Imarisai

Saqqaata tullia

Imai

Jehovap Nalunaajaasui

Kalaallisut

Ajoqersuisorsuaq ilinniarfigiuk

 KAPITALI 10

Jiisusip anersaapiluit pissaaneqarfigai

Jiisusip anersaapiluit pissaaneqarfigai

ILAA eqqaamavat qanoq ililluni Guutip inngiliisa ilaat Saatani Diaavulunngortoq? — Guutimut pikitsitsivoq namminissarsiortuugami pallorfigineqarusukkamilu. Inngilinik allanik taassumunnga ilaliuttoqarpa? — Aap, ilaliuttoqarpoq. Biibilimi anersaapilunnik imaluunniit Saatanip inngiliinik taaneqartarput. — Saqqummersitat 12:9.

Inngilit ajortut imaluunniit anersaapiluit Guuti upperaat? — Biibilimi allaqqavoq Guutip piunera ‘anersaapiluit upperigaat’. (Jaaku 2:19) Ersigivaalli. Nalunnginnamikku Guutip pillarumaaraatik ajortuliatik pillugit. Qanoq ajortulioramik? —

Biibilimi allaqqavoq qilammi inigisartik qimallugu nunarsuarmut aqqartut inuttut inuulerniassagamik. Aqqarput nunami arnanik pinnersunik atoqateqarniassagamik. (1 Mosesi 6:1, 2; Judasi 6) Nalunngiliuk kinguaassiuutitigut atoqateqarneq suunersoq? —

 Tamanna tassaavoq angutip arnallu innangaqatigiitsillutik kinguaassiuutitigut imminnut ataqatigiinnerat. Taamaalilluni anaanaasup naavata iluani meeraq pinngoriartulersinnaasarpoq. Kisianni inngilit arnanut taamatut attaveqarnerat ajortuuvoq. Guutip angutit arnallu katissimasut kisimik atoqatigiinnissaannik pisinnaatippai. Tamanna pitsaavoq, meerarmi inunngoruni anaanaqarlunilu ataataqassaaq; taakkumi katissimagamik meerarlu paarilluarsinnaallugu.

Sunaana inngilit ilaasa iliuuserigaat taama ajortigisoq?

Taamani inngilit imminnut inuttut timileriarlutik arnanik nunarsuarmiittunik atoqateqaramik meerartaarput peroramik angisoorsuanngortunik. Taakku paannikkumatuujupput inunnik ajoqusiisartut. Taamaattumik Guuti ulersuartitsivoq inorujussuit inuillu ajortut suujunnaarsinniarlugit. Guutilli Noa umiarsualiortissimavaa, inuit ikittunnguit ajunngitsuliortut annanniassammata. Ajoqersuisorsuaq oqarpoq ulersuaq taamanilu pisimasut eqqaamassallugit pingaaruteqartoq. — 1 Mosesi 6:3, 4, 13, 14; Lukasi 17:26, 27.

Ulersuaqalermat inngilit ajortut qanoq pisimasoraagit? — Inngilinngoqqipput qilammullu uterlutik. Maannali Guutimut inngiliusinnaajunnaarput, Saatanillu inngilerilerpai, tassa anersaapilunngorput. Meeraammi inorujussuanngorsimasut  qanoq pippat? — Ulersuarmi toqupput, allatulli Guutimut naalakkumanngitsutut.

Sooruna ullumikkut nunarsuarmi aatsaat taama ajortoqartigisoq?

Ulersuup kingorna Guutip anersaapiluit imminnut inunngortittarnerat akueriunnaarpaa. Tassa massakkut takuneqarsinnaanngillat, kisianni suli ajortumik iliortinniarsarisarpaatigut. Anersaapiluit aatsaat taama sukataartigipput allat ajoquserniarlugit. Qilammit nunamut igitaanikuugamik.

Naak anersaapiluit takusinnaanngikkaluarlutigit qularinngilluinnarsinnaavarput piunerat. Biibilimi allaqqavoq Saatanip silarsuaq tamaat tammarteqqagaa, anersaapiluisalu ikioraat. — Saqqummersitat 12:9, 12.

Isumaqarpit Diaavulup tammartissinnaagaatigut, tassa salloqittarluta? — Aap, mianersunngikkutta. Taamaattorli ersigisariaqanngilavut. Ajoqersuisorsuaq ima oqarpoq: ‘Diaavulup uanga tigunngilaanga.’ Jehovamut qanittumik attaveqarutta taassuma Diaavulumut anersaapiluinullu illersussavaatigut. — Johannesi 14:30, NV.

