Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Juuli 2014

 SAMMISAQ PINGAARNEQ | PUJORTARNEQ GUUTIP QANOQ ISUMAQARFIGIGAA

Pujortarneq Guutip qanoq isumaqarfigaa?

Pujortarneq Guutip qanoq isumaqarfigaa?

Naoko pujortartarunnaarnini pillugu ima oqarpoq: “Guutip pissusii siunertaalu pillugit sallusuissut ilikkarakku inuunera allanngortissinnaalerpara.” Naokop ilikkagai Biibilimeersuupput. Tupa pillugu Biibilimi allassimasoqanngikkaluartoq Guutip pujortarneq qanoq isumaqarfigineraa tassani paasisinnaavarput. * Inuppassuit tamatuminnga ilisimasaqarneq pujortartalinnginnissaminnut pujortartarunnaarnissaminnulluunniit kajumississutigisimavaat. (2 Timotheusi 3:16, 17) Pujortartarnerup ulorianaatai ilisimaneqarluartut pingasut tamakkulu pillugit Biibilimi allassimasut misissoriartigit.

PUJORTARNEQ UERINARTUUVOQ

Tupa uerinarnerpaat ilaattut ilisimaneqartumik — nikotinimik — akoqarpoq. Nikotini inuummarissaataasinnaallunilu eqqissisaataasinnaavoq. Pujortarnikkut qarasaq nikotineqalipallattarpoq nikotinilersorneqaqattaarlunilu. Millussinerit tamarmik immikkut nikotinilersuutaasarmata, ullormut poortamik ataatsimik pujortartartoq agguaqatigiissillugu ullormut 200-riarluni nikotinimik pisarpoq. Tamannalu aanngajaarniutinik allanik atuinermi ulorianartumik pinerup annertussusianit annertunerungaarpoq. Nikotini najuussorneqartoq annertusiartortillugu uerineq annertusiartortarpoq. Pujortarnermik uerereersup nikotinimik pinaveersaarnini nuanniitsutut malugisarpaa.

‘Naalakkumasarsi inussiaataaffigissavarsi.’ — Romamiut 6:16

Tupamut inussiaataaguit ilumut Guutimut naalassinnaavit?

Tupa pillugu eqqortumik isiginnittaaseqarnissamut Biibilimi allassimasoq una iluaqutigisinnaavarput: “Naluisiuk ilissi inussiatut kiffartorfigiumasarsi naalakkumasarsilu inussiaataaf­figisaria­qarassiuk?” (Romamiut 6:16) Inuup eqqarsaatai iliuusiilu tupagunneranit aqunneqarpata tupamut inussiaataassaaq. Guutilli, Jehovamik imaluunniit Jahvemik atillip, kissaatigaa iliuutsinit timimut anersaamullu, tassa isummamut eqqarsartaatsimullu, ajoqutaasinnaasunit aqunneqarnata kiffaanngissuse­qassasugut. (Tussiaat 83:19; 2 Korinthimiut 7:1) Inuup Jehovamik pingaartitsine­rujartorlunilu ataqqinninnerujartortup paasilissavaa taassuma pitsaanerpaamik tunineqartariaqarnera ileqqumullu toqussutaasinnaasumut inussiaataatilluni Guuti pitsaanerpaamik tunisinnaanagu. Taamatut paasinninnini ajoqutaasumik tamatuminnga akiuinissaminut piumassuseqalis­sutigissavaa.

Olaf Tysklandimiu 12-inik ukioqarluni pujortartalersoq ukiuni 16-ini cigarettit pinngitsoorsinnaanngereerlugit pujortartarunnaartoq ima oqaluttuarpoq: “Cigaretti siulleq aputiminertut ajoqutaanngitsutut ippoq. Ukiulli ingerlaneranni pujortartarnera aputerujussuup sisoorneratut ippoq. Ilaanni cigarettiuteqarnanga pujortagunnera ilungersunangaarmat cigarettikut arsakoorfimmiittut tamaasa aviisikuminermut cigarettiliaraakka. Tamanna kingumut eqqarsaatigigaangakku kanngusuttaqaanga.” Pujortartarunnaarnini pillugu ima oqarpoq: “Jehovamik nuannaartitserusunnera aalajangiisuulluinnarpoq. Jehovap inunnik asanninnera neriuuteqalersitsineralu uerinartumik tamatuminnga asoorussilluinnarnissannut nukissaqalissutigaakka.”

