Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Oktobari 2014

‘Tassaalissaasi kunngeqarfik palaseqatigiinnik innuttalik’

‘Tassaalissaasi kunngeqarfik palaseqatigiinnik innuttalik’

“Uannut tassaalissaasi kunngeqarfik palaseqatigiinnik innuttalik inuiaqatigiillu illernartut.” — 2 MOS 19:6.

1, 2. Arnap kinguaassaa sumit illersorneqartariaqarpa, aamma sooq?

GUUTIP siunertaminik qanoq naammassinninnissaanik paasinninnissamut Biibilimi siulittuut siulleq pingaaruteqarluinnarpoq. Guuti Edenimi neriorsuigami ima oqarpoq: “Akerariissikkumaarpassi illit [Saatani] arnarlu, illit kinguaassatit taassumalu kinguaassai.” Qanoq akerariitsigissappat? Jehova ima nangippoq: “Taassuma [arnap kinguaassaata] niaqqut aserortissavaa, illillu taassuma kimmia aserortissavat.” (1 Mos 3:15NW) Arnap kinguaassaa Saatanip akeraringaaramiuk pissaanini tamaat atorlugu piuneerunniarsarissavaa.

2 Tupinnanngilaq tussiaasiortup Guutip kiffai ima qinnummagit: “Takuat, akeqqatit nipiliortorsuupput, akerartortivillu niaqqutik massitippaat. Peqqusersiorlutik pilersaaruteqarput innuttannut, isumalioqatigiipiluppullu sernissukkatit pillugit. Oqarput: Nungutitsigit inuiaajunnaarsillugit.” (Tuss 83:3-5) Saatanip siunertaraa kinguaassap siuaasai suujunnaarsinniarlugillu akiornissai. Kinguaassaq illersorumallugu Naalagaaffiullu iluatsilluarnissaa qulakkeerniarlugu Jehovap angerutsit allat pilersippai.

 ANGERUSEQ KINGUAASSAMIK ILLERSUISOQ

3, 4. (a) Inatsisit tunngavigalugit angeruseq qanga atuutilersinneqarpa, Israelikkullu qanoq iliorumappat? (b) Inatsisit tunngavigalugit angeruseq kikkunnut illersuutaava?

3 Aaperaap, Iisaap Jaakullu kinguaavi millionilikkuutaanngormata Jehovap inuiaqatigiinngortippai Israelikkuusut. Mosesi akunnermiliuttoralugu Guutip inuiaqatigiit taakku asseqanngilluinnartumik angerfigeqatigai. Jehovap inatsisinik tunivai, taakkulu inatsisinik maleruaajumallutik neriorsuipput. Biibilimi ima allassimavoq: “[Mosesip] angerutsip allassimaffia tigullugu inuit atuffappai, taakkulu oqarput: ‘Naalagaq naalallugu peqqussutai tamaasa maleruarumaarpavut.’ Mosesip inuit pilliutip [ussiup angutivissap] aavata ilaanik serpartarpai oqarlunilu: ‘Tassa aak angerutsip pia, Naalakkap angerfigeqatigimmasi oqaatsit tamakku tamaasa tunngavigalugit.’” — 2 Mos 24:3-8.

Inatsisit Aaperaap kinguaavinut illersuutaapput

4 Inatsisit tunngavigalugit angeruseq ukiumi 1513-imi Kr.in.si. atuutilersinneqarpoq. Angeruseq tamanna tunngavigalugu Jehovap Israelikkut immikkut ittumik siunertaqarluni toqqarpai. Taakkua Guuti eqqartuussisorissallugulu inatsisiliortorissallugulu kunngerissavaat. (Es 33:22) Guutip najoqqutassiaanik naapertuilluartunik maleruaanerup imaluunniit maleruaannginnerup kingunerisartagai Israelikkut oqaluttuarisaanerannit erserpoq. Israelikkut inatsisit naapertorlugit Guutimik nalusunut kateqqusaanatillu guutinik allanik pallorfiginneqqusaanngillat. Inatsisit Aaperaap kinguaavinut illersuutaapput. — 2 Mos 20:4-6; 34:12-16.

5. (a) Inatsisit tunngavigalugit angeruseq pissutigalugu Israelikkut sumik periarfissinneqarpat? (b) Sooq Israelikkut Guutimit ajattorneqarpat?

