Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Januaari 2015

 SAMMISAQ PINGAARNEQ | SAATANI PIVIUSUUA?

Saatani ajortumut assersuutaannaava?

Saatani ajortumut assersuutaannaava?

Saatani Biibilimi eqqartorneqartoq ajortumut assersuutaanerassallugu ajornanngitsuararsuuvoq. Assersuutaannaanera ilumut Biibilimi ajoqersuutigineqarpa? Taamaappat sooq Biibilimi allaatigineqarpa Saatani Jiisusimik Kristusimik Guutimillu Ajugaqanngitsumik oqaloqateqartoq? Taakkua oqaloqatigiinnerisa ilaat marluk misissoriartigit.

SAATANIP JIISUSI OQALOQATIGIMMAGU

Jiisusip kiffartornini aallartimmagu Diaavulup pingasoriarluni usseraluarpaa. Siullermik Jiisusi pissaanerminik Guutimeersumik nerisassarsiornissaminut namminissarsiortumik atoqqullugu Saatanip tatiniarsarigaluarpaa. Taava Jiisusi inuunerminik navianartorsiortitsilluni imminut malugeqqusaaqqullugu Diaavulumit mianersuaalliortinniarneqarpoq. Aamma Saatanip Jiisusi silarsuarmi naalagaaffinnut tamanut naalakkersuilersinnaasoq neqeroorfigaa pallorfigilaarpani. Jiisusip pillaqqilluni ussiiniutit taakku pingasut Allakkat issuarlugit itigartippai. — Matthæusi 4:1-11; Lukasi 4:1-13.

Jiisusip kina oqaluuppaa? Immini ajortoq? Biibili naapertorlugu Jiisusi ‘uagutsitut usserneqarsimavoq, ajorteqanngilarli’. (Hebræerit 4:15) Aamma Biibilimi ima allassimavoq: “Taanna ajortuliunngilaq, peqquserlunnermillu qanermiugisaqanngilaq.” (1 Petrusi 2:22) Jiisusi assuarnaatsuujuarami naammalluinnartuujuarpoq. Ilumini ajortumik sumilluunniit pileriartuaartitsinngisaannarpoq. Erseqqippoq Jiisusip ilumini ajortoq oqaluutinngikkaa; kinaassusilivik oqaluuppaa.

Oqaloqatigiinnermi tamatumani Saatanip kinaassusiliviuneranut suli allamik uppernarsaatissaqarpoq.

  • Eqqaamajuk Diaavulup Jiisusi silarsuarmi tamarmi naalakkersuilersinnaaneranik neqeroorfigigaa pallorfigippani. (Matthæusi 4:8, 9) Saatani piunngippat tamanna asuliinnaq neqeroorutaasimassagaluarpoq. Aammami Saatanip taama oqartussaassuseqartiginera Jiisusip apeqqusinngilaa.

  • Jiisusip usserneqarnini itigartereeraa Diaavulup taanna “qimakkallarpaa”. (Lukasi 4:13) Saatani tamatumani tassaarpasippa pissuseq ajortoq imaluunniit akeraq uteriingaartoq?

  • Malugiuk ‘inngilit Jiisusi ornikkaat kiffartorfigalugulu’. (Matthæusi 4:11) Inngilit taakku ilumut anersaajuppat Jiisusimik nakussatsitsillutillu ikiuisut? Soorunami. Taava aamma Saatani anersaajusimassaaq kinaassusilik, ilaa?

 SAATANIP GUUTI OQALOQATIGIMMAGU

Oqaloqatigiinnerit misissugassatta aappaanni Jobi Guutimik mianerinnittoq eqqartorneqarpoq. Tamatumuuna Diaavulup Guutillu marloriarlutik oqaloqatigiinnerat oqaluttuarineqarpoq. Oqaloqatigiinnerni taakkunani marlunni Guutip Jobi assuarnaatsuunera pillugu nersualaarpaa. Saatanip Jobi Guutimut kiffartornerarpaa iluaqutissartaa piinnarlugu, tassa oqamisaarpoq Guutip Jobi akilerlugu ilumoorfiginnitsikkaa. Taamatut Diaavulup Jobi Guutimit ilisarisimanerunerarpaa. Jobip pigisaminik qitornaminillu Diaavulumit piiagaaffigitinnissaa, allaallu nappaateqalersinneqarnissaa Jehovap akueraa. * Piffissap ingerlanerani paasinarsivoq Jehova Jobi pillugu eqqortumik oqartoq Saatanilu sallusoq. Jobi assuarnaatsuugami Jehovamit pilluaqquneqarpoq. — Jobi 1:6-12; 2:1-7.

