Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Januaari 2015

 UPPERSUSIAT MALIGUK | JOSEFI

“Qanoq-aamma taama ajortigisumik iliorsinnaassagama?”

“Qanoq-aamma taama ajortigisumik iliorsinnaassagama?”

JOSEFIP silaannaq isugutallunilu kissartoq ilummooruppaa imermilu naasut ilaatigut lotusit naamasinnaallugit. Niuertut ingerlaaqatigiit, maanna kuussuup Nilenip akuata siaruarneratigut ingerlasut, angalaqatigai. Takorluukkit angutit qatigattuujutiminnik ingerlassillutik kuup kuunnerata ilaa sinerlugu Egyptenimiut illoqarfiat suli alla qanilliartoraat, ilaannikkullu timmissat naloraarusillit tingitittoortaraat. Josefip angerlarsimaffini Hebroni, qatsissumi anorlerajuttumi kilometerinik hundredinik arlalinnik ungasitsigiligartik, eqqarsaatigeqqilerpaa; maanna silarsuarmi allarluinnarmiippoq.

Takorluukkit aapakaat palmit figenequtillu kaarfannit nilliarpaluttut. Inuillu sanioqquttut oqaluppalunnerat Josefip aapakaat nilliarpalunnerattut paasisinnaanngitsutut ippai. Immaqa paaserusullugit tusarnaaqqissaaraluarpoq. Angerlarsimaffimminut uteqqinnaviarunannginnami oqaatsit taakku ilinniartariaqassavai.

Josefi nukappiaraannaavoq — 17-inik 18-inilluunniit ukiulik — taamaattoq angussuit inersimasut ilarpassuisa nikallussutigisinnaasaannik nalaataqarpoq. Josefi angumminnik asaneqarnerpaammat qatanngutaasa sinngagalugu toqunnialeraluarpaat. Toqunnaguli niuertunut tunivaat. (1 Mosesi 37:2, 5, 18-28) Maanna sapaatit-akunnerini arlalinni angalareerlutik illoqarfissuaq qanilliartortillugu niuertut qiimmakkaluttuinnarput, neriullutik Josefi nioqqutissatillu akisuut tunigunikkit iluanaangaatsiassallutik. Josefip qanoq ililluni isumatsassimaneq uummammini sorlanitsinnaveersaarsinnaavaa neriuutaaruttutullu misiginaveersaarluni? Ullumikkullu uagut unamminiarnartut atugarliuutillu qanoq uppernitsinnut ajoqutaatinnaveersaarsinnaavavut? Josefi ilinniarfigingaarsinnaavarput.

‘JEHOVAP JOSEFI NAJORPAA’

“Josefi Egypteniliaanneqarami tamaannaassisiminit Ismaelikkuusunit akigineqarpoq Faraomi kunngikkormiumut, Egyptenimiumut Potifarimut Faraop paarsisaasa naalagaannut.” (1 Mosesi 39:1) Oqaasialunnguit Biibilimeersut tamakku atuareerlugit takorlooruk angutip inuusuttup tuneqqinneqarami nikanarsagaasutut misigisimasimanissaa. Nioqqutissiaannanngorsimavoq! Takorloorsinnaavarput Josefip naalagartaani, kunngikkormiuni atorfilik, malillugu aqqusinerni niuffattorpassuit akulloqquallugit angerlarsimaffittaassaminukartoq.

Angerlarsimaffik? Josefip angerlarsimaffigisimasaanit allaanerulluinnarpoq. Ilaqutariinni tuperni najugalinni savaatiminnik isumaginninniarlutik nuttartuartuni peroriartorpoq. Maani Egyptenimiut pisuut, soorlu Potifari, illuni kusanartuni qalipaatigissaartuni najugaqarput. Itsarnisarsiuut oqaatigisarpaat itsaq Egyptenimiut ungalusanik naatsiiveqartartut, taakkunanilu orpiit alanngiffiusinnaasut imermilu naasut papyrusit, lotusit allallu tasinnguani naasarput. Illut ilaat kaajallallugit sukarsuallit naatsiiviup qeqqaniittarput silaannarissarfiusunik qutsissumi igalaaqarlutik, inerpassuaqarlutik, angisuunik nerisarfeqarlutik kiffanullu isersimaartarfeqarlutik.

