INUIT oqaluttuarisaaneranni piffissami pissanganarnerpaami inuuvugut. (2 Tim 3:1-5) Ullut tamaasa Jehovamik asanninnerput taassumalu najoqqutassiaanut naalannerput misilinneqartarput. Jiisusip taamatut erloqisoqarnissaa nalunnginnamiuk ajoqersukkani naggatissamut pinertusaarnissaminnut pisariaqartitaannik kajumissaarniarlugit neriorsorpai. (Matt 24:3, 13; 28:20) Nakussatsikkumallugit inussiaq aalajaatsoq “piffissaq eqqorlugu” anersaakkut nerisassanik tunisisartussatut toqqarpaa. — Matt 24:45, 46.

Inussiaq aalajaatsoq 1919-imi toqqarneqarpoq. Taamanimiilli inussiaq oqaatsit assigiinngitsorpassuit atorlugit anersaakkut nerisassanik Guutip innuttaanut tunniussisarsimavoq. (Matt 24:14; Saqq 22:17) Biibililersaarutilli ilaat oqaatsit ilaannut saqqummersinneqarneq ajorput. Inuit ilaasa saqqummersittakkavut qarasaasiakkut pissarsiarisinnaasanngilaat. Assersuutigalugu inuppassuit isiginnaagassiat allaaserisalluunniit jw.org-imiinnaq saqqummersinneqartartut takusinnaasanngilaat. Tamanna pissutigalugu kristumiut ilaasa anersaakkut nerisassat pisariaqartitatik tamaasa pissarsiarisinnaasanngilaat? Tamanna akissutissarsiumallugu apeqqutit pingaarutillit sisamat sammeriartigit.

 1. Jehovap nerisassat tunniuttagaasa ilaat suna pingaarnerpaava?

Jiisusi ujaqqanik timiusanngortitsinissamik Saatanimit usserneqarami ima akivoq: “Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.” (Matt 4:3, 4) Jehovap oqaasii Biibilimiipput. (2 Petr 1:20, 21) Taamaattumik Biibili anersaakkut nerisassatta pingaarnersaraat. — 2 Tim 3:16, 17.

Jehovap peqatigiissortaasa New World Translation of the Holy Scriptures tamaat ilaannaaluunniit oqaatsinut 120-nit amerlanerusunut nutsersimavaat, ukiullu tamaasa nutsikkat amerliartortarput. Tamatuma saniatigut Biibilimik nutsikkat allat milliardillit oqaatsinut tuusintilikkuutaanut nutserneqarsimasut naqiterneqarsimapput. Tamanna ‘inuit tamarmik annaanneqarnissaannik sallusuissummillu ilisarsinissaannik’ Guutip piumasaanut naapertuuppoq. (1 Tim 2:3, 4) Aamma qularinngissinnaavarput Jehovap inuit tamarmik uummammiugisaat ilisimagamigit “anersaakkut pisariaqartitsinerminnik eqqumaffiginnittut” peqatigiissortaminut qanillisikkumaarlugillu anersaakkut pisariaqartitaannik pilersorumaarai. — Matt 5:3, 6NW; Joh 6:44; 10:14; Hebr 4:13.

2. Biibililersaarutivut anersaakkut nerisassani qanoq pingaaruteqartigippat?

Inuk uppersuseqarluarumalluni Biibilimi atuakkani paasisariaqarlugillu malillugit inuusariaqarpoq. (Jaak 1:22-25) Ukiuni 100-kkunni angut Etiopiamiu taamaaliortariaqarsimavoq. Filipip angut Guutip oqaasianik atuartoq takugamiuk aperaa: “Atuakkatit paasivigit?” Angut akivoq: “Qanoq ilillunga paasisinnaassavakka ilitsersorneqanngikkuma?” (ApS 8:26-31) Taava atuakkaminik paasinnissinnaaqqullugu Filipip ikiorpaa. Angutip ilikkakkani killinneqaatigingaaramigit aalajangerpoq kuisinniarluni. (ApS 8:32-38) Taamatuttaaq Biibililersaarutivut sallusuissutinik Guutip oqaasianiittunik paasinninnissatsinnut iluaqutigisarpavut. Atuakkavut misigissutsikkut sunnerneqaatigisarlugillu ilikkakkavut malillugit inuunissatsinnut killinneqaatigisarpavut. — Kol 1:9, 10.

Jehovamut kiffaagatta Biibililersaarutitsinni sinnilissuarnik pitsaasunik ‘nerisassaqartarlunilu imigassaqartarpoq’. (Es 65:13) Assersuutigalugu Napasuliaq Alapernaarsuiffik oqaatsinut 210-nit amerlanerusunut saqqummersinneqartartumi siulittuutit nassuiarneqartarlutillu sallusuissutinik pingaarutilinnik paasinnissinnaaqqulluta ikiorneqartarlutalu Guutip najoqqutassiai malillugit inuunissatsinnut kajumissaarneqartarpugut. Atuagassiaq Vågn op! oqaatsinut 100-t missaanniittunut saqqummersinneqartarpoq. Tamatumani Jehovap pinngortitarsua alutornangaartoq siunnersuutitsialannillu Biibilimeersunik maleruaasarnissarput pillugit ilinniartinneqartarpugut. (Uss 3:21-23; Rom 1:20) Inussiaq aalajaatsoq Guutip oqaasia tunngavigalugu oqaatsinut 680-init amerlanerusunut Biibililersaarutinik saqqummersitsisarpoq! Ullut tamaasa Biibilimik atuartarpit? Atuagassiat Biibililersaarutillu nutaat illit oqaatsinni pissarsiarineqarsinnaasut tamaasa atuartarpigit?

