Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuli 2014

Kajumillutik kiffartortut — Mikronesiami

Kajumillutik kiffartortut — Mikronesiami

KATHERINE USA-mi peroriartortoq 16-inik ukioqarluni Jehovap Nalunaajaasuisa ilaattut kuisippoq. Oqaluussinermi aallussilluartuuvoq, sumiiffimmili najugaani Guutip naalagaaffia pillugu tusarliussaq inunnit ikittuinnarnit ilassineqartarpoq. Ima oqarpoq: “Guuti pillugu paasisaqarusuttut nunaannut aallartinneqaqqullutik Guutimut qinusimasut misigisalikkersaarutaat atuartarpakka. Inummik soqutiginnittumik naapitserusuttaraluarlunga suli naammattuugaqanngilanga.”

Katherinep ukiorpassuarni sumiiffimmi aalajangersimasumi oqaluussisareerluni inuit Guutip naalagaaffia pillugu tusarliussamik ilassinnikkusuttut nunaannut nuunnissani eqqarsaatigisalerpaa. Tamannali artornarpallaassasoralugu eqqarsaatigisarpaa. Inuunermini ataasiaannarluni ilaquttani — ulluni 14-iinnarni — qimaqqasimavai, taamanilu ullut tamaasa angerlarsertarsimavoq. Taamaakkaluartorli Jehovamik ilisarisimannilerusuttunik ikiuinissaminik uummatikkut iluunngarluni kissaateqarnini malillugu iliulerpoq. Sumut nuussinnaanerluni misissoreerlugu immikkoortortaqarfimmut Guamimiittumut paasissutissat pisariaqartitani pissarsiariumallugit allappoq. Katherine 2007-imi juulip qaammataani 26-nik ukioqarluni Saipanimut, qeqertamut Manerassuarmiittumut angerlarsimaffimminillu 10.000 kilometerit missaanni ungasitsigisumiittumut, nuuppoq. Sunik misigisaqarpa?

QINNUTIT MARLUK AKINEQARPUT

Katherinep ilagiinnut nutaanut ilannguteqqammerluni Doris, arnaq 45-t missaanni ukiulik Biibilimik atuaqqissaaqateqarusuttoq, naapippaa. Atuakkami Biibilimi ajoqersuutigineqartut-mi kapitalit pingasut atuaqqissaareeramikkit Katherine ernumalerpoq. Ima oqarpoq: “Doris atuaqqissaaqatitsialaavoq, siuariartornissaanullu ajoqutaarusunngilanga. Siornatigut aalajangersimasumik Biibilimik atuaqqissaaqateqartarnikuunngilanga, misigivungalu Doris qatanngummik arnamik misilittagaqarluarnerusumik, immaqa ilutiminik, atuaqqissaaqateqartarnissaminik pisariaqartitsisoq.” Katherine qatanngummik arnamik eqqortumik Dorisimik Biibilimik atuaqqissaaqatiginnissinnaasumik nassaarnissamut ikioqqulluni Jehovamut qinuvoq. Aalajangerpoq Dorisip allamit atuaqqissaaqatigineqartalernissaa pillugu ilisimatinniarlugu.

Katherine ima oqaluttuarpoq: “Tamanna pillugu oqaluttuutileruttorinni Dorisip oqarfigaanga ajornartorsiut pillugu oqaloqatigerusullunga. Tusarnaareerlugu oqaluttuuppara inuuninni tamatumunnga assingusumik naammaginnillunga atuinissannut Jehovap ikiorsimagaanga. Dorisip qutsavigaanga.” Taava Dorisip Katherine pilerpaa: “Jehovap ikiorniarlunga illit atorpaatit. Ulloq taanna siullermeerlutit pulaartussaasutit nalunaaquttap-akunnerpassui atorlugit Biibilimik  atuarpunga. Qiallunga Guuti qinnuigaara Biibilimik paasinninnissannut ikiuisussamik aallartitseqqullugu. Taava matunnut kasuttorputit. Jehovap qinnutiga akivaa!” Katherine oqaluttuaq killitsinnartoq taanna oqaluttuaritillugu qullililerpoq. Ima oqarpoq: “Dorisip oqaasii qinnutinnut akissutaapput. Jehovap ersersippaa atuaqqissaaqatigiinnermik ingerlatsiinnarsinnaasunga.”

Doris 2010-mi kuisippoq ullumikkullu arlalinnik Biibilimik atuaqqissaaqateqartarluni. Katherine ima oqarpoq: “Inuup eqqortuliorusuttup Jehovamut kiffartortunngornissaanut ikiuinissannik kissaateqartuarsimanera piviusunngormat qujamasungaarpunga!” Ullumikkut Katherine pilluarluni qeqertami Kosraemi Manerassuarmiittumi specialpioneritut kiffartorpoq.

UNAMMINIARNARTUT PINGASUT — QANOQ NAAMMAGALUGIT ATORNEQARSINNAASUT

Qatanngutit angutit arnallu (19-iniit 79-it tungaanut ukiullit) 100-nit amerlanerusut nunanit assigiinngitsuneersut Mikronesiami sumiiffinni pisariaqartitsiffiusuni kiffartorput. Oqaluussisartut aallussilluartut taakkua misigissusaat Ericamit, 2006-imi 19-inik ukioqarluni Guamimut nuussimasumit, ima oqaatigineqarput: “Sumiiffimmi inuit sallusuissummut qiisasut najugaqarfianni pioneriuneq nuannerluinnarpoq. Taamatut kiffartulernissannut Jehovamit ikiorneqarsimanera qujamasuutigingaