Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Septembari 2014

Angajoqqaajususi — Meeqqasi paarisigit

Angajoqqaajususi — Meeqqasi paarisigit

“Maluginiarluarniakkit savaativit qanoq issusii.” — USS 27:23.

1, 2. (a) Israelimi savanik paarsisut akisussaaffiisa ilaat suuppat? (b) Sutigut angajoqqaat savanik paarsisunut assingussuteqarpat?

ITSAQ Israelimi savanik paarsisuuneq imaannaanngitsuusimavoq. Issittumi kiattumilu silami sulisarlutillu savaatitik uumasunut qaasuttunut tillinnianullu illersortarpaat. Savanik paarsisut savat ataasiakkaarlugit misissoqqissaakulasarlugillu napparsimasut ajoqusersimasulluunniit paaqqutarisarpaat. Savaaqqat savanit sanngiinnerusarmata paarilluarnerusarpaat. — 1 Mos 33:13.

2 Kristumiut angajoqqaat savanik paarsisutut pissuseqartariaqarput. Angajoqqaat Jehovap najoqqutassiaanut naapertuuttumik meeqqaminnik perorsaanissartik akisussaaffigaat. (Ef 6:4) Tamanna ajornaatsuujuaannarpa? Naamik! Meeqqat Saatanip isumaliuutersuutaanit sunnerneqarniartuarput. Tamatuma saniatigut meeqqat naammalluinnanngitsuugamik ajortulioqqajaasarput. (2 Tim 2:22; 1 Joh 2:16) Meeqqatit qanoq ikiorsinnaavigit? Meeqqannik paarsininni iliuuserisinnaasatit pingasut sammeriartigit: (1) taakkuninnga ilisimannilluarnissat, (2) isumassuinissat, aamma (3) siulersuinissat.

MEEQQASI ILISIMALLUARSIGIT

3. Qanoq angajoqqaat meeqqatik ilisimallualersinnaavaat?

 3 Savanik paarsisuulluartup savaatimi peqqissuunissaat qulakkeerusuttaramiuk savat ataasiakkaarlugit misissoqqissaartarpai. Biibilimi ima allassimavoq: “Maluginiarluarniakkit savaativit qanoq issusii.” (Uss 27:23) Angajoqqaatut ‘savaatitit’, meeqqatit, ilisimalluartariaqarpatit. Taamaaliorumallutit meeqqavit iliuuserisartagaat, eqqarsaataat misigissusaallu maluginiartariaqarpatit. Qanoq taamaaliorsinnaavit? Meeqqatit oqaloqatigikulasarnerisigut.

4, 5. (a) Meeqqat angajoqqaaminnik unneqqarissumik oqaloqateqarnissaannut siunnersuutit suut iluaqutaasinnaappat? (Allaaserisap aallaqqaataani asseq takuuk). (b) Meeqqatit ilinnik oqaloqateqarnissaminnut piumassuseqalersikkumallugit qanoq iliorsimavit?

4 Angajoqqaat ilaasa maluginiarsimavaat meeqqamik inuusuttuaranngortut attaveqaqatiginiarnerat unamminiarnarnerulertartoq. Inuusuttuaqqat ilaasa eqqarsaatitik misigissutsitillu oqaloqatigiissutigerusunneq ajorpaat. Meeqqatit taamaappata qanoq iliorsinnaavit? Misigissanngilatit sivisuumik itisuumillu oqaloqatigisariaqarlugit. Akerlianik eqqissisimasumik avatangiiseqartillusi oqaloqatiginiartassavatit. (5 Mos 6:6, 7) Sammisaqaqatigiittaritsi. Pisuttuaqatigiissinnaavusi, pinnguaqatigiissinnaavusi illumiluunniit suliassanut tunngatillugu ikioqatigiissinnaavusi. Meeqqatit eqqissisimagunik eqqarsaatitik misigissutsitillu pillugit oqaloqatiginissannut piumassuseqarnerusinnaapput.

