‘Jehova qutsavigisiuk ajunngitsuummat.’ — TUSS 106:1.

1. Sooq Jehova qutsavigisarparput?

JEHOVAP ‘tunissutinik ajunngitsunik naammalluinnartuusunillu tamanik’ tunisarpaatigut. (Jaak 1:17) Savanik paarsisuuvoq asannittoq pisariaqartitatsinnik tamanik isumaginnittartoq. (Tuss 23:1-3) Jehova qujamasuffigingaartariaqarparput. Ingammik annikilliornartorsiorfiusuni ‘qimarnguffigalugulu nakuussutigaarput’. (Tuss 46:2) Tussiaasiortutut ima allattutut misigivugut: “Naalagaq qutsavigisiuk ajunngitsuummat, unneqqarissusia atavoq naassaanngitsumik.” — Tuss 106:1.

Ukiumut 2015-imut allassimaffik: Jehova qutsavigisiuk ajunngitsuummat. — Tussiaat 106:1

2, 3. (a) Qujasuitsunngornerup suut ulorianaatigai? (b) Allaaserisami matumani apeqqutit suut sammissavavut?

2 Sooq Jehova qutsavigisariaqarparput? Siulittuutigineqartutut inuit ulluni kingullerni qujasuitsuupput. (2 Tim 3:2) Inuppassuit Jehovap iliuuserisimasai ajunngitsut iluaqutigisatik qujamasuutigineq ajorpaat. Silarsuarmi pigisalerituuffiusumi pisariaqartinneqanngitsunillu pisisarnissamik kajumissaarisarfiusumi inuuvugut. Tamannalu pissutigalugu  inuppassuit pigisarpassuatik naammagineq ajorpaat. Itsaq Israelikkut assigalugit pilluaqqussutit Jehovamullu attaveqarnerput erlinnangaartoq qujamasuutigiunnaarlugillu pingaartikkunnaarsinnaavavut. — Tuss 106:7, 11-13.

3 Aamma misilinneqarnitsinni pinertusaarnerput qanoq kinguneqarsinnaanersoq eqqarsaatigiuk. Ajornartorsiuteqangaaratta pilluaqqussutivut pinnagit ajornartorsiutivut kisiisa eqqarsaatigiinnalersoorsinnaavavut. (Tuss 116:3) Taamaattumik qanoq qujamasuttuarsinnaavugut? Misilinneqaraluarluta qanoq ajunngitsumik isiginnittaaseqartuarsinnaavugut? Tamanna sammeriartigu.

“ANGIGAARPUT NAAMMASSISATIT; NAALAGAQ”

4. Qanoq Jehovamut qujamasuttuarsinnaavugut?

4 Jehovamut qujamasuttuassagutta iliuuseqartariaqarpugut. Siullermik, Jehovap uagutsinnut pilluaqqussutai maluginiartariaqarpavut. Taavalu pilluaqqussutit taakku Guutip uagutsinnut asanningaarneranik qanoq ersersitsinersut eqqarsaatigeqqissaarlugu. Tussiaasiortoq taamaaliorami Jehovap imminerminut iliuuserisimasarpassui nuannersut ajasoorutigai. — Tussiaat 40:6; 107:43 atuakkit.

5. Qujamasunnermut tunngatillugu apustili Paulusi qanoq ilinniarfigisinnaavarput?

5 Apustilip Paulusip maligassiuineranik eqqarsaatiginneqqissaarnikkut Jehovamut qujamasunneq ilinniarsinnaavarput. Paulusip qinunermini Guutimut qujasarmat pilluaqqussutiminik eqqarsaatiginneqqissaartarsimanera nalunngilarput. Taassuma nassuerutigaa ‘siornatigut mitaatiginnittuullunilu qinuginnittuullunilu angutaasersorsuulluni’. Taamatut inooriaaseqarnikuugaluarluni Guutimit Kristusimillu nallittorneqarnini allanullu oqaluussinissamik immikkut pisinnaatitaaffeqarnini qujamasuutigai. (1 Timotheusi 1:12-14 atuakkit). Paulusip aamma qatanngutini kristumiut qujamasuutigingaarpai taakkualu ajunngitsunik pissuseqarnerat aalajaallutillu kiffartornerat pillugit Jehova qutsavigisarlugu. (Fil 1:3-5, 7; 1 Th 1:2, 3) Paulusip misilinneqarnermini pinertusaartilluni  qatanngutimi nammineq pilluni iliuuserisimasaat Jehovamut qujassutigisarpai. (ApS 28:15; 2 Kor 7:5-7) Tupinnanngilaq Paulusip kristumiut ima kajumissaarmagit: ‘Qujaniartaritsi tussiutit unnersiutiginnissutillu tussiutaasallu atorlugit Guuti qujaniarfigalugu.’ — Kol 3:15-17.