 PUJORTARNEQ TIMIMUT AJOQUTAAVOQ

“Cigarettinik pujortartarneq ... timip pisataanut tamangajannut ajoqutaasoq aamma napparsimagajuttut toqusartullu amerliartornerannut pissutaasoq ilisimatuussutsikkut uppernarsarneqarsimavoq,” The Tobacco Atlas-imi allassimavoq. Pujortartarneq tunillaassinnaanngitsumik nappaateqalernermut, soorlu kræfternermut, uummallunnermut, puallunnermullu, pissutaasartoq ilisimaneqarluarpoq. Nunarsuarmi Peqqinneq pillugu Suleqatigiiffik (WHO) naapertorlugu pujortarneq aamma nappaatit tunillannartut, soorlu tuberkulosep, toqussutaasarnerannut pissutaangaarpoq.

“Naalagaq Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.” — Matthæusi 22:37

Ileqqupalaamut nakkaannartarnikkut timit Guutip pinngortitaa paarinerlukkukku Guutimik asannillutillu ataqqinnittuussavit?

Jehovap Guutip oqaatsini, Biibili, aqqutigalugu inuunitta, timitta sianiutittalu eqqortumik isumaqarfiginissaannik ilinniartippaatigut. Ernerata, Jiisusip, tamanna pivaa ima oqarami: “Naalagaq Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.” (Matthæusi 22:37) Erseqqippoq Guutip kissaatigigaa timerput ajunngitsumik atorlugulu inuunitsinnik ataqqinnittuussasugut. Jehova taassumalu neriorsuutai pillugit ilinniarnerujartortilluta taassuma uagut pilluta iliuuserisarpassui nuannaarutigilissallugillu pingaartilissavavut. Tamannalu kajumississutigalugu timitsinnut ajoqutaasinnaasunik sunilluunniit atuinaveersaassaagut.

Jayavanth, Indiami nakorsaq, ukiuni 38-ni pujortartartuusimasoq ima oqarpoq: “Nakorsanut atuagassiani pujortarnerup navianartuunera atuartarpara. Nalunngilara eqqunngitsuliornerusoq, nakorsiartullu pujortartarunnaaqqusarpakka. Namminerli tallimarianngikkuma arfinileriarlunga asoorunniartaraluarlugu pujortartarunnaarsinnaanngilanga.” Taavami pujortartarunnaarnissaminut suna iluaqutigaa? Oqarpoq Biibilimik atuaqqissaartalernini iluaqutigisimallugu. “Jehova nuannaartikkusulerakku ingerlaannaq pujortartarunnaarnissannut piumassuseqalerpunga.”

PUJORTARNEQ AAMMA ALLANUT AJOQUTAAVOQ

Tupap pujua aamma allap pujortagaata najuussornera toqunartuupput. Allat pujortagaannik ilummoorussineq kræfteqalissutaasinnaavoq allatulluunniit nappaateqalissutaasinnaalluni, ukiullu tamaasa pujortartanngitsut arnaanerusut meeraanerusullu 600.000-t tamanna toqqutigisarpaat. Nalunaarusiami WHO-meersumi ima mianersoqqussuteqarpoq: “Allat pujortagaannik ilummoorussineq navianartuujuaannarpoq.”

“Tullit ilittut asassavat.” — Matthæusi 22:39

Ilumut ilaquttatit tullillu asavigit pujortarnikkut navianartorsiortikkukkit?

