Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Novembari 2014

Jiisusip makititaanerata uagutsinnut pingaaruteqarnera

Jiisusip makititaanerata uagutsinnut pingaaruteqarnera

“Makissimavoq.” — MATT 28:6.

1, 2. (a) Upperisarsiornikkut siuttut ilaat qanoq aperippat, Petrusillu qanoq akivai? (Allaaserisap aallaqqaataani assiliaq takuuk). (b) Sooq Petrusi qunusuilluni oqalussinnaasimava?

JIISUSIP toqunerata ullualuit kingorna apustilip Petrusip juutit upperisarsiornikkut siuttui qununarpasittut oqaloqatigai. Angutit taakkua peqatigiipilullutik Jiisusi toqutaatinniarsimavaat. Maanna Petrusi pisussinnaanngitsumik ajorunnaarsitsisimanera pillugu kamaallugu ima aperaat: “Pissaaneq suna atorlugu kiallu aqqani taamaaliorpisi?” Petrusi sapiilluni ima akivoq: “Ilisimassavarsi angut taanna saassinni qeqartoq ajorunnaarsinneqarmat Jiisusi-Kristusip, Nazaretimiup, ilissi kikiattukkassi Guutilli toqusunit makitissimasaata aqqani.” — ApS 4:5-10.

2 Siusinnerusukkut Petrusip qununini pissutigalugu Jiisusi pingasoriarluni miserratigisimavaa. (Mark 14:66-72) Maanna upperisarsiornikkut siuttut oqaloqatigigamigit qunusuippoq. Sooq? Anersaamit illernartumit ikiorneqarnermi saniatigut Jiisusip makissimanera upperilluinnaramiuk. Sooq tamanna upperilluinnarpaa? Aamma sooq uagut tamanna upperilluinnarsinnaavarput?

3, 4. (a) Jiisusip apustilii sioqqullugit makititsinerit ilaat oqaluttuarikkit. (b) Jiisusip kikkut makitippai?

 3 Toqusut uummaqqissinnaanerat apustilit nalunngilaat. Taakkua sioqqullugit Guutip pruffiitit Elia Elisalu toqusunik makititsisinnaatippai. (1 Kng 17:17-24; 2 Kng 4:32-37) Allaat angut toqusimasoq Elisap ilerranut iginneqarluni taassuma saarnginut tukkami uummaqqippoq. (2 Kng 13:20, 21) Guutip oqaasianik upperinninnitsitut kristumiut siulliit oqaluttuat taakku upperaat.

Jiisusip toqusunik makititsisarnera pillugu atuarnerput killinneqaatigingaartarparput

4 Illittaaq Jiisusip toqusunik makititsisarnera pillugu atuaraangavit killitsingaartarsimassaatit. Assersuutigalugu uillarnerup ernituami Jiisusimit makitinneqarneranik nuannaarutiginningaarnera takorlooruk. (Luk 7:11-15) Aamma Jiisusip niviarsiaqqamik makititsinera eqqarsaatigiuk. Angajoqqaajusut panitsik uummaqqimmat aliasukkunnaarlutik pilluangaalersimassapput! (Luk 8:49-56) Aamma inuit Lazarusi pisulluni iliverminit animmat nuannaarnerup pianik qiiaammersimassapput! — Joh 11:38-44.

SOOQ JIISUSIP MAKITITAANERA IMMIKKUULLARISSUUSOQ

5. Jiisusip makititaanera taanna sioqqullugu makititsinernit qanoq allaanerua?

5 Apustilit nalunngilaat Jiisusip makititaanera taanna sioqqullugu makititsinernit allaanerusoq. Inuit siusinnerusukkut makitinneqartut inuttut timeqaleqqipput, kingusinnerusukkullu toqoqqillutik. Jiisusi anersaatut toqusuitsutut makititaavoq. (Apustilit Suliaat 13:34 atuaruk). Petrusi allappoq Jiisusi ‘timikkut toqutaasoq, anersaakkulli uummartitaasoq’. Aamma “qilaliarpoq Guutillu talerpiata tungaani issialluni, inngilit oqartussaatitaasullu pissaanerillu imminut naalatsigititaareermata”. (1 Petr 3:18-22) Makititsinerit tamarmik tupinnartuliaapput, Jiisusilli makititaanera tupinnartuliat annerpaartaraat.