EQQARSAATIGINNEQISSAARTARNEQ QINUSARNERLU QUJAMASUTTUARNISSAMUT ILUAQUTAAPPUT

6. Sooq Jehovamut qujamasuppit?

6 Paulusip maligassiaa qanoq ilaarsinnaavarput? Jehovap uagut pilluta iliuuserisimasai eqqarsaatigeqqissaarsinnaavavut. (Tuss 116:12) Ima aperineqaruit qanoq akissavit? “Illit pilluaqqussutit Jehovameersut suut qujamasuutigaagit?” Jehovamut attaveqarnerit erlinnangaartoq oqaatigissaviuk? Imaluunniit Kristusip utertitsissutitut pilliutaa tunngavigalugu ajortinnik isumakkeerfigineqarnerit? Qatanngutitit erloqinartorsiorninni ikiuisimasut eqqaassavigit? Oqassavit aappat qitornatilluunniit qujamasuutigingaarlugit? Pilluaqqussutit Guutimeersut eqqarsaatigeqqissaartarnissaannut piffissaqartarit. Tamanna ullut tamaasa qutsavigisarnissaanut kajumississutigissavat. — Tussiaat 92:2, 3 atuakkit.

Hannap Hizkijallu qujamasunner­mik maligassiaat ilaartarlugulu Jehovap ilinnut iliuuserisi­ma­sai pillugit Guuti qutsavigi­sa­ruk

7. (a) Sooq Jehova qinunitsinni qutsavigisariaqarparput? (b) Qinuninni Jehovamut qujasarnerit qanoq iluaqutigissaviuk?

7 Pilluaqqussutivut tamaasa eqqarsaatigeqqissaartarutsigit Jehova qinunikkut qutsavigerusussavarput. (Tuss 95:2; 100:4, 5) Inuit ilaat piumasaqarniaannarlutik Guutimut qinusarput. Jehovalli atukkatsinnik qutsavigineqartarnini iluarisarpaa. Biibilimi Guutip kiffai arlallit, assersuutigalugu Hanna Hizkijalu, qinunerminni Jehovamut qujasut eqqaaneqarput. (1 Sam 2:1-10; Es 38:9-20) Taamaattumik qujamasuttumik isiginnittaaseqarnerat ilaarlugillu Jehova ilinnut iliuuserisimasai pillugit qutsavigisaruk. (1 Th 5:17, 18) Taamaalioruit nukissaqarnerulissallutillu Guuti asanerulissallugulu ikinngutigiuassavat. — Jaak 4:8.

Illit pilluaqqussutit Jehovameersut suut qujamasuutigaagit? (Immikkoortut 6 aamma 7 takukkit)

8. Suut qujamasukkunnaassutigisinnaavavut?

8 Mianersunngikkutta Jehovap tunissutai ajunngitsut qujamasuutigiunnaariaannaavavut. Sooq? Naammalluinnanngitsuullutalu angajoqqaatsinnit siullernit qujasuitsuuneq kingornukkatsigu. Jehovap Adami Evalu paratiisimi angerlarsimaffimmik pisariaqartitaannillu tamanik tunivai. Naassaanngitsumik eqqissillutik inuusinnaagaluarput. (1 Mos 1:28) Pilluaqqussutisiatilli qujamasuutiginngilaat. Piumatuujupput amerlanerusunillu perusullutik. Naggataatigulli pigisatik tamaasa annaavaat. (1 Mos 3:6, 7, 17-19) Silarsuarmi qujamasunngiffiusumi inuugatta Jehovap uagut pilluta iliuuserisimasarpassui qujamasuutigiunnaarsinnaavavut.  Guutimik ikinnguteqarneq aamma nunarsuaq tamakkerlugu qatanngutigiissuarnut ilaanermik immikkut pisinnaatitaaffeqarneq qujamasuutigiunnaarsinnaavavut. Silarsuarmit matumannga allamut saasarneqariaannaavugut. (1 Joh 2:15-17) Taamatut pissanngikkutta pilluaqqussutisiarpassuavut eqqarsaatigeqqissaartariaqarlugillu Guutip innuttaanut ilaanermik immikkut pisinnaatitaaffeqarnerput pillugu Jehova qutsavigiuartariaqarparput. — Tussiaat 27:4 atuaruk.