Guutimik asanninneq pingaarnerpaavoq Jiisusilu naapertorlugu pingaarnerpaat aapparaat tullermik  — tassa ilaquttatsinnik, ikinngutitsinnik avatangiisitsinniittunillu allanik — asanninneq. Ima oqarpoq: “Tullit ilittut asassavat.” (Matthæusi 22:39) Qanigisanut ajoqutaasumik ileqqoqarneq tullermut asannittuliornerussanngilaq. Asanninneq ilumoortoq kajumississutigalugu oqaaqqissaarut Biibilimeersoq una maleruassavarput: “Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.” — 1 Korinthimiut 10:24.

Armen Armeniamiu ima oqaluttuarpoq: “Pujortartarnera ilaquttama ajoqutigigamikku pujortartarunnaaqqullunga kimigiiserfigisarpaannga. Pujortartarnermali taakkununnga sunniutipiloqarnera miserratigiuarpara.” Sooq isummani allanngortikkini ima nassuiarpaa: “Biibilimik ilisimasakka Jehovamillu asanninnera iluaqutigalugit pujortartarunnaarlungalu nassuerutigaara pujortarneq uannuinnaanngitsoq aammali avatangiisinniittunut ajoqutaasoq.”

PUJORTARTOQAQQISSANNGILAQ

Biibilimik ilisimasaqarneq iluaqutigalugu Olafip, Jayavanthip aamma Armenip ileqqoq imminnut allanullu ajoqutaasoq asooruppaat. Pujortarnerup ajoqutaaneranik ilisimasaqarnerat pujortartarunnaarnerannut pissutituaanngilaq. Jehovamik asannileramik taannalu nuannaartikkusuleramikku pujortartarunnaarsinnaanngorput. Asanninnerup pingaaruteqassusia Biibilimi ima erseqqissaarneqarpoq: ‘Guutimut asanninneq tassaavoq inassutai maleruaratsigit, inassutaalu artornartuunngillat.’ (1 Johannesi 5:3) Soorunami najoqqutassianik Biibilimeersunik maleruaaneq ajornaatsuujuaannanngilaq, Guutimilli asanningaarneq kajumississutigigaanni naalanneq ‘artornartuussanngilaq’.

Ullumikkut nunarsuaq tamakkerlugu ilinniartitsinersuaq iluaqutigalugu Jehovap Guutip inuit millionillit tupamut qaqugorsuarmut inussiaataajunnaarsinnaaqqullugit ikiortarpai. (1 Timotheusi 2:3, 4) Qanittukkut Jehovap naalagaaffini — naalagaaffik qilammiittoq ernerminik Jiisusimik Kristusimik kunngilik — aqqutigalugu niuernerup silarsuaa piumatooq inunnik millionilinnik tupamut inussiaataatitsisoq suujunnaarsissavaa. Pujortartoqaqqinnginnissaa isumagissavaa inuillu naalattut timikkut isumakkullu naammalluinnartunngortillugit. — Esaja 33:24; Saqqummersitat 19:11, 15.

Pujortartarunnaarniarsariguit nikalloqinak. Jehovamik asanninnerup taassumatullu pujortarnermut isiginnittaaseqalernikkut aamma illit pujortartarunnaarnissamut pisariaqartumik piumassuseqalissaatit. Jehovap Nalunaajaasuisa najoqqutassianik Biibilimeersunik ilinniarnissannik tamakkuninngalu maleruaanissannik ikiorusuppaatsit atoriaannaasunik siunnersorlutit. Qularutigissanngilat pujortartarunnaarnissannut Jehovamit ikiorneqarusukkuit taassuma pisariaqartitannik nakussatsillutillu pissatsissagaatit. — Filippimiut 4:13.

^ par. 3 Pujortarneq pineqaraangat matumani pineqartarpoq cigarettit, sikaat, pujortaatillu atorlugit tupap pujuanik najuussineq. Najoqqutassialli Biibilimeersut sammineqartut aamma sukuloornermut, cigarettiusaanut (e-cigarettinut) nikontinilinnut nioqqutissanullu allanut tunngapput.