Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Marsi 2015

“Naalakkami” taamaallaat katinnissaq piviusorsiornerua?

“Naalakkami” taamaallaat katinnissaq piviusorsiornerua?

“Kuisimasumik aappassaqanngilanga, aamma kisimiillunga utoqqalinissara annilaangatigaara.”

“Angutit ilaat nalunaajaasuunngitsut inussiarnersuullutillu asannillutillu isumassuisuupput. Upperisannik akerlilersuineq ajorlutillu qatanngutinit angutinit soqutiginarpasinnerusarput.”

Guutimut kiffaasut ilaat aappaqanngitsut tamatumunnga assingusumik oqarsimapput. Jehovap kiffami “Naalakkami” taamaallaat, tassa kristumiunut ilumoortunut, katittarnissaannik piumasaqarnera nalunngilaat. (1 Kor 7:39) Taamaattumik kristumiut ilaat sooq taamatut oqartarpat?

ERNUMANERMUT PISSUTAAQATAASUT

Qatanngutit arnat angutinit amerlanerummata kristumiut ilaat taamatut oqartarput. Nunarpassuarni aamma taamaappoq. Assersuutigalugu Koreami qatanngutit 57 procentii arnaapput 43 procentiilu angutaallutik. Colombiamilu qatanngutit 66 procentii arnaapput 34 procentiilu angutaallutik.

Nunat ilaanni angajoqqaat nalunaajaasuunngitsut panimminnut katikkusuttumut aningaasarpassuarnik tunissutinilluunniit akisuunik piumasaqartarput. Qatanngutillu angutit kisimiittut tunissutinut taakkununnga akissaqarneq ajorput. Tamatuma kingunerisaanik qatanngutit arnat ilaasa kristumiumik uinissinnaanerlutik ernumassutigisarpaat. *

JEHOVA TATIGILLUINNARUK

Taamatut misigisimaguit qularinngilluinnarsinnaavat Jehovap atukkannik misigissutsinnillu ilisimaarinnilluinnarnera. — 2 Nal 6:29, 30.

Biibilimili Jehovap peqquaatigut Naalakkami taamaallaat katissasugut. Sooq? Uagutsinnut pitsaanerpaaq nalunagulu illersorusukkamisigut. Ajuallaatigisatsinnik imaluunniit pilluarunnaassutigisatsinnik aalajangiinerlunnissarput kissaatiginngilaa. Nehemiap nalaani juuterpassuit Guutimut  kiffartunngitsunik nuliarput. Taamaattumik Nehemiap Salomop maligassiuinerlunnera eqqaavaa. “Salomo Guutimit asaneqarpoq, Guutillu Israelimut tamarmut kunnginngortippaa; taamaakkaluartoq takornartat arnartaasa ajortuliortippaat.” (Neh 13:23-26) Jehovap oqaaqqissaarutini iluaqutigissagivut nalunnginnamiuk Naalakkami taamaallaat kateqquaatigut. (Tuss 19:8-11; Es 48:17, 18) Asannittumik tutsuiginartumillu siunnersorsimammatigut qujamasungaarpugut. Jehova Naalakkersuisutsitut naalakkaangatsigu Kisimi Oqartussaasutut akuerisarparput. — Uss 1:5.

Soorunami ‘uppinngitsut uniaqatigerusunngilatit’, tassa Jehovamik asanninngitsumik aappartaarusunngilatit. Inuummi taassuma Guutimut kiffartorunnaarsissinnaavaatit. (2 Kor 6:14) Guutip siunnersuutai iluaqutaajuaannarput, ullumikkullu kristumiorpassuit silatusaarlutik Jehovamut naalanniarlutik aalajangersimapput. Taamaakkaluartorli qatanngutit ilaat silatusaarniarnatik aalajangertarput.