5 Taamaalioraluarlutilli meeqqavit suli oqaloqatigerusunngippatsit? Periaatsit allat misilikkit. Assersuutigalugu paniit ullormut sulerisimanersoq aperinagu illit sulerisimanerlutit oqaluttuussinnaavat. Taava imaassinnaavoq sulerisimanerminik oqaluttuukkumanerussagaatit. Paniit qanoq misiginersoq paasiniarlugu inuttaa apeqqusernagu sammisaq aalajangersimasoq pillugu apersortaruk. Aperisinnaavat eqqartugarsi ikinngutaasa qanoq isumaqarfigineraat ikinngutinilu qanoq siunnersorusussanerai.

6. Piffissaqarnerit oqaloqatikkuminarnerillu meeqqannut qanoq ersersissinnaaviuk?

6 Piffissaqartutit oqaloqatikkuminartutillu meeqqavit malugisinnaappassuk oqaloqatigerusunnerussavaatsit. Meeqqavit ilaginissaannut ulapippallaarpasittuaannaruit ajornartorsiutiminnik oqaluttuunnavianngilaatsit. Oqaloqatikkuminarnerlutit qanoq paasisinnaaviuk? Ima oqaannassanngilatit: “Qaqugukkulluunniit oqaloqatigisinnaavarma.” Inuusuttuaraativit nalunngittariaqarpaat ajornartorsiutitik ilinnut pingaaruteqartut ingasattumillu qisuariarfigissanngikkitit. Kayla 19-inik ukiulik ima oqarpoq: “Ataataga suulluunniit pillugit oqaloqatigisinnaavara. Akornusertarnangalu eqqartuunneq ajorpaanga; tusarnaaginnartarpaanga. Naggataatigullu siunnersorluartarpaanga.”

7. (a) Peerariinneq pillugu oqaloqatigiinnermi angajoqqaat qanoq oqimaaqatigiissaarisuusinnaappat? (b) Qanoq angajoqqaat meeqqatik uumisutsilersinnaavaat?

7 Sammisaq oqaloqatigiissutigiuminaatsoq, soorlu peerariinneq, pillugu meeqqatit oqaloqatigigukkit qulakkeertariaqarpat eqqartorneqartumut tunngatillugu eqqortumik iliuuseqarnissaannik ilinniartitsinissat. Assersuutigalugu takorlooruk neriniartarfimmut isertutit nerisassallu allattorsimaffiannik toqunartulimmik nerineq pillugu mianersoqqussutinik ulikkaartumik tunineqarlutit. Ilimanarpoq anissasutit neriniartarfimmullu allamukarlutit. Meeqqannut tunngatillugu aamma taamatut pisoqarsinnaavoq. Siunnersuininni taamaallaat mianersoqqusisaruit meeqqatit uumisulernissaat ilinnillu siunnersorneqarusukkunnaarnissaat ilimanarpoq. (Kol 3:21 atuaruk.) Akerlianik oqimaaqatigiissaarisuuniarit. Qatanngut arnaq inuusuttoq Emilymik atilik ima oqarpoq: “Angajoqqaama peerariinneq ajortumik oqaluuserineq ajorpaat. Inummik allamik ilinnialerneq aappassamillu nassaarneq  nuannernerartarpaat. Peerariinneq pillugu oqaloqatigigaangakkit tamanna toqqissisimanerulissutigisarpara. Allaat isertuarnanga inuit ilinnialikkama kikkuunerannik ilisimatikkusunnerusarpakka.”

8, 9. (a) Kamagittarneq akornusiinanilu tusarnaarneq qanoq iluaqutaasarpat? (b) Meeqqannut tusarnaarnerit qanoq iluaqutigisimaviuk?

8 Meeqqannut kamagittartuullutillu tusarnaaqqissaartarit. Taamaaliornerit oqaloqatikkuminartuuninnut ersiutaassaaq. (Jaaku 1:19 atuaruk.) Anaanaq kisimiittoq Katiamik atilik ima oqarpoq: “Siusinnerusukkut paninnut tunngatillugu utaqqisinnaassuseqanngilanga. Oqalunnerani akornusertuaannarpara. Tusarnaarnissamut qasuallaartarlungaluunniit akornusersorneqarusunneq ajorpunga. Pissusinnilli allannguigama aamma paniga pissusiminik allannguivoq. Massakkut suleqatikkuminarnerujussuuvoq.”

