‘Jiisusip akivai: “Nalunaajaasigissavassi nunarsuup isua tikillugu allaat.”’ — APS 1:7, 8.

1, 2. (a) “Nalunaajaasoq ilumoortoq sallusuitsorlu” kinaava? (b) Jiisusip aqqa qanoq isumaqarpa, Jiisusillu juutit Jehovamit iluarisaaqqilersinnaaqqullugit qanoq ikiorpai?

JIISUSIP eqqartuussaanermini Romamiut Judæami naalagaatitaat Pontiusi-Pilatusi sapiilluni ima oqarfigaa: “Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu.” (Johannesi 18:33-37 atuakkit). Ukiut arlallit qaangiummata apustilip Paulusip Jiisusi Kristusi ‘nassuerummik eqqortumik nassuerutiginnittutut’ eqqaavaa. (1 Tim 6:13) Silarsuarmi Saatanimit aqunneqartumi uumissuingaarfiusumilu inuuvugut. Nalunaajaajuarumalluta Jiisusi, “nalunaajaasoq ilumoortoq sallusuitsorlu”, ilaarlugu sapiitsuusariaqarpugut. — Saqq 3:14.

2 Juutit tamarmik Jehova pillugu nalunaajaasuusimapput, Jiisusili juutinit tamanit nalunaajaasuunerpaajusussaavoq. (Es 43:10NW) Jiisusi suli inunngunngitsoq inngili ataatarsiassaanut Josefimut ima oqarpoq: “Jiisusimik atsissavat, innuttani annaatissammagit ajortaannit.” (Matt 1:20, 21) Hebræerit oqaasii naapertorlugit ateq Jiisusi ima isumaqarpoq: “Jehova annassutaavoq.” Jehovap Jiisusi aqqutigalugu inuiaat ajortimit toqumillu annaakkumaarpai. Jiisusip juutit oqaluussiffigai Jehovamit iluarisaaqqilerumallutik ajortuliatik peqqissimissutigisariaqaraat. (Matt 10:6; 15:24; Luk 19:10) Guutip naalagaaffia  aallussilluarluni nalunaajaatigaa. Markusi ima allappoq: “Jiisusi Galilæamut pivoq Guutillu iivangkiiliua oqaluussissutigalugu oqarluni: ‘Piffissaq nalliuppoq, Guutillu naalagaaffia qanillivoq; allamik isumataaritsi, iivangkiiliulu upperisiuk!’” (Mark 1:14, 15) Jiisusip allaat juutit upperisarsiornikkut siuttui pissaanillit sapiilluni assuarai. Tamannalu taassuma toqutaaneranut pissutaaqataavoq. — Mark 11:17, 18; 15:1-15.

“GUUTIP TUPINNANGAARTULIAI”

3. Jiisusip toqutaanerata kingorna ullut pingasut qaangiummata qanoq pisoqarpa?

3 Jiisusip naakkittaatsumik toqutaanerata kingorna ullut pingasut qaangiuttut tupinnangaartumik pisoqarpoq! Jehovap Jiisusi inuttut timeqartinnagu anersaajusutulli toqujuitsutut toqusunit makitippaa. (1 Petr 3:18) Jiisusi inuttut timeqarluni saqqummernermigut ajoqersukkaminut uppernarsaavoq makitaasimalluni. Ullormi makititaaffimmini ikinnerpaamik tallimariarluni ajoqersukkaminut assigiinngitsunut saqqummerpoq. — Matt 28:8-10; Luk 24:13-16, 30-36; Joh 20:11-18.

4. Jiisusip ajoqersukkaminut saqqummerami qanoq pisoqarpa, qanorlu ilioqquai?

4 Jiisusip tallimassaanik saqqummerami apustilit allallu katersuussimasut pingaarutilimmik ilinniartippai. Toqunerminik makititaanerminillu siulittuutit Allakkaniittut paasisinnaaqqullugit Jiisusip ikiorpai. Ataatsimiinnerup naggataatungaani Jiisusip ajoqersukkani qanoq iliussanerannik oqarfigai. Oqarpoq aqqi tunngavigalugu ‘allamik isumataarneq ajortit isumakkeerneqaatissaat inuiaqatigiinnut tamanut oqaluussissutigineqassasoq’ Jerusalemi aallarnerfigalugu. Imalu peqquai: ‘Tamakku tamaasa ilissi nalunaajaassutigissavasi.’ — Luk 24:44-48.

