KAASARI QIN SHI HUANGDI

ILISIMA­SASSAR­SIORTOQ PONCE DE LEÓN

Toqu akeraavoq naakkittaatsoq sapinngisarput tamaat atorlugu akiorniartagarput. Asasatsinnik annaasaqa­raangatta immaqa pisoq ilumuunngin­neraqqajaa­sarparput. Imaluunniit inuusut­tuugutta nukissaqar­luarlutalu immaqa akeqqatsinnit taassumannga ajugaaffigi­neqarsinnaan­ngitsutut eqqarsar­tarpugut — takorluugaq piviusuunngitsoq sapinngisamik sivisunerpaamik takorloor­niartagarput.

Itsaq faraot toqujuissusermik ujartuiuarsimapput. Taakkua inuunermik annersaat — sulisartullu tuusintilippassuit inuunerat — toqumik ajugaaffiginninniarnermut atorpaat. Pyramideliaat toqujuissusermik ujartuinerannut — nassaarinnis­simanngin­nerannullu — uppernarsaataapput.

Kiinamiut kaasarii oqaluttuatoqqat naapertorlugit inuunertusaammik imertagassialiortitsinermikkut aamma toqujuitsunngorusussimapput. Kaasarip Qin Shi Huangdip angakkuni toqujuitsunngortitsisumik imertagassiornissaannik piumasaqarfigai. Angakkulli inuunertusaatiliarpassui toqunartumik kviksølvitaqarput, taakkuninngalu ilaannik imernini toqqutigisimagunarpaa.

1500-kkunni ilisimasassarsiortoq spaniamiu Juan Ponce de León inuusuttuunerup puilaffia ujarniarlugu Puerto Ricomit umiarsuarluni aallarpoq. Taassuma Florida, USA-miittoq, nassaaraa, ukiulli arlaqanngitsut qaangiummata nunap inoqqaavinut sorsunnermini toquvoq. Inuusuttuunerullu puilaffia nassaarineqanngisaannarsimavoq.

Faraot, kaasarit ilisimasassarsiortullu tamarmik toqumut ajugaariaraluarput. Tamatta, naak immaqa taakkua periusaat iluarinngikkaluarlugit, sooq taamaaliornersut paasivarput, ilaa? Amerlanersatta inuujuarnissartik kissaatigilluinnarpaat.

TOQU AJUGAAFFI­GINEQAR­SINNAAVA?

Sooq toqu akueriuminaatsipparput? Tamanna Biibilimi nassuiarneqarpoq. Tassani Pinngortitsisoq, Jehova Guuti, * pillugu ima allassimasoqarpoq: “Suut tamaasa suliarisimavai ajunngitsumik eqqortumillu piffissarlu eqqorlugu, aammattaaq  inunnut eqqarsaatigisassanngortippai silarsuarmi pisartut [aammattaaq naassaanngissuseq inuit uummataanniitissimavaa, Biibili-mi quppernerup ataani ilanngussaq].” (Oqaluussisartup oqaasii 3:11) Nunarsuarmi kusanangaaqisumi inuuneq naassaanngitsumik, ukiuni 80-iniinnaanngitsoq, nuannaarutigerusupparput. (Tussiaat 90:10) Kissaat tamanna uummatitsinniippoq.

Sooq Guutip inuit ‘naassaanngissusermik’ uummammiulerpai? Isumatsatsinniaannarluta? Naamerluinnaq. Akerlianik toqup ajugaaffigineqarumaarnera Guutimit neriorsuutigineqarpoq. Neriorsuut tamanna inuunermillu naassaanngitsumik neriorsuut Biibilimi arlaleriarlutik eqqaaneqarput. — Takuuk ungalusaq  “Toqumut ajugaaneq”.

Jiisusi paatsuugassaanngitsumik ima oqarpoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” (Johannesi 17:3) Tassa toqu ajugaaffigineqarumaarpoq. Guutilli kisimi akiuunnitsinni tamatumani ajugaatitsisinnaanera Jiisusip uppernarsarpaa.

^ par. 9 Biibili naapertorlugu Guuti Jahvemik, imaluunniit Jehovamik, ateqarpoq.