Ataatsimiinnitsinni ataatsimeersuarnitsinnilu oqalugiaatinut najoqqutat aamma Jehovap peqatigiissortaanit suliarineqartarput. Taakkunani oqalugiaatit, isiginnaartitsinerit, takutitsinerit apersuinerillu nuannarisarpigit? Aap, Jehovap anersaakkut nerisassanik sinnilissuarnik tunisarpaatigut! — Es 25:6.

 3. Biibililersaarutitta ilaat illit oqaatsinni saqqummersinneqarsimanngippata anersaakkut nerisassatit amigarsimassappat?

Naamik! Kristumiut ilaasa allanut sanilliullugu anersaakkut nerisassanik amerlanerusunik tunineqartarnerat tupaallaatigissanngilarput. Sooq? Apustilit assersuutigeriartigit. Ukiuni 100-kkunni ajoqersukkanut allanut sanilliullugu ilitsersorneqarnerupput. (Mark 4:10; 9:35-37) Taamaattorli ajoqersukkat allat anersaakkut nerisassanik pisariaqartitaminnik tunineqartarput. — Ef 4:20-24; 1 Petr 1:8.

Jiisusip oqaasiisa iliuusiisalu amerlanersaat Biibilimi allaatigineqannginnerat eqqaamasariaqarparput. Apustili Johannesi ima allappoq: “Jiisusi aamma allarpassuarnik naammassisaqarpoq; ataasiakkaat tamaasa allaatigissagaluaraanni isumaqarpunga mappersakkat allanneqartussat silarsuarmi tamarmi inissaqarnavianngikkaluartut.” (Joh 21:25) Kristumiut siulliit Jiisusi pillugu uagutsinnit paasissutissaateqarnerupput. Taamaattorli amigaateqanngilagut. Sooq? Jehovap qulakkeersimammagu Jiisusip tumaanik atuaanissatsinnut naammattunik ilisimasaqarnissarput. — 1 Petr 2:21.

Aamma kristumiut siulliit nalaanni apustilit ilagiinnut allagaat eqqarsaatigikkit. Paulusimit allakkat ikinnerpaamik ataatsit Biibilimut ilanngunneqarsimanngillat. (Kol 4:16) Allagaq taanna piginnginnatsigu anersaakkut nerisassavut amigarpat? Naamik. Jehovap sunik pisariaqartitaqartugut nalunagulu anersaakkut nukittunissatsinnut pisariaqartitatsinnik tunisarpaatigut. — Matt 6:8.

Jehovap sunik pisariaqartitaqartugut nalunagulu anersaakkut nukittunissatsinnut pisariaqartitatsinnik tunisarpaatigut

Jehovap innuttaasa ilaat sinnilissuarnik anersaakkut nerisassaqarput. Immaqali illit oqaatsinni Biibililersaarutivut amerlanngillat. Taamaappat Jehovamit isumassorneqarnerit eqqaamassavat. Biibililersaarutit pigisatit atuaqqissaartarlugillu ataatsimiinnerit oqaatsini paasisinnaasanni ingerlanneqartartut najuuffigisakkit. Taamaalillutit Jehovamut attaveqartuarsinnaavutit. — Tuss 1:2; Hebr 10:24, 25.

4. Paasissutissat jw.org-imi saqqummersinneqartartut pissarsiarisinnaanngikkukkit uppernikkut sanngiillissavit?

Atuagassiat Biibililersaarutillu allat taamaallaat nittartakkatsinni saqqummersinneqartarput. Aappariinnut, angajoqqaanut, inuusuttuaqqanut meeqqanullu paasissutissat iluaqutaasut nittartakkami tamatumaniipput. Ilaqutariit paasissutissat taakku ilaqutariittut atuaqqissaaqatigiinnerminni iluaqutigisarpaat. Nittartakkatsinni pisut soqutiginartut, soorlu Gileadimi naggataarnersiorneq ukiumoortumillu ataatsimiinneq, kiisalu pinngortitami ajunaarnersuit eqqartuussinerillu Jehovap innuttaanut sunniuteqartut pillugit nutaarsiassat nalunaarusiarineqartarput. (1 Petr 5:8, 9) Nittartagarput aamma oqaluussinermi, soorlu nunani sulinitsinnik killilersuisuni inerteqquteqartuniluunniit nutaarsiassamik nuannersumik siaruarterinermi, iluaqutaangaartarpoq.

Taamaattorli nittartakkatsinnik atuisinnaaguit atuisinnaanngikkuilluunniit anersaakkut nukittujuarsinnaavutit. Kristumiut tamarmik anersaakkut nerisassanik pisariaqartitaminnik tunineqartarniassammata inussiaq naammattunik naqitikkanik saqqummersitsisarpoq. Nittartakkamik jw.org-imik atuerusuinnarlutit atortorissaarummik elektroniskiusumik pisisariaqartutut misigisariaqanngilatit. Qatanngutit ilaasa paasissutissat nittartakkatsinni taamaallaat pissarsiarineqarsinnaasut nalunngisaminnut interneteqanngitsunut atugassatut anillatsittarpaat. Tamannali ilagiinnut piumasaqaataanngilaq.

Jiisusip anersaakkut nukittujuarnissatsinnut pisariaqartitatsinnik tunisisarnissani pillugu neriorsuutiminik eqqortitsinera qujamasuutigaarput. Jehovap silarsuup matuma ajortup suujunnaarsinneqarnissaata tungaanut anersaakkut nerisassanik “piffissaq eqqorlugu” tunisiuarumaarnera qularinngilluinnarsinnaavarput.