5, 6. (a) Sooq Jiisusi oqarpa: ‘Nalunaajaasigissavassi’? (b) Jiisusip ajoqersugaasa suna nalunaajaatigilersussaavaat?

5 Taamaattumik Jiisusip ullut 40-t qaangiuttut kingullermik saqqummernermini peqqussutaa una ajoqersukkat paasilluarsimassavaat: “[Nalunaajaasigissavassi] Jerusalemimi Judæamilu tamarmi Samariamilu nunarsuullu isua tikillugu allaat.” (ApS 1:8) Ajoqersukkat juutiupput, taamaattumik Jehova pillugu nalunaajaasooreerput. Maannakkulli aamma Jiisusi pillugu nalunaajaasuussapput. Tamanna qanoq paasisariaqarpa?

Jiisusip ajoqersugai siulliit ilaarlugit Jehovap siunissamut siunertaa oqaluussissutigaarput (Immikkoortut 5 aamma 6 takukkit)

6 Ilisimatitsilissapput Jehovap Jiisusi aqqutigalugu inuiaat aniguisikkumaarai. Aniguisitsinissaq tamanna Jehovap itsaq Israelikkunnik aniguisitsisimaneranit annerungaassaaq. Jiisusip Kristusip toqunera makititaaneralu pissutigalugit inuit ajortimit toqumillu aniguisinneqarsinnaapput. Ukiumi 33-mi piinsip ulluani Jiisusip ajoqersugai anersaamit illernartumit taninneqaramik “Guutip tupinnangaartuliai” nalunaajaatigilerpaat. Inuppassuit tusarliussaq tamanna tusaramikku allamik isumataarlutillu Jiisusip pilliutaa upperilerpaat. Jiisusi toqusunit makititaasoq qilammi nutaamik oqartussaassuseqalersinneqarpoq, Jehovallu taanna aqqutigalugu inuit tuusintillit annaassinnaanngorpai. Taamaalilluni Jiisusip aqqata isumaa isumaqarnerulerpoq. — ApS 2:5, 11, 37-41.

‘AMERLASUUT UTERTINNEQAATISSAAT’

7. Ukiumi 33-mi piinsip ulluani pisut suna ersersippaat?

7 Ukiumi 33-mi piinsip ulluani pisut ersersippaat Jiisusip pilliutaa naammalluinnartoq utertitsissutitut inunnik ajortimit aniguisitsissutissatut Jehovap akuerisimagaa. (Hebr 9:11, 12, 24) Jiisusi nassuiaavoq ‘inuunini akissatut tunniukkumallugu  amerlasuut utertinneqaatissaattut’ tikiussimalluni. (Matt 20:28) “Amerlasuut” eqqartugai taakku taamaallaat juutiuppat? Naamik, Jiisusip pilliutaa iluaqutigalugu ‘silarsuup ajortaa’ atuukkunnaassaaq, Guutimmi piumasaraa “inuit tamalaat annaanneqassasut”. — Joh 1:29; 1 Tim 2:4-6NW.

8. Jiisusip ajoqersugai siulliit qanoq nalunaajaajuarsinnaappat, sumillu naammassisaqarpat?

8 Jiisusip ajoqersugaasa siulliit sapiillutik taanna nalunaajaatigiuarpaat. Qanoq taamaaliorsinnaagamik? Nammineerlutik taamaaliorsinnaanngillat. Oqaluussiuarsinnaajumallutik anersaamit illernartumit sapiissuseqalersinneqarnissartik Jehovamut qinnutigaat. (Apustilit Suliaat 5:30-32 atuakkit). Ukiut 27-t tamatuma kingorna Jiisusip ajoqersugaasa ‘sallusuissummik oqaatsit, tassa iivangkiiliu’ juutinut Guutimillu nalusunut ‘qilaap ataani pinngortitanut tamanut oqaluussissutigisimavaat’. — Kol 1:5, 23.

9. Siulittuutigineqartutut kristumiut ilagiivini qanoq pisoqarpa?

9 Ajoraluartumik piffissap ingerlanerani ilagiinniittut ilaat eqqunngitsunik ajoqersuisalerput. (ApS 20:29, 30; 2 Petr 2:2, 3; Jud 3, 4) Tamatumalu kingunerisaanik ilagiit tamarmik ajortumik sunnerneqarput. Jiisusip siulittuutigaa taamanimiilli “pissutsit aaqqissuussaanerata naggataatungaa” (NW) tikillugu tunussisoqartarumaartoq. (Matt 13:37-43) 1914-imi oktobarimi Jehovap Jiisusi Kristusi inuiannut kunnginngortippaa. Ukiumi tamatumani Saatanip silarsuaata ‘ullussai kingulliit’ aallartipput. — 2 Tim 3:1.

