Imarisai

Imai

Jehovap Nalunaajaasui

Oqaatsit toqqakkit Kalaallisut

Atuartartut apeqqutaat

Atuartartut apeqqutaat

Sooq ukiuni kingullerni Biibilimi oqaluttuat siunissami pisussanut annerusunut assersuutaasut Biibililersaarutitsinni allaaserineqarpiartarunnaarpat?

Vagttaarnet-imi aggustip aallaqqaataa 1953-imoortumi nassuiarneqarpoq inuk, pisoq atortorisarluunniit Biibilimi eqqaaneqartoq siunissami inummut pisussamulluunniit annerusumut assersuutaasartoq. Qangaanerusoq Biibililersaarutitsinni allassimasarpoq angutit arnallu aalajaatsut soorlu Debora, Elihu, Jefta, Jobi, Rahabi, Rebekka allarpassuillu tanitanut ‘inuppassuarnulluunniit amerlangaartunut’ assersuutaasut. (Saqq 7:9) Assersuutigalugu allaaserinikuuarput Jefta, Jobi Rebekkalu tanitanut assersuutaasut aamma Debora Rahabilu ‘inuppassuarnut amerlangaartunut’ assersuutaasut. Ukiunili kingullerni taamatut naleqqiussineq ajorpugut. Sooq taamaappa?

Biibilimi inuit eqqaaneqartut ilaasa siunissami pisussamut annerusumut assersuutaanerat Allakkani Illernartuni ilinniartitsissutigineqarpoq. Assersuutigalugu apustilip Paulusip arnat marluk pillugit ‘assersuut’ eqqaavaa. Arnaq siulleq tassaavoq Hagari, Aaperaap inussiaataa. Paulusip nassuiarpaa taassuma inuiaqatigiinnut Israelikkunnut, Mosesip inatsisai tunngavigalugit Jehovamut atasunut, assersuutaanera. Arnap aappaa tassaavoq ‘inussiaataanngitsoq’, Aaperaap nulia Sara. Taanna Guutip nulianut, Guutip peqatigiissortaasa ilaannut qilammiittumut, assersuutaavoq. (Gal 4:21-31) Kunngip palasillu Melkisedekip Jiisusillu assingussuterpassui Paulusip aamma eqqaavai. (Hebr 6:20; 7:1-3) Taamatuttaaq Paulusip pruffiiti Esaja ernerilu Jiisusimut tanitanullu assersuuppai. (Hebr 2:13, 14) Inuit, pisut atortorisallu siunissami pisussanut annerusunut assersuutit pillugit eqqorluartumik ilisimasaqarniassagatta Jehovap Paulusi taamatut naleqqiussisarnissamik isumassarsisippaa.

PISOQ

Savaaraq poorskisiutissaq itsaq Israelimi pilliutigineqartartoq siunissami pisussamut annerusumut assersuutaavoq. — 4 Mos 9:2

PISUP ASSERSUUTAA

Paulusi allappoq Kristusi ‘savaaraasoq uagutsinnut poorskisiutissaq’. — 1 Kor 5:7

Biibilimili ersersinneqarpoq inuup siunissami pisussamut annerusumut assersuutitut eqqaaneqartup inuunera pillugu allassimasut annikitsualuttortai tamarmik siunissamut assersuutaanissaat naatsorsuutigissanngikkipput. Assersuutigalugu Jiisusip Melkisedekimut assersuutaanera Paulusip nassuiarpaa. Taamaakkaluartorli Aaperaap kunngit sisamat ajugaaffigereermagit Melkisedekip  piffissaq Aaperaamut timiusamik viinnimillu sassaassinera Paulusip eqqaanngilaa. Taamaattumik pisumut tamatumunnga isumaritinneqartup paasiniarnissaanut Biibilimi tunngavissaqanngilaq. — 1 Mos 14:1, 18.

Kristusip toqunerata kingorna ukiut hundredillit qaangiuttut atuakkiortut ilaat kukkorujussuarput. Biibilimi oqaluttuat tamarluinnaasa siunissamut assersuutaatippaat. The International Standard Bible Encyclopaedia-mi Origenesip, Ambrosiusip Hieronymusillu ilinniartitsissutaat pillugit ima nassuiaateqarpoq: “Siunissamut assersuutit ujartorpaat soorunalimi Biibilimi pisuni tamani pingaaruteqanngitsuni nassuiaatissarsillugit. Allaat pisut nalinginnaasut soqutaanngitsullu, sallusuissummik [isertugaateqartutut] isigineqartarput, ... allaat ajoqersukkat unnummi Annaassisumit makititaasimasumit saqqummerfigineqaramik aalisakkat pisarisaasa amerlassusaat, 153-it, inuit ilaasa aalajangersimasumik isumaqartinniartarpaat!”