Pigissaarnersuaq tamanna Josefip ajasoorutigaa? Ilimananngilaq. Kiserliungaarami allamik eqqarsaateqarsinnaanngilaq. Egyptenimiummi oqaasii, atisaat, isikkui ingammillu upperisarsiornerat sungiusimasaanit  allaanerulluinnarput. Guuterpassuit pallorfigaat, anersaarsiortuullutillu angakkuartartuupput, aamma toqu toqullu kingorna inuuneq ingasattumik soqutigaat. Josefip kiserliornini qanoq susinnaajunnaassutiginngilaa? Biibilimi allassimavoq Jehovamit najorneqartoq. (1 Mosesi 39:2) Qularnanngivippoq Josefip uummammiuni Guutimut aniatittarai. Biibilimi ima allassimavoq: “Naalagaq qanippoq torlorfigisiminut tamanut.” (Tussiaat 145:18) Josefi Guutini qanikkumallugu aamma sua?

Angutip inuusuttup isumatsaqqanini sapilissutigerusunnagu suliassiissutigineqartut sapinngisaminik suliarilerpai. Tamannalu pissutigalugu Jehovap pilluaqqusinnaavaa, Josefilu naalagartaaminit nuannarineqalerpoq. Potifarip malugaa kiffani inuusuttoq Guutiminit pilluaqquneqartoq, ilimanarluinnarporlu tamanna Potifarikkut pisuunerulissutigigaat. Josefi tatigineruleraluttuinnarlugu naggataatigut inuusuttoq pillaqqissoq taanna pigisaminut tamanut nakkutiginnittunngortippaa. — 1 Mosesi 39:3-6.

Josefi ullumikkut inuusuttunut Guutimut kiffartortunut maligassiuilluarpoq. Assersuutigalugu atuarfimmi avatangiisit, anersaarsiortunik nuannarisaqarfiusut siunissamullu tunngatillugu isumalluarfiunngitsut, inuusuttunut taakkununnga eqqumiiginarlutillu takornartaasinnaapput. Taamaattunik misigisaqaruit Jehova allanngorsimanngitsoq eqqaamajuk. (Jaaku 1:17) Ilumoorfiginnitsini imminillu iluarisaajumallutik ilungersortut tamaasa najortuarpai. Pilluaqqungaartarpai, aamma illit pilluaqqussavaatit.

Josefi inersimasunngorsimasoq eqqartoriartigu. Allassimavoq ‘kusanartuusoq inugissuullunilu’. Oqaatsinit taakkunannga ersersinneqamisaarpoq navianartorsiortoqartoq, inummi isikkorissoq kissaatiginngisamik naleqqutinngitsumillu sammineqalersinnaavoq.

Potifarip nuliata Josefi inuusuttoq malugaa

“AKUERIUMANNGILAA”

Josefip ilumoorfiginninneq pingaartippaa, Potifarilli nulia taamaanngilaq. Ima allassimavoq: “Naalagaata nuliata Josefi kajungerfigilerlugu oqarfigaa: ‘Innaatinnga!’” (1 Mosesi 39:7) Josefip arnaq Guutimik nalusoq kannguttaatsoq taanna pileritsaappaa? Biibili tunngavigalugu isummersinnaanngilagut Josefi angutit inuusuttut kinguaassiuutitigut pilerissusiannit nalinginnaasumit sunnertissinnaanngitsoq aamma isummersinnaanngilagut arnaq, kunngikkormiuni atorfillip pisuujullunilu nuimasuup nulia nukatsitaq, pinnersuunngitsoq. Josefi eqqarsarsimassanerluni arnaq taanna innaakkaluaruniuk naalakkaminit paasitinngitsoorsinnaallutik? Taamatut assuarnartuliornerup pigisatigut  iluaqutissartarisinnaasai eqqarsaatigalugit ussernartorsiortarsimava?

Soorunami Josefi qanoq eqqarsartarsimanersoq naluarput. Suulli uummammiuginerai nalunanngilaq. Akissutaanit tamanna erseqqippoq: “Uanga maaniitillunga naalagara illuminiittut pillugit isumakuluuteqanngilaq, pigisani tamaasa uannut paaritippai.” (1 Mosesi 39:8) Imalu nangippoq: “Illumi maani uannit oqartussaanerusoqanngilaq arlaannillu erliguutinngilaanga illit kisivit pinnatit, nuliarigamisit. Taamaattumik qanoq-aamma taama ajortigisumik iliorsinnaassagama taamaalillungalu Guutimut ajortuliorlunga?” (1 Mosesi 39:9, NW) Takorlooruk qulanngivilluni qanoq kimittutigisumik oqaatsit taakku oqaatigigai. Nakkaannarfiginissaataluunniit eqqarsaatiginera anniaatigaa. Sooq?

