Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Maaji 2014

 SAMMISAQ PINGAARNEQ

Qinunissamut pissutissaqarpa?

Qinunissamut pissutissaqarpa?

Immaqa ima apererusussaatit: ‘Guutip suut tamaasa, allaat eqqarsaatikka pisariaqartitakkalu, ilisimappagit qinusariaqarpunga?’ Taama aperinissamut pissutissaqarluarpoq. Jiisusi oqannginnerpa Guutip ‘pisariaqakkasi ilisimareerai suliluunniit qinnuiginngikkissinni’? (Matthæusi 6:8) Itsaq Israelimi kunngiusup, Daavip, tamanna ilisimavaa imalu allalluni: “Oqaaseq uanga oqqanni pinngorianngitsoq illit Naalagaq, ilisimareeraraat naammattumik.” (Tussiaat 139:4) Taava sooq Guutimut qinunikkut saaffiginnittariaqarpugut? Tamanna akissutissarsiniarlugu qinuneq pillugu Biibilimi qanoq allassimasoqartoq misissoriartigu. *

“Guuti qaninniarsiuk, taava taanna ilissinnut qanillissaaq.” — Jaaku 4:8

 QINUNEQ GUUTIMUT QANILLISSUTIGI­SARPARPUT

Jehovap * Guutip suut tamaasa ilisimagai Biibilimi allassimagaluartoq aamma ersersinneqarpoq pallorfiginnitsini pillugit paasissutissaannaat katersorneq ajorai. (Tussiaat 139:6; Romamiut 11:33) Killeqanngitsumik eqqaamasinnaassusia qarasaasiamut inuit ataasiakkaat pillugit paasissutissanik toqqorsiinnartartumut assersuunneqarsinnaanngilaq. Guutilli imminut qanillinissarput kissaatigigamiuk eqqarsaativut ilorlerpaat soqutigilluinnarpai. (Tussiaat 139:23, 24; Jaaku 4:8) Naak Guutip pisariaqartilluinnakkavut ilisimagaluarai Jiisusip ajoqersukkani qinusarnissaannik kajumissaarpai. (Matthæusi 6:6-8) Eqqarsaativut Pinngortitsisitsinnut saqqummiunnerusalerutsigit taassumunnga qaninnerulissaagut.

Immaqa ilaannikkut sunarpiaq qinnutigissanerlugu nalornissutigisarparput. Pissutsini taama ittuni misigissutsit oqaasertalersinnaanngisavut Guutip nalunngilai. Atukkatsinnik ilisimasaqarluarnini pissutigalugu pisariaqartitatsinnik matussusiisinnaavoq. (Romamiut 8:26, 27; Efesosimiut 3:20) Paasigutsigu Guuti, allaat malunnarpianngitsumik, inuunitsinnut akuliussimasoq taassumunnga qaninnerulersutut misigissaagut.

GUUTIP QINNUTIT TAMAASA AKISARPAI?

Biibilimi allassimavoq sooq Guutip Ajugaqanngitsup kiffami aalajaatsut qinnutaat akisarai, aamma sooq inuit ilaasa qinnutaat akineq ajorai. Assersuutigalugu piffissap ilaani itsaq Israelimi nakuuserneq nalinginnaalermat pruffiitini Esaja inunnut ima oqaqquaa: “Qanorluunniit qinutigigaluarussi tusassanngilassi. Assasi aammik ulikkaarput.” (Esaja 1:15) Erseqqippoq Guutip inatsisaanik asissuisup imaluunniit ajortumik siunertaqarluni qinusup Guutimik tusarneqarnissani ilimagissanngikkaa. — Ussatit 28:9; Jaaku 4:3.

Qinnutit pillugit Biibilimi ima allassimavoq: “Piumasaminut naapertuuttumik qinnuigigutsinni [tusarumaarpaatigut].” (1 Johannesi 5:14) Tamanna isumaqarpa Guutip kiffami qinnutaat tamaasa naammassiinnartarai? Tamatigut taamaattariaqanngilaq. Paulusip “timiminut kapputtoq” peeqqullugu Guutimut pingasoriarluni qinnutigisaa eqqarsaatigeriaruk. (2 Korinthimiut 12:7, 8) Immaqa Paulusi aaqqinneqarsinnaanngitsumik isimigut nappaateqarpoq. Tamanna taassumunnga ilungersunarsimassaqaaq! Paulusi napparsimasunik ajorunnaarsitsisinnaanermik, allaat toqusimasunik makititsisinnaanermik, piginnaaneqartitaavoq, namminerli nappaatini atuinnartariaqarpaa. (Apustilit Suliaat 19:11, 12; 20:9, 10) Akineqarusunnermisut qinnutini akineqanngikkaluartut Guutimit ikiorneqarnini qujamasuutigingaarpaa. — 2 Korinthimiut 12:9, 10.

