Imarisai

Imai

Jehovap Nalunaajaasui

Oqaatsit toqqakkit Kalaallisut

 SAMMISAQ PINGAARNEQ | SAATANI PIVIUSUUA

Saatani siooragissavarput?

Saatani siooragissavarput?

Kulilte takussaanngitsuullunilu navianartuuvoq — Saatanitulli

Takussaanngitsuuvoq. Qalipaateqarnanilu tipeqannginnami malugineqarani ajunaartitsisarpoq. Silarsuarmi toqunartumik toqquteqartut immaqa affaat sinnerlugit toqunartumik tamatuminnga, kuliltemik, toqquteqarsimapput. Pinaveersaartitsisinnaagattali annilaangasariaqanngilagut. Inuppassuit silatusaarlutik kuliltemik malussartartumik kalerrisaarutitaartarput kalerreeriataarnissaalu piareersimaffigisarlugu.

Kuliltetulli Saatani takussaanngitsuuvoq, inunnut malunnarpiarnanilu navianartorujussuaq. Guutilli iluaqutissaqartippaatigut. Saatani siooragisariaqanngilat Guutimit tunissutit atorluarukkit.

Aalajangernerup pingaaruteqarnera. Jaakup allagai 4:7-imi allassimavoq Diaavulu akiorutsigu ‘qimassagaatigut’. Saatanip pissaaneqangaaraluarluni iliuusererusunngisannik iliuuseqartissinnaanngilaatit. Nammineq aalajangersinnaavutit. Petrusip allagai siulliit 5:9-mi ima allassimavoq: “Uppernikkut aalajaallusi [Diaavulu] assortorsiuk.” Eqqaamajuk Jiisusip pingasoriarluni ussiinerigaluit itigartereerai Saatanip qimakkaa. (Matthæusi 4:11) Aamma illit Saatanip ussiineri itigartissallugit aalajangersinnaavutit.

Guutimik ikinnguteqarneq. Jaakup allagai 4:8-mi kajumissaarneqarpugut ‘Guuti qanissagipput’. Jehovap kissaatigaa qanimut ikinngutigilerniassagitsinni. Qanoq taamaaliorsinnaavit? Pitsaanerpaamik taamaliorsinnaavutit taanna pillugu Biibilimeersunik ilinniarnikkut. (Johannesi 17:3) Jehova pillugu ilikkakkatit taassuminnga asannilissutigissavatit, asanninnerlu tamanna taassuma piumasaatut iliorusulissutigissavat. (1 Johannesi 5:3) Ataatannut qilammiusumut qanilliguit taanna qanoq pissava? Jaaku nangilluni allappoq Guuti ‘ilinnut qanillissasoq’.

Jehovap anersaakkut ittunik illersuutissaqartippaatit

Sernissorneqarnissamik neriorsuut. Ussatit 18:10-mi ima allassimavoq: “Naalakkap [Jehovap, NW] aqqa pallittaalisap napasuliaatut ippoq, iluartoq tassunga qimaanasuartarpoq isumannaatsumilu inissittarluni.” Soorunami tamanna isumaqanngilaq Guutip aqqa aarnuatupajaaq ittoq. Isumaqarporli Guutip aqqanik ataqqinnivissut qaqugukkulluunniit taassumunnga ikioqqullutik qinusinnaasut.

Maleruagassaq Biibilimeersoq. Apustilit Suliaat 19:19-imi Efesosimi kristumiunngorlaat ilaatigut ima oqaluttuarineqarput: “Angakkuarniartarsimasut ilaasa atuagaatitik nassarpaat tamarmillu takkuanni ikuallallugit. Naatsorsuutigineqarpoq tamakkua tamarmik aningaasanik sølviusunik 50.000-inik  naleqartut.” * Kristumiut taakkua pigisatik anersaarsiornermut tunngasut tamaasa qanoq naleqarneri apeqqutaatinnagu suujunnaarsippaat. Pisimasumik oqaluttuaq tamanna ullumikkut ilinniutigisinnaavarput. Ullutsinni silarsuarput anersaarsiornermik poorsimasutullusooq ippoq. Anersaarsiornermut tunngasunik ajoqutaarpasinngikkaluartunilluunniit pigisaqarutta ileqqoqaruttaluunniit anersaapiluit uagutsinnik sunniinissaannut periarfississinnaavavut. Sumilluunniit pilliuteqassagaluarutta tamakkuninnga sammisaqartannginnissaq pingaaruteqarluinnarpoq. — 5 Mosesi 18:10-12.

Rogeliop, allaaserisami siullermi eqqaaneqartup, 50-inik ukioqalernissami tungaanut Diaavuloqarnera upperinngilaa. Taavali isummani allanngortippaa. Sooq? Ima oqaluttuarpoq: “Taamani aatsaavissuaq inuuninni Biibiliuteqalerpunga. Biibilimeersunik ilisimasaqalerama Diaavuloqarnera upperilerpara. Ilisimasaqarneq tamannarpiaq Diaavulumit sunnertinnginnissannut illersuutigaara.”

“Biibilimeersunik ilisimasaqalerama Diaavuloqarnera upperilerpara. Ilisimasaqarneq tamannarpiaq Diaavulumit sunnertinnginnissannut illersuutigaara”

Ulloq Saatanip suujunnaarsiffissaa misigerusuppiuk? Misigisinnaavat. Biibilimi piffissaq Diaavulup, inuppassuarnik tammartitsisup, “tatsimut innerusumut ikuallassaataasumullu” igitaaffissaa siulittuutigineqarpoq. (Saqqummersitat 20:10) Soorunami anersaap takussaanngitsup inneq ikuallassaallu ajoqutigisinnaanngilai. Taamaattumik taseq innerusoq suujunnaarsitaanissamut assersuutaasimassaaq. Saatani piuleqqinngisaannassaaq. Guutimik asannittunut nuannerunassusia!

Taamaalinnginnerani Jehova taassumalu piumasai pillugit sapinngisannik ilinniartuarit. * Takorlooruk kiisami ima oqarsinnaalerutta: “Saatani piunngilaq!”

^ par. 8 Aningaasat sølviusut pineqartut tassaappata Romamiut itsaq aningaasaataat, denarit, aningaasarpassuusimassapput. Sulisartoq nalinginnaasoq taama aningaasarsitigissaguni ulluni 50.000-ni sulisariaqarpoq!

^ par. 11 Atuakkami Biibilimi sorpiaat ajoqersuutigineqarpat?-mi kapitali 10-mi Saatani anersaarsiornerlu pillugit paasissutissaqarpoq. Jehovap Nalunaajaasuisa ilaannit piniaruk, nittartakkamiluunniit www.jw.org-imi atuaruk.