Soorlu Josefi nammineq oqartoq naalakkaminit tatigineqarpoq. Potifarip illuminiittut tamaasa, nuliani kisiat pinnagu, Josefimut paaritippai. Josefip tatigineqarnini qanoq atornerlussinnaassavaa? Eqqarsaat tamanna tujormigingaarpaa. Taassumunngali una suli pingaaruteqarneruvoq: Guutiminut, Jehovamut, ajortuliunnginnissaq. Aappariinneq ilumoorfiginninnerlu pillugit Guutip isiginnittaasianik angajoqqaaminit ilinniartinneqarluarsimavoq. Jehovap aappariit siulliit aappariilersillugillu aappariinnermut isummani erseqqissarsimavaa. Uiusoq nuliaasorlu tassaalissagamik ‘uinik ataaseq’ aappariittuartussaapput. (1 Mosesi 2:24) Ataqatigiinnermik taamaattumik avissaartitsiniartut Guutimit kamaanneqariaannaapput. Assersuutigalugu angutit Aaperaap nulianik (Josefip aanaqqiutaanik) Iisaallu nulianik (Josefip aanaanik) innarliingajattut ajunaaqqajaqaat. (1 Mosesi 20:1-3; 26:7-11) Pisimasut taakkua ilinniagassartaat Josefip ilikkarsimavaa, Guutimillu iluarisaarusuppoq.

Potifarip nuliata tusaasani nuannarinngilluinnarpai. Inussiaannakasiup itigartippaani neqeroorutinilu ‘ajortuunerarlugu’. Taamaakkaluartoq persariuarpaa. Immaqa naaggaarneqarnini ajussutigingaarlugu Josefip angertinnissaa aalajangiusimanerulerpaa. Saatanip Jiisusimik ussiisup isiginnittaasiatut isiginnittaaseqarpoq. Aamma Saatanip ussiinini iluatsinngimmata taamaatiinnarnani usserniakkani “qimakkallarpaa”. (Lukasi 4:13) Inuk aalajaakkumalluni aalajangiusimannilluinnartariaqarpoq. Josefi taamaaliorami pinertusaarsinnaasimavoq. Potifarip nuliata “ullut tamaasa” persarigaluaraani Josefi nakkaannanngilaq. Ima allassimavoq: “Akueriumanngilaa.” (1 Mosesi 39:10) Potifarilli nuliata Josefip innaannissaa aalajangiusimavaa.

Kiffanik allanik isersimasoqannginnissaanut piareerpoq. Nalunngilaa Josefip suliassani naammassissaguniuk illumut isertariaqartoq. Isermat peqqusersiorfigaa. Atisaatigut tigoriarlugu ima kimigiiserfigeqqippaa: “Innaatinnga!” Josefi ingerlaannaq iperartinniarsarivoq — iperarumanngimmanili atisani arnap tigummisaa peerniarsuarlugu peeramiuk imminiiginnarlugu qimaavoq! — 1 Mosesi 39:11, 12.

Immaqa apustilip Paulusip isumassarsisinneqarluni siunnersuutaa una eqqaavarput: “Kinguaassiuutitigut assuarnartuliorneq qimarratigisiuk.” (1 Korinthimiut 6:18, NW) Josefi kristumiunut ilumoortunut tamanut maligassaalluarpoq! Immaqa Guutip ileqqorissaarneq pillugu najoqqutassiaanik pingaartitsinngitsunik peqateqartariaqarpugut, imaanngilarli taakkua sunniutipiloqarnerat nakkaannarfigissagipput. Qanorluunniit kinguneqassagaluarpat qimaasariaqarpugut.

Josefip qimaanini akisunaarpaa. Potifarip nulia akiniaarusuppoq. Nillialermat kiffat allat iserput. Oqarpoq Josefip pinngitsaalilluni arneriffiginiaraani nillialeramilu qimaasoq. Josefip atisaa uppernarsaatissamaatigalugu uini utaqqilerpaa. Potifari angerlarmat salluliuutini oqaatigeqqippaa, taamaalilluni uini takornartaq taanna imminni kiffanngortikkamiuk pisimasumut pisuutimisaarlugu. Potifari qanoq qisuariarpa? Ima allassimavoq: “Kamangaalerpoq.” Josefilu parnaarussaatippaa. — 1 Mosesi 39:13-20.