Guutip Saatanillu oqaloqatigiinnerini Jehovap ilumini ajortoq oqaluuppaa? Biibilimi ima allassimavoq: “Isornaalluinnarpoq Guutip aqqutaa.” (2 Samueli 22:31) Guutip oqaasiani aamma ima allassimavoq: “Illernarpoq, illernarpoq, illernarpoq Naalagaq, Guuti Ajugaqanngitsoq.” (Saqqummersitat 4:8) Oqaaseq illernartoq isumaqarpoq minguitsoq, iluartoq, ajorteqanngilluinnartoq. Jehova naammalluinnartuullunilu kukkujuitsuuvoq. Ajortumik pissuseqarsinnaanngilluinnarpoq.

Saatanip Guutimik oqaloqateqarnerata kinguneri angutip Jobip misigai

Isumaqartoqarporli Jobi pillugu allassimasut oqaluttualiaannaasut. Tamanna ilumoorpa? Biibilimi allassimasunit allanit erserpoq Jobi ilumut inuusimasoq. Assersuutigalugu Jaakup allagaani Jobi maligassaalluartutut kristumiut atugarliorfimminni pinertusaarnissaminnut kajumississutigisinnaasaattut Jehovallu pinertusaartunik pilluaqqusisarneranik tuppallernartumik eqqaasitsissutitut allaatigineqarpoq. (Jaaku 5:7-11) Tamanna qanoq kimittutigissagaluarpa Jobi taassumalu Saatanimit saassunneqarnera oqaluttualiaannaappata? Aammami Ezekielip allagaani angutit iluartut pingasut eqqaaneqarput, tassaappullu Noa, Danieli Jobilu. (Ezekieli 14:14, 20) Jobi Noatulli Danielitullu kinaassusiliviuvoq uppersuseqangaartoq. Jobi ilumut inuusimappat saassussisua, malersuisitsisua, aamma piviusuusimassaaq, ilaa?

Saatani anersaatut piviusutut Biibilimi allaatigineqartoq erseqqippoq. Immaqali ima eqqarsarputit: ‘Ullumikkut silarsuatsinni ilaquttakkalu Saatanimit navianartorsiortinneqarpugut?’

NALITSINNIMI?

Takorlooruk illoqarfigisanni pinerluttorpassuaqalersoq. Illoqarfik isumannaakkunnaarpoq ileqqorluttullu amerligaluttuinnarlutik. Maanna pissutsit taamatupajaaq ittut uku eqqarsaatigikkit: Saatani anersaapiluillu — anersaat piviusut Saatanitut Guutimut pikitsitsisimasut — nunarsuarmut igitaapput. Tamanna qanoq kinguneqarpa? Nutaarsiassani illit tusartakkatit eqqarsaatigikkit.

  • Silarsuaq tamakkerlugu pinerlutsaalisitsisoqaraluartoq misigittaalluni nakuusernerit amerligaluttuinnarnerat tusartarpiuk?

  • Angajoqqaarpassuit isumaalukkaluartut aliikkutat anersaarsiornertallit amerligaluttuinnarnerat tusartarpiuk?

  • Avatangiisit, annaanniarlugit ilungersortoqaraluartoq, soqutigittaatsumik ajoquserneqartarnerat tusartarpiuk?

  • Innuttaaqatigiinni ilungersunartumik ajortoqarpasippa — pissaanilik ajortoq inunnik ajunaarnersuaqartitsilerpa?

Malugiuk ajornartorsiutinut Biibilimi kina pissutaanerarneqartoq: “Igitaavoq uumasorujussuaq taanna, pulateriaarsutoqaq Diaavulumik Saatanimillu taaneqartoq silarsuarmik tamarmik tammartitsiniartoq nunamut igitaavoq, inngiliilu taassumunnga ilanngullugit igitaapput. ... Eqqanarli nuna imarlu Diaavulu ilissinnut aqqarmat kamattorsuulluni, piffissakissutsi nalunnginnamiuk.” (Saqqummersitat 12:9, 12) Uppernarsaatit eqqarsaatigereerlugit inuppassuit isummertarput Saatani anersaajusoq ajortoq silarsuatsinni ajoqusiisitsisartoq.

Immaqa qanoq illersorneqarsinnaanerlutit eqqarsaatigaat. Taamatut eqqarsaruit paasinarpoq. Allaaserisap tulliani iluaqutigisinnaasatit sammineqarput.

^ par. 12 Biibili naapertorlugu Guuti Jehovamik, imaluunniit Jahvemik, ateqarpoq.