Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Marsi 2015

‘Eqqumanissat’ aalajangiusimaviuk?

‘Eqqumanissat’ aalajangiusimaviuk?

“Taamaattumik eqqumagitsi, ulloq nalunaaquttap-akunneraluunniit nalugassiuk.” — MATT 25:13.

1, 2. (a) Jiisusip ullunut kingullernut tunngatillugu suut paasinarsisippai? (b) Apeqqutit suut sammissavavut?

JIISUSIP Jerusalemimi naalaffik Uuliap Qaqqaanit isigigaa takorlooruk. Apustilini sisamat, Petrusi, Andreasi, Jaaku Johannesilu, ilagivai. Ajoqersugaasa Jiisusi siunissaq pillugu pissanganartumik siulittuisoq tusarnaaqqissaarpaat. Silarsuup matuma ajortup ulluini kingullerni Jiisusip Ataatami naalagaaffiani naalakkersuinerata nalaani pisussat siulittuummit paasinarsisinneqarput. Jiisusip oqarfigai piffissami tamatumani soqutiginaatilimmi ‘inussiani aalajaallunilu silatooq’ nunarsuarmi sinniisorissallugu piffissarlu eqqorlugu ajoqersukkaminut anersaakkut nerisassanik tunniussisassasoq. — Matt 24:45-47, NW.

2 Taamatut oqareerluni Jiisusip niviarsiat qulit assersuusiarai. (Matthæusi 25:1-13 atuakkit). Allaaserisami matumani  apeqqutit uku pingasut sammissavavut: (1) Assersuusiami suna oqariartuutigineqarpa? (2) Tanitat aalajaatsut assersuusiami siunnersuut qanoq maleruarsimavaat, tamannalu qanoq kinguneqarpa? (3) Ullumikkut tamatta immikkut Jiisusip assersuusiaa qanoq iluaqutigaarput?

ASSERSUUSIAMI SUNA OQARIARTUUTIGINEQARPA?

3. Ukiuni kingulliunerusuni niviarsiat qulit pillugit assersuusiaq qanoq nassuiartarsimavarput, qanorlu sunniuteqartumik?

3 Allaaserisap siuliani paasivarput ukiuni kingulliunerusuni inussiap aalajaallunilu silatuup Biibilimi allaatigineqartut ilaat pillugit nassuiaariaatsini allanngortissimagaa. Inussiap aalajaatsup assersuusiami innersuussutaasinnaasoq siulittuutaasinnaasorluunniit samminerunagu ilinniutissartaa samminerusarpaa. Jiisusip niviarsiat qulit pillugit assersuusiaa assersuutigeriartigu. Biibililersaarutitsinni allassimasaraluarpoq qulliit, uulia uuliaasiviillu atortumut inummulluunniit allamut assersuutaasut. Annikitsualuttortat sammivallaarnerisigut assersuutip oqariartuutaa paasiuminarlunilu pingaaruteqartoq maangaannartinneqarsimasinnaava? Apeqqummut tamatumunnga akissut pingaaruteqarpoq.

Niviarsiat qulit qullitik ikumatillugit uissap tikiunnissaanut piareersimasariaqarput

