Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 4

Guuti ateqarpoq

Guuti ateqarpoq

AATSAAT siullerpaamik naapitaqaraangavit suna siulliullugu apeqqutigisarpiuk? — Aperisarputit: “Qanoq ateqarpit?” Taava atia paasisarpat. Tamatta ateqarpugut. Guutip inuk siullerpaaq Adamimik atserpaa. Adamillu nuliani Evamik atserpaa.

Inuilli kisimik ateqanngillat. Uumasuuteqarpit? Immaqaluunniit pinnguaq inuusarluunniit? Peqaruit atsersimassavatit, ilaa? — Ateq pingaartuuvoq.

Unnuit ilaanni ulloriarpassuit isiginnaarigit. Ilimagaajuk aamma taakku ateqartut? — Ateqarput. Guutip ullorissat tamaasa atsersorsimavai. Biibilimi ima allassimavoq: “Ullorissat qassiussusissaat aalajangerpaa tamaasalu immikkut aqqisigut taasarlugit.” — Tussiaat 147:4.

Nalunngiliuk ullorissat tamarmik immikkut ateqartut?

Silarsuarmi tamarmi kina pingaarnerpaasoraajuk? — Ilumut, Guutiuvoq. Taanna aamma ateqarnerluni? — Jiisusi oqarpoq ateqartoq. Jiisusi Guutimut qinunermini ima oqarpoq: ‘Aqqit uanga ajoqersukkannut ilisimalersippara.’ (Johannesi 17:26) Ateq taanna nalunngiliuk? — Guutip nammineq oqaluttuuppaatigut. Oqarpoq: “Uanga tassa Jahve [Jehova, NV], tassa atera!” Ukiorpassuarni Kalaallit Nunaanni Guutip atia Jehova taamatut atorneqartarsimavoq. Guutip atia tassaavoq JEHOVA. — Esaja 42:8.

Nuannarisarpiuk allat qanoq ateqarnerit eqqaamagaangassuk? — Aap, nuannarisarpat, ilaa? — Jehovap aamma kissaatigaa atini eqqaamassagipput. Taamaattumik pingaaruteqarpoq Guuti oqaluuserigaangatsigu Jehovap atiata atortarnissaa. Ajoqersuisorsuup allanik oqaloqateqaraangami Guutip atia, Jehova, atortarpaa. Ilaanni Jiisusi ima oqarpoq: “[Jehova] Guutit asassavat uummatikkut iluunngarlutit.” — Markusi 12:30.

 Soorunami Jiisusip nalunngilaa Jehovap atia qanoq pingaartigisoq. Taamaattumik atiata atornissaa ajoqersukkaminut ilinniartitsissutigaa. Aamma ilinniartippai atia qinugaangamik atortassagaat. Nalunngilaa Guutip kissaatigigaa inuit tamarmik atini, Jehova, nalussanngikkaat.

Ilaanni Guuti Mosesimut atermi Jehovap pingaaruteqassusia takutinniarlugu aalajangerpoq. Mosesi inuiaqatigiinnut Israelikkunnik taaneqartartunut ilaavoq. Taamani Egyptenimi najugaqarput, tassanilu inuit najugallit Egyptenimiunik taaneqartarput. Taamanikkut Egyptenimiut Israelikkut pinngitsaalillugit inussiatut sulisittarpaat iluanngitsumillu iliorfigisarlugit. Ilaanni Mosesip inuiaqatimi ilaat ikiorniarsaraa. Egyptenimiut kunngiat Faraomik atilik kamangaalerpoq, Mosesilu toqunnialerlugu. Taava Mosesi Egyptenimiit qimaavoq.

Nunamut Midjanimik atilimmut pivoq. Tassani katippoq marlunnillu ernertaarluni. Aamma savanik  paarsisuuvoq. Ullut ilaanni Mosesi qaqqap eqqaaniittunik savanik paarsitilluni eqqumiitsumik takusaqarpoq. Kakillarnaq ikualasoq takuaa; orpigarli ikuallanngilaq. Mosesip takulluarusukkamiuk kakillarnaq ornippaa.

Susoqarsoraajuk? — Kakillarnap qeqqaniit nipi Mosesimut tutsiuppoq! Ima tutsiuppoq: “Mosesi! Mosesi!” Kinamitaavaana oqaluttoq? — Guutiuna oqaluttoq. Suliassarlu annertooq Mosesimut suliaritikkumavaa. Guuti ima oqarpoq: ‘Maanna aallarit! Faraomut Egyptenip kunngianut aallartinniarpakkit, innuttakka Israelikkut Egyptenimit anisikkiartortillugit.’ Guutillu Mosesi ikiorniarlugu neriorsorpaa.

Mosesi kakillarnap ikualasup eqqaaniilluni pingaarutilimmik ilikkagaqarpoq. Suua?

Mosesili akivoq: ‘Taavami Egyptenimi Israelikkut ornillugit oqarfigigukkit Guutip aallartikkaanga, taakkualu Guutip atia apeqqutigippassuk? Taava qanoq akissavakka?’ Guutillu Mosesi akivaa: ‘Israelikkut ima oqarfigissavatit: “Jehovap ilissinnut aallartippaanga,” tassa Jehova atera naassaanngitsumik.’ (2 Mosesi 3:1-15) Tamatuma takutippaa Guuti taamatut ateqartuaannassasoq. Atini allanngortinngisaannassavaa.  Naassaanngitsumik atini Jehova ilisimaneqaatigerusuppaa.