5 Inatsisit tunngavigalugit angeruseq naapertorlugu palasit Israelimi kiffartortussatut toqqarneqartarput, taakkulu siunissami palaseqatigiinnut inunnik pitsaanerusumik kiffartuussisussanut assersuutaapput. (Hebr 7:11; 10:1) Inatsisit tunngavigalugit angeruseq pissutigalugu Israelikkut tassaalersinnaapput “kunngeqarfik palaseqatigiinnik innuttalik”. Taamatut pisinnaatitaaffeqalissagunik Israelikkut Jehovap inatsisai maleruartariaqarpaat. (2 Mosesi 19:5, 6 atuakkit). Ajoraluartumilli maleruanngilaat. Israelikkut Missiarsi, Aaperaap kinguaava pingaarnerusoq, upperinngilaat. Taamaattumillu Guutimit ajattorneqarput.

Israelikkut inatsisinik maleruaanngikkaluartut inatsisit suli iluaqutaapput (Immikkoortut 3-miit 6-imut takukkit)

6. Inatsisinut suna siunertaava?

6 Israelikkut Guutimut aalajaannginnamik tassaalinngillat kunngeqarfik palaseqatigiinnik innuttalik. Taamaakkaluartorli Inatsisit suli iluaqutaapput. Inatsisit pissutigalugit kinguaassaq illersorneqarpoq, inuillu Missiarsip kinaaneranik paasinninnissaannut iluaqutaapput. Kristusi nunarsuarmiitilluni kinaanera paasineqarmat Inatsisit siunertaat  naammassivoq. Biibilimi allassimavoq Kristusi Inatsisit naggatigigaat. (Rom 10:4) Taava kikkut tassaalissappat kunngeqarfik palaseqatigiinnik innuttalik? Jehova inuiaqatigiinnik nutaanik pilersitsiniarluni angerutsimik allamik pilersitsivoq.

INUIAQATIGIIT NUTAAT PILERSINNEQARTUT

7. Jeremia aqqutigalugu Jehovap suna siulittuutigaa?

7 Inatsisit tunngavigalugit angerutsip atorunnaarsinneqarnera sioqquterujussuarlugu Jehovap Israelikkunnik ‘nutaamik angerfigeqatiginnikkumaarnini’ pruffiiti Jeremia aqqutigalugu siulittuutigaa. (Jeremia 31:31-33 atuakkit). Angerutsimi tamatumani isumakkeerfigineqarumalluni uumasunik pilliuteqartarnissaq piumasaqaatigineqanngimmat Inatsisit tunngavigalugit angerutsimit allaanerulluinnarpoq. Sooq pilliuteqartoqartariaqanngila?

8, 9. (a) Jiisusip aava sumik periarfissaqalersitsiva? (b) Angerusisaamut ilaasut sumik periarfissinneqarpat? (Allaaserisap aallaqqaataani assiliaq takuuk).

8 Ukiut hundredillit tamatuma kingorna ukiumi 33-mi nisanip 14-ianni Naalakkap unnukkorsiortitsinera Jiisusip aallarnerpaa. Jiisusip ermuseq eqqartoramiuk ajoqersukkani aalajaatsut aqqanillit ima oqarfigai: “Ermuseq manna tassa angerusisaaq uanga aakkut pillusi kuineqartukkut.” (Luk 22:20) Matthæusip allagaa naapertorlugu Jiisusi ima oqarpoq: “Taanna tassa aaga, angerutsip aava, amerlasuut pillugit kuineqartussaq ajortit isumakkeerneqaatissaannik.” — Matt 26:27, 28.

9 Aak Jiisusip pilliutaa tunngavigalugu angerusisaaq atuutilersinneqarpoq. Aak ataasiaammik kuineqarpoq, tamannalu tunngavigalugu inuppassuit ajortiminnik naassaanngitsumik isumakkeerfigineqarsinnaapput. Jiisusi ajorteqannginnami isumakkeerfigineqartariaqannginnamilu angerutsimi nutaami ilaanngilaq. Guutilli Jiisusip pilliutaata nalinga inunnut iluaqutissatut atorsinnaavaa. Anersaani illernartoq iluaqutigalugu inuit aalajaatsut tanissinnaavai qitornavissiartaaralugillu. (Romamiut 8:14-17 atuakkit). Jehovap taakku ernermisut, Jiisusitut, ajorteqanngitsutut naatsorsuussinnaavai. Tanitat taakku ‘Kristusip kingornusseqatigissavai’. Israelikkut ‘palaseqatigiinnik innuttalittut kunngeqarfinngornissamut’  periarfissaq annaasaat tanitat immikkut pisinnaatitaaffigilersinnaavaat. Taakku pillugit apustili Petrusi ima allappoq: “[Ilissi] tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat.” (1 Petr 2:9) Angerusisaap pingaaruteqangaarnera erseqqippoq. Tamannami tunngavigalugu Jiisusip ajoqersugai Aaperaap kinguaavinut pingaannginnerusumut ilaalersinnaapput.

