Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Nr. 1 2017

 BIIBILI INUIT INUUNERANNIK ALLANNGUISITSISARPOQ

Toqorusunngilanga!

Toqorusunngilanga!
  • UKIOQ INUUIA: 1964

  • INUNNGORFIA: TULUIT NUNAAT

  • KOQALUTTUASSARTAA: INUUSUTTUARAQ INUUNERLULLUNI ANAANANNGORTOQ

INUUNINNI PEREERSUT

Londonip ilaani inuttuumi Paddingtonimi inunngorpunga. Anaananni angajukkalu pingasut peroriartorpugut. Ataataga imigassamik ajornartorsiuteqartoq qaqutiguinnaq takusarparput.

Meeraallunga anaanama unnuit tamaasa qinusarnissannik ilinniartippaanga. Mikisumik Tussiaatiinnarnik imalimmik Biibiliuteqarpunga, Tussiaatillu taakku erinalersortarpakka erinarsortarniassagakkit. Ilaanni atuakkami Biibilimut tunngasuunngitsumi puiuikkiussara una atuarpara: “Ullut ilaanni aqagussaqarunnaassaaq.” Oqaatsit taakku pissutigalugit siunissaq eqqarsaatigisalerakku unnuakkut sinissaaruttalerpunga. ‘Soorunami inuuneq siunertaqarnerusimassaaq,’ eqqarsartarpunga. ‘Sooq inuuvunga?’ Toqorusunngilanga!

Anersaarsiornermut tunngasut alapernaaffigisalerpakka. Toqusut oqaluunniartalerpakka, atuaqatikkalu iliveqarfinnukartalerpugut filmillu quilertanartut isiginnaartalerlugit. Tamaasa pissanganartillugillu amiilaaraavut.

Quliinnarnik ukioqarlunga naalatsikkuminaallivunga. Pujortartalerama ueriffigipallappara. Aamma kingusinnerusukkut marihuana atugarilerpara. Aqqanilinnik ukioqarlunga aalakoornartunik misiligaasalerpunga. Mamarinngikkaluarlugu sunniutaa nuannaraara. Aamma nipilersuutit qitinnerlu nuannaraakka. Pisinnaanerit tamaasa festeriartarlungalu imerniartarfinniittarpunga. Unnuakkut nipaarsaarlunga anisarlungalu ullaassakkut isertarpunga. Ullaanngortorlu qasoqqasarama atuariartunngitsoorajuppunga. Atuariartoraangamalu anitsiarfinni imertarpunga.

Anaanama inuunerlunnera ilisimasaqarfigivallaanngilaa. Ukiumi atuarfigisanni kingullermi karakteeriluttorujussuunera anaanama pakatsissutigalugulu kamassutigaa. Oqqappugut, uangalu allamut nuuppunga. Tony, rastafariusoq, peerartaara ineqatigillatsiarpara. Annikitsutigut pinerluttartuuvoq, ikiaroornartunillu tuniniaasarluni nakuuserajuttorujussuartut ilisimaneqarpoq. Naartuliaarpunga, 16-iinnarnillu ukioqarlunga ernertaarpugut.

 BIIBILI QANOQ ALLANNGUSSUTIGIGIGA

Jehovap Nalunaajaasui naapeqqaarpakka anaananut kisimiittunut meeraannullu angerlarsimaffimmi najugaqartillunga. Oqartussaasunit tassunga inissitaavunga. Nalunaajaasut arnat marluk anaanaq inuusuttoq alla pulaartarpaat. Ilaanni eqqartueqatigiinnerat peqataaffigaara. Nalunaajaasut kukkusut uppernarsarusuppara. Apeqquterpassuakkali tamaasa eqqissillutik erseqqissumillu Biibili tunngavigalugu akisarpaat. Inussiarnersuullutillu saamasuupput, tamannalu kajumississutigigakku Biibilimik atuaqqissaqatigiumaneqarnera akueraara.