6. Jiisusip makititaanera ajoqersukkanut qanoq sunniuteqarpa?

6 Jiisusip makititaanera ajoqersukkat killitsissutigingaarpaat. Akeraasa toqungasorigaluaraat anersaajuvoq pissaanilissuaq kimilluunniit ajoquserneqarsinnaanngitsoq. Makititaanera Guutimit ernerineqarneranut uppernarsaataavoq. Ajoqersukkat Jiisusip uummaqqissimanera nalunnginnamikku aliasukkunnaarlutik qiimmapput, allaat sioorajunnaarlutik sapiillipput. Jiisusi makititaasimanngitsuuppat  Guutip siunertaa naammassineqarsinnaananilu nutaarsiassamik nuannersumik oqaluussinerat asuliinnaasimassagaluarpoq.

7. Ullumikkut Jiisusi suleriva, suullu apeqqutaalerpat?

7 Nalunngilarput Jiisusi tassaaginnanngitsoq taamani inuusoq pingaarutilik. Ullumikkummi nunarsuaq tamakkerlugu oqaluussineq qilammit nakkutigaa. Guutip naalagaaffiani qilammiittumi kunngiusutut qanittukkut nunarsuarmi ajussuseqarunnaarsitsissallunilu paratiisi inuit naassaanngitsumik inuuffigisassaat pilersissavaa. (Tuss 37:29) Jiisusi makititaasimanngitsuuppat taama pisoqarsinnaasimassanngikkaluarpoq. Sooq Jiisusip toqusunit makititaasimanera upperilluinnarsinnaavarput? Aamma sooq makititaanera uagutsinnut pingaaruteqarpa?

Jiisusi makititaasimanngitsuuppat Guutip siunertaa naammassineqarsinnaananilu nutaarsiassaq nuannersoq asuliinnaasimassagaluarpoq

JEHOVAP TOQU PISSAANEQARFIGAA

8, 9. (a) Sooq juutit upperisarsiornikkut siuttuisa Jiisusip ilerra paarsisuleqquaat? (b) Arnat ilivermut apuummata susoqarpa?

8 Jiisusi toqutaareermat juutit upperisarsiornikkut siuttui Pilatusimukarput imalu oqarlutik: “Naalagaq, eqqaavarput peqquserluttoq taanna inuugallarami oqartoq: Ullut pingasunngorpata makikkumaarpunga. Taamaattumik peqqusigit iliveq ullut pingasunngornissaannut paarineqassasoq, ajoqersugaasa tillikkiartoqinavaat inunnullu oqarlutik: Toqusunit makissimavoq. Taava peqquserlunneq kingulleq siullermiit ajornerulissaaq.” Pilatusip ima akivai: “Aajuku paarsisussasi. Pisinnaasarsi naapertorlugu paaritikkiartorsiuk.” Taamaaliorpullu. — Matt 27:62-66.

9 Jiisusi qaarusummut ilivissiamut ujarassuarmik matulimmut ilineqarpoq. Upperisarsiornikkut siuttut Jiisusip ilivermiittuarnissaa kissaatigaat. Jehovali allarluinnarmik pilersaaruteqarpoq. Ullut pingasut qaangiummata ajoqersukkat marluk, Maria Magdalene Mariaqataalu ilivermukarput. Apuukkamik inngili ujaqqami ilerrup paanit assakartissimasamini issiasoq takuaat. Inngilip arnat iliveq imaqanngitsoq takuniassammassuk ilivissiamut ima oqarfigalugit iseqquai: “Maaniinngilaq, makissimavoq.” (Matt 28:1-6) Jiisusi uumavoq!

10. Jiisusip makititaasimanera Paulusip qanoq uppernarsarpaa?

10 Ulluni 40-ni tulliuttuni pisut Jiisusip makititaasimaneranik qularunnaarsitsipput. Apustili Paulusi Korinthimiunut ima allappoq: “[Pingaarnerpaatillugit] ilissinnut tunniuppakka uannut kingornussassiissutigineqartut makku: Kristusi toqusoq ajortivut pillugit Allakkat malillugit, ilisaasorlu; ullullu pingajuanni makissimasoq Allakkat malillugit, takuneqartorlu Kefasimit kingornalu taakkunannga aqqaneq-marluusunit. Kiisalu qatanngutit 500-t qaangerlugit amerlassuseqartut ataatsikkut takuaat; taakkua amerlanersaat suli  inuupput, ilaalli sinippaarput. Taava Jaakumit takuneqarpoq, kingornalu apustilinit tamanit. Kingullerpaallungali allaat uanga, iloqiaalluni erniusutut ittunga, takuara.” — 1 Kor 15:3-8.