ANGERUSISAAQ ATUUTILERSINNEQARTOQ

10. Angerusisaaq qanga atuutilersinneqarpa, aamma sooq siusinnerusukkut tamanna pisimanngila?

10 Angeruseq Naalakkap unnukkorsiortitsinerani atuutilersinneqanngilaq. Sooq? Angeruseq atuutilissappat Jiisusi qilaliaqqaartariaqarpoq pilliutimilu nalinga Guutimut sassaallugu. Aamma ‘Kristusip kingornusseqatissai’ anersaamit illernartumit taninneqaqqaartariaqarput. Taamaattumik ukiumi 33-mi piinsip ulluani Jiisusip ajoqersugaasa anersaamik illernartumik taninneqarneranni angerusisaaq atuutilersinneqarpoq.

11. Suna iluaqutigalugu juutit juutiunngitsullu kipineqanngitsut angerusisaamut ilaalersinnaappat, angerfigeqatigineqartullu qassiuppat?

11 Jehovap Israelikkut nutaamik angerfigeqatiginiarlugit Jeremia aqqutigalugu nalunaarutigigamiuk Inatsisit tunngavigalugit angerutsip pisariaqarunnaarnera ersersippaa. Angerusisaaq atuutilersinneqarmat Inatsisit tunngavigalugit angeruseq atuukkunnaarpoq. (Hebr 8:13) Taama pisoqarmat juutit juutiunngitsullu kipineqanngitsut Guutip naalagaaffianik kingornussinissaminnut assigiimmik periarfissaqalerput, taakkumi ‘uummatimikkut kipineqarput, anersaakkut, allannertigut pinnani’. (Rom 2:29) Guutip inatsisinik ilumiulissavai taakkualu uummataannut allallugit. (Hebr 8:10) Angerutsimi nutaami tanitat 144.000-t angerfigeqatigineqassapput. Inuiaqatigiit nutaat taakku tassaapput “Israeli Guutip pigisaa” imaluunniit anersaakkut Israeli. — Gal 6:16; Saqq 14:1, 4.

12. Inatsisit tunngavigalugit angerutsip aamma angerusisaap suut assigiissutigaat?

12 Inatsisit tunngavigalugit angerutsip aamma angerusisaap suut  assigiissutigaat? Inatsisit tunngavigalugit angerutsimi Jehova Israelikkullu angerfigeqatigiipput angerutsimilu nutaami Jehova anersaakkullu Israeli angerfigeqatigiillutik. Mosesi Inatsisit tunngavigalugit angerutsimi akunnermiliuttuuvoq angerutsimilu nutaami Jiisusi akunnermiliuttuulluni. Uumasut aavisigut Inatsisit tunngavigalugit angeruseq atuutilersinneqarpoq Jiisusillu pilliutaata aavatigut angerusisaaq atuutilersinneqarluni. Inatsisit tunngavigalugit angeruseq atuukkallarmat Mosesi Israelikkunnut siulersuisuuvoq Jiisusilu, ilagiinni niaquusoq, angerutsimi nutaami siulersuisuulluni. — Ef 1:22.

13, 14. (a) Angerusisaaq Naalagaaffimmut qanoq attuumassuteqarpa? (b) Anersaakkut Israelip Kristusi qilammi naalakkersueqatigissappagu suna pisariaqartinneqarpa?

13 Angerusisaaq Naalagaaffimmut qanoq attuumassuteqarami? Angeruseq taanna tunngavigalugu inuiaat illernartut pilersinneqartut qilammi Naalagaaffimmi kunnginngornissaminnik palasinngornissaminnillu periarfissinneqarput. Taakkulu tassaapput Aaperaap kinguaavinut pingaannginnerusunut ilaasut. (Gal 3:29) Taamaattumik Aaperaamut angerutsip piviusunngornissaa angerusisaamit uppernarsarneqarpoq.

