunera] assannut tunniuppara.” — Lukasi 23:46.

Jiisusip toqusunit makititaassalluni qularinngilaa. Ilivermi puiorneqarnavianngilaq. Jiisusi toqusunit makititaareermat, apustilip Petrusip Biibilimi Jiisusi pillugu allassimasoq uparuarpaa. Petrusi ima oqarpoq: ‘Toqusut inaaniiginnassanngilaq [tassa ilivermi], timaalu aserornermik takusaqassanani.’ (Apustilit Suliaat 2:31; Tussiaat 16:10) Jiisusip timaa toqungasoq suli aserunngilaq, tassa asiunngilaq tippannanilu.

 Nunami inuutilluni Jiisusip ajoqersukkani oqarfigai sivisuumik toqungassanani. Nassuiaavoq ‘toqutaassalluni, ullullu pingajuanni makikkumaarluni’. (Lukasi 9:22) Taamaammat Jiisusip makititaanera ajoqersukkat tupaallaatigisariaqanngilaat. Tupaallappat? — Tusassavat.

Tallimanngornermi nalunaaqutaq pingasut missaani Ajoqersuisorsuaq nappakkami toquvoq. Josefi, angut pisooq Killisiuisoqatigiinnut ilaasortaq, isertorluinnarluni Jiisusimik upperinnippoq. Jiisusi toqusoq tusaramiuk Pilatusimukarpoq, tassa Romamiut sinnerlugit nunamik aqutsisuusumut. Tassani Jiisusip timaa nappakkamit aqqarumavaa iliumallugulu. Taava Josefip Jiisusip timaa naatsiivimmukaappaa qaarsumut ilullisamut ilineqarfissaanut, tassa imaappoq inuit toqusut ilineqarfigisartagaannut. Timaa ilineqarmat ujarassuaq qaarusuup ammarnganut assakaatinneqarpoq. Taamaalilluni iliveq matuneqarpoq.

Maanna ullut pingajorilerpaat, sapaataavorlu. Seqineq suli nuisimanngilaq taamaattumillu taarluni. Iliveq sakkutuunit paarineqarpoq. Palasiunerit ilivermik paarseqqusisuupput. Nalunngiliuk sooq? —

Palasit aamma tusarsimavaat Jiisusi oqartoq toqusunit makikkumaarluni. Maanna annilaangatigaat ajoqersugaasa taassuma timaa tillissasoralugu kingornalu Jiisusi toqusunit makinnerarlugu. Taamaammat palasit ilivermi nakkutilliisitsipput. Tassanngaannarli nuna sajulerpoq, taartumilu qaamaneq takussaalerpoq. Tassa Jehovap inngilia! Sakkutuut ersingaaleramik nikissinnaajunnaarput. Inngili ilivermukarpoq ujarassuarlu assakarlugu. Iliveq imaqanngilaq!

Sooq iliveq imaqanngila? Susoqarami?

Soorlu apustili Petrusi kingusinnerusukkut oqartoq: “Jiisusi taanna Guutip makitissimavaa.” (Apustilit Suliaat 2:32) Guutip Jiisusip inuunera tunniuteqqippaa nunamukanngikkallarmallu timaata assinganik tunillugu. Anersaatut makititaavoq. Soorlu nalunngikkit  inngilit aamma anersaajusut. (1 Petrusi 3:18) Tassa takuneqarsinnaanngilaq, inuillu takusinnaassappanni inuttut timeqarluni takutittariaqarpoq. Taamaaliorpa? — Tusassavat.

Seqineq nuiartorpoq, sakkutuullu qimagutereerput. Maria Magdalene arnallu allat Jiisusimut ajoqersugaasut ilivermukarput Jiisusi toqusimasoq uuliamik tanikkiartorlugu. Ingerlatillutik oqaluuseraat kia ujaqqamik oqimaatsumik assakaatitseqatigisinnaaneraatik. (Markusi 16:3) Apuukkamilli ujarak assakartinneqareersimavoq. Iliveq imaqanngilaq! Jiisusip timaa toqungasoq tammarsimavoq! Mariap Magdalenep Jiisusip apustiliisa ilaat tuaviorluni ujalerpai.

