Imarisai

Imai

Jehovap Nalunaajaasui

Oqaatsit toqqakkit Kalaallisut

“Illit piumasat taamaappoq”

“Illit piumasat taamaappoq”

“Ilisimasunut sianisuunullu tamanna isertorakku saqqummersilluguli meerannguanut.” — LUK 10:21.

1. Sooq Jiisusi ‘anersaamit illernartumit sunnigaalluni qiimmattarpa’? (Allaaserisap aallaqqaataani assiliaq takuuk).

JIISUSI ‘anersaamit illernartumit sunnigaalluni qiimmattartoq’ najorlugu qanoq issimassasoq takorlooruk. Immaqa qungujulallunilu pissanganermik qiimarpasippoq. Sooq? Ajoqersukkani 70-it * Guutip naalagaaffia pillugu nutaarsiassamik nuannersumik oqaluusseqqullugit aallartikkamigit. Pissaanillit amerlasuut nutaarsiassamik nuannersumik akerlilersuinerat pissutigalugu ajoqersukkani suliassamik qanoq naammassinnissimanersut tusarusungaarpaa. Allakkanik ilisimasut farisiiarillu qaffasissumik ilinniagaqarsimasut silassorissullu akerlilersuisunut taakkununnga ilaapput. Jiisusi sanasuinnartut taassumalu ajoqersugai ‘inuinnaasutut immikkut ilinniagaqarsimanngitsutut’ inunnit isigineqarnissaat kissaatigaat. (ApS 4:13; Mark 6:3) Taamaakkaluartorli ajoqersukkat oqaluussereerlutik uteramik nuannaangaarput. Allaat anersaapilunnit akerlilersorneqaraluarlutik oqaluussisimapput! Sooq nuannaarlutillu sapiissuseqarsinnaasimappat? — Lukasi 10:1, 17-21 atuakkit.

Guutip innuttaasa ilinniartitseriaasertik paasiuminarsarneratigut pitsanngorsarsimavaat

2. (a) Sooq Jiisusip ajoqersukkani meerannguanut assersuuppai? (b) Jiisusip ajoqersugaasa sallusuissutinik Biibilimeersunik paasinninnissaminnut suna iluaqutigaat?

 2 Jiisusip Jehova ima oqarfigaa: “Unnersiutigaakkit Ataataq, qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut. Ilumummi, Ataataq, tamanna piumasaraat.” (Matt 11:25, 26) Sooq Jiisusip ajoqersukkani meerannguanut assersuuppai? Allakkanik ilisimasut farisiiarillu qaffasissumik ilinniagaqarsimasut imminnullu ilisimatuutut isigisut assiginagit Jiisusip ajoqersugai meeqqat pisarnerattut ilinniarusussuseqaramik. Makitanissartik ilinniarnagu maniguunnissartik ilinniarpaat. (Matt 18:1-4) Maniguummata Jehovap anersaani illernartoq atorlugu sallusuissutinik itisuunik Biibilimeersunik paasinninnissaannut ikiorpai. Juutilli upperisarsiornikkut siuttui makitasuut Saatanimit makitassuserminnillu tappiillisitaaqqajuarput.

3. Allaaserisami matumani suna sammissavarput?

3 Jiisusip qiimmattarnera paasinarpoq! Jehovap inunnik maniguuttunik, ilinniagaat apeqqutaatinnagit, sallusuissutinik itisuunik Biibilimeersunik paasinninnissamut ikiuinera Jiisusip nuannaarutigaa. Guutip allanngorsimannginnini pissutigalugu taamatut ilinniartitseriaaseq ullumikkut aamma iluaraa. Tamanna qanoq ersersittarpaa? Allaaserisami matumani sallusuissutit itisuut Biibilimeersut inunnut maniguuttunut Jehovap qanoq paasinarsisittarnerai sammissavarput.

