Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Oktobari 2014

“Eqqarsaatigisigit qilammiittut”

“Eqqarsaatigisigit qilammiittut”

“Eqqarsaatigisigit qilammiittut, nunamiittut pinnagit.” — KOL 3:2.

1, 2. (a) Sooq ilagiit Kolossemiittut navianartorsiorpat? (b) Qatanngutit Kolossemiittut siunnersuut suna Guutimik ikinnguteqartuarnissaminnut iluaqutigaat?

KRISTUMIUT siulliit nalaanni ilagiit Kolossemiittut ataasiussuseqarnerat navianartorsiorpoq. Qatanngutit ilaat isumaqarput kikkut tamarmik Mosesip inatsisaanik maleruaassasut. Ilaalli isumaqarput inuunermi nuannaarutaasinnaasunik nuannaarutiginninneq ajortuusoq. Taamatut eqqarsarnerup navianaateqarnera pillugu Paulusi ima mianersoqqusivoq: “Mianersoritsi napitinneqaqqunasi ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik.” — Kol 2:8.

2 Tanitat kristumiut taakkua inuit isumaliutersuutaat maleruarunikkit Guutimit anersaakkut ernerineqartussatut pisinnaatitaaffitsik ajattussavaat. (Kol 2:20-23) Paulusip Guutimut erlinnangaartumik attaveqartuaqqullugit ima allaffigai: “Eqqarsaatigisigit qilammiittut, nunamiittut  pinnagit.” (Kol 3:2) Kristumiut taakkua naassaanngitsumik qilammiilernissamik immikkut ittumik neriugisartik eqqaamasariaqarpaat. — Kol 1:4, 5.

3. (a) Kristumiut tanitat qanoq neriuuteqarpat? (b) Allaaserisami matumani suna sammissavarput?

3 Ullumikkut kristumiut tanitat Guutip naalagaaffianut tunngasut aamma ‘Kristusimik kingornussisussaaqataanermik’ neriuuteqarnertik eqqarsaatigiuarpaat. (Rom 8:14-17) Nunamimi inuunissamik neriuuteqartut? Taakkua Paulusip siunnersuutaa qanoq maleruarsinnaavaat? ‘Qilammiittut’ qanoq eqqarsaatigiuarsinnaavaat? (Joh 10:16) Aaperaap Mosesillu erloqinartorsiornerminni qilammiittut eqqarsaatigiuarpaat. Taakku qanoq ilaarsinnaavavut?

QILAMMIITTUT QANOQ EQQARSAATIGIUARSINNAAGIVUT

4. Kristumiut nunarsuarmi inuunissamik neriugisallit qilammiittut qanoq eqqarsaatigiuarsinnaavaat?

4 Nunami inuunissamik neriugisallit qilammiittut eqqarsaatigiuartariaqarpaat. Taamaaliortarpullu Jehova taassumalu naalagaaffia inuunerminni salliukkaangamikkit. (Luk 10:25-27) Kristusi taamaaliormat aamma uagut taamaaliortariaqarpugut. (1 Petr 2:21) Kristumiut siulliit nalaanni isumaliutersuutit eqqunngitsut, silamiut ilisimaqqissaarniutaat pigisaleritunerlu nalinginnaapput. Saatanip pissutsinik aaqqissuussaanerani inuuffigisatsinni aamma tamakku nalinginnaapput. (2 Korinthimiut 10:4, 5 atuakkit). Jiisusi ilaartariaqarparput Jehovamullu attaveqarnitsinnut ajoqusiisinnaasut mianersuutigisariaqarpavut.

Qilammiittut taamaallaat eqqarsaatiginerisigut akiuunnermi ajugaasinnaavugut

5. Aningaasanut pigisanullu tunngatillugu imminut qanoq aperisinnaavugut?

5 Silarsuup aningaasanut pigisanullu tunngatillugu isiginnittaasiatut isiginnittaaseqarpugut? Eqqarsartaatsitsinnit iliuutsitsinnillu suut pingaartinnerivut ersersinneqarajupput. Jiisusip tamanna nassuiarpaa ima oqarami: “Uummativimmi erlinnartuutitit najortuartarpai.” (Matt 6:21) Imminut aperisariaqarpugut suna pingaarnerpaatinnerlutigu. Aningaasat, pitsaanerusumik suliffittaarnissaq ilorrisimaarnartumilluunniit inooriaaseqarnissaq isumakuluutigivallaartarpavut? Imaluunniit pilimanianngitsumik inooriaaseqarneq Jehovamullu attaveqarnerput pingaarnerutippavut? (Matt 6:22) Jiisusi oqarpoq ‘erlinnartuutinik nunami’ pingaartitsigutta Jehovamut attaveqarunnaarsinnaasugut. — Matt 6:19, 20, 24.

