Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Aggusti 2014

“Saakkuit qatanngutitit nakussatsikkigit”

“Saakkuit qatanngutitit nakussatsikkigit”

JIISUSI miserratigereerlugu Petrusi qiangaalerpoq. Anersaakkut oqimaaqatigiissaareqqilissaguni ilungersortariaqarpoq, taamaakkaluartorli Jiisusip taanna aqqutigalugu inuit allat ikiorneqarnissaat kissaatigaa. Taamaattumik Jiisusip ima oqarfigaa: “[Qaqugu] saakkuit qatanngutitit nakussatsikkigit.” (Luk 22:32, 54-62) Piffissap ingerlanerani Petrusi kristumiut siulliit ilagiivini sukarsuartut ilerpoq. (Gal 2:9) Taamatuttaaq qatanngut angut utoqqaanertaasimagaluartoq utoqqaanertatut akisussaaffeqaqqilersinnaavoq qatanngutiminillu anersaakkut nakussatsitsinissani nuannaarutigeqqilerlugu.

Utoqqaanertatut akisussaaffeqarunnaarsitaasimasut immaqa iluatsinngitsutut misigipput. Julio * Amerika Kujallermi ukiut 20-it sinnerlugit utoqqaanertatut kiffartortuusimareerluni ima oqarpoq: “Oqalugiarnissamut piareersarneq, qatanngutinut pulaarneq ilagiinniittunillu isumassuineq inuuninni pingaarnerpaajugaluarput! Taamatulli akisussaaffeqarunnaariataarpunga, inuuninnilu sammisassaarullungalusooq misigivunga. Taamanikkut aliasunnikooqaanga.” Ullumikkut Julio utoqqaanertatut kiffartoqqilernikuuvoq.

“NUANNAARUTIGIINNARTASSAVASI”

Ajoqersugaq Jaaku ima allappoq: “Qatanngutikka, tamalaanik misilinneqartarnisi nuannaarutigiinnartassavasi.” (Jaak 1:2) Jaakup naammalluinnanngissuserput malersorneqarnerpullu pissutigalugit misilinneqaatigisinnaasavut pivai. Assersuutigalugu namminissarsiorluni pilerissuseqarneq kinaassusersiortuunerlu allaatigai. (Jaak 1:14; 2:1; 4:1, 2, 11) Jehovamit perorsaatissinneqarnerput aliasuutigisinnaavarput. (Hebr 12:11) Taamatulli misilinneqaraluarluta nuannaartuarsinnavugut.

Ilagiinni akisussaaffeqarunnaarsitaasimagaluaruttaluunniit qanoq upperluartiginerluta misissorsinnaavarput Jehovamullu asanninnerput ersersittuarlutigu.  Aamma eqqarsaatigisinnaavarput sooq utoqqaanertaasimanerluta. Imminut ima aperisinnaavugut: ‘Pisinnaatitaaffimmik tamatumannga namminissarsiuinnarlunga anguniagaqarsimavunga, imaluunniit Guutimut asanninnera ilagiillu taassuma pigisaasa isumagineqarluarnissaat pissutigalugit utoqqaanertaasimavunga?’ (ApS 20:28-30) Utoqqaanertatut kiffartortuusimasut Jehovamut asanninnertik ilumoortuusoq tamanut, aamma Saatanimut, uppernarsarniarlugu iliuuserpassuaqarsinnaapput.

Kunngi Daavi ingasattumik ajortuliornerminik perorsaatissinneqarami peqqissimivoq isumakkeerfigineqarlunilu. Ima tussiaasiorpoq: “Pilluarpoq unioqqutitsinerminik isumakkeerfigineqartoq, ajortuliaminillu matooriffigineqartoq. Pilluarpoq inuk Naalakkap ajorteqartinngisaa, peqqusersiornermillu ilumiugisaqanngitsoq.” (Tuss 32:1, 2) Perorsaatissinneqarnini akueraa qularnanngitsumillu Guutip innuttaanik paarsisuulluartunnguutigalugu.

Qatanngutit angutit utoqqaanertatut kiffartoqqilersimasut ilarpassui siornatigornit paarsisuulluarnerulertarput. Taakkua ilaat ima oqarpoq: “Unioqqutitsisimasut qanoq isumassussanerlugit maanna paasilluarnerulerpara.” Utoqqaanertaq alla ima oqarpoq: “Qatanngutinik isumassuinissara immikkut pisinnaatitaaffiusoq maanna pingaartinnerulerpara.”

KIFFARTOQQILERSINNAAVIT?