10. (a) Kristumiut tanitat ukioq pingaarutilik sorleq oqaluussissutigaat? (b) Oktobarimi 1914-imi qanoq pisoqarpa, qanorlu tamanna nalunngilarput?

10 Ukiut arlallit 1914 sioqqullugu kristumiut tanitat Guutip naalagaaffiata ukiumi pingaarutilimmi tassani oktobarimi naalakkersuilerumaarnera paasivaat oqaluussissutigilerlugulu. Taamatut paasinninnerat Danielip orperujussuaq kipineqartoq ‘piffissarititallu arfineq-marluk’ kingorna naajartoqqilersoq pillugu siulittuutaanit tunngaveqarpoq. (Dan 4:16) Jiisusip kunnginngornissani ullullu kingulliit siulittuutigigamigit piffissarititat taakku ‘Guutimik nalusut piffissarititaattut’  taavai. 1914-imiilli nunarsuarmi pisunit erserpoq Jiisusi Kristusi kunnginngorsimasoq. (Luk 21:24; Matt 24:3, 7, 14) Ullumikkut ‘Guutip tupinnangaartuliaasa’ oqaluussissutigisartakkatta ilaat tassaavoq Jehovap naalagaaffimmini 1914-imi Jiisusimik kunnginngortitsinera.

11, 12. (a) Jiisusi kunnginngorlaajulluni 1919-imi qanoq iliorpa? (b) 1935-mi suna paasinarsiva? (Allaaserisap aallaqqaataani asseq takuuk).

11 Jiisusi Kristusi kunnginngornermi kingorna ajoqersukkaminik tanitanik ‘Babylonersuarmit’ aniguisitsilerpoq. (Saqq 18:2, 4) 1919-imi sorsunnersuup siulliup naanerata kinguninngua tanitat nunarsuaq tamakkerlugu oqaluussinissaminnut periarfissaqarnerulerput. Utertitsissutip annaassissutaangaarnera Guutillu naalagaaffianik nutaarsiassaq nuannersoq oqaluussissutigaat. Tamatuma kingunerisaanik inuit tuusintit arlallit sallusuissut paasivaat qilammilu Kristusimik naalakkersueqateqartussatut taninneqarlutik.

12 1935-imi erserpoq Kristusip ‘savaatini allat’ katersulereersimagai. Ullumikkut nunarsuaq tamakkerlugu taakku millioniliupput. Tanitat peqatigalugit Kristusip sapiitsuunermigut maligassiaa malillugu inunnut allanut oqaluussisarput. ‘Savat allat’ aamma upperaat Kristusip pilliutaa kisiat annaassissutigisinnaallugu. Nalunngilaat oqaluussinermi pinertusaarunik Jehovallu iluarisaatut inuugunik “annikilliortitaangaarnermit” aniguisinneqarsinnaallutillu Guutip silarsuassaani nutaami inuusinnaallutik. — Joh 10:16; Saqq 7:9, 10, 14.

‘IIVANGKIILIU TUSARLIUSSINNAANNGORLUGU NAKIMAASSUSEQALERIT’

13. Jehovap Nalunaajaasuisut suna aalajangiusimavarput, kristumiullu siulliit qanoq ilaarsinnaavavut?

13 Jehovap ‘tupinnangaartuliaanik’ neriorsuutaanillu inunnut allanut nalunaajaatiginninneq immikkut pisinnaatitaaffigaarput. Nalunaajaanerli ajornaatsuujuaannaanngilaq. Imaassinnaavoq inuit tusarliussatsinnik tusarusunngitsut, immaqalu allaat malersorpaatigut. Taamaappat apustili Paulusi oqaluusseqataalu ilaarsinnaavavut. Taanna ima allappoq: “Guutitsinni nakimaassuseqalersitaavugut ilungersungaarluta iivangkiiliua ilissinnut tusarliussinnaanngorlugu.” (1 Th 2:2) Guutimut tunniulluinnarluta neriorsuisimanerput eqqortittariaqarparput. Saatanip silarsuaata ajortup suujunnaarsinneqarluinnarnissaata tungaanut Jehova pillugu nalunaajaajuarusuppugut. (Es 6:11) Tamannali nammineerluta naammassisinnaanngilarput. Kristumiut siulliit ilaarlugit Jehovamut qinnutigisariaqarparput anersaani illernartoq aqqutigalugu  ‘pissaanermik asseqanngitsumik’ tuneqqulluta. — 2 Korinthimiut 4:1, 7 atuakkit; Luk 11:13.