Guutip piumasaatut Mosesi iliorusukkami pisuutut pissaanilittullu inuunissamut periarfissani piumassuseqarluni taamaatippai

6. Ajortulioqqajaasarnitta akiorniarnerani qanoq ajugaasinnaavugut?

6 Naammalluinnanngitsuugatta ajortulioqqajaasarpugut. (Romamiut 7:21-25 atuakkit). Guutip anersaava illernartoq tatiginngikkutsigu ‘inuulluapilunneq, aalakoorneq’ kinguaassiuutitigullu inuunerlunneq ileqqorilersoorsinnaavavut, imaluunniit allaat Guutip inatsisai sumiginnarlugit ‘ileqqorluttunngorsinnaavugut’. (Rom 13:12, 13)  Naammalluinnanngitsuugatta ajortulioqqajaasarnerput akiorniartuartariaqarparput. Qilammiittut taamaallaat eqqarsaatiginerisigut akiuunnermi ajugaasinnaavugut. Paulusi ima allappoq: “Timiga peqqarniisaarfigaara naalatsillugulu pinngitsaalillugu.” (1 Kor 9:27) Uaguttaaq imminut pinngitsaalisariaqarpugut. Angutit marluk aalajaatsut Guutimit iluarisaaniarlutik iliuuseqartuartut maligassiaat sammeriartigit. — Hebr 11:6.

AAPERAAP JEHOVA UPPERAA

7, 8. (a) Aaperaat Saralu sunik ajornartorsiuteqarpat? (b) Aaperaap suna eqqarsaatigiuarpaa?

7 Aaperaat ilaquttanilu Jehovamit Kana’animut nooqquneqaramik piumassuseqarluni naalappoq. Aaperaap uppernera naalanneralu pillugu Jehovap pilluaqquaa ima angerfigeqatigalugu: “Inuiassuanngortikkumaarpakkit pilluaqqullutillu.” (1 Mos 12:2) Ukiorpassuilli qaangiummata Aaperaat Saralu suli qitornaqanngillat. Aaperaat eqqarsarpa Jehovap neriorsuutini puiorsimagaa? Tamatuma nalaani Aaperaat unamminiagassarpassuaqarpoq. Illoqarfimmi Urimi ilorrisimaarnartumik inuujunnaarluni Kana’animut kilometerit 1600-t sinnerlugit ungasitsigisumiittumut aallarput. Ilaquttanilu tuperni najugaqarnerminni naammattunik nerisassaateqartuaannarneq ajorlutillu ilaannikkut ujajaasunit navianartorsiortinneqartarput. (1 Mos 12:5, 10; 13:18; 14:10-16) Taamaakkaluartorli Aaperaat ilaquttanilu ilorrisimaarnartumik inuujumallutik Urimut uterusunngillat. — Hebræerit 11:8-12, 15 atuakkit.

8 Aaperaap Jehova upperaa ‘nunamiittullu’ eqqarsaatiginagit. (1 Mos 15:6) Guutimit neriorsorneqarsimanini eqqarsaatigiuarpaa. Aaperaap uppernera Jehovap takugamiuk ima oqarfigaa: “‘Qilak isigeriassaguk ullorissallu kisillugit, kisinneq sapinngikkukkit.’ Oqarporlu: ‘Taama amerlatigilissapput kinguaassatit.’” (1 Mos 15:5) Aaperaap taama oqarfigineqarami paasivaa Jehovamit puiorneqarsimanani. Ullorissat tamatigut qiviaraangamigit amerlangaartunik kinguaassaqalernissaq pillugu Jehovap neriorsuutaa eqqaasarpaa. Jehovallu piffissarititaa nalliummat Aaperaat neriorsorneqarsimanermisut ernertaarpoq. — 1 Mos 21:1, 2.

9. Aaperaat qanoq ilaarsinnaavarput?

9 Aaperaap pisimaneratut uaguttaaq Jehovap neriorsuutaasa eqquunnissaat utaqqivavut. (2 Petr 3:13) Qilammiittut eqqarsaatigiuanngikkutsigit neriorsuutit eqquunnissaat utaqqikatalersinnaallugillu Jehovamut kiffartornitsinni aallusserpiarunnaarsinnaavugut. Immaqa siornatigut pioneritut kiffartorumallutit assigiinngitsutigulluunniit immikkut kiffartorumallutit Jehovamut pilliuteqartarsimavutit. Maannakkulli sulerivit? Aaperaatut Jehovamut kiffartorninni sapinngisamik iliuuseqartuarniarpit  siunissamilu pilluaqqussutit qilanaaralugit? (Hebr 11:10) Aaperaap “upperimmani” Jehovap ikinngutimisut isigaa. — Rom 4:3.