Tussiaasiortoq Jehova pillugu ima allappoq: “Unnerluutiginnittanngilaq naassaanngitsumik.” (Tuss 103:9) Taamaattumik eqqarsassanngilagut Guutip inuk ingasattumik unioqqutitsisimasoq tatigeqqinngisaannassagaa. Ricardo ukiorpassuarni utoqqaanertaagaluarluni akisussaaffeqarunnaarsitaasimasoq ima oqarpoq: “Kukkusimanera ajuusaarutigeqaara. Sivisuumik piukkunnanngitsutut misigigama qatanngutinik nakkutilliisunngoqqinnissannut sapiuppunga. Allanit tatigineqaqqilernissara qularutigaara. Taamaakkaluartorli inuit allat ikiorusukkakkit Biibilimik atuaqqissaaqateqarsinnaavunga, ilagiinni qatanngutinik qiimmassaasinnaallungalu oqaluusseqateqarsinnaavunga. Tamanna imminut tatiginerulissutigaara, maannalu utoqqaanertatut kiffartoqqilersimavunga.”

Jehovap angutit kiffartoqqikkusussuseqalersinnaaqqullugit nuannaaqqilersinnaaqqullugillu ikiortarpai

Narrutsaqqajuarneq qatanngutit utoqqaanertatut kiffartornissaminnut akornutigisinnaavaat. Jehovap  kiffaa Daavi kunngimit Saulimit sinngasumit qimaasimasoq ilaaraanni pitsaanerungaarpoq! Daavi allaat akiniaanissaminut periarfissaqaleraluarluni Saulimut akiniaarusunngilaq. (1 Sam 24:5-8; 26:8-12) Sauli sorsunnermi toqutaammat Daavip aliasuutigeqaa taannami taassumalu ernera ‘nuannarisamisut asasamisullu’ eqqaavai. (2 Sam 1:21-23) Daavi narrutsaqqanngilaq.

Paatsoorneqartutut imaluunniit naapertuilluanngitsuliorfigineqartutut misigiguit eqqarsaatitit narrutsassimanermit aqunneqarnaveersaartikkit. Assersuutigalugu Tuluit Nunaanni Williamip ukiut 30-t missaanni utoqqaanertaasimagaluarluni akisussaaffeqarunnaarsitaasimasup utoqqaanertat ilaat narrutsaatigai. Williamip oqimaaqatigiissaareqqilernissaminut suna iluaqutigaa? Ima oqarpoq: “Jobimik allakkat qiimmassaatigeqaakka. Jehovap Jobi ikinngutiminik pingasunik eqqisseqateqarnissaanik ikiormagu soorunami aamma uanga kristumiunik utoqqaanertanik eqqisseqateqarnissannik ikiorumaarpaanga!” — Job 42:7-9.

UTOQQAANERTATUT KIFFARTOQQILERSUT JEHOVAP PILLUAQQUSARPAI

Nammineq aalajangikkannik Guutip savaataanik paarsisuujunnaarsimavit? Taava sooq paarsisuujunnaarsimanerit eqqarsaatigissallugu pitsaassaaq. Nammineq ajornartorsiutitit pissutigigakkit? Inuuninni allat pingaarnerutilerakkit? Allat naammalluinnanngissutaat nikalluutigigakkit? Sunaluunniit pissutaagaluarpat eqqaamajuk utoqqaanertaagallaravit inuit allat assigiinngitsutigut ikiornerusinnaasimallugit. Taakkua oqalugiaatitit nakussatsissutigisimavaat, maligassiuilluarnerit qiimmassaatigisimavaat paarsisutullu pulaartarnitit misilinneqarnerminni pinertusaarnerulissutigisimallugit. Utoqqaanertatut aalajaatsutut kiffartortuugallaravit Jehovap uummataanik, aamma illit uummatinnik, nuannaartitsivutit. — Uss 27:11.

Ilagiinni oqaluussinermilu nuannaarlutit ulapputeqartarnikkut Jehovamut asanninnerit uppernarsaruk

Jehovap angutit ilagiinni siulersuisutut kiffartorusussuseqalersinnaaqqullugit nuannaaqqilersinnaaqqullugillu ikiortarpai. Utoqqaanertaajunnaarniarlutit aalajangersimagaluaruit akisussaaffeqarunnaarsitaasimagaluaruilluunniit ‘nakkutilliisunngoqqinnissat sulissutigisinnaavat’. (1 Tim 3:1NW) Paulusi kristumiut Kolossemiittut Guutip piumasaanik ilisimasaqaleqqullugit ‘tamatigut Jehovap iluarisaanik ilioqqullugit’ ‘qinnussisarluni soraanngilaq’. (Kol 1:9, 10) Utoqqaanertatut kiffartornissamut pisinnaatitaaffeqaqqileruit Jehovamit nakussatsinneqaqqullutit, utaqqisinnaassuseqartinneqaqqullutit nuannaartinneqaqqullutillu taanna qinnuigiuk. Ulluni kingullerni makkunani Guutip innuttai paarsisunit asannittunit anersaakkut annertoqqusersorneqarnissartik pisariaqartippaat. Illimmi, qatanngutitit nakussatseqqikkusuppigit?

^ par. 3 Atit ilaat allanngortitaapput.