4. Assersuusiami uku kikkuunerat qanoq nalunngilarput: (a) uissaq? (b) niviarsiat?

4 Jiisusip assersuusiaani oqariartuut sammeriartigu. Siullertut, niviarsiat qulit pillugit assersuusiami inuit eqqaaneqartut eqqarsaatigikkit. Uissaq kinaava? Jiisusi. Tamanna nalunngilarput siusinnerusukkut Jiisusi imminut uissatut oqaatigigami. (Luk 5:34, 35) Niviarsiat kikkuuppat? Tassaapput kristumiut tanitat ‘savarpannguit’. Tamanna qanoq nalunngilarput? Assersuusiami niviarsiat qulit qullitik ikumatillugit uissap tikiunnissaanut piareersimasariaqarmata. Jiisusip ajoqersukkaminut tanitanut ima oqarnera maluginiaruk: “Qiterusersimassaasi qullisilu ikumatillugit, assiginiarsigillu inuit naalakkamik katittorsiortunit angerlarnissaanik utaqqisut.” (Luk 12:32, 35, 36) Tamatuma saniatigut Kristusip ajoqersugai tanitat niviarsianut minguitsunut apustilimit Paulusimit apustilimillu Johannesimit assersuunneqarput. (2 Kor 11:2; Saqq 14:4) Taamaattumik oqarsinnaavugut Matthæusip allagai 25:1-13 siunnersuut mianersoqqussullu allassimasut Jiisusip ajoqersugaanut tanitanut atuuttut.

5. Jiisusip assersuusiamini piffissaq sorleq pineqarnersoq qanoq paasinarsisippaa?

5 Jiisusimmi siunnersuutaa piffissami sorlermi inuusunut atuuppa? Tamanna assersuusiap naggataatungaani oqaasiinit erserpoq. Ima oqarpoq: “Uissaq tikiuppoq.” (Matt 25:10) Napasuliaq Alapernaarsuiffik-mi juulip 15-iat 2013-imoortumi paasivarput Jiisusip Matthæusimi kapitalini 24-mi 25-milu siulittuutimini ‘tikiunnissani’ arfineq-pingasoriarluni  innersuussutigigaa. Jiisusip ‘tikiunnissani’ innersuussutigigaangamiuk piffissaq annikilliornartussarsuarmi silarsuaq ajortoq manna eqqartuunniarlugu suujunnaarsinniarlugulu tikiuffissani innersuussutigisarpaa. Taamaattumik isummersinnaavugut Jiisusip assersuusiaa ulluni kingullerni atuuttoq, Jiisusili annikilliornartussarsuarmi ‘tikiutissasoq’.

6. Assersuusiami suna oqariartuutigineqarpa?

6 Assersuusiami tamatumani oqariartuut qanoq ilinniarfigisinnaavarput? Biibilimi allassimaffiit ataqatigiinnerat eqqarsaatigikkit. Matthæusi kapitali 24-mi Jiisusip inussiaq aalajaallunilu silatooq eqqartorpaa. Inussiaq taanna angutinut ikittunut tanitanut ulluni kingullerni Kristusip ajoqersugaanut siuttuusussanut assersuutaavoq. Jiisusip angutit taakku aalajaattuaqqullugit oqaaqqissaarpai. Kapitalimi tulliuttumi Jiisusi ulluni kingullerni ajoqersukkani tanitat tamaasa siunnersorniarlugit niviarsiat qulit pillugit assersuusiorpoq. Qilammut makititaanissamik akissarsissagunik ‘eqqumaqquneqarput’. (Matt 25:13) Assersuusiaq sammeriartigu paasiniarlugulu tanitat siunnersuut qanoq maleruarsimaneraat.

ASSERSUUSIAMI SIUNNERSUUT TANITAT QANOQ MALERUARPAAT?

7, 8. (a) Sooq niviarsiat sianisuut piareeqqappat? (b) Tanitat qanoq piareeqqappat?

7 Assersuusiami niviarsiat sianisuut niviarsiat sianiitsut assiginagit uissaq tikiummat piareeqqanerat Jiisusip erseqqissarpaa. Sooq? Piareeqqallutillu eqqumagamik. Niviarsiat tamarmik eqqumasariaqarlutillu unnuaq tamaat qullitik ikumatittariaqarpaat. Niviarsiat sianisuut tallimat niviarsiat sianiitsut assiginagit qulliminnut uuliassamaatinik pisisimagamik piareeqqapput. Kristumiut tanitat Jiisusip tikiunnissaanut qanoq piareeqqappat?