MOSESIP ‘TAKUSSAANNGITSUT ISIGAALUSOOQ’

10. Mosesi qanoq perorsarneqarpa?

10 Mosesip aamma qilammiittut eqqarsaatigiuarpai. Egyptenip nunarsuarmi pissaaneqarnerpaanerata nalaani Egyptenimi kunngikkormiutut perorsarneqarpoq. Biibilimi allassimavoq ‘Egyptenimiut ilisimassusiannik tamanik ajoqersorneqartoq’. Taamatut qaffasissumik ilinniartinneqarnini ‘oqaatsimigut suliamigullu pissaaneqalissutigaa’. (ApS 7:22) Mosesi taamatut tunuliaqutaqarami Egyptenimi pingaarutilimmik inissisimaffeqalernissaminut periarfissarpassuaqarpoq. Illinniartinneqarsimanerli alla Mosesimut pingaaruteqarneruvoq.

11, 12. Ilinniartinneqarneq suna Mosesimut pingaarnerpaava, aamma sooq taamatut oqarsinnaavugut?

11 Mosesi meeraalluni anaanaminit, Jokebedimit, Hebræerit Guutiat pillugu ilinniartinneqarpoq. Jehova pillugu taamatut ilisimasaqarneq Mosesimut pingaaruteqarnerpaavoq. Guutip piumasaatut iliorusukkami pisuutut pissaanilittullu inuunissamut periarfissani piumassuseqarluni taamaatippai. (Hebræerit 11:24-27 atuakkit). Mosesip meeraanermini ilinniartinneqarsimanini Jehovamullu uppernini qilammiittut eqqarsaatigiuarnissaannut iluaqutigai.

Kristusitut eqqarsartarutta maniguullutalu oqaluussinitsinni aallussilluartuarsinnaavugut

12 Mosesi Egyptenimiunit pitsaanerpaamik ilinniartinneqarsimagaluarluni Egyptenimi pissaaneqalerusunnanilu tusaamasanngorusunnanilu pisuunngorusunngilaq. Biibilimili ima allassimavoq: “Faraop paniata erneranik taaneqaqqunngilaq. Guutip innuttai naallioqatigiumanerungaarpai sivikitsuinnarmik ajortimi inuulluataarnissaminngarnit.” Ukiut arlallit qaangiummata Mosesip Jehova pillugu taamatut ilisimasaqarneq taassuma innuttaanik siulersuinissaminut iluaqutigaa.

13, 14. (a) Jehovap innuttaanik aniguisitsissaguni Mosesip suut ilinniaqqaartariaqarpai? (b) Uaguttaaq suut ilinniaqqaartariaqarpavut?

13 Mosesip Jehova taassumalu innuttai, taamani Egyptenimi inussiaataasut, asavai. Mosesi 40-nik ukioqarluni taakkuninnga aniguisitsinissaminut piareertutut misigivoq. (ApS 7:23-25) Jehovalli nalunngilaa Mosesi aniguisitsinissaminut suli piareersimanngitsoq. Mosesip maniguunnissani, kamagittarnissani, saamanissani imminullu naalakkersinnaanissani ilinniartariaqarpai. (Uss 15:33) Mosesi ajornartorsiutaalertussanut annertuunut  piareersimajumalluni ilinniartinneqartariaqarpoq. Taamaattumik Mosesi pissuserineqartussanik taakkuninnga ineriartortitsinissaminut iluaqutigisaminik ukiuni 40-ni savanik paarsisuuvoq.

14 Mosesi taamatut ilinniartinneqarnini iluaqutigaa? Aap, Biibilimi allassimavoq ‘inunnit nunarsuarmiittunit tamanit anneruniajuinnerpaannguutigigaa’. (4 Mos 12:3) Maniguunnissani ilinniarsimagamiuk inuit assigiinngitsut ajornartorsiutaannut tunngatillugu kamagittarsinnaavoq. (2 Mos 18:26) Uaguttaaq annikilliornartussarsuarmit aniguinissatsinnut Guutillu silarsuassaani nutaami inuulernissatsinnut iluaqutissatsinnik pissuseqartariaqarpugut. (Saqq 7:14) Kikkut tamaasa, aamma kamajasorisavut ajuallajasorisavullu, peqatigisarpavut? Apustilip Petrusip oqaasii uku iluaqutigisinnaavavut: “Kikkuugaluartulluunniit ataqqisigit, qatanngutit asasigit.” — 1 Petr 2:17.