Ilisimalluarumallugit tusarnaarsigit (Immikkoortut 3-miit 9-mut takukkit)

9 Ataataq Ronaldimik atilik inuusuttuaqqamik panilik tamatumunnga assingusumik misigisaqarsimavoq. Ima oqarpoq: “Atuarfimmini nukappiaqqamut asannilersoorsimanini pillugu oqaluttuummanga kamarujussualeraluarpunga. Jehovalli kiffaminut kamagittartuunera ingasaassinianngitsuuneralu eqqarsaatigilerakkit isummerpunga paniga naqqinnialinnginnerani misigissutsiminik eqqartuinissaanut periarfisseqqaarukku ajunnginnerussasoq. Taamaaliornera nuannaarutigaara! Aatsaavissuaq panimma misigissusii paasivakka. Oqaloreermat asannittumik oqaluunnissaa ajornannginnerutilerpara. Tupaallaatigeqisannik siunnersuutinnik maleruaarusunnerulerpoq. Oqarpoq pissuserisaminik allannguerusungaarluni.” Meeqqannik oqaloqateqartuarnerit taakkua eqqarsaataannik misigissusaannillu paasinninnissannut iluaqutigissavat. Tamatuma kingunerisaanik aalajangiisarneranni sunniuteqarnerungaartalissaatit. *

MEEQQASI ISUMASSORSIGIT

10, 11. Qanoq meeqqatit sallusuissummiiginnaqqullugit ikiorsinnaavigit?

10 Savanik paarsisuulluartup nalunngilaa sava savarpanit ungasilliartulersinnaasoq. Sava savarpanit ungasinnerulaarluni ivigartulersinnaavoq arriitsumillu avissaariartorluni. Taamatuttaaq meeqqat ajortumik sunniisartunik ilagisaqartarnertik aliikkutaqartarnertilluunniit usserneqaatigineratigut sallusuissut arriitsumik qimakkiartulersinnaavaat. (Uss 13:20) Meeqqatit sallusuissummit ungasilliartoqqunagit susinnaavit?

11 Perorsaaninni paasigukku meeqqatit  sanngiissuteqartut iliuuseqapallagit. Meeqqavit kristumiutut pissusii ineriartortinneqarnerusariaqartut nakussatsinnissaat sulissutigiuk. (2 Petr 1:5-8) Ilaqutariittut atuaqqissaaqatigiinneq taamaaliornissannut periarfissatsialaavoq. Rigets Tjeneste oktobari 2008-moortumi ima allassimasoqarpoq: “Ilaqutariinni ittuusut pissarsiaqarnartumik aalajangersimasumillu ilaqutariittut Biibilimik atuaqqissaartarnissamik Jehovamut akisussaaffitsik pimooruteqqullugu kajumissaarneqarput.” Aaqqiissut tamanna silatusaarlutit meeqqannik paarsinissannut atortarpiuk? Qularissanngilat meeqqavit ilinnit ikiorneqarniarnertik qujamasuutigissagaat. — Luk 11:28; Fil 1:10.

Isumassorluarsigit (Immikkoortut 10-miit 12-imut takukkit)

12. (a) Aalajangersimasumik ilaqutariittut atuaqqissaaqatigiittarneq inuusuttut qanoq iluaqutigisimavaat? (Aamma ungalusaq “ Qujamasuutigaat” takuuk) (b) Ilaqutariittut atuaqqissaaqatigiittarneq qanoq iluaqutigisarpiuk?

