• UKIOQ INUUIA: 1949

  • INUNNGORFIA: USA

  • OQALUTTUARSARTAA: INUUNERUP SIUNERTAANIK PAASINIAAVOQ

INUUNINNI PEREERSUT:

USA-mi naalagaaffiup New Yorkip avannaatungaani illoqarfeeqqami Ancramimi peroriartorpunga. Tassani najugaqartut amerlanerit naasorissaasuupput immuliortunik nersutaatillit. Aap, illoqarfeeqqami nersussuit inunnit amerlanerupput.

Ilaquttakkalu illoqarfeeqqami oqaluffituami naalagiartarpugut. Sapaatit tamaasa ullaakkut aatama skuukka qillersartarpai. Biibili qaqortoq mikisoq aanama uannut tunniussimasaa nassarlugu søndagsskoleriartortarpunga. Qatanngutikkalu sulilluarnermik, inoqatitsinnik ataqqinnillunilu ikiuinermik aamma qujamasunnermik ilinniartinneqarpugut.

Inersimasunngorama nuuppunga ilinniartitsisunngorlungalu. Guuti inuunerlu pillugit apeqquterpassuit eqqarsaatigisarpakka. Atuartitama ilaat pikkorissorujussuupput. Allat pikkorippallaanngillat, ilungersortarpulli. Ilaat innarluuteqartut allat timimikkut piginnaalluarput. Isumaqarpunga naapertuilluanngitsoqartoq. Ilaannikkut atuartitama atugarliornerusut angajoqqaavi imatupajaaq oqartarput: “Qitornama taamatut atugaqarnera Guutip piumasaraa.” Isumaliutigisarpara sooq Guutip meeqqat ilaat inunnguuserisaminnik innarluuteqarnerat akuerineraa. Naalungiarsummi eqqunngitsuliorsimanngilaq.

Aamma imminut ima aperisarpunga: ‘Qanoq siunertaqarluartumik inuusinnaavunga?’ Misigivunga ukiut sukkasoorujussuusut. Asannittumik perorsarneqarpunga, ilinniagaqarluarsimavunga maannalu nuannarisannik suliffeqarlunga. Inuunermali sinnera imaqanngitsutut ippoq. Inuuninni ingerlalluassaguma uininnissara, angerlarsimaffigissaalernissara, qitornartaarnissara, soraarninngornissama tungaanut sulinissara utoqqaligumalu utoqqaat illuannut nuunnissara neriuutigiinnarsinnaavara. Inuunerli siunertaqarnerusinnaanersoq isumaliutigisarpara.

BIIBILI INUUNINNIK QANOQ ALLANNGUISSUTIGIGIGA:

Aasat ilaanni ilinniartitsisoqatikkalu Europaliarpugut. Westminster Abbey, Notre-Dame de Paris, Vatikani oqaluffiillu mikinerit takornariarpavut. Tikitatsinni sumi tamani apeqqutit  eqqarsaatigisartakkakka apeqqutigisarpakka. Sloatsburgimut, New Yorkimiittumut, uternerma kingorna oqaluffiit assigiinngitsut akissutissarsiorfigaakka. Kialuunniilli apeqqutigisakka naammaginartumik akisinnaanngilai.

Taamaalluni atuartup aqqaneq-marlunnik ukiullip ornillunga apeqqutit pingasut uannut apeqqutigai. Siullermik aperivoq ilisimaneriga Jehovamik Nalunaajaasuulluni. Angerpunga. Aappassaattut, aperaanga Jehovap Nalunaajaasui pillugit paasisaqarnerorusunnersunga. Angeqqippunga. Taava pingajussaattut aperivoq sumi najugaqarnersunga. Sunaaffa taassuma eqqannguani najugaqarpunga. Taamani nalulluinnarpara niviarsiaqqap taassuma apeqqutai pingasut inuuninnik allannguissutigiumaarlugit.

Tamatuma kinguninngua sikkilerluni uannukarpoq, Biibilimillu atuaqqissaaqatigiittalerpugut. Upperisarsiornikkut siuttunut assigiinngitsorpassuarnut akissutissarsinanga apeqqutigisimasakka niviarsiaqqamut apeqqutigaakka. Taassumalu akissutit naammaginartut paasiuminartullu takunikuunngisaannakkakka uanga Biibilinni takutippai!