8 Tanitat naggatissap tungaanut suliassaminnik isumaginninnissaminnut piareeqqapput. Paasivaat Guutimut kiffartussagunik Saatanip silarsuaani pigisatigut atugarissaarnissamik itigartitsisariaqarlutik, taamaaliornissaminnulli kajumissuseqarput. Naggatissap nalliutingajalernera pissutiginagu Jehovamilli taassumalu erneranik asanninnertik pissutigalugit Jehovamut ilumoorlutik kiffartornissartik aalajangiusimavaat. Assuarnaattuarput silarsuullu pigisaleritussusianit, kinguaassiuutitigut inuunerlunneranit namminissarsiorneranillu sunnertikkumanatik. Niviarsiat sianisuut qullilisarlutik piareeqqasut assigalugit tanitat uissaq, allaat kingusinaarsorinaraluartoq, qaammaarillutik erinitsajuillutillu utaqqivaat. — Fil 2:15.

Jiisusip tanitat aalajaattuaqqullugit oqaaqqissaarpai

9. (a) Jiisusi uernarnermut tunngatillugu qanoq mianersoqqusiva? (b) ‘Uissaq aggernerarlugu’ suaartoqarmat tanitat qanoq iliuuseqalerpat? (Quppernerup ataatungaani ilanngussaq takuuk).

9 Niviarsiat sianisuut aamma eqqumagamik uissap tikiunnissaanut  piareeqqapput. Assersuusiamili niviarsiat qulit tamarmik “uernalerput sinilerlutillu”. Taamaattumik ullumikkut kristumiut tanitat Kristusip tikiunnissaa utaqqitillugu allamut saatsinneqarlutik ‘sinilersinnaappat’? Aap. Jiisusip nalunngilaa inuk kajumissusilik piumassusilillu Kristusip tikiunnissaa utaqqitillugu sanngiillisinnaallunilu allamut saatsinneqarsinnaasoq. Taamaattumik kristumiut tanitat eqqumanissartik tamaviaarutiginerulersimavaat. Qanoq? Assersuusiami niviarsiat qulit tamarmik ima suaartoqarmat iliuuseqalerput: “Uissaq aggerpoq!” Niviarsialli sianisuut kisimik eqqumajuarput. (Matt 25:5, 6; 26:41) Taamatuttaaq kristumiut tanitat aalajaatsut ulluni kingullerni ima suaartoqarmat iliuuseqalerput: “Uissaq aggerpoq!” Jiisusip tikiutingajalerneranut uppernarsaatit ersarissut akuerisimallugillu tikiunnissaanut piareeqqapput. * Jiisusip assersuusiaata naggataatungaa, piffissamut aalajangersimasumut tunnganerusoq, sammeriartigu.

SIANISUUT AKISSARSISINNEQARPUT SIANIITSULLU PILLAGAALLUTIK

10. Niviarsiat sianisuut niviarsiallu sianiitsut oqaloqatigiinnerat pillugu qanoq aperisinnaavugut?

10 Assersuusiap naggataatungaani niviarsiat sianiitsut niviarsianut sianisuunut qulliup uuliassaanik pisinnaanerlutik aperipput. Niviarsialli sianisuut sianiitsunik ikiuiumanngillat. (Matthæusi 25:8, 9 atuakkit). Kristumiut tanitat aalajaatsut pisariaqartitsisunik ikiuiumanikuunnginnamik? Assersuusiami piffissaq pineqartoq eqqarsaatigiuk. Annikilliornartussarsuup naggataatungaani Jiisusi, uissaq, eqqartuussiartorluni tikiutissaaq. Taamaattumik oqaloqatigiinnerup annikilliornartussarsuup naangajalernerani pisunut innersuussutaanera ilimanarpoq. Sooq taamatut oqarsinnaavugut? Taamanikkussamut tanitat inaarutaasumik naqissuserneqarsimassagamik.

11. (a) Annikilliornartussarsuup aallartinnginnerani susoqassava? (b) Niviarsiat sianisuut niviarsianut sianiitsunut uuliamik pisiniaqqusillutik oqarnerat qanoq paasisariaqarpa?