SALLUSUISSUTINIK ITISUUNIK TAMANUT NASSUIAANEQ

4. Sooq oqarsinnaavugut Napasuliaq Alapernaarsuiffik paasiuminarsagaq tunissutaasoq?

4 Ukiuni kingullerni Guutip peqatigiissortaasa paasiuminartumik ilinniartitsisarnerup pingaaruteqassusia erseqqissartarsimavaat. Assersuutit pingasut sammeriartigit. Siullertut, Napasuliaq Alapernaarsuiffik paasiuminarsagaq saqqummersinneqartarpoq. * Inuppassuarnut, aamma atuffarluttunut oqallorippallaanngitsunullu, tunissutaavoq iluaqutaangaarsimasoq. Ilaqutariit paasisimavaat atuagassiaq paasiuminarsagaq pissutigalugu meeqqat Napasuliaq Alapernaarsuiffik paasilluarnerusinnaagaat. Qatanngutit amerlasuut qujassuteqarniarlutik allassimapput. Qatanngut arnaq oqaluttuarpoq siornatigut Napasuliaq Alapernaarsuiffik-mik atuaqqissaaqatigiinnermi akisarnissani merserisarsimallugu. Atuagassiarli paasiuminarsagaq pillugu ima allappoq: “Maannakkut minnerpaamik ataasiarlunga akisarpunga annilaangasarunnaarlungalu. Jehovamut ilissinnullu qujassutissaqaqaanga!”

5. New World Translation of the Holy Scriptures-ip nutarterneqarnera sutigut iluaqutaasimava?

5 Aappaattut, Biibili New World Translation of the Holy Scriptures nutartigaq tuluttooq 2013-imi oktobarip tallimaanni ukiumoortumik ataatsimiinnermi saqqummersinneqarpoq. *  Allassimaffippassuit tuluttut ikinnerusunik oqaasertaqaleraluartut isumaat allanngornatillu paasiuminarnerulerput. Assersuutigalugu Jobimik allakkat 10:1 27-nik oqaasertaqarunnaarluni 19-inik oqaasertaqalerpoq aamma Ussatit 8:6 20-nik oqaasertaqarunnaarluni 13-inik oqaasertaqalerpoq. Allassimaffiit taakku marluk nutartikkami paasiuminarnerulerput. Qatanngut angut tanitaq ukiorpassuarni aalajaalluni Jehovamut kiffartortoq ima oqaluttuarpoq: “Biibilimi nutartikkami Jobimik allakkat atuaqqammerpara, misigivungalu aatsaavissuaq paasillugu!” Qatannguterpassuit tamatumunnga assingusumik oqarsimapput.

6. Inussiaq aalajaallunilu silatooq aamma kiffat pillugit paasinnittaatsitsinnik allannguisimanerput qanoq isumaqarfigaajuk? (Matt 24:45-47)

6 Pingajuattut, allassimaffinnik aalajangersimasunik qanittukkut paasinnittaatsitsinnik allannguisimanerput eqqarsaatigiuk. Assersuutigalugu “inussiaq aalajaallunilu silatooq” pillugu paasinnittaatsitsinnik allannguisimanerput Napasuliaq Alapernaarsuiffik-mi juulip 15-iat 2013-imoortumi saqqummersinneqarpoq. (Matt 24:45-47, NW) Allaaserisami tamatumani nassuiarneqarpoq inussiaq aalajaatsoq Siulersuisoqatigiinnut assersuutaasoq. Aamma ‘kiffat’ tanitanut ‘savanullu allanut’ inussiamit aalajaatsumit nerisassanik pisartunut tamanut assersuutaasut. (Joh 10:16) Sallusuissutit taakku pillugit ilinniarnerput allanillu ilinniartitsisarnerput nuannaarutigaarput! Ilinniartitseriaatsimik paasiuminarnerusumik Jehovap iluarinninnini aamma sutigut allatigut ersersissimavaa?

BIIBILIMI OQALUTTUAT PILLUGIT NASSUIAATIT PAASIUMINARNERUSUT

7, 8. Biibilimi oqaluttuat siunissami pisussanut annerusunut assersuutaasut ilaat suuppat?

