Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik  |  Januaari 2014

 SAMMISAQ PINGAARNEQ | SALLULIUUTIT GUUTIMIK ASAJUMINAATSITSISUT

Sooq inuppassuit Guuti asajuminaatsikkaat

Sooq inuppassuit Guuti asajuminaatsikkaat

“‘Naalagaq Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu.” — Jiisusi Kristusi, ukioq 33 Kr.in.king. *

Inuit ilaasa Guuti asajuminaatsittarpaat. Guuti paasissaanngitsutut, ungasittutut imaluunniit allaat peqqarniitsutut isigisarpaat. Ataani oqaaserineqartut maluginiakkit:

  • “Guutimut ikioqquvunga, taamaakkaluartorli Guuti ungasissorujussuartut allaallu attavigineqarsinnaanngitsutut isigaara. Aamma misigissuseqanngitsutut isigaara.” — Marco, Italiamiu.

  • “Guutimik pallorfiginninnissara kissaatigilluinnarpara, misigivungali ungasissorujussuusoq. Misigivunga Guuti sukannersuullunilu uagutsinnik pillaarusuttartoq. Guutip asannissuseqarnera upperinngikkaluarpara.” — Rosa, Guatemalamiu.

  • “Meeraallunga isumaqartarnikuuvunga Guutip uagutsinnik pillaaniarluni kukkunissarput utaqqiinnartaraa. Kingusinnerusukkut ungasissutut isigilerpara. Allaanngilaq Guuti ministeriunertut nunami naalakkersuiffimmini innuttaasunut tunngasunik isumaginnittaraluarluni innuttaasunik soqutigisaqanngitsoq.” — Rebecca, Canadamiu.

Illit qanoq isumaqarpit? Guuti asajuminaappa? Kristumiut ukiuni hundredilikkuutaani apeqqut tamanna apeqqutigisarsimavaat. Allaat ukiuni akullerni kristumiut amerlanerit Guutimut Ajugaqanngitsumut qinunaveersaartarsimapput. Sooq? Ersigilluinnaramikku. Oqaluttuarisaanermik ilisimatooq Will Durant tamanna pillugu ima oqarpoq: “Qanoq ililluni ajortiliup qinnutini sapiiserluni [issiavissaarsuarmi issiasumut] taama ungasitsigalunilu amiilaarnartigisumut saqqummiussinnaassagamigit?”

Sooq Guuti ‘ungasittutut amiilaarnartutullu’ isigineqalerpa? Guuti pillugu sorpiaat Biibilimi ajoqersuutigineqarpat? Guuti pillugu sallusuissummik paasinninnerit taassuminnga asanninnissannut iluaqutigisinnaaviuk?