JIISUSIP MAKITITAANERANIK ILISIMANNINNITSINNUT PISSUTAASUT

11. Jiisusip “Allakkat malillugit” makititaanera qanoq eqquuppa?

11 Jiisusi “Allakkat malillugit” makitinneqarpoq. Makititaanissaa Guutip oqaasiani siulittuutigineqarpoq. Assersuutigalugu Daavi allappoq Guutimut ‘upperluartoq’ toqusut inaanniiginnassanngitsoq. (Tussiaat 16:10 atuaruk). Ukiumi 33-mi piinsip ulluani Petrusip ‘upperluartoq’, imaluunniit ‘illernartortaq’, Jiisusiunerarpaa ima nassuiaalluni: “[Daavip] siumut ilisimavaa eqqartorlugulu Kristusip toqusunit makinnissaa, oqarami toqusut inaanniiginnassanngitsoq timaalu aserornermik takusaqassanani.” — ApS 2:23-27, 31.

12. Jiisusi makititaasimasoq kikkunnit takuneqarpa?

12 Jiisusimik makititaasimasumik takunnittut amerlapput. Jiisusip makititaanermi kingorna ullut 40-t ingerlaneranni ajoqersukkani naatsiivimmi ilineqarfigisamini, illoqarfeeqqamut Emmausimut aqqutaani sumiiffinnilu allani saqqummerfigai. (Luk 24:13-15) Inuit ataasiakkaat, soorlu Petrusi, inuppaaluillu oqaluffigai. Ilaanni Jiisusi allaat inunnut 500-nit amerlanerusunut saqqummerpoq. Inuit taama amerlatigisut Jiisusimik takunnittuunerat suusupagineqarsinnaanngilaq.

13. Ajoqersukkat Jiisusip makititaasimaneranik upperinnilluinnarnerat aallussilluarnerannit qanoq erserpa?

13 Ajoqersukkat Jiisusip makititaanera aallussilluarlutik oqaluussissutigaat. Oqaluussinertik pillugu malersorneqarput, naalliutsinneqarput ilaallu toqunneqarlutik. Una eqqarsaatigiuk: Jiisusi makititaasimanngitsuuppat Petrusi inunnut Jiisusimik uumissuisunut toqunnissaanillu pilersaarusiortunut Kristusip makissimanerata oqaluussissutigineratigut inuunerminik navianartorsiortitserusussimassagaluarpa? Jiisusip makititaasimanera oqaluussinermillu nakkutiginninnera Petrusip ajoqersukkallu allat qularinngilluinnarpaat. Aamma Jiisusip makititaanera ajoqersugaasa makititaajumaarnerminnik upperinninnerulissutigaat. Assersuutigalugu Stefanusi makititaanissani qularinngilluinnarlugu toquvoq. — ApS 7:55-60.

14. Sooq Jiisusip makititaasimanera upperaajuk?

14 Jiisusip massakkut kunngiuneranut kristumiullu ilagiivinut niaquuneranut uppernarsaatissaqarpugut. Kristumiut ilumoortut amerliartortuarput. Jiisusi toqusunit makititaasimanngitsuuppat amerliartorsimassagaluarpat? Uummaqqissimanngitsuuppat taanna pillugu immaqa ilisimasaqarnavianngikkaluarpugut. Jiisusilli makititaasimaneranik nunarsuarlu tamakkerlugu oqaluussinermik nakkutiginninneranik upperinninnissatsinnut pissutissaqarluarpugut.

SOOQ JIISUSIP MAKITITAANERA UAGUTSINNUT PINGAARUTEQARTOQ

15. Sooq Jiisusip makititaanera oqaluussinissatsinnut sapiillissutigaarput?

15 Kristusip makititaanera oqaluussinissatsinnut sapiillissutigaarput. Jiisusip nalaaniilli Guutip akeraasa oqaluussineq assigiinngitsutigut, soorlu tunussineq, illaruaatiginninneq, nakuuserneq, oqaluusseqqusinnginneq, naalliutsitsineq  toqutsinerlu atorlugit, unitsinniartarsimavaat. Biibilimili ima siulittuuteqarpoq: “Sakkut ilinnut sakkuaatissatut saffiukkat atorsinnaassuseqassanngillat.” (Es 54:17) Saatanip ikiortai qunuginngilavut. Jiisusimmi neriorsuisimanermisut ikiortarpaatigut. (Matt 28:20) Qanorluunniit ilioraluarunik akeqqatta unitsinngisaannassammatigut sapiissuseqarsinnaavugut!

Jiisusip makititaanera oqaluussinissatsinnut sapiillissutigaarput (Immikkoortoq 15 takuuk)

16, 17. (a) Jiisusip makititaanera ilinniartitsissutaasa ilumoornerannut qanoq uppernarsaataava? (b) Iivangkiiliu Johannesip allagaa 11:25 naapertorlugu Guutip Jiisusi susinnaatippaa?