“[Mannaavoq] taassuma saavani nakimanngissutigisarput: Piumasaminut naapertuuttumik qinnuigigutsinni tusarumaaraatigut.” — 1 Johannesi 5:14

Ilumoorpoq inuit Biibilimi eqqaaneqartut ilaasa qinnutaat tupinnartuliornikkut akineqartarnerat. (2 Kunngit 20:1-7) Taamatulli akineqartarnerat qaqutigoorpoq. Uppertut ilaasa qinnutimik akineqarpasittannginnerat eqqissiunnaarutigisarpaat. Assersuutigalugu Daavi ima aperivoq: “Qanoq sivisutigisumik puiorsimassavinga, Naalagaq?” (Tussiaat 13:2) Daavilli Jehovamit annaanneqartuarsimanerminik paasinninnini Guutimik tatiginninnerulissutigaa. Qinnummi tassani Daavi aamma ima oqarpoq: “Tatigaara unneqqarissutsit.” (Tussiaat 13:6) Ullumikkut Guutimut pallorfiginnittut Daavitut qinnutimik taassumannga akineqarnissaata tungaanut qinujuartariaqarsinnaapput. — Romamiut 12:12.

 GUUTIP QINNUTIT QANOQ AKISARAI

Guuti pisariaqartitatsinnik matussusiisarpoq.

Angajoqqaat asannittut pissutissaqarluarlutik qitornamik piumasaat tamaasa taakkununnga tunniunneq ajorpaat. Taamatuttaaq immaqa uagut qinnutivut kissaatigisatsitut piffissamiluunniit ilimagisatsinni Guutip akineq ajorpai. Pinngortitsisulli, ataatatut asannittutut, piffissaq eqqorlugu eqqortumillu pisariaqartitatsinnik matussusiiumaarnera tatigisinnaavarput. — Lukasi 11:11-13.

Ikioqqulluta qinnuterput Biibilimi atuakkatsinni Guutimit akineqar­sinnaavoq

Ilaannikkut Guutip qinnutit malun­narpian­ngitsumik akisarpai.

Taavami ajornartorsiutip qaangeru­minaatsup anigornissaanut ikioqqulluta qinugutta? Tupinnartu­liornikkut akineqanngikkutta isummissaagut Jehovap qinnuterput akisimanngikkaa? Naamik. Guutip malunnarpian­ngitsumik ikiorsimaneraatigut eqqarsaatigissallugu silatusaarnerussaaq. Immaqa piffissami eqqortumi ikinngutaalluartoq ikiorniarluta sapinngisaminik iliuuseqarsimavoq. (Ussatit 17:17) Imaassinnaannginnerpa ikinngut ernumasoq Jehovap uagutsinnik ikiuisikkaa? Ikioqqulluta qinnuterput aamma Biibilimi atuakkatsinni Guutimit akineqarsinnaavoq. Ajornartorsiutip naammagalugu atornissaanut Biibilimi pisariaqartitatsinnik ilisimassuseqalersin­neqarsinnaavugut. — 2 Timotheusi 3:16, 17.

Guutip piffissami eqqortumi ikiorniarluta ikinngutaal­luartoq uagutsinnik ikiuisissin­naavaa

Guutip kiffami ajornartorsiutaat piiginnarnagit amerlanertigut kiffani pisariaqartumik nukissaqaler­sittarpai. (2 Korinthimiut 4:7) Assersuutigalugu Jehovap ernermi Jiisusip Guutip aqqata mitannarsisin­neqarnissaa annilaangatigalugu misilinneqarnini sakkortooq imminit peeqqullugu qinnuigimmani erni nakussat­seqqullugu inngili aallartippaa. (Lukasi 22:42, 43) Tamatumunnga assingusumik Guutip pisariaqartit­siffitsinni ikinngutigil­luagarput tuppallernartumik oqaaseqartis­sinnaavaa. (Ussatit 12:25) Akissutit taama ittut malunnarpiar­tanngimmata Guutip qinnutitsinnik naammassinneriaasia maluginiar­tariaqarparput.

Guutip piffissarititaa nallersiiuk.

Biibilimi allassimavoq Guutip Ajugaqanngitsup inuit maniguuttut “piffissaq nalliuppat” ikiorumaarai. (1 Petrusi 5:6) Qinnutitta ilaat ingerlaannaq akissutisinngikkutsigit eqqarsalissanngilagut Jehovap soqutiginngikkaatigut. Pinngortitsisitta asannittup ilisimassuseqangaarnini pissutigalugu nalunnginneruaa qinnutivut uagutsinnut iluaqutaanersut.