Aamma Augustinip Hippomeersup nassuiarpaa Jiisusip suaasiassanit timiusaliat tallimat aalisakkallu marluk atorlugit angutinik 5000-nik nerisitsinera pillugu Biibilimi oqaluttuaq assersuutaasoq. Oqarpoq suaasiassanit timiusaliat Biibilimi atuakkanut tallimanut siullernut assersuutaasut. Suaasiassallu qajuusiassanit nalikinnerusutut isigineqartarnerat pissutigalugu “Testamentitoqaq” “Testamentitaaq”-mut sanilliullugu nalikinnerusutut isumaqassasoq. Kiisalu aalisakkat marluk kunngimut palasimullu assersuutaasut. Biibilimik misissueqqissaartartup allap nassuiarpaa Jaakup puugutaq aappaluttoq akiliutigalugu Esauip angajulliussutaanik pisinera Jiisusip aanni aappaluttoq akigalugu inuiaat qilaliarnissamik neriuuteqalersitsineranut assersuutaasoq.

Nassuiaatit taakku paasiuminaappata ajornartorsiut paasisinnaassavat. Biibilimi oqaluttuat suut siunissami pisussamut annerusumut assersuutaanersut suullu assersuutaannginnersut inuit ilisimasinnaanngilaat. Taamaattumik suna silatusaarnerussava? Inuup, pisup atortorisalluunniit siunissami pisussamut annerusumut assersuutaanera Biibili tunngavigalugu ilinniartitsissutigineqartoq akuerissavarput. Nassuiarniartassanngilarpulli taamaaliornissamut Biibilimi tunngavissaqanngikkaangat.

Annikitsualuit oqaluttuallu Biibilimi allaatigineqartut qanoq iluaqutigisinnaavavut? Apustili Paulusi ima allappoq: “[Siornatigut] allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.” (Rom 15:4) Kristumiut siulliit nalaanni Paulusip tanitat Biibilimi oqaluttuat qanoq iluaqutigisinnaaneraat paasitinniarlugit allaffigai. Taamanimiilli kristumiut tamarmik, aamma ‘savat allat’, Biibilimi ilinniartitsissutigineqartut iluaqutigisimavaat. — Joh 10:16; 2 Tim 3:1.

Taamaattumik Biibilimi oqaluttuat amerlanerit tanitanut, ‘savanut allanut’ imaluunniit kristumiunut oqaluttuarisaanermi piffissami aalajangersimasumi inuusunut taamaallaat atuutinngillat. Guutilli kiffaanut tamanut, itsaq nalitsinnilu inuusunut, iluaqutaapput. Assersuutigalugu Jobip naalliunnera tanitat sorsunnersuarmi siullermi naalliunnerannut assersuutaannaanngilaq. Guutip innuttai amerlasuut, angutit arnallu, tanitat ‘savallu allat’ Jobitut naalliussimapput taannalu pillugu oqaluttuap atuaqqissaarnera iluaqutigisimallugu. ‘Paasivaat Jehova naggataatigut qanoq iliortoq; Jehova nallittuingaartoq saammaassingaartorlu’. — Jaak 5:11.

Ilagiitsinni utoqqarnik arnaqarpoq aalajaatsunik Deboratut ilumoorfiginnittunik utoqqaanertaqarlunilu inuusuttunik Elihutut siuneqassuseqartunik. Pionereqarporlu Jeftatut aallussilluarlutillu sapiissuseqartunik qatannguteqarlunilu aalajaatsunik Jobitut erinitsajuitsuusunik. Jehovamut qujamasungaarpugut ‘siornatigut allagaasut tamarmik uatsinnut ilinniutissaasut’ atuarsinnaagatsigit taamaalilluta Allakkat “tunissutaat tuppallersaatigalugit neriuuterput aalajangiussinnaaqqullugu”!

Tamakku pissutigalugit Biibilimi oqaluttuat assersuutissartaqarnersut siunissamiluunniit eqquuttussaanersut paasiniarlugit tamarluinnaasa misissoqqissaarneq ajorpavut. Paarlattuanik Biibilimi ilinniutissat pingaaruteqartut Biibililersaarutitsinni maanna sammineqarnerusarput.