QILAMMIITTUT EQQARSAATIGIUARTIGIT

15, 16. (a) Sooq qilammiittut eqqarsaatigiuartariaqarpavut? (b) Sooq kristumiut pissuserissuusariaqarpat?

15 ‘Ulluni atugarliungaarfiusuni’  inuuvugut. (2 Tim 3:1) Taamaattumik Guutimut qanittuarumalluta qilammiittut eqqarsaatigiuartariaqarpavut. (1 Th 5:6-9) Pingasutigut qanoq taamaaliorsinnaasugut sammeriartigu.

16 Pissuserissuunerput: Petrusip pissuserissuunissarput pingaaruteqarnerarpaa ima oqarami: “Guutimik nalusut akornanni ajunngitsumik inuugitsi.” Nangilluni eqqaavaa Jehovamik ilisimanninngitsut pissusitsinnik maluginiaanertik pissutigalugu ‘Guutimik unnersiutiginnilersinnaasut’. (1 Petr 2:12) Angerlarsimaffitsinni, suliffitsinni, atuarfitsinni, sunngiffimmi sammisaqarnitsinni oqaluussinitsinniluunniit sapinngisamik pissuserinnitsigut Jehova naalannarsisinniartassavarput. Soorunami naammalluinnanngitsuugatta tamatta kukkusarpugut. (Rom 3:23) Tamannali nikalluutigisariaqanngilarput, Jehovammi ‘ajunngitsoq pillugu uppertutut sorsunnitsinni’ ikiorumaaramisigut. — 1 Tim 6:12.

17. Qanoq Jiisusitut isiginnittaaseqarsinnaavugut? (Allaaserisap aallaqqaataani assiliaq takuuk).

17 Isiginnittaaserput: Pissuserissuujumalluta ajunngitsumik isiginnittaaseqartariaqarpugut. Apustilip Paulusip Jiisusitut isumaqaqqulluta kajumissaarpaatigut. (Fil 2:5) Jiisusi qanoq isiginnittaaseqarami? Maniguuttuuvoq, tamannalu pissutigalugu oqaluussinermini imminut pilliutigeriaannaavoq. Guutip naalagaaffia pillugu nutaarsiassaq nuannersoq eqqarsaatigiuarpaa. (Mark 1:38; 13:10) Guutip oqaasia Jiisusip malittarisassiatut pingaarnerpaatut isigaa. (Joh 7:16; 8:28) Allakkat Illernartut issuarsinnaajumallugit, illersorsinnaajumallugit nassuiarsinnaajumallugillu atuaqqissaartarpai. Kristusitut eqqarsartarutta maniguullutalu oqaluussinitsinni aallussilluarlutalu Biibilimik atuaqqissaarnitsinni eqiasuitsuussaagut.

Guutip naalagaaffia pillugu nutaarsiassaq nuannersoq Jiisusip pingaartittuarpaa (Immikkoortoq 17 takuuk)

18. Qanoq Jehovamik suleqateqarsinnaavugut?

18 Iliuutsivut: Guutip “qilammiittut nunamiittullu” Jiisusimut naalatsigitinnissaat siunertaraa. (Fil 2:9-11) Jiisusi pingaarutilimmik inissisimaffeqaraluarluni maniguulluni Ataataminut naalatsigitippoq, aamma uagut taamaaliortariaqarpugut. (1 Kor 15:28) Inunnik inuiannik tamaneersunik ajoqersuganngortitsiortornitsigut Jehovamik suleqateqartarpugut. (Matt 28:19) Aammattaaq tullitsinnut qatanngutitsinnullu ‘ajunngitsuliortarpugut’. — Gal 6:10.

19. Sunissarput aalajangiusimajuartariaqarparput?

19 Jehovap qilammiittunik eqqarsaatiginneqqusiuarnera qujamasuutigingaarparput! ‘Arpannitsinni nikallujuittariaqarlutalu’ qilammiittut salliuttuartariaqarpavut. (Hebr 12:1) Jehovamut tarnikkut iluunngarluta kiffartornissarput aalajangiusimajuarutsigu Ataatatta qilammiusup iliuutsivut pillugit pilluaqqussavaatigut. — Kol 3:23, 24.