MISILINNEQARNERMI PINERTUSAARNEQ

9. Sooq misilinneqangaarnermi pilluaqqussutisiarisavut eqqarsaatigeqqissaartariaqarpavut?

9 Qujamasuttuunerput misilinneqangaarnermi pinertusaarnissatsinnut iluaqutigissavarput. Pisut alianartut inuunitsinni nalaassinnaasavut, soorlu aappatta ilumoorunnaarnera, perululluni napparsimalerneq, asasamik toqusoorneq imaluunniit pinngortitami ajunaarnersuaqarnera, sapilersutut misigilissutigisinnaavavut. Jehovap pilluaqqussutaanik eqqarsaatiginneqqissaarneq tuppallersaatigissallugulu pinertusaarnissatsinnut nakussatsissutigissavarput. Misigisimasat eqqartugassavut eqqarsaatigikkit.

10. Irinap pilluaqqussutisiaminik eqqarsaatiginneqqissaartarnini qanoq iluaqutigaa?

10 Irinap, USA-mi pioneriusup, uia utoqqaanertaasoq Irinamut ilumoorunnaarlunilu qitornaminik qimatsivoq. * Irinap aalajaalluni Jehovamut kiffartornissaminut suna iluaqutigaa? Ima oqarpoq: “Jehovap uannik isumassuinera qujamasuutigaara. Ullut tamaasa pilluaqqussutisiannik kisitsisarnikkut Ataatatsinnit sernissuisartumit qilammiittumit ilisimaneqarnerup asaneqarnerullu immikkut pisinnaatitaaffiunerat takusinnaalerpara. Nalunngilara imminiinngisaannassagaanga.” Irina inuunermini alianartorpassuarnik misigisaqarnikuugaluarluni nuannaartuunini iluatsilluartumik pinertusaarnissaminut allanillu qiimmassaasarnissaminut iluaqutigaa.

11. Kyung-sookip perulunnermini pinertusaarnissaminut suna iluaqutigaa?

11 Kyung-sook, Asiamiu, uinilu ukiut 20-t sinnerlugit pioneriusimapput. Puammigut siaruaassimasumik kræfteqalerpoq oqarfigineqarlunilu qaammatit pingasut arfinillillu missaanni inuusinnaalluni. Uinilu misilinneqarnerpassuarni pinertusaarnikuugaluarlutik peqqiilliunngisaannarsimapput. Taanna ima oqaluttuarpoq: “Napparsimalernera nikallussutigingaarpara. Misigivunga pigisakka tamaasa annaasimallugit, annilaangasorujussuuvungalu.” Kyung-sookip pinertusaarnissaminut suna iluaqutigaa? Ima nangippoq: “Unnuit tamaasa innannginninni illutta qalianukartarpunga ullormut qujamasuutigisakka tallimat pillugit qinuniarlunga. Taamaalioreeraangama eqqissisutut misigisarlungalu Jehovamik  asanninnerma ersersinnissaanut killinneqartarpunga.” Kyung-sookip unnukkut qinusarnini qanoq iluaqutigaa? Ima oqarpoq: “Paasivara misilinneqarnitsinni Jehovap tapersersortaraatigut inuunitsinnilu pilluaqqussutit misilinneqarnernit amerlanerungaartut.”

Sheryl qatanngutaalu aniguisoq John (Immikkoortoq 13 takuuk)

12. Jasonip nuliani toqukkut annaagamiuk suna tuppallersaatigaa?

12 Jason Afrikami immikkoortortaqarfimmi kiffartortoq ukiullu 30-t sinnerlugit piffissaq tamaat kiffartorsimasoq ima oqaluttuarpoq: “Ukiut arfineq-marluk matuma siorna nuliara toquvoq, tamatumalu aliasuutiginera sapilersutut misigilissutigisarpara. Kræfternermini naalliuutigisarsimasai eqqarsaatigileraangakkit nikallungangaartarpunga.” Jasonip suna tuppallersaatigaa? Ima oqarpoq: “Ataasiarlunga nuliaralu nuannisaqatigiinnerput eqqaalerpara, tamatumalu eqqaamanera pillugu Jehova qinunikkut qutsavigaara. Tuppallersarneqartutut misigivunga tamatumalu kingorna tamakkuninnga eqqaamanninnera pillugu Jehova qutsavigisalerlugu. Qujamasunneq isiginnittaatsinnut sunniuteqangaarpoq. Qimagussimanera suli aliasuutigisarpara, kisianni aappariilluarsimanerput Jehovamillu asanningaartumik kiffartoqateqarnermik immikkut pisinnaatitaaffeqarsimanera pillugit Jehovamut qujasarnera pitsaanerusumik isiginnittaaseqalissutigaara.”