Nalunngittariaqarparpulli anersaapiluit qanoq ilillutik ajortunik iliortinniartaraatigut. Eqqarsariarit. Anersaapiluit nunarsuarmut aqqaramik ajortuliorput. Qanoq? — Ulersuaq sioqqullugu arnanik nunarsuarmiittunik atoqateqaramik, inngilimmi taamaaliortussaanngillat. Ullumikkut anersaapiluit nuannaraat inuit Guutip atoqatigiinnermut inatsisaanik unioqqutitsisut isiginnaassallugit. Kikkunuku kisimik atoqatigiissinnaatitaasut? — Ilumut, tassa katissimasut kisimik atoqatigiissinnaatitaapput.

Ullumikkut nukappissat niviarsissallu atoqatigiittarput, taamaaliortussaanngikkaluarpulli. Biibilimi angutip kinguaassiuutaa eqqartorneqarpoq, usummik taaneqarpoq. (3 Mosesi 15:1-3) Arnap kinguaassiuutai utsunnik taaneqartarput. Kinguaassiuutit Jehovap pinngortippai aalajangersimasumik siunertaqarluni, tassa angutip arnallu katissimasut kisimik nuannaarutiginiassammatigit. Anersaapiluit nuannaartarput inuit Jehovap inatsisaanik unioqqutitsigaangata.  Assersuutigalugu nukappiaqqap niviarsiaqqallu kinguaassiuutitik marluullutik pinnguarigunikkik eqqunngitsuliussapput. Inersimasuunngimmata katissimanatillu taamaaliornerat anersaapiluit nuannaarutigisarpaat. Uagulli anersaapiluit nuannaartikkusunngilavut, ilaa? —

Aamma anersaapiluit allamik nuannarisaqarput, Jehovalli uumigisaanik. Sunaanersoq eqqoriarsinnaaviuk? — Nakuuserneq. (Tussiaat 11:5) Inuit inoqatitik annersikkaangatigit nakuusernermik taaneqartarpoq. Eqqaamajuk inorujussuit, anersaapiluit meeraat, taama pissusilersortut.

Anersaapiluit inuit ersisaassallugit aamma nuannaraat. Ilaannikkut toqusimasup isikkuatut isikkoqarlutik takutittarput. Allaat inuup nipigisimasaa ilaarsinnaavaat. Taamaalillutik amerlasuut salloqittartarpaat isumaqalersillugit toqusimasut suli uumasut, inunnillu oqaloqateqarsinnaasut. Anersaapiluinuku inuit amerlasuut aliortukkanik upperinnilersittaraat.

 Taamaattumik mianersortariaqarpugut Saatanimit anersaapilunnillu salloqittarneqannginniassagatta. Biibilimi ima mianersoqquneqarpugut: ‘Saatani inngiliunerarpoq ajunngitsoq, aamma kiffai ajunngitsuunerarput.’ (2 Korinthimiut 11:14, 15) Piviusumilli anersaapiluit ajortuupput. Takoriartigu qanoq taakkutut ilertinniartaraatigut.

Sumiuna nakuusernermik, kinguaassiuutitigut atoqateqarnermik eqqunngitsumik anersaanillu aliortukkanillu takusaqartartugut? — Ilaa, fjernsynimi, filmini, qarasaasiami pinnguaatini, internettimi ilaannilu titartakkani? Tamakkuninnga isiginnaaraangatta Guutimut imaluunniit Diaavulumut anersaapilunnulluunniit qaninnerulertarpugut? Qanoq isumaqarpit? —

Nakuusertut isiginnaartarutsigit qanoq kinguneqarsinnaava?

Kikkunuku ajortunut tusarnaartinniartaraatigut isiginnaartillutalu? — Aap, Saatanip anersaapiluillu. Suummi uanga illillu tusarnaarlugillu isiginnaartassavavut? — Atuartakkavut, isiginnaartakkavut tusarnaartakkavullu tamarmik ajunngitsuussapput, Jehovamullu kiffartornitsinnut iluaqutaassallutik. Suusinnaappat? —

Ajunngitsut suut iliuuserisinnaavavut?

Ajunngitsunik iliortarutta anersaapiluit ersigisariaqanngilavut. Jiisusimi taakkunannga nukittuneruvoq, taakkualu Jiisusi ersigaat — soorlu anersaapiluit taamani Jiisusimut suaartut: “Tikiuppit suujunnaarsikkumalluta?” (Markusi 1:24) Ilaa nuannaassaagut Jiisusip Saatani anersaapiluilu peersippagit? — Tamatuma nalliunnissaata tungaanut Jiisusi Ataataalu qilammiittoq qanittumik attaveqarfigigutsigit qularutiginngissinnaavarput Jiisusip anersaapilunnut illersorumaaraatigut.

Qanoq iliortussaanerluta atuaqqilaariarta: Jaaku 4:7, 8 aamma 1 Petrusi 5:8, 9.