7 Ukiorpassuarni Jehovamut kiffartorsimaguit Biibilimi oqaluttuat pillugit nassuiaatit Biibililersaarutitsinni allanngorsimanerat maluginiarsimassavat. Siusinnerusukkut oqaluttuat siunissami pisussanut annerusunut assersuutaanerarnissaat nalinginnaasimavoq. Biibilimi oqaluttuat taamatut nassuiassallugit pissutissaqarluarpa? Aap. Assersuutigalugu Jiisusi ‘pruffiitip Jonap nalunaaqutigisaanut’ innersuussivoq. (Matthæusi 12:39, 40 atuakkit). Jiisusip nassuiarpaa Jonap piffissaq imarmiorsuup iluaniiffia piffissamut iliverminiinnerminut assersuutaasoq.

Biibilimi oqaluttuat taakkualu assersuutissartaat atuaqqissaaraangatsigit uppernerput nakussatsinneqartarpoq

8 Biibilimi oqaluttuat allat aamma siunissami pisussanut annerusunut assersuutaapput. Apustilip Paulusip taakkua ilaat arlallit allaaserai. Assersuutigalugu Aaperaap Hagarimut Saramullu attaveqarnera Jehovap inuiaqatigiinnut Israelikkunnut Guutillu peqatigiissortaanut qilammiittumut attaveqarneranut assersuutaavoq. (Gal 4:22-26) Taamatuttaaq tupeq naapeqatigiittarfik, naalaffik, ulloq saammaannartitsivik, palasiuneq allallu Inatsisini allaatigineqartut ‘pisussat  nalliuttussat ajunngitsut tarraannaraat’. (Hebr 9:23-25; 10:1) Biibilimi oqaluttuat taakkualu assersuutissartaat atuaqqissaaraangatsigit uppernerput nakussatsinneqartarpoq. Imaappali inuit, pisut atortorineqartullu Biibilimi eqqaaneqartut tamarmik inunnut pisunulluunniit allanut assersuutaasut?

9. Siusinnerusukkut Naboti pillugu Biibilimi oqaluttuaq qanoq nassuiarneqartarpa?

9 Siusinnerusukkut Biibililersaarutitsinni inuit, pisut atortorineqartulluunniit oqaluttuani eqqaaneqartut inummut pisumulluunniit assersuutaanerat allaaserineqakulasarpoq. Assersuutigalugu dronningip ajortup Jezabelip Naboti toqutaatippaa uimi, Akabip, taassuma viinnequteqarfia piniassammagu. (1 Kng 21:1-16) 1932-mi Napasuliaq Alapernaarsuiffik-mi nassuiarneqarpoq Akabi Jezabelilu Saatanimut taassumalu peqatigiissortaanut assersuutaasut, Naboti Jiisusimut assersuutaasoq Nabotillu toqunera Jiisusip toqutaaneranut assersuutaasoq. 1965-imili atuakkami “Lad dit navn blive helliget”-mi allassimavoq Naboti tanitanut assersuutaasoq, Jezabeli kristumiuunerartunut assersuutaasoq Nabotillu Jezabelimit malersorneqarnera tanitat ulluni kingullerni malersorneqarnerannut assersuutaasoq. Ukiorpassuarni nassuiaatit taakku Guutip kiffaanik aalajaatsunik nakussatsitsisimapput. Taamaattumik ullumikkut sooq allaanerusumik nassuiaasarpugut?

10. (a) Inussiaq aalajaatsoq Biibilimi oqaluttuanik nassuiaassagaangami sutigut mianersornerusarpa? (b) Ullumikkut Biibililersaarutitsinni suut sammineqarnerusarpat?

 10 Ukiut ingerlaneranni Jehovap inussiaq aalajaallunilu silatooq mianersornerunissaanut silatusaarnerunissaanullu ikiorsimavaa. Qanoq? Massakkut inussiap aalajaatsup Biibilimi oqaluttuap pisussamut annerusumut assersuutaanerartarpaa taamaallaat taamaaliornissamut Biibilimi tunngavissaqaraangat. Qangaanerusoq siunissami pisussanut annerusunut nassuiaatit paasiuminaatsuullutillu eqqaamajuminaatsuullutillu maleruaruminaatsuupput. Pingaarnerusumillu Biibilimi oqaluttuani pisussamut annerusumut nassuiaataasinnaasut sammineqarpallaaleraangata ilinniutissartaat maangaannartarput. Taamaattumik ullumikkut atuagassiani upperneq, pinertusaarneq, Guutimut tunniusimaneq pissuserineqartussallu allat Biibilimi oqaluttuanit ilinniutigisinnaasavut paasiuminarnerusut sammineqarnerusarput. *