Biibilimit ilikkakkakka nuannaarutigaakka. Johannesip allagai siulliit 5:19 atuarakku killitsippunga, ima allassimavoq: ‘Silarsuaq tamaat Ajortup pissaaneqarfigaa.’ (NW) Oqiliallannaqaaq paasillugu avatangiisitsinniittunik naalliunnartoqartitsisoq tassaanani Guuti tassaasoq Saatani — Guutillu pissutsit iluarsissagai. (Saqqummersitat 21:3, 4) Paasivara Biibilimi tamanna paasiuminartumik erseqqissumillu nassuiarneqartoq. Nalunaajaasoq uannik atuaqqissaaqatiginnittartoq aqqaneq-marluinnarnik ukioqaraluartoq isumaqarpunga sallusuissut kimilluunniit oqaatigineqaraluaruni sallusuissutaasoq.

Takorusupparali Nalunaajaasut ilinniartitsissutigisatik naapertorlugit iliuuseqartarnersut. Assersuutigalugu niviarsiaqqap erseqqissarsimavaa kristumiut ilumoortut utaqqisinnaassuseqarlutillu inussiarnersuusut. (Galatiamiut 5:22, 23) Taamatut pissuserissaartuunersoq paasiumallugu aalajangerpunga misilinniarlugu. Atuaqatigiittussaalluta piaaralunga inortuivunga. Ima eqqarsarpunga: ‘Utaqqissavaanga? Utaqqiguninga inortuinera kamaatigissavaa?’ Biilerlunga angerlarama illup saavani majuartarfinni utaqqisoq takuara. Arpalluni orneriarlunga ima oqarpoq: “Angerlarniaraluarpunga anaanaga napparsimmavinnut politiinullu sianeriartoqqullugu inortuineq ajoravit ajutoorsimanersutit paasiniaqqullugu. Isumaalugileraluarakkit!”

Ulloq alla akiuminaatsumik aperivara isumaqarama apeqqut aqqaneq-marlunnik ukioqartup akisinnaanngikkaa. Piumasaannarminik akissanersoq paaserusuppara. Aperiganni isigalunga ilumoorsaarpasilluni ima oqarpoq: “Nalornivunga. Apeqqut allassavara angajoqaannut apeqqutiginiarlugu.” Tulliani atuaqqissaaqatigiileratta Napasuliaq Alapernaarsuiffik nassarpaa, tassani apeqqutima akissutaa allassimavoq. Tamanna Nalunaajaasunut kajungilissutigaara — atuagassiaataanni apeqqutigisama tamarmik Biibili tunngavigalugu akissutaat atuarneqarsinnaapput. Niviarsiararlu atuaqqissaaqatigiinnerput unitsinngilara, ukiorlu ataaseq qaangiummat Jehovap Nalunaajaasuisa ilaattut kuisippunga. *

QANOQ ILUAQUTI­GIGIGA:

Apeqqutigisar­takkakka kiisami naammaginartumik akissutissarsigakkit akissutit kikkunnut tamanut oqaluttuare­rusuppakka. (Matthæusi 12:35) Aallaqqaammut ilaquttama allamik upperisaqalernera akerleraat. Akerlilersui­vallaarunnaa­riartuaarpulli. Anaanaga utoqqalilluni Biibilimik atuaqqissaartalerpoq. Kuisinnissani angumerinagu toquvoq, qularinngilarali Jehovamut kiffartorniarluni aalajangersimasoq.

1978-imi Nalunaajaasoq Elias Kazan aappartaarivara. 1981-imi USA-mi Betelimi kiffartorusunnersugut aperitippugut. * Alianaraluartumik ukiut sisamaannaat Betelimi kiffartoreersugut Elias toqukkut qimaguppoq. Uillareeraluarlunga Betelimiiginnarpunga, tassanilu kiffartornera allamut saasaatigaara tamannalu tuppalliutit ilagaat.

2006-imi Betelimi kiffartoqatigisara Richard Eldred uitaarivara. Richardilu Betelimi kiffartornerput immikkut pisinnaatitaaffiusoq suli nuannaarutigaarput. Guuti pillugu ilumoortumik paasinnikkama apeqqutikka akissutissarsivakka inuuneralu siunertaqarlualerluni — taamaalisitsisullu tassaapput apeqqutit pingasut niviarsiaqqap apeqqutigisai.

^ par. 16 Niviarsiaqqap taassumalu qatanngutaasa ilinniartitsisutik tallimat Biibilimik atuaqqissaaqatigisarpaat, taakkulu Jehovamik pallorfiginnilerput.

^ par. 18 “Beteli” isumaqarpoq “Guutip illua”. Jehovap Nalunaajaasuisa nunarsuaq tamakkerlugu immikkoortortaqarfitik Betelinik taaguuteqartippaat. (1 Mosesi 28:17, 19, quppernerup ataani ilanngussaq) Betelikkormiut Jehovap Nalunaajaasuisa ilinniartitsinerannut iluaqutaasunik assigiinngitsunik suliaqarput.