14 Angerusisaaq tunngavigalugu anersaakkut Israeli pilersinneqarlunilu tanitat ‘Kristusimik kingornusseqateqarsinnaanngorput’. Tanitalli Jiisusi qilammi qanoq kunngioqatigisinnaallugulu palasioqatigisinnaagamikku? Angeruseq alla tunngavigalugu tamanna pisinnaavoq.

NAALAKKERSUEQATAANISSAMIK ANGERUSEQ

15. Jiisusip apustilini aalajaatsut sumik angerfigeqatigai?

15 Naalakkap unnukkorsiortitsinera pilersereerlugu Jiisusip apustilini aalajaatsut Naalagaaffimmik angerutsimik taaneqartumik angerfigeqatigai. (Lukasi 22:28-30 atuakkit). Angerutsimi tamatumani Jehova angerfigeqatiginninnani Jiisusi tanitanik angerfigeqatiginnippoq. Jiisusip oqaasii ‘soorlu Ataatama angerfigeqatigigaanga’ ‘Melkisedeki assigalugu naassaanngitsumik palasiunissamik’ angerutsimut innersuussutaagunarput. — Hebr 5:5, 6.

16. Naalagaaffimmik angeruseq tunngavigalugu kristumiut tanitat sumik periarfissinneqarpat?

16 Apustilit aqqanillit taakku Jiisusip misilinneqarnerani ilumoorfiginnipput. Apustilit qilammi Jiisusi ilagalugu issiavissaarsuarni kunngitut naalakkersuisussaanerannut palasitullu kiffartortussaanerannut Naalagaaffimmik angeruseq qularnaveeqqutaavoq. Taakkuali aqqanillit kisimik tamanna immikkut pisinnaatitaaffiginavianngilaat. Jiisusip apustili Johannesi takorruukkakkut saqqummerfigaa imalu oqarfigalugu: “Ajugaasoq uanga issiavissaarsuanni issiavissikkumaarpara soorlu uanga ajugaasimasunga ataatannilu issiavissillunga issiavissaarsuani.” (Saqq 3:21) Taamaattumik kristumiut tanitat 144.000-usut Naalagaaffimmik angerfigeqatigineqarput. (Saqq 5:9, 101936; 7:4) Angeruseq tamanna tunngavigalugu tanitat qilammi Jiisusi naalakkersueqatigisinnaavaat. Tamanna nuliassamut kunngimut katittussamut  assersuunneqarsinnaavoq. Katikkunik nulianngortup kunngi naalakkersueqatigisinnaavaa. Tanitat Kristusimut ‘nuliassatut’ imaluunniit ‘niviarsiatut minguitsutut’ Kristusimut katinnissamut neriorsorneqartutut Biibilimi eqqaaneqarput. — Saqq 19:7, 8; 21:9; 2 Kor 11:2.

GUUTIP NAALAGAAFFIA UPPERILLUINNARUK

17, 18. (a) Angerutsit arfinillit sammeriikkavut Naalagaaffimmullu attuumassuteqartut eqqaakkit. (b) Naalagaaffik sooq upperilluinnarsinnaavarput?

17 Allaaserisani marlunni angerutsit tamarmik Naalagaaffimmut attuumassuteqarnerat sammereerparput. (Allaaserisap siuliani nassuiaat “Guutip siunertani qanoq naammassiumaaraa” takuuk.) Ersarippoq Naalagaaffiup angerutsinik, inatsisitigut isumaqatigiissutinik, tunngaveqarnera. Qularinngilluinnarsinnaavarput Naalagaaffik Jiisusimit kunngiuffigineqartoq aqqutigalugu Guutip inunnut nunarsuarmullu siunertani piviusunngortikkumaaraa. — Saqq 11:15.

Naalagaaffik Missiarsimit kunngiuffigineqartoq aqqutigalugu Jehovap nunarsuarmut siunertani naammassiumaarpaa (Immikkoortut 15-imiit 18-imut takukkit)

18 Naalagaaffiup inuiaat ajornartorsiutaannut aaqqiissutissatuaanera inunnullu tamanut naassaanngitsumik iluaqutaajumaarnera qularutissaanngilaq. Taamaattumik qanortoq sallusuissut tamanna inunnut allanut aallussilluarluta oqaluussissutigiuartigu! — Matt 24:14.