Nabotip maligassiuilluarnera ilinniarfigingaarparput (Immikkoortoq 11 takuuk)

11. (a) Naboti pillugu oqaluttuaq maanna qanoq paasivarput, taassumalu maligassiuinera qanoq iluaqutigaarput? (b) Sooq ukiuni kingullerni Biibilimi oqaluttuat siunissami pisussanut annerusunut assersuutitut Biibililersaarutitsinni qaqutigoortumik allaatigineqartarsimappat? (Atuagassiami matumani “Atuartartut apeqqutaat” takuuk).

11 Naboti pillugu oqaluttuamik paasinnittaaserput maanna paasiuminarneruvoq. Nabotip toqunera Jiisusimut tanitanulluunniit assersuutaanngilaq. Guutimulli aalajaannini pissutigalugu toquvoq. Naalakkersuisumit pissaanilimmit malersorneqangaaraluarluni Jehovap inatsisai maleruartuarpai. (4 Mos 36:7; 1 Kng 21:3) Ullumikkut Guutip kiffaanut taassumatut malersorneqartunut maligassaalluangaarami. (2 Timotheusi 3:12 atuaruk). Kristumiut tamarmik ilinniutissartaa paasisinnaavaat, eqqaamasinnaavaat, maleruarsinnaavaat uppernikkullu nakussatsissutigisinnaallugu.

12. (a) Biibilimi oqaluttuat pillugit qanoq isummertariaqanngilagut? (b) Sooq sallusuissutit itisuut paasiuminarnerusumik nassuiarsinnaalernikuuavut? (Quppernerup ataatungaani ilanngussaq takuuk).

12 Isummertariaqarpugut Biibilimi oqaluttuat ilinniutissaannaasut? Naamik. Paarlattuanilli Biibililersaarutitsinni Biibilimi oqaluttuat siunissami pisussanut annerusunut assersuutit nassuiarnagit qanoq ilinniarfigineqarsinnaanersut sammineqarnerusarpoq. Assersuutigalugu Nabotip malersorneqaraluarluni assuarnaattuarnera toquneralu Kristusip tanitallu assuarnaattuarnerannik eqqaasitsissutigaarput. ‘Savalli allat’ amerlangaartut assuarnaattuarnerannik aamma eqqaasitsissutigaarput. Jehovap uagutsinnik  ilinniartitseriaasiata paasiuminarnerunera ersarippoq. *

JIISUSIP ASSERSUUSIAI PILLUGIT NASSUIAATIT PAASIUMINARNERUSUT

13. Maanna Jiisusip assersuusiaanik paasiuminarnerusumik nassuiaasalersimanerput sumit erserpa?

13 Jiisusi Kristusi ilinniartitsisut inuusimasut pingaarnerpaartaraat. Taassuma ilinniartitsinermini assersuusiornissani nuannarisarpaa. (Matt 13:34) Assersuutit isummanik paasiuminaatsunik paasiuminarsaanermut, eqqarsalersitsiniaanermut uummatinillu killiinissamut iluaqutaammata sunniuteqarluartarput. Ukiut ingerlaneranni Biibililersaarutitsinni Jiisusip assersuusiai paasiuminarnerusumik nassuiarneqartalersimapput. Assersuutigalugu Jiisusip seernarsaat, siinuppip naatsiiassartaa qassutillu pillugit assersuusiaasa paasilluarnissaannut Napasuliaq Alapernaarsuiffik aggustip aallaqqaataa 2008-moortoq iluaqutigaarput. Maanna assersuutit taakkua Guutip naalagaaffianut innersuussutaanerat paasivarput, tamannalu inuppassuit silarsuarmik ajortumik matuminnga itigartitsinissaminnut Kristusimullu ajoqersuganngornissaminnut iluaqutigisimavaat.