16 Jiisusip makititaanera ilinniartitsissutaasa ilumoornerannut uppernarsaataavoq. Biibilimik misissueqqissaartartoq allappoq Kristusi makititaasimanngippat kristumiut sianiinaarterujussuarsimassasut. Paulusilu allappoq Jiisusi uummaqqissimanngitsuuppat kristumiut oqaluussinerat uppernerallu asuliinnaasimassagaluartut. Aamma iivangkiiliut tassaasimassagaluarput angut inussiarnersoq silatoorlu akeqqaminit toqunneqartoq pillugu oqaluttuat alianartut. Jiisusili makitinneqarpoq, tamannalu ilinniartitsissutaasa ilumoornerannut uppernarsaataavoq. — 1 Korinthimiut 15:14, 15, 20 atuakkit.

17 Jiisusi ima oqarpoq: “Uanga makissutaallungalu inuussutaavunga.” (Joh 11:25) Jiisusip neriorsuutaa tamanna piviusunngorumaarpoq. Jehovap Jiisusi qilammi naalakkersuisussanik inunnillu milliardilinnik nunarsuarmi inuusussanik makititsisinnaatippaa. Jiisusip pilliutaa makititaaneralu toqusoqartarunnaarnissaanut  uppernarsaataapput. Taamaattumik misilinneqarnerni tamani allaallu inuunerput navianartorsiortinneqassagaluarpat pinertusaarnissamut sapiissuseqarsinnaavugut!

18. Jiisusip makititaanera sumut uppernarsaataava?

18 Jiisusip makititaanera Jehovap asannittup najoqqutassiai naapertorlugit inuit eqqartuunneqarumaarnerannik upperinnilissutigaarput. Paulusip Athenimi angutit arnallu oqarfigai Guutip aalajangersimagaa “ulloq silarsuarmik tamarmik naapertuilluartumik eqqartuussiffissani angutikkut tamatumunnga qinereersimasamigut; tamannalu tamanut [upperisassanngortikkaa] toqusunit makitikkamiuk”. (ApS 17:31) Guutip Jiisusi eqqartuussisunngortippaa, taassumalu naapertuilluartumik asannittumillu eqqartuussiumaarnera qularinngissinnaavarput. — Esaja 11:2-4 atuakkit.

Makititaanissamik neriuut qujamasuutigalugulu Jehovamut naalattuarnissaq kajungeraarput

19. Kristusip makititaaneranik upperinninnerput qanoq sunnertissutigaarput?

19 Jiisusip makititaasimanera upperigatsigu Guutip piumasaatut iliorusuppugut. Jiisusip inuunini pilliutigisimanngitsuuppagu makititaasimanngitsuuppallu ajortiliujuarlutalu toqusussaassagaluarpugut. (Rom 5:12; 6:23) Aap, neriuuteqarnata ima oqassagaluarpugut: “Nerillutalu erngutiinnarniarta, aqagu toqussagatta!” (1 Kor 15:32) Inuulluarniutit pingaarnerutinnagit makititaanissamik neriuut qujamasuutigalugulu Jehovamut naalattuarnissaq kajungeraarput.

20. Jiisusip makititaanera Guutip angingaassusianut qanoq ersiutaava?

20 Jiisusip makititaanera Jehovap, ‘ujarlersiminik akissarsisitsisartup’, angingaassusianut ersiutaavoq. (Hebr 11:6) Jehovap Jiisusi toqusuitsutut qilammut makitikkamiuk pissaaneqangaarnini siuneqassuseqangaarninilu ersersippai. Taamaaliornermigullu neriorsuutiminik piviusunngortitsisinnaanini ersersippaa. Jehovap neriorsuutigaa ‘kinguaassap’ immikkut ittup nunami qilammilu kiap kisimi oqartussaanera akerleriissutaajunnaarsissagaa. Neriorsuut tamanna piviusunngussappat ‘kinguaassaq’, Jiisusi, toqusariaqarlunilu makitinneqartariaqarpoq. — 1 Mos 3:15.

21. Makititaanissamik neriuut qanoq isumaqarfigaajuk?

21 Makititaanissamik neriuut pillugu Jehovamut qujamasungaarpugut. Biibilimi ima neriorsuuteqarpoq: “Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.” Apustili Johannesi taama neriorsorneqartoq ima oqarfigineqarpoq: “Allagit, oqaatsit tamakku uppernarlutillu ilumoormata.” Kiap tamakku Johannesimut saqqummersippai? Makititaasimasup Jiisusip Kristusip! — Saqq 1:1; 21:3-5.