11 Taamaattumik annikilliornartussarsuup aallartinnginnerani tanitat aalajaatsut tamarmik nunarsuarmiittut inaarutaasumik naqissuserneqassapput. (Saqq 7:1-4) Tamatuma kingorna qilaliarnissaat qularnanngilaq. Annikilliornartussarsuarli sioqqullugu pisussat eqqarsaatigeriakkit. Tanitat sinilertut aalajaakkunnaartullu qanoq pineqassappat? Inaarutaasumik naqissuserneqarnavianngillat. Taamanikkussamut kristumiut aalajaatsut allat taninneqassapput. Annikilliornartussarsuaq aallartippat sianiitsut Babylonersuup suujunnaarsitaanera immaqa tupaallaatigissavaat. Taama pisoqarpat Jiisusip tikiunnissaanut piareersimasimannginnertik paasissavaat. Taamanikkussamullu ikioqquppata qanoq pisoqassava? Tamanna assersuusiami akineqarpoq. Niviarsiat sianisuut niviarsiat sianiitsut uuliamik tunerusunnginnamikkit uuliamik pisiniaqqullugit oqarfigaat. ‘Unnuaammalli’  pisiniarfiillu matoqqammata kingusinaarput!

12. (a) Annikilliornartussarsuarmi tanitat inaarutaasumik naqissusiineq sioqqullugu aalajaakkunnaarsimasut qanoq pineqassappat? (b) Niviarsiatut sianiitsutut ittut qanoq pineqassappat?

12 Annikilliornartussarsuarmi tanitat aalajaatsut aalajaakkunnaarsimasunik kikkunnilluunniit ikiuisinnaassanngillat. Ikiorneqarusuttut kingusinaareersimassapput. Aalajaakkunnaartut qanoq pineqassappat? Niviarsiat sianiitsut uuliasiniarmata qanoq pisoqartoq maluginiaruk: “Uissaq tikiuppoq, piareersimasullu taanna katittorsiorfimmut iseqatigaat, matulu matuneqarpoq.” Jiisusip annikilliornartussarsuup naggataani naalannassutsimini tikiukkuni tanitat aalajaatsut qilammut katersussavai. (Matt 24:31; 25:10; Joh 14:1-3; 1 Th 4:17) Jiisusilli aalajaakkunnaarsimasut ajattussavai. Taakku niviarsiatut sianiitsutut immaqa ima oqassapput: “Naalagaq, naalagaq, mappiutsigut!” Jiisusilli qanoq akissavai? Savaasatut ittunut amerlasuunut akissutimisut ima akissavai: “Ilumut oqarfigaassi: Ilisarisimanngilassi.” — Matt 7:21-23; 25:11, 12.

Kristumiut tanitat tamarmik immikkut piareersimanissartik eqqumanissartillu aalajangiusimasariaqarpaat

13. (a) Sooq isummertariaqanngilagut Kristusip ajoqersugai tanitat amerlasuut aalajaakkunnaassasut? (b) Sooq oqarsinnaavugut Jiisusip assersuusiaanit ersertoq taassuma kristumiunik tanitanik tatiginninnera? (Allaaserisap aallaqqaataani assiliaq takuuk).

13 Jiisusip tanitat amerlasuut aalajaakkunnaarnissaat taarserneqartariaqarnissaallu pivaa? Naamik. Matthæusi kapitali 24-mi allassimavoq Jiisusip inussiaq aalajaallunilu silatooq ajortunngoqqunagu oqaaqqissaaraa. Imaanngilarli taassuma ajortunngorumaarnera naatsorsuutigigaa. Taamatuttaaq niviarsiat qulit pillugit assersuusiaq mianersoqqussutaavoq. Soorlu niviarsiat tallimat sianiitsuusut tallimallu sianisuujusut kristumiut tanitat tamarmik immikkut piareersimanissartik eqqumanissartillu aalajangiuttariaqarpaat. Taamaaliunngikkunik sianiitsunngorlutillu aalajaakkunnaassapput. Paulusip tamatumunnga assingusumik qatanngutini tanitat mianersoqquai. (Hebræerit 10:29, 39 atuakkit; 5 Mosesi 30:19 naleqqiuguk). Paatsuugassaanngitsumik mianersoqqusivoq, qatanngutimili akissarsisinneqarumaarnerat qularutiginngilaa. Jiisusip tanitanik tatiginninnera niviarsiat qulit pillugit assersuusiami mianersoqqussummit erserpoq. Nalunngilaa kiffani tanitaasut tamarmik aalajaattuarsinnaallutillu akissarsiassartik nuannersoq pissarsiariumaaraat!