PIVIUSORSIORNERUVOQ

Qatanngut arnaq Australiami najugalik Maggymik atilik kristumiuunngitsumik sammisaqalerpoq. * Ima oqaluttuarpoq: “Taanna ilaginiaannarlugu ataatsimiigiarpiassaarpunga. Anersaakkut sanngiillingaatsiarpunga.” Qatanngut arnaq alla Indiami najugallip Ratanamik atillip atuaqatini Biibilimik atuaqqissaartalersoq sammilerpaa. Angutilli Ratana samminiaannarlugu Biibili atuaqqissaartalerpaa. Naggataatigut Ratana Jehovamut kiffartorunnaarlunilu katikkumallugu allamik upperisaqalerpoq.

Ndenguè Camerounimeersoq 19-inik ukioqarluni angummut Jehovamut kiffartortuunngitsumut katippoq. Uissaata katinnginnerminni Jehovamut kiffartortuarsinnaaneranik neriorsorpaa. Katinnermilli kingorna sapaatit-akunneri marluk qaangiuttut uiminit ataatsimiigiassaaqquneqarpoq. Ima oqaluttuarpoq: “Kiserliungaarlungalu qiasaqaanga. Paasivara inuunera aqukkunnaarsimallugu. Ilerasuttuarpungalu.”

Kristumiut ilaasa Jehovamut kiffartunngitsumik, inussiarnersumilli ilumoorfiginnittumillu, aappaqarnerat ilumoorpoq. Uilli uppeqatiginngisat inussiarneraluarpalluunniit Jehovamut attaveqarnerit qanoq sunnerneqassava? Jehovap pilluarnissaq pillugu siunnersuutaanik maleruaannginnerit ilisimallugu qanoq misigissavit? Pingaarnerpaatullu, illit iliuuserisimasatit pillugit Jehova qanoq misigissava? — Uss 1:33.

Nunarpassuarni qatanngutit angutit arnallu Jehovap “Naalakkami” taamaallaat kateqqusineranik maleruaanerup pitsaanerpaaneranut uppernarsaataapput. Qatanngutit aappaqanngitsut Jehovamut kiffartortumut katinnermikkut Jehovamik nuannaartitserusupput. Michikop Japanimiup ilaquttaminit Jehovamik asanninngitsumut katinnissamut tatineqaraluarluni Guutimut naalannissani aalajangiusimavaa. Ikinngutinilu kristumiunut ilumoortunut katittut takullugit assut artorsaatigisarpaa. Ima oqaluttuarpoq: “Eqqarsartuarpunga Jehova ‘Guutiummat pilluartoq’ aappaqarnerput aappaqannginnerpulluunniit pilluarnissatsinnut aalajangiisuunngitsoq. Uummatittalu kissaataannik tunisisarnera upperaara. Taamaattumik aappartaarusukkaluarluta aappassatsinnik nassaarsinnaanngikkutta sivisulaartumik kisimiittuunissarput pitsaaneruvoq.” (1 Tim 1:11) Kingusinnerusukkut Michiko uinilluarpoq, Jehovallu siunnersuutaanik maleruaasimanini nuannaarutigaa.

Aamma qatanngutit angutit ilaasa imminut tulluartumik nuliarnissartik utaqqisimavaat. Assersuutigalugu Bill Australiamiittoq nassuerpoq ilaanni arnanut nalunaajaasuunngitsunut soqutiginnittarsimalluni. ‘Uppinngitsulli qamutinik uniaqatigilernerannik’ kinguneqarsinnaasumik sammilerusunnginnamigit qanimut ikinngutigilernaveersaartarpai. Ukiut ingerlaneranni qatanngutit arnat amerlanngitsut aamma soqutigisarsimavai, arnanilli taakkunannga soqutigineqartarsimanani. Bill kristumiumik arnamik namminermisut anguniagalimmik nuliarnissaminut ukiuni 30-ni utaqqivoq. Ima oqaluttuarpoq: “Peqqissimissuteqanngilanga. Oqaluusseqatigiittaratta, atuaqqissaaqatigiittaratta kiffartoqatigiittarattalu pilluaqquneqartutut  misigivunga. Nuliama ikinngutai tamarmik Jehovamik pallorfiginnittuummata naapissallugit peqatigissallugillu nuannarisarpakka. Najoqqutassiat Biibilimeersut maleruarnerisigut aappariinnerput pitsanngorsarniartarparput.”