12 Inuusuttuaqqap Carissamik atillip ilaqutaasalu ilaqutariittut atuaqqissaaqatigiittarnertik iluaqutigisimavaat. Carissa ima oqarpoq: “Tamatta issiaqatigiilluta oqaloqatigiittarnerput nuannaraara. Taamaaliornitsinni puiunaatsumik nuannisaqatigiittarlutalu attaveqatigiilluarnerulertarpugut. Ataataga ilaqutariittut atuaqqissaaqatigiinnermik aalajangiusimannittuarpoq. Tamatuminnga pimoorussinera qiimmaallaatigisarakku nammineq pimoorussinissannut kajumississutigisarpara. Aamma ataatatut anersaakkullu siulersuisutut ataqqinissaanut pissutissaqarnerulertarpunga.” Qatanngut arnaq inuusuttoq Brittneymik atilik ima oqarpoq: “Ilaqutariittut atuaqqissaaqatigiinneq angajoqqaannut qanillinerussutigaara. Taamaaliortarnerput ajornartorsiutinnik soqutiginninnerannik isumassuinerannillu ersersitsisarpoq. Atuaqqissaaqatigiinneq ilaqutariittut nukittunissatsinnut ataasioqatigiinnissatsinnullu iluaqutigisarparput.” Ersarippoq meeqqatit isumassorumallugit aalajangersimasumik ilaqutariittut atuaqqissaaqatigiittariaqartusi, tamannalu meeqqanik paarsinermi pingaaruteqarluinnarpoq. *

MEEQQASI SIULERSORSIGIT

13. Qanoq meeraq Jehovamut kiffartorusulersinneqarsinnaava?

13 Savanik paarsisuulluartoq savaatini siulersorniarlugit illersorniarlugillu ajaappiaqartarpoq. Savaatimi ‘mangiarfissaqqissumukaannissaat’ pingaarnertut anguniagarisarpaa. (Ez 34:13, 14) Illit angajoqqaatut tamatumunnga assingusumik anguniagaqarputit. Meeqqatit Jehovamut kiffartuleqqullugit siulersorusuppatit. Meeqqavit tussiaasiortutut misiginissaat kissaatigaat, taanna ima allappoq: “Guuti, piumasat malillugu iliornissaq tassa kajungerisara; inatsisitit uanga ilunni ipput.” (Tuss 40:9) Meeqqatit taamatut misigilerunik Jehovamut tunniulluinnarnissartik kuisinnissartillu kissaatigilissavaat. Taamatut pingaarutilimmik aalajangersinnaajumallutik anersaakkut inersimalertariaqarlutillu Jehovamut kiffartornissartik kissaatigilluinnartariaqarpaat.

14, 15. (a) Suna angajoqqaat anguniagarisariaqarpaat? (b) Sooq inuusuttuaraq sallusuissummut tunngatillugu qulalersinnaava?

14 Immaqa meeqqatit Jehovamut attaveqarnerminnik ineriartortitserpasinngillat. Immaqa allaat Jehovap Nalunaajaasuisa upperisaat sallusuissutaanersoq qularutigisarpaat. Illit qanoq iliussavit? Meeqqatit eqqarsalersinniarlugit oqaloqatigisakkit Jehovamillu uummatikkut iluunngarluni asanninnissamik ilinniartillugit. Guutip iliuuserisimasarpassuinik qujamasuutiginninnissaannik ilinniartikkit. (Saqq 4:11) Taava piareerunik Jehova pallorfiginiarlugu nammineq aalajangerumaarput.

15 Meeqqatit sallusuissummut tunngatillugu qularuteqarpata kamagittarlutit siulersorniartakkit. Jehovamut kiffartorluni inuunerup pitsaanerpaajuneranik naassaanngitsumillu  pilluaqqussutissartaqarneranik paasinneqqullugit ikiukkit. Aamma qularnerannut pissutiviusut paasiniartakkit. Assersuutigalugu ernerpit Biibilimi allassimasut akerlerai, imaluunniit meeqqanut allanut oqaluussinissani merseriinnarpaa? Panippit Guutip peqqussutaasa iluaqutaanerat qularutigaa, imaluunniit kiserliortutut allanillu ajattorneqartutut misigiinnarpa?