Qanoq ililluni Guutip atini Immami Aappalaartumi ilisimaneqalersippaa?

Mosesi Egyptenimut utermat Egyptenimiut isumaqarput Jehova Israelikkut Guutigigaat pissaaneqanngitsoq. Takorluunngilaat nunarsuarmut tamarmut Guutiusoq. Kisianni Jehova Egyptenip kunngianut ima oqarpoq: ‘Atera nalunaarutigineqaqqugakku nunarsuarmi tamarmi.’ (2 Mosesi 9:16) Jehovallu atini ilisimaneqalersippaa. Nalunngiliuk qanoq ililluni ilisimaneqalersikkaa? —

Tusariassagit. Israelikkut Egyptenimit anineranni Mosesimut siulersortippai. Immamullu Aappalaartumut pimmata Jehovap imaq avissaartippaa, immallu naqqa panertillugu ingerlaffigisinnaaniassammassuk. Israelikkut kamii masatsinngillalluunniit! Faraoli sakkutuuilu immap naqqagut panertukkut malinnaatillugit imersuaq avissaarsimasoq tassanngaannaq avissaaqqajunnaarpoq. Sakkutuut immamit ulugunneqarput tamarmillu ipillutik.

Sivitsunngitsoq Jehovap Immami Aappalaartumi qanoq iliorsimanera nunarsuarmi tamarmi tusaamaneqalerpoq. Qanoq nalunngilarput inuit tamanna tusarsimagaat? — Ukiut 40-t missaat qaangiuttut Jehovap Israelikkut Kana’animut, nunamut neriorsuutigisimasaanut, pipput. Tassani Israelikkut angutit marluk arnaq inuusuttoq Rahabi naapippaat, taannalu  ima oqarpoq: ‘Tusarsimavarput Egyptenimit anigassi Jehovap Immami Ivissuartuumi [Aappalaartumi] aqqutissassinni imaq tissortissimagaa.’ — Josva 2:10.

Ullumikkut inuit amerlasuut Egyptenimiutut ipput. Upperinngilaat Jehovap nunarsuarmut tamarmut Guutiunera. Taamaammat Jehovap kissaatigaa kiffami inunnut allanut oqaluussissutigissagaanni. Jiisusi taamaaliorpoq. Jiisusilu toqungajalerluni, Jehovamut ima qinuvoq: ‘Aqqit taakkununnga ilisimalersippara.’ — Johannesi 17:26.

Jiisusip Guutip atia ilisimaneqalersippaa. Illit Biibilimi Guutip atia takutissinnaaviuk?

 Jiisusitut ikkusuppit? Taava allat oqaluttuussinnaavatit Guutip Jehova aterigaa. Paasilissavat amerlasuut tamanna ilisimanngikkaat. Immaqa tamanna pillugu Biibilimi allassimasumik takutissinnaavatit. Assersuutigalugu Biibili-mi Tussiaat 83:19-imi takuneqarsinnaavoq. Nammineq Biibilerput saqqummeriartigu atuarlugulu. Ima allaqqavoq: “Paasitserlugu illit kisivit — aqqit tassaasoq Jahve [Jehova, NV] — Qutsinnerussaartuusutit nunarsuarmi tamarmi.”

Tamanna sumik ilinniarfigisinnaavarput? — Matumani paasivarput ateq Jehova tassaasoq Qutsinnerpaap, Guutip ajugaqanngitsup, Jiisusimut Ataataasup sunillu tamanik pinngortitsisup aqqa. Taamaattumik Jehova atinit allanit tamanit pingaarnersaavoq. Aamma eqqaamassavat Jiisusi oqarmat Jehova uummaterput tamakkerlugu asassagipput. Illit Jehova asaviuk? —

Qanoq takutissinnaavarput Jehova asagipput? — Ilaatigut taamaaliorsinnaavugut Guuti ilisarisimalerniarlugu ikinngutigilerniassagatsigu. Allallu oqaluttuullugit qanoq ateqartoq. Takutissinnaavarput atia Biibilimi allaqqasoq. Inuit oqaluttuussinnaavavut pinngortitaanik kusanartunik, iliuuserisimasaanillu ajunngitsorpassuarnik. Jehovap tamanna nuannaarutigissavaa, kissaatigaami inunnit ilisarisimaneqarnissani. Taamaaliorsinnaassaagut, ilaa? —

Jehovali pillugu oqalukkaangatta amerlasuut tusarnaarumaneq ajorput. Jiisusi, Ajoqersuisorsuaq, Jehova pillugu oqaluttuaraangat amerlasuut tusarnaarumaneq ajorpaat. Tamannali Jiisusip unissutigineq ajorpaa.

Uagut Jiisusitut iliorniarta. Jehova oqaluuseriuaannarlugu. Taamaaliorutta Jehovap nuannaarutigissavaa, takutissagatsigumi atia asagipput.

Allassimaffiit allat Guutip atiata qanoq pingaaruteqartigineranik takutitsisut atuariartigit: Esaja 12:4, 5; Matthæusi 6:9; Johannesi 17:6; Romamiut 10:13.