14, 15. (a) Kristumiut siulliit qanoq pineqarsimappat, Petrusillu qanoq qiimmassarsimavai? (b) Jehovap aqqa pissutigalugu malersorneqarutta suna eqqaamassavarput?

14 Ullumikkut inuit millionillit kristumiuuneraraluarlutik Guutip uumigisaatut iliortarput, taamaattumillu Guutimit iluarisaanatik. (Tit 1:16) Kristumiut siulliit nalaanni aamma taamaappoq. Kristumiut ilumoortut taamanikkut inuppassuarnit, immaqa amerlanersaannit, uumigineqartarput. Petrusip kristumiut taakku qiimmassarniarlugit ima allaffigai: “Pilluarpusi Kristusip aqqa pissutigalugu mitaatigineqarussi naalannassutsip anersaavata, tassa Guutip Anersaavata, najormasi.” — 1 Petr 4:14.

15 Jehovap Nalunaajaasui ullumikkut ‘Kristusip aqqa pissutigalugu mitaatigineqartarpat’? Aap, Jiisusi Guutillu naalagaaffiani kunngiunera nalunaajaatigigatsigit mitaatigineqartarpugut. Taamaattumik Jehovap aqqanik nalunaajaatiginninneq pissutigalugu uumigineqarnerup assigaa ‘Kristusip aqqa pissutigalugu mitaatigineqarneq’. Jiisusimmi malersortini ima oqarfigai: “Uffa Ataatama aqqani tikiuttunga ilissi ilassinngilassinga.” (Joh 5:43) Taamaattumik tulliani oqaluussinerit pissutigalugu malersorneqaruit eqqaamajuk Guutimit iluarisaasutit anersaavalu illernartoq pigigit.

16, 17. (a) Nunarsuaq tamakkerlugu Jehovap innuttaasa oqaluussineq qanoq isumaqarfigaat? (b) Sunissat aalajangiusimaviuk?

16 Aamma eqqaamajuk nunarsuaq tamakkerlugu sallusuissummik upperinnilertut amerliartuinnarnerat. Allaat sumiiffinni oqaluussiffigineqakulasartuni tusarliussatsinnik nuannersumik tusaarusuttunik inoqarpoq. Taamaattumik soqutiginnittunik naapitaqaraangatta taakku Biibilimik atuaqqissaaqatigisalerniarlugit pulaaqqiinissarput qulakkeertariaqarparput. Taamaalilluta taakku Jehovamut tunniulluinnarnissaannut kuisinnissaannullu siumukarsinnaaqqullugit ikiorsinnaavavut. Sarietut Sydafrikameersutut misigigunarputit. Taanna ukiut 60-it sinnerlugit oqaluussisartuusimavoq. Ima oqarpoq: “Jiisusip utertitsissutitut pilliutaa aqqutigalugu Jehovamut, qilammi nunamilu oqartussaassuseqarnerpaamut, attaveqarluarsinnaanera qujamasuutigeqaara, taassumalu aqqanik naalannangaartumik ilisarisimannilersitsisinnaanera nuannaarutigaara.” Sariep uiatalu, Martinusip, meeqqatik pingasut inuillu allat arlallit Jehovamik pallorfiginnittunngornissaannut ikiorsimavaat. Ima nangippoq: “Allamik taama nalerisimaarnartigisumik suliassaqanngilaq. Jehovallu anersaani illernartoq aqqutigalugu pisariaqartumik nakussatsittarpaatigut inuunermik annaassiniaqataajuarsinnaaqqulluta.”

17 Kuisimasuugaluarutta kuisimasuunngikkalularuttaluunniit Jehovap Nalunaajaasuisa nunarsuaq tamakkerlugu ilagiivinut ilaasinnaanerput immikkut ittumik pisinnaatitaaffiusoq qujamasuutigisariaqarparput. Taamaattumik inunnut allanut peqqissaartumik nalunaajaajuarit Saatanillu silarsuaanit mingutsinneqarnaveersaartuarlutit. Taamaalioruit Jehova, Ataatarput asannittoq taaguutigisarput, ataqqinaatississavat.