Biibilimeersunik ilikkagaqapallappunga inuuninnik allannguissutigisannik. Inuusuttuullungali toqunissara ersigisarpara. Maannali Jiisusip toqusunit makititaanissamik ajoqersuutaa paasilerpara! (Johannesi 5:28, 29) Aamma ilikkarpara Guutip uanga inuttut isumassoraanga. (1 Petrusi 5:7) Ingammik Jeremiap oqaasii uku killitsissutigaakka: ‘Uanga nalunngilakka ilissi pillusi pilersaarutigisakka, oqarpoq Naalagaq, pilluarnissamik pilersaaruteqarama ajunaarnissamik pinnanga. Siunissaqartissavassi neriuutissaqartillusilu.’ (Jeremia 29:11) Nunami paratiisiusumi naassaanngitsumik inuunissamik neriuut upperilerpara. – Tussiaat 37:29.

Jehovap Nalunaajaasui uannut asanninnivimmik ersersitsipput. Ataatsimiinnerat peqataaffigeqqaarakku qanilaarfigineqarlungalu inussiarnisaarfigineqaqaanga. (Johannesi 13:34, 35) Tamanna oqaluffimmi pineqartarninnit allaanerungaarpoq. Nalunaajaasut tunuliaqutakka eqqarsaatiginagit tikilluaqquaannga. Piffissaqarfigalungalu isumagalungalu soqutigalungalu ikiorpaannga. Misigivunga ilaqutariissuarnut asannittunut ilaallunga.

Biibilimik atuaqqissaartarninnit paasivara Guutip najoqqutassiai qutsissut maleruarumallugit inuuninni allannguisariaqarlunga. Pujortartarunnaarniarneq oqitsuinnaanngilaq. Aamma paasigakku nipilersuutit tusarnaartakkama ilaat marihuanamik pujortagussutigisarlugit nipilersuutinik allanik tusarnaartalerpunga. Aalakooqqikkusunnginnama festertarunnaarlungalu imerniartarfinniittarunnaarpunga. Inuunerilikkannilu iluaqutigisinnaasannik ajunngitsumik sunniuteqartartunik ikinngutissarsiorpunga. – Ussatit 13:20.

Aamma Tony Biibilimik atuaqqissaaqatigineqartarpoq. Apeqqutini Biibili tunngavigalugu Nalunaajaasunit akineqartarmata ilikkakkami sallusuissutaanera upperilerpaa. Inuunermini ima allannguerujussuarpoq: nakuuserajuttut peqatigisarunnaarpai, pinerluttarunnaarpoq marihuanamillu pujortartarunnaarluni. Jehovamit iluarisaalluarumalluta marluulluta paasivarput inuunerlukkunnaartariaqarluta angajoqqaajulluarnerusariaqarlutalu. 1982-imi katippugut.

Eqqaamavara Napasuliaq Alapernaarsuiffik-mi Iteritsi!-milu * inuunerminnik allannguerusullutik iluatsissimasut misigisalikkersaarutaannik ujarlertarlunga. Maligassiuilluarnerat kajumississutigingaartarpakka! Nakkaannarnanga ilungersortuarnissannut nukissaqalissutigisarpakka. Nakkaannarumananga Jehovamut qinujuarpunga. 1982-imi juulimi Tonylu marluulluta Jehovap Nalunaajaasuisut kuisippugut.

QANOQ ILUAQUTIGIGIGA

Jehovamut ikinngutaalernikkut inuunera annaappara. Aamma ajornartorsiorfiusuni Jehovap annertoqqusersuisarnera Tonylu misigisarparput. Ajornartorsiorfiusuni taamaattuni Guutimik tatiginninnissarput ilikkarparput, misigivugullu ilaqutariittut ikiortuarlutalu isumagiuaraatigut. – Tussiaat 55:23.

Ernitta panittalu Jehovamik ilisarisimannileqqullugit ilinniartinneri nuannaarutigisimavara. Maannalu aamma nuannaarutigaara ernuttakka Guutimik ilisarisimannilermata.

Siunissaq toqunissaralu unnuakkut sinissaarutigisarunnaarpakka. Tonylu Jehovap Nalunaajaasuisa ilagiivi arlallit sapaatit-akunneri tamaasa qiimmassarniarlugit tikeraarfigisarneri ulapputigaavut. Taakku suleqatigalugit Jiisusimik upperinninnikkut naassaanngitsumik inuusinnaaneq ilinniartitsissutigaarput.

^ par. 17 Jehovap Nalunaajaasuinit saqqummersinneqartut.