Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Maaji 2014

Guutip upperisarsioqatigiit assigiinngitsut suleqatigiissippai?

Guutip upperisarsioqatigiit assigiinngitsut suleqatigiissippai?

“Upperisarsiorneq ataasioqatigiilersitsisarpa imaluunniit avissaartuutitsisarpa?” Taama aviisimi The Sydney Morning Herald-imi atuartartut aperineqarput. Akisut amerlanersaat, 89 procentit missaanniittut, isumaqarput upperisarsiorneq avissaartuutitsisartoq.

UPPERISARSIOQATIGIILLI assigiinngitsut suleqatigiinnissaannik tapersersuisut allatut isiginnittaaseqarput. Eboo Patel, Interfaith Youth Core-imik pilersitsisoq, ima oqarpoq: ‘Upperisarsioqatigiit tamarmik misiginneqatiginninnissaq, avatangiisinik innarlitsaaliuinissaq inoroorsaartuunissarlu pillugit ajoqersuisarput.’

Ilumoorpoq buddhistit, katuullit, naaggaartut, hindut, musliimit allarpassuillu ilaannikkooriarlutik piitsuussusermik annikillisaaniarlutik, inuit pisinnaatitaaffiinik pitsanngorsaaniarlutik, qaartartut nunamiittut inerteqqutaalersinniarlugit avatangiisillu eqqarsaatigalugit ajornartorsiutit uparuarniarlugit suleqatigiittarsimanerat. Upperisarsioqatigiit assigiinngitsut paaseqatigiinnissaq isumassarsioqatigiinnissarlu anguniarlugit ataatsimeeqatigiittarsimapput. Assigiinngissusertik festivaalerlutik, nipilersorlutik, qinullutik naneruummik ikitsillutik allatigullu iliuuseqarlutik nalliuttorsiutigisarpaat.

Upperisarsioqatigiit assigiinngitsut taamatut suleqatigiinnermikkut akerleriikkunnaarsinnaappat? Guutip upperisarsioqatigiit assigiinngitsut suleqatigiissinnerisigut silarsuarmi pissutsit pitsaanerulersinniarpai?

SUNA AKIGALUGU ATAASIO­QATIGIIT­TOQARPA?

Upperisarsioqatigiit assigiinngitsut suleqatigiinnissaannut peqatigiiffiit annerpaat ilaanni nunani 76-ini upperisarsioqatigiinnik assigiinngitsunik 200-nit amerlanerusunik ilaasortaqarneq usorsisimaarutigineqarpoq. Taakkua “upperisarsioqatigiit assigiinngitsut ulluinnarni suleqatigiinnerannik siuarsaajuarnissaq” anguniagassatut nalunaarutigisimavaat. Oqaatsilli piviusunngortinnissaasa ajornarnerusarnera uppernarsineqarsimavoq. Peqatigiiffimmik pilersitsisimasut naapertorlugit upperisarsioqatigiit assigiinngitsorpassuit upperisamillu sammisaqaqatigiit minnerit narrujuummisikkumanagit siunertamik nalunaarusiap oqaasilersorneqarnera qajassuunneqarsimavoq. Siunertami nalunaarusiami Guutip eqqaaneqarnissaata isumaqatigiinngissutiginera ajornartorsiutigineqartut ilagisimavaat. Taamaattumik Guuti eqqaaneqarnaniluunniit innersuutigineqanngilluinnarpoq.

Guuti eqqaaneqanngimmat taava upperisarsiornermi taanna qanoq inissisimaffeqarpa? Qanorlu upperisarsioqatigiit assigiinngitsut suleqatigiit peqatigiiffinnit allanut ajunngitsuliorniartunit asannittuliorniartunilluunniit allaanerussuteqaramik? Taamaattumik peqatigiiffik eqqaaneqartoq upperisarsioqatigiinnut peqatigiiffittut imminnut taanatik ‘peqatigiiffittut suleqatigiissitsilerniartutut’ taapput.

AJUNNGITSULIORNEQ — NAAMMAPPA?

Upperisarsioqatigiit assigiinngitsut suleqatigiinnissaannik tapersersuisoq tusaamasaq, Dalai Lama, ima oqarpoq: ‘Upperisarsioqatigiit angisuut tamarmik asanninnissaq, misiginneqatiginninnissaq isumakkeerfiginnittarnissarlu oqariartuutigisarpaat.’ Imalu nangippoq: “Tamakkuli ulluinnarni ersersinneqartarnissaat pingaaruteqarpoq.”

 Pissuserineqartussat taakku, soorlu asanninneq, misiginneqatiginninneq isumakkeerfiginninnerlu, pingaaruteqarluinnarput. Jiisusi ima oqarluni siunnersuuteqarpoq tamatigut atorneqarsinnaasumik: “Inunnut qanorluunniit iliorfigeqqugussi ilississaaq taamatut iliorfigisigit.” (Matthæusi 7:12) Upperisarli ilumoortoq ajunngitsuliornerinnaava?