“Taamaattumik Guutip assaata pissarsuup ataani qanilaartuugitsi, taava taassuma piffissaq nalliuppat akitsisissavaasi.” — 1 Petrusi 5:6

Tamanna ima assersuusiarineqarsinnaavoq: Takorlooruk ernivit cykelitaarsinnaanerluni aperigaatit. Piumasaanik tuniinnassagaluarpiuk? Misigiguit cykelitaarnissaminut suli nukangavallaartoq immaqa aalajangissaatit pitsinnissaanut utaqqisilaarniarlugu. Ullulli arlaanni cykelitaarnissaanut piukkunnarsippat qularnanngitsumik pitsikkumaarpat. Tamatumunnga assingusumik qinusarnitsinni qasusuikkutta piumasatsinnik eqqortunik, ‘uummatitta kissaatigisaannik’, piffissaq eqqorlugu Guutip tuniumaarpaatigut. — Tussiaat 37:4.

JEHOVAMIT TUSARNEQA­RUMAARNERIT TATIGIUK

Kristumiut ilumoortut qinunerup iluaqutaanera qulareqqunagu Biibilimi kajumissaarneqarput. ‘Oqaannarluni ajornannginnerusarpoq’, immaqa oqarumassaatit. Ilumoorpoq qaangeruminaatsumik ajornartorsiuteqarnitsinni imaluunniit eqqunngitsumik pineqarnitsinni Guutip akissuteqarnissaa utaqqikatannarsinnaasoq. Jiisusilli qinunermi pinertusaartuarnissamik ilinniartitsissutaanik eqqaamanninnissaq pingaaruteqarpoq.

 Uillarneq piitsoq naapertuilluartumik pineqarumalluni eqqartuussisumut naapertuilluanngitsumut uteqattaartuartoq Jiisusip assersuutitut oqaluttuaraa. (Lukasi 18:1-3) Siullermik eqqartuussisup itigartikkaluarlugu naggataatigut imminut ima oqarfigaaq: “Uillarneq taanna ikiorniarpara naapertuilluartumik pineqarnissaanut, pisarissersormanga, taamaaliunngikkuma ornillunga isarujussuaqinavaanga.” (Lukasi 18:4, 5) Allassimaqqaarfiit naapertorlugit eqqartuussisoq tusarnaarpoq uillarnerup ‘isimi ataatigut tilloqinammani’ imaluunniit ‘tusaamanerlunneqaleqinagami’. * Eqqartuussisoq naapertuilluanngitsoq tusaamanerlunneqalernissaminik annilaangatiginnilluni uillarnermik ikiuiumaguni qanorli Guutip isumassuingaartup ‘ulloq unnuarlu torlorfiginnittuartut’ ikiorumanerungaartigissavai. Jiisusip oqarneratut Guutip “naapertuilluartumik pineqartissavai erniinnaartumik”. — Lukasi 18:6-8.

“Qinugitsi, tunineqassaasi taava.” — Lukasi 11:9

Ilaannikkut ikioqqulluni qinujuarnissaq sapernarsinnaasaraluartoq tunniutiinnartassanngilagut. Qinunermi qasusuinnikkut Guutimit siulersorneqarusulluta ersersissavarput. Taamaaliornikkut qinnutitsinnut Guutip akissutai maluginiarnerulissavavut tamannalu Guutimut attaveqarlualernermik kinguneqassaaq. Aap, tatigilluinnarsinnaavarput uppernikkut qasusuilluta qinnutivut Jehovap akiumaarai. — Lukasi 11:9.

^ par. 3 Guutip qinnutitsinnut tusarnaarnissaa kissaatigigutsigu taassuma piumasaqaatai maleruaqqissaarniartariaqarpavut. Taamaaliorutta, allaaserisami matumani sammineqartutut, qinnutit sunniuteqangaartarnerat misigisinnaavarput. Atuakkami Biibilimi sorpiaat ajoqersuutigineqarpat?-mi kapitali 17-imi, Jehovap Nalunaajaasuinit saqqummersinneqartumi, paasisaqarnerusinnaavutit.

^ par. 5 Biibili naapertorlugu Guuti Jahvemik, imaluunniit Jehovamik, ateqarpoq.

^ par. 22 Biibilip nalaani Guutip piumasaraa Israelimi eqqartuussisut uillarnernik iliarsunnillu immikkut isumassuisuusassasut. — 5 Mosesi 1:16, 17; 24:17; Tussiaat 68:6.