“Jehova Guutigigakku qujamasu­ngaar­pu­nga” — Sheryl

13. Sherylip ilaquttami amerlanersaat toqukkut annaagamigit suna pinertusaarnissaminut iluaqutigaa?

13 2013-ip naajartornerani Filippinerini Haiyanimik taaneqartumik anoraasuarsualermat Sherylip taamani 13-iinnarnik ukiullip suut tamangajaasa annaavai. Ima oqaluttuarpoq: “Angerlarsimaffiga ilaquttamalu amerlanersaat annaavakka.” Angutaa, arnaa qatanngutaalu pingasut anorersuup kingunerisaanik nuna qarsunneqarmat ajunaarput. Sherylip narrujuumminani alianartumik atugaqarnermini pinertusaarnissaminut suna iluaqutigaa? Pilluaqqussutini eqqarsaatigeqqissaartaramigit Jehovamut  suli qujamasuppoq. Ima oqarpoq: “Qatanngutit pisariaqartitsisunik tuppallersaaniarlutillu qiimmassaaniarlutik iliuuserisartagaat maluginiarpakka. Nalunngilara qatanngutit nunanit tamalaaneersut qinnuttaraannga.” Ima nangippoq: “Jehova Guutigigakku qujamasungaarpunga. Pisariaqartitatsinnik tuniuaannarpaatigut.” Aap, pilluaqqussutisiarisimasavut qujamasuutigigaangatsigit aliasuppallaarunnaartarpugut. Tamanna artornartorsiornitsinni pinertusaarnissatsinnut iluaqutigissavarput. — Ef 5:20; Filippimiut 4:6, 7 atuakkit.

JEHOVA “QIIMMATTAATIGISSAVARA”

14. Qanoq nuannersumik neriuuteqarpugut? (Allaaserisap aallaqqaataani assiliaq takuuk).

14 Oqaluttuarisaanerup ingerlanerani Jehovap innuttai pilluaqqussutisiaminnik qujamasuutiginnittuarsimapput. Israelikkut Immami Aappalaartumi Jehovap Faraomit sakkutuuinillu aniguisimmatik nuannaarnerup pianik Jehova tussiarfigalugulu unnersiutigalugulu qutsavigaat. (2 Mos 15:1-21) Qanittukkut naalliunnartoqarunnaarnissaanik ilisimanninneq ullumikkut pilluaqqussutisiatta erlinnarnerpaartaasa ilagaat. (Tuss 37:9-11; Es 25:8; 33:24) Jehovap akerlilersortini tamaasa suujunnaarsippagit silarsuassaminullu nutaamut eqqissineqarfiusumut naapertuilluassuseqarfiusumullu tikilluaqquppatigut qanoq misigissanersugut takorlooruk. Ulloq taanna Jehovamut qujamasunneq ila nuannissaqaaq! — Saqq 20:1-3; 21:3, 4.

Qanittukkut naalliunnartoqa­run­naar­nis­saa­nik ilisiman­nin­neq pilluaqqussu­ti­si­at­ta erlinnarner­paar­taa­sa ilagaat

15. 2015-imi sunissat aalajangiusimaviuk?

15 2015-ip ingerlanerani Jehovamit pilluaqqussutisiassarpassuit qilanaarutigissavavut. Soorunami ilaanneeriarluta misilinneqarnermi erloqisassaagut. Qanorluunniilli pisoqaraluarpat Jehovap sumiginnanngisaannassagaatigut nalunngilarput. (5 Mos 31:8; Tuss 9:10, 11) Aalajaalluta kiffartorfigisinnaaniassagatsinni pisariaqartitatsinnik tamanik tuniuassavaatigut. Pruffiitip Habakkukip ima allattup isiginnittaasianik ilaarsinissarput aalajangiusimajuartigu: “Figenequt sikkinngitsoorpoq, viinnequt inerititaqanngilaq, oliveninik katersuineq iluatsitsinngilaq, narsaat inerittoqanngilaq. Savat ungaluliamiikkunnaarput, ungalusami nersutaateqanngilaq. Naalagaq qiimmattaatigissavara, Guuti annatsitsisiga tipaatsuutigalugu.” (Hab 3:17, 18) Qanortoq ukiumi aggersumi pilluaqqussutisiarisimasavut tamaasa eqqarsaatigeqqissaartuarisigit ukiumullu 2015-imut allassimaffimmi siunnersuutip maleruarnissaanut kajumissuseqarluta: ‘Jehova qutsavigisiuk ajunngitsuummat.’ — Tuss 106:1.

^ par. 10 Allaaserisami matumani atit ilaat allanngortitaapput.