Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Decembari 2014

Atuartartut apeqqutaat

Atuartartut apeqqutaat

Rakelip qitornaminik upputiginninnera Jeremiap allaatigigamiuk suna pivaa?

Jeremiap allagai 31:15-imi ima allassimavoq: “Ima oqarpoq Naalagaq: ‘Ramami tusarsaavoq upippalunneq, qiangaarpalunneq; Rakelip qitornani upippai peerussimammata, tuppallersagassaanani.’”

Rakeli ernerminit siulliulluni toquvoq. Taamaattumik Rakelip toqunerata ukiut 1000-t kingorna Jeremia allakkami tamanna piviusorsiornerorpasinngilaq.

Rakelip Josefi angajullequtigaa. (1 Mos 30:22-24) Kingusinnerusukkut Rakeli Benjaminimik erninerliorami toquvoq. Taava immaqa ima apererusussaagut: Sooq ernerminik ‘peerussimasunik’ upissinera Jeremiap allagai 31:15-mi allaatigineqarpa?

Josefi marlunnik erneqarpoq, Manasse Efraimilu. (1 Mos 41:50-52; 48:13-20) Piffissap ingerlanerani naggueqatigiit Efraimikkut naalagaaffimmi avannarlermi, Israelimi, pissaaneqarnerpaanngorlutillu naalagaaffimmi avannarlermi naggueqatigiissortanut qulinut sinniisunngorput. Rakelip ernerata aappaata Benjaminip naggueqatigiissortai naalagaaffimmut kujallermut, Judamut, sinniisunngorput. Taamaattumik Rakeli Israelikkunnut tamanut, naalagaaffimmut avannarlermut naalagaaffimmullu kujallermut, anaanaasutut assersuutaavoq.

Jeremiap allagaasa allanneqarnerata nalaani naalagaaffik avannarleq Assyriamiunit tiguarneqareersimavoq inuppassuillu tigusaallutik aallarussaasimallutik. Efraimilli kinguaavisa ilaat Judamut qimaasimagunarput. Ukiumi 607-imi Kr.in.si. naggueqatigiissortat marluusut naalagaaffiat Juda Babylonimiunit ajugaaffigineqarluni tiguarneqarsimavoq. Tigusarineqarsimasut amerlanerit Jerusalemip avannaatungaani illoqarfimmut Ramamut 8 kilometeringajattut ungasitsigisumiittumut aallarunneqarput. (Jer 40:1) Benjaminip nunagisaani, Rakelip ilisaaffiani, inuit ilaat toqutaasimagunarput. (1 Sam 10:2) Rakelip upputiginninnera Ramap eqqaani Benjaminikkunnut imaluunniit sumiiffiup tamatuma eqqaani inunnut allanut toqunneqartunut tunngasimagunarpoq. Jeremiap allaatigisaa aamma Israelimi anaanaasut toqusortaminnik imaluunniit Guutip innuttaasa aallarunneqarnerannik upputiginninnerannut tunngasimasinnaavoq.

Rakelip ernerminik upputiginninneranik Jeremiap allaatiginninnera siulittuutaavoq. Ukiut hundredilikkuutaat tamatuma kingorna pisumut, Jiisusip meeraalluni ulorianartorsiorneranut, tunngavoq. Kunngi Herodesi peqqusivoq Jerusalemip kujataata tungaaniittumi, Betlehemimi, nukappiaqqat tamarmik marluk tikillugit ukiullit toqunneqassasut. Anaanaasut ernerminnik ‘peerussimasunik’ upputiginnillutik aliasungaarnerat takorloorsinnaaviuk? Taakkua upputiginninnerat Ramami, Jerusalemip avannaata tungaani, tusarsaavorlusooq. — Matt 2:16-18.

Taamaattumik Jeremiap nalaani aamma Jiisusip nalaani Rakelip ‘qitornaminik upputiginninnera’ juutit anaanaasut qitornaminnik toqutaasimasunik aliasuutiginninnerannut assersuutaavoq. Soorunami toqusimasut, ‘akeqqat nunaannukarsimasut’, makititaanermikkut inuuleqqissagunarput. — Jer 31:16; 1 Kor 15:26.