JEHOVA UTAQQITILLUGU

Jehovap siunnersuutaa tatigalugu taassumunnga kiffartortumik aappaninnissannut utaqqininni susinnaavit? Sooq aappaqannginnerit eqqarsaatigisinnaavat. Misigiguit Jehovap peqqussutaasut iliorniarnerit pissutigalugu aappaqarnak qularinngissinnaavat tamanna Jehovap nuannaarutigigaa. (1 Sam 15:22; Uss 27:11) Aamma Jehovamut qinukulasarit qanorpiarlu misiginerlutit oqaluttuuttarlugu. (Tuss 62:9) Sapinngisannik ussernartunik kissaatipilunnillu akiuiniarninni Jehovamut attaveqarnerit ullut tamaasa nakussatsinneqassaaq. Jehovap erlinnartutut naatsorsuummatit kissaatitit pisariaqartitatillu soqutigingaarpai. Aappartaarnissannik neriorsornikuunngilaatit. Aappaninnissannilli pisariaqartitsinerpit qanoq pitsaanerpaamik matussuserneqarnissaa Jehovap ilisimavaa. — Tuss 145:16; Matt 6:32.

Immaqa Daavitut misigisarsinnaavutit, taanna ima allappoq: “Pinasuarit, akinnga Naalagaq, anersaara suujunnaarpoq. Kiinnat uannut isertoqinagu.” (Tuss 143:5-7, 10) Tunniutiinnaqinak. Jehova ilinnut qanoq piumasaqarnerminik ersersitsinissamut piffissaqartiguk. Biibilimik atuartarnikkut atuakkavillu eqqarsaatigeqqissaartarnerisigut Jehovamut tusarnaartarit. Tamanna Jehovap ilinnut piumasaanik kiffaminillu qanoq ikiuisarsimaneranik ilisimanninnissannut iluaqutigissavat. Jehovap tusarnaarneratigut naalannissannut uppersuseqarnerulissaatit.

Kristumiut aappanngitsut ilaqutariit meeqqallu ikiortaramikkit ilagiinni pingaaruteqarput

Kisimiittuuninni pilluartuarnissannut ulapittuarnissannullu suut iluaqutigisinnaavigit? Jehovamut attaveqarnerit nakussatsinniarsinnaavat tusaamaneqarlualernissallu sulissutigalugu. Tukkortuuneq, sullarissuuneq, ilakkuminartuuneq Jehovamullu ilumoorneq sulissutigisinnaavatit. Taakku pilluarluni aappariinnermut pisariaqarput. (1 Mos 24:16-21; Ruth 1:16, 17; 2:6, 7, 11; Uss 31:10-27) Oqaluussinermi ilagiinnilu ulapputeqarnikkut Guutip naalagaaffia siulliullugu noqqaassutigisaruk. Tamanna ajortumik aalajangiinnginnissannut illersuutigissavat. Bill kisimiittuusimanini pillugu ima oqarpoq: “Pioneritut kiffartorama ukiut ingerlalertupallapput!”

Jehovap “Naalakkami” taamaallaat kateqqusinera itsarnisaavallaanngilaq. Kristumiumut ilumoortumut katinnikkut Jehova ataqqinartittarlugulu nuannaartittarparput. Biibilimi ima allassimavoq: “Pilluarpoq Naalakkamik mianerinnittoq inassutaanullu asanningaartoq. Pigissaarlunilu pisuussuteqassaaq illumini, naassaanngitsumillu atassaaq iluarsusia.” (Tuss 112:1, 3) Taamaattumik “Naalakkami” taamaallaat katinnissat aalajangiusimajuk.

^ par. 7 Allaaserisami matumani sammisaq qatanngutip arnap isiginnittaasianit eqqartussavarput. Taamaattorli najoqqutassiat aamma angutinut atuupput.

^ par. 13 Atit ilaat allanngortitaapput.