Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Maaji 2014

Nalunngiliuk?

Nalunngiliuk?

Romamiut naalagaaffianni inussiat qanoq atugaqartarpat?

Romamiut inussianut ujamiliutitittagaat

Romamiut naalagaaffianni inuppassuit aallarussaanermik sorsunner­miluunniit tigusaanermik kingorna inussianngor­tinneqarput. Tigusat taakku tunineqartut amerlanertigut angerlarsimaffitsik ilaquttatillu takoqqin­ngisaan­nartarpaat.

Saffiugassanik piiaaffinni inussiatut sulisut naalliullutik toqusarput; nunaannarmili sulisartunut angerlarsimaffinnilu inussianut atugassarititaasut ajunnginnerulaarput. Inussiat ilaat saviminermik ujameqartinneqartarput, tassanilu allassimasarpoq inussiamik piginnittumut utertitsisoq akissarsisinneqassasoq. Arlaleriarlutik qimaariaraluarsimasut qaamikkut F-imik, fugitivus-imik (inussiamik qimaasimasumik) isumaqartumik, uutarlugit nalunaaqutserneqarsinnaasarput.

Fiilimuumut allakkami apustilip Paulusip inussiamik qimaasimasumik Onesimosimik piginnittumut Fiilimuumut utertitsinera eqqartorneqarpoq. Paulusip Fiilimuut inatsisit naapertorlugit Onesimosimik sakkortuumik pillaasinnaatitaagaluartoq asanninneq ikinngutigiinnerlu tunngavigalugit Onesimosimik inussiarnersumik ‘ilassinneqquaa’. — Fiilimuut 10, 11, 15-18.

Sooq itsaq Fønikiamiut qalipaatissiaq aappallarissoq ilisimaneqaatigaat?

Fønikiap, ullumikkut Libanonitut ilisimaneqartup, qalipaat purpuri aappallarissoq tyrusi, illoqarfiup Tyrusip aqqanik taaguuserneqarsimasoq, ilisimaneqaatigaa. Kunngip Salomop itsaq Israelimi naalaffimmik pequsersuinermini ‘annoraamineq aappallarissoq’, assassortartumit Tyrusimiumit suliarineqarsimasoq, atorpaa. — 2 Nalunaarsuutit 2:12, 13.

Aappallarissup tyrusip qalipaatissiassanngortinniarnerata pisariunera pissutiginerullugu itsaq qalipaatissiani akisunerpaasimavoq. Qallersaammut ataatsimut siuteqqut murexsneglet * 12.000-it missaanniittut qalipaatissiassarineqartussaammata aalisartut immami siuteqqunik amerlasoorujussuarnik katerseqqaartariaqartarput. Tamatuma kingorna siuteqqup qinersiini qalipaat atugassaq peerniarlugu qaleruaa peerneqartarpoq. Qinersit taratsunik akooriarlugit ulluni pingasuni seqinermut manineqartarput. Taava akuugaq qummuattamut matuneqartartumut imermillu tarajulimmut kueriarlugu ulluni arlalinni kissassimaartinneqartarpoq.

Qalipaatissiassamik aappallarissumik tyrusimik nioqqutissiornermut tunisassiornermullu tunngatillugu Fønikiamiut niuertarnermikkut nunasiaateqalertarnermikkullu ukiuni hundredini arlalinni qalipaatissiassamik niuillaqqinnerpaasimapput. Taakku qalipaatissiassamik nioqqutissiortarnerannut uppernarsaatit Immap Akullersuup aamma Cádizip Spaniamiittup akornanni nassaarineqartarsimapput.

^ par. 8 Qalipaat 5-8 cm-tut takitigisarput.