Apustili Paulusi nalimini Guutimut kiffartornerartut pillugit ima allappoq: “[Taakku] pillugit nalunaajaasariaqarpunga Guuti ilungersuutigigaat, kisianni silaqassuseqarnatik [eqqorluartumilli ilisimasaqarnatik, NW].” Suna ajornartorsiutaagami? Paulusi ima nangippoq: “Paasisimanngilaat Guutip iluarnera sunaasoq namminnerli iluarnertik atortinniarlugu.” (Romamiut 10:2, 3) Guutip piumasaa pillugu eqqorluartumik ilisimasaqannginnamik aallussilluarnerat — uppernerallu — iluaqutaanngillat. — Matthæusi 7:21-23.

TAAMATUT SULEQATIGIITTARNEQ BIIBILIMI QANOQ ALLAATIGINEQARPA?

Jiisusi ima oqarpoq: “Pilluarput eqqisseqatigiissitsisut.” (Matthæusi 5:9) Nammineq eqqisseqatigiissitsinermigut inuillu assigiinngitsunik upperisallit eqqissineq pillugu tusarliussiffigisarnerisigut oqaluussinermisut iliuuseqartarpoq. (Matthæusi 26:52) Tusarliussamik ilassinnittut kipineqarsinnaanngitsumik asaqatigiilerput. (Kolossemiut 3:14) Jiisusilli inuit assigiinngitsunik tunuliaqutallit eqqisseqatigiilersinniaannarlugit suleqatigiilersinniartarpai? Allat upperisarsiornikkut pallorfiginninneranni peqatigisarpai?

Farisiiarit saddukiiarillu upperisarsiornikkut siuttuisa Jiisusi peqqarniitsumik akerlilersorlugulu allaat toqunniarsaraat. Jiisusip tamanna qanoq qisuariarfigaa? Ajoqersukkani ima kajumissaarpai: “Ilaginnarsigit tappiitsuullutik tappiitsunik ingerlassisuupput.” (Matthæusi 15:14) Jiisusip inuit taamaattut upperisarsiornikkut suleqatigerusunngilai.

Kingusinnerusukkut illoqarfimmi Korinthimi — akaarinniffiusutut assigiinngitsunillu upperisarsiorfiusutut ilisimaneqartumi — Grækenlandimiittumi kristumiut ilagiivinik pilersitsisoqarpoq. Kristumiut taamatut avatangiiseqarnerminni qanoq iliussappat? Allat guutisiorneranni peqataasannginnissaat apustilip Paulusip ima allalluni erseqqissarpaa: “[Iluarnerup] inatsisaanneq sukkut peqatiginerpaa? Qaamasoq taartorlu sukkut assigiissuteqarpat? Qanoq ilillutik Kristusi Beliarilu [imaluunniit: Saatanilu] naligiissinnaappat?” Ima nangippoq: “Taamaattumik: ‘Akornannit anigitsi avissaarlugillu.’” — 2 Korinthimiut 6:14, 15, 17.

Kristumiut upperisarsiortunut allanut akuliuttarnerat Biibilimi akerlerineqarpoq. Immaqali ima eqqarsarputit: ‘Taavami inuit qanoq ataasioqatigiilersinneqarsinnaagamik?’

QANOQ ATAASIOQA­TIGIILERTOQAR­SINNAASOQ

Sanaartornermik suliaqartartut amerlasuunik sulisoqartarput. Taakkua malitassatut titartagaq sorleq maleruassanerlugu isumaqatigiinngissutigigunikku suliartik naammassisinnaassavaat?

Ullumikkut upperisarsioqatigiit assigiinngitsut suleqatigiittarnerannut tunngatillugu aamma taamatut oqartoqarsinnaavoq. Taakkua suleqatigiinnerup ataqqeqatigiinnerullu pingaaruteqassusiat oqaatigiuarpaat, upperisalli sumik tunngaveqarnissaa isumaqatigiissutigisinnaanngilaat. Taamaattumik ileqqussanut ajoqersuutinullu tunngasut avissaartuussutaajuaannarput.

Guutip pallorfiginninnermut najoqqutassiai Biibilimiittut malitassatut titartakkamut assersuunneqarsinnaapput. Biibili malillugu inuusinnaavugut. Inuit Biibilimit siulersortinneqartut naggueqatigiinnik upperisarsiortunillu aalajangersimasunik nikaginnikkunnaarlutik eqqissillutik ataasioqatigiillutillu suleqatigiinnissartik ilikkarsimavaat. Guutip tamanna ima oqarluni siulittuutigaa: “Inuiaat nutaanik oqaaseqalersissavakka, oqaatsinik minguitsunik, tamarmik Jehovap aqqanik torlorfiginnissinnaaqqullugit suleqatigiilluarlutillu taassuminnga kiffartorfiginnissinnaaqqullugit.” Ataasioqatigiinneq “oqaatsinik minguitsunik”, Guutip pallorfiginninnermut najoqqutassiaanik, aallaaveqarpoq. — Sefania 3:9NW; Esaja 2:2-4.

Jehovap Nalunaajaasuisa najukkavit ungasinngisaani ataatsimiinnerminnut najuunnissannut qaaqquaatsit. Taamaalillutit taakkua tupinnaannartumik eqqisseqatigiinnerat ataasioqatigiinnerallu nammineerlutit takusinnaassavat. — Tussiaat 133:1.