“ISIGAI AJORTUMIK PIVAAT KALUNNERNIK PITULLUGIT”

Taamanikkut Egyptenimiut parnaarussivii pillugit ilisimasakitsuararsuuvugut. Itsarnisarsiuut parnaarussiviit taamaattut toqqavikuinik — pallittaalisarujussuartut ittunik ineerartalinnik aamma naqqup iluini — nassaarsimapput. Josefip parnaarussaaffini oqaluttuaraa, oqaaserlu atugaa nutsiinnavillugu isumaqarpoq itersaliaq, tassa sumiiffik taarlunilu  tujorminartoq. (1 Mosesi 40:15) Tussiaatini atuarsinnaavarput Josefi parnaarussivimmi naalliutsitaasoq. “Isigai ajortumik pivaat kalunnernik pitullugit, qungatsimigut saviminermik attatalerneqarpoq.” (Tussiaat 105:17, 18) Ilaannikkut Egyptenimiut parnaarussat ikusiisa qulaatigut talii tunummut qilertarpaat; allallu saviminiusumik qungasequtserneqartarput. Josefimut ajortumik iliuuseqarsimanngitsumut naalliunnarsimassaqaaq!

Atugarliulernera sivikitsuinnaanngilaq. Oqaluttuami allassimavoq Josefi ‘tassaniilersoq’. Ukiuni arlalinni parnaarussivipalaami tassaniippoq! * Naluaalu iperagaasinnaanerluni. Ullut ingerlagamik ingerlagamik kiisa qaammatinngorput — qanoq ililluni isumatsannaveersaarlunilu neriuttuarsinnaava?

Apeqqut tamanna Biibilimi tuppallernartumik ima akineqarpoq: “Naalakkalli Josefi najorpaa ajunngitsuliorfigalugulu.” (1 Mosesi 39:21) Parnaarussiviit qarmarsuiluunniit, kalunnerilluunniit itersalialluunniit taartut Jehovap asannittup kiffaminik najuinissaminut ajoqutigineq ajorpai. (Romamiut 8:38, 39) Takorloorsinnaavarput Josefip isumatsaqqanini Ataataminut qilammiusumut qinunikkut oqaluttuarigaa ‘Guutillu tuppallersaajuartup’ kisimi pilersissinnaasaanik eqqissineq misigigaa. (2 Korinthimiut 1:3, 4; Filippimiut 4:6, 7) Jehovap Josefi aamma qanoq iliorfigaa? Allassimavoq ‘parnaarussiviup naalagaanut nuannarisarilersikkaa’.

Parnaarussat sulisitaasarsimagunarput, Josefilu Jehovap pilluaqqusinnaasaanik iliuuseqaqqippoq. Suleruloortarpoq sumilluunniillu suliassinneqaraluaraangami sapinngisaminik suliarisarlugu, iliuuseqarfigisinnaanngisanilu Jehovamut isumagitittarlugit. Jehovamit pilluaqquneqarpoq, Potifarillu illuani kiffaagallarnermisut allanit tatigineqalerlunilu ataqqisaalerpoq. Ima allassimavoq: “Parnaarussiviup naalagaata Josefi parnaarussanut tamanut akisussaasunngortippaa, parnaarussivimmilu suliarisassat tamaasa Josefip nakkutigai. Josefimut suliassiissutaasut tamaasa parnaarussiviup naalagaata isumagisariaaruppai, Naalakkap Josefi najormagu suliarisaanillu iluatsitsisittarlugu.” (1 Mosesi 39:22, 23) Josefip Jehovamit isumagineqarnerminik ilisimanninnini tuppallersaatigisimassavaa!

Josefi parnaarussivimmi eqiasuilluni suligami Jehovamit pilluaqquneqarpoq

Imaassinnaavoq inuunitsinni ilimaginngisamik alianartumillu nalaataqartugut, immaqaluunniit naapertuilluanngitsuliorfigineqangaartugut. Taamaattoqassappat Josefip uppernera ilinniarfigisinnaavarput. Jehova qinunikkut attavigiuarutsigu, taassuma peqqussutaanut ilumoorfiginnittuarutta sapinngisarpullu tamaat taassuma isaani eqqortumik iliorniartuarutta, pilluaqqusinnaasaanik iliussaagut.

^ par. 23 Biibilimi ersersinneqarpoq Josefi Potifarip illuanut pigami 17-inik ukioqanngikkuni 18-inik ukioqartoq, tassaniittorlu inersimasunngornissami tungaanut immaqa ukiualunni. Parnaarussivimmiit iperagaagami 30-nik ukioqarpoq. — 1 Mosesi 37:2; 39:6; 41:46.