Assersuutit isummanik paasiuminaatsunik paasiuminarsaanermut, eqqarsalersitsiniaanermut uummatinillu killiinissamut iluaqutaammata sunniuteqarluartarput

14. (a) Samariamiu isumassuisoq pillugu assersuusiaq qanoq nassuiartarsimavarput? (b) Jiisusip assersuusiaa maanna qanoq paasivarput?

14 Jiisusip oqaluttuai, imaluunniit assersuusiai, sukumiinerusut qanoq paasisinnaavavut? Oqaluttuat ilaat assersuutaallutilluunniit siulittuutaapput. Allat ilinniutissartaqarput. Qanorli nalunngissinnaavarput suut assersuutaanersut suullu assersuutaannginnersut? Ukiut ingerlaneranni tamatuma akissutaa ersarinnerulersimavoq. Assersuutigalugu Samariamiu isumassuisoq pillugu Jiisusip assersuusiaanik nassuiaasarsimanerput eqqarsaatigiuk. (Luk 10:30-37) Napasuliaq Alapernaarsuiffik-mi 1924-moortumi allassimavoq Samariamiu Jiisusimut assersuutaasoq Jerusalemimillu Jerikomut aqqusineq ammukajaaq Edenimi pikitsitsinerup kingorna inuit atugarisaasa ajorsiartuinnarnerannut assersuutaasoq. Aamma aqqusinermi ujajaasut niuertunut suleqatigiinnut piumatuunullu pissaanilinnut assersuutaasut aamma palasi Levikkuusorlu kristumiuunerartunut assersuutaasut allassimavoq. Ullumikkulli Biibililersaarutitsinni assersuusiaq taanna kristumiut tamarmik inuit allat pillugit isummiussereertannginnissaannik eqqaasitsissutitut atorneqartarpoq. Tamatta pisariaqartitsisut, ingammik anersaakkut ittunik, ikiortariaqarpavut. Jehovap sallusuissummik paasiuminarnerulersitsisimanera qujamasuutigaarput.

15. Allaaserisami tulliuttumi suna sammissavarput?

15 Allaaserisami tulliuttumi Jiisusip niviarsiat qulit pillugit assersuusiaa sammissavarput. (Matt 25:1-13) Assersuusiaq taanna Jiisusip ulluni kingullerni ajoqersukkami qanoq paasissagaat kissaatigaa? Assersuummi inuit, atortorisat pisulluunniit eqqaaneqartut tamarmik siunissami inummut pisussamulluunniit annerusumut assersuutaappat? Imaluunniit ulluni kingullerni iluaqutigisassatsinnik Jiisusip ilinniartikkusuppaatigut? Tamanna sammissavarput.

^ par. 1 Biibilimi allassimaqqaarfiit ilaanni ‘70-inik’ allanilu ‘72-inik’ allassimasarput.

^ par. 4 Atuagassiaq paasiuminarsagaq 2011-mi juulimi tuluttut saqqummersinneqaqqaarpoq. Taamanimiilli oqaatsit allat amerlanngitsut atorlugit saqqummersinneqartalerpoq.

^ par. 5 Biibili nutartigaq oqaatsini allani saqqummersinneqarumaarpoq.

^ par. 10 Assersuutigalugu inuit Biibilimi eqqaaneqartut inuunerat Napasuliaq Alapernaarsuiffik-mi allaaserisani Uppersusiat maliguk-mi sammineqarput. Allaaserisani pisussanut annerusunut nassuiaatit sammineqarnatik oqaluttuat sutigut ilinniarfigineqarsinnaasut sammineqartarpoq.

^ par. 12 Guutip oqaasia ‘paasiuminaassinnaasunik’, soorlu Paulusip allagaasa ilaannik, imaqarpoq. Biibilimilli allaqataasut tamarmik anersaamit illernartumit isumassarsisinneqarput. Ullumikkut Guutip anersaavata kristumiut Biibilimik, ‘Guutip itissusiinik allaat’, paasinninnissaannut ikiortarpai. — 2 Petr 3:16, 17; 1 Kor 2:10.