KRISTUSIP ‘SAVAATAASA ALLAT’ QANOQ ILUAQUTIGISINNAAVAAT?

14. Sooq ‘savat allat’ niviarsiat qulit pillugit assersuusiaq aamma iluaqutigisinnaavaat?

14 Jiisusip assersuusiaa kristumiunut tanitanut atuuppoq. ‘Savalli allat’  Jiisusip assersuusiaa aamma iluaqutigisinnaavaat? (Joh 10:16) Aap! Assersuusiami oqariartuut ersarippoq: “Eqqumagitsi.” Jiisusi aamma ima oqarsimavoq: “Ilissinnut oqaaserisara una tamanut oqaaseraara: Eqqumagitsi!” (Mark 13:37) Jiisusip ajoqersukkami tamarmik piareersimanissaat eqqumanissaallu piumasaraa. Kristumiullu tamarmik tanitat oqaluussinermik pingaarnerutitsiuaannartut maligassiuilluarnerat ilaarsinnaavaat. Eqqaamajuk niviarsiat sianiitsut niviarsianut sianisuunut uuliamik piumammata. Piumasaminnik itigartinneqarput. Tamanna tamatta immikkut Guutimut aalajaattuarnissatsinnik, piareersimanissatsinnik eqqumajuarnissatsinnillu akisussaaffeqarnitsinnik eqqaasitsissutigaarput. Allat uagut sinnerluta taamaaliorsinnaanngillat. Tamatta Eqqartuussisumut naapertuilluartumut, Jiisusimut Kristusimut, tikiutingajalersumut akisussaatinneqassaagut. Taamaattumik piareersimasariaqarpugut!

Allat uagut sinnerluta eqqumasinnaanatillu aalajaassinnaanngillat

15. Sooq Kristusip nuliassamut katinnissaa kristumiut tamarmik nuannaarutigingaassavaat?

15 Kristumiut tamarmik Jiisusip assersuusiaani katititsineq eqqaaneqartoq nuannaarutigingaarpaat. Siunissami, Harmagedonimi sorsunnerup kingorna, kristumiut tanitat Kristusimut nulianngussapput. (Saqq 19:7-9) Qilammi katititsineq nunarsuarmiittut tamarmik iluaqutigissavaat. Sooq? Tamanna inuiannut tamanut naammalluinnartumik naalakkersuinermut qularnaveeqqutaammat. Qilammi nunarsuarmiluunniit naassaanngitsumik inuunissamik neriugisaqaraluarutta piareersimajuarnissarput eqqumajuarnissarpullu aalajangiusimajuartigit. Taamaaliorutta siunissaq nuannersoq Jehovap uagutsinnut piareersarsimasaa nuannaarutigisinnaassavarput!

^ par. 9 Assersuusiami ‘uissap aggernerarlugu’ suaarnerup (versi 6) aamma uissap tikiunnerata (versi 10) akornanni piffissaq sivisulaartoq ingerlavoq. Ulluni kingullerni tanitat eqqumajuarput. Jiisusip najuunneranut nalunaaqutit paasigamikkit nalunngilaat taanna Guutip naalagaaffiani kunngitut naalakkersuisoq. Taamaakkaluartorli tikiunnissaata tungaanut eqqumajuarput.