Siulersorsigit (Immikkoortut 13-imiit 18-imut takukkit)

16, 17. Angajoqqaat meeqqatik Jehovamut nammineq attaveqaleqqullugit sutigut ikiorsinnaavaat?

16 Qanoq meeqqatit sallusuissummut tunngatillugu qularuteqarunnaaqqullugit ikiorsinnaavigit? Angajoqqaarpassuit meeqqatik iluatsilluartumik ikiorsimavaat ima aperinerisigut: “Kristumiuuneq ajornanngitsutut sapernartutulluunniit isigaajuk? Kristumiuunerup suut iluaqutissartarai? Jehovamut kiffartornerup suut ajoqutissartarai? Kristumiuunerup ullumikkut siunissamilu iluaqutissartai qanoq isumaqarfigaagit? Iluaqutissartai ajoqutissartaanit pingaaruteqarneruppat?” Nammineq oqaatsitit atorlugit, ilumoorpalullutit, inussiarnerpalullutit soqutiginnippalullutillu taamatut aperinissat eqqaamassavat. Meeqqatit eqqartuunneqartutut misigitissanngilatit. Markusip allagaa 10:29, 30-milu allassimasut eqqartorumasinnaavatit. Inuusuttut ilaasa immaqa kristumiuunerup iluaqutissartai ajoqutissartaalu immikkut allattorusussavaat. Tamanna suut ajornartorsiutaanerannik taakkuninngalu qanoq aaqqiisoqarsinnaaneranik paasiniaanissassinnut iluaqutigissavarsi. Atuakkat Biibilimi ajoqersuutigineqartut aamma Bevar jer selv i Guds kærlighedatorlugit soqutiginnittut atuaqqissaaqatigisariaqarutsigit meeqqavut aamma taakku atorlugit atuaqqissaaqatiginissaat pingaaruteqarnerungaassaaq! Illit taamaaliortarpit?

17 Piffissap ingerlanerani meeqqavit Jehovamut kiffartorniarnertik nammineq aalajangertussaavaat. Illit nalunaajaasuunerit pissutigiinnarlugu Jehovamut kiffanngornavianngillat. Meeqqatit nammineq Jehovamut attaveqartariaqarput. (Uss 3:1, 2) Meeqqavimmi Guutimut qanilliniarnertik sapernartippassuk? Apeqqutinik makkuninnga eqqarsaatiginneqqissaaqqullugit ikiukkit: ‘Sooq Guuti piusoraara? Qanoq nalunngissinnaavara Jehovap soqutigigaanga? Guutip peqqussutaanik maleruaaninnik iluaqutiginninnissara upperaara?’ Angajoqqaajususi, meeqqasi paarilluarsigit kamagittarlusilu siulersorlugit. Jehovamut kiffartorluni inuunerup pitsaanerpaaneranik upperinnileqqullugit ikiorsigit. * — Rom 12:2.

18. Qanoq angajoqqaat Jehovamik, Paarsisorsuarmik, ilaarsisinnaappat?

18 Kristumiut ilumoortut tamarmik Paarsisorsuaq, Jehova, ilaarusuppaat. (Ef 5:1; 1 Petr 2:25) Ingammik angajoqqaat savaatitik, meeqqatik asasatik, ilisimasariaqarpaat. Angajoqqaat meeqqatik Guutip neriorsuutaanik naassaanngitsumik iluaqutiginninniassammata siulersortariaqarpaat. Aap, meeqqatit paariumallugit Jehovamillu asannileqqullugit sapinngisannik iliuuseqarit!

^ par. 9 Siunnersuutit amerlanerusut atuarsinnaavatit Napasuliaq Alapernaarsuiffik 1. aggusti 2009-moortumi, qupp. 20-22.

^ par. 12 Paasisaqarnerujumallutit takuuk Napasuliaq Alapernaarsuiffik 15. marsi 2014-imoortoq, qupp. 17-19.

^ par. 17 Paasisaqarnerujumallutit takuuk Vagttårnet 1. februaari 2012-imoortoq, qupp. 18-21.