Arnat allat ilivermiiginnarput. Tupigusullutik eqqarsarput: ‘Jiisusimmita timaa sumut piva?’ Tassanngaannaq angutit marluk qaammarissunik atisallit takulerpaat. Tassa inngilit! Arnat ima oqarfigaat: ‘Sooq Jiisusi maani ujarpisiuk? Toqusunit makissimavoq. Tuaviorlusi ajoqersugai oqarfigiartorsigit.’ Arnat taakku marluk qanoq tuaviortigisut takorloorsinnaagunarpat! Aqqutaanili angummik naapitsipput. Kinaasoraajuk? —

Tassa Jiisusi inuttut timeqarluni taakkununnga takutittoq! Aamma oqarfigai tuaviorlutik ajoqersukkat oqarfigiartussagaat. Arnat nuannaartorujussuupput. Ajoqersukkat nanivaat oqarfigalugillu: ‘Jiisusi uumavoq! Nammineq takuarput!’ Mariap Petrusi Johannesilu oqarfigereerpai iliveq imaqanngitsoq. Ilivermukarput alakkarlugulu soorlu uani takusinnaagit. Jiisusip nermutigisimasaa takuaat, naluaalli qanoq isumaqassallutik. Jiisusi uummaqqissimasoq uppererusukkaluarpaat, kisianni upperiuminaappallaarpoq.

Qanormita Petrusi Johannesilu isumaliorpat?

Sapaammi tassani kingusinnerulaartukkut Jiisusi ajoqersukkanut marlunnut illoqarfimmut Emmausiliartunut takutippoq. Jiisusip ingiaqatigai oqaloqatigalugillu, taakkuali ilisarinngilaat inuutilluni timimi assinganik timeqarluni takutinngimmat. Jiisusili nereqatigaat, qinuvorlu — ilisarilerpaallu! Pilluangaalerlutik tuaviorlutik aqqutikkut  takisuukkut Jerusalemimut uterlutik oqaluttuariartorpaat! Immaqa tamatuma kinguninnguatigut Jiisusi Petrusimut takutippoq takusinnaaniassammagu uumalluni.

Kingusinnerusukkut sapaat taanna unnukkut ajoqersugarpaaluit inimi katersuusimapput. Matut parnaaqqapput. Tassanngaannarli Jiisusi inimi akornanniilerpoq! Nalujunnaarpaat Ajoqersuisorsuaq ilumut uumasoq. Takorlooriaruk qanoq pilluartigisut! — Matthæusi 28:1-15; Lukasi 24:1-49; Johannesi 19:38–20:21.

Ulluni 40-ni Jiisusi timit assigiinngitsut atorlugit ajoqersukkaminut takutittarpoq uumanini takusinnaaniassammassuk. Taava nunarsuaq qimappaa Ataataminullu qilaliarluni. (Apustilit Suliaat 1:9-11)  Sivitsorianngitsoq ajoqersukkat tamanut oqaluuserilerpaat Guutip Jiisusi toqusunit makitissimagaa. Oqaluussiuaannarput naak palasinit unatarneqartaraluarlutik ilatillu toqunneqaraluartut. Nalunngilaat toqugaluarunik Guutip eqqaamassagaatsik, soorlu ernini eqqaamasimagaa.

Suut inuppassuit poorskip nalaani soqutigisarpaat? Illimmi?

Aap, Jiisusip ajoqersugai siulliit inunnit ullumikkut inuusunit amerlanernit allaanerulluinnarput! Ukiup taamaalinerani Jiisusip toquffiata makititaaneratalu nalaani inuppassuit manniit, kukkukuuaqqat, ukallillu tamakkulu assigisaat poorskimi atorneqartartut kisiisa eqqarsaatigisarpaat. Biibilimili tamakku eqqartorneqanngilluinnarput. Guutimut kiffartussasugut eqqartorneqarpoq.

Jiisusip ajoqersugai ilaarsinnaavavut inuit Guuti iliuuserisimasaanik nuanningaartumik oqaluttuullugit: Ernini toqusunit makitissimavaa. Annilaanganissatsinnut pissutissaqanngilagut inuilluunniit toqunniarluta sioorasaaraluarpatigut. Toqussagaluarutta Jehovap eqqaamassavaatigut makitillutalu soorlu Jiisusi makitissimagaa.

Guutip kiffartortini puiunngisaannassagai ullullu ilaanni uummarteqqissagai nalunagu nuanneq, ilaa? — Tamanna nalunnginnatsigu Jehovap qanoq nuannaartinnissaa paaserusussavarput. Nalunngiliuk qanoq iliorsinnaasugut? — Tamanna kapitalip tulliani tusassavat.

Upperluarsinnaavugut neriuuteqarlutalu nalunnginnatsigu Jiisusi makititaasimasoq. Atuakkit Apustilit Suliaat 2:22-36; 4:18-20 aamma 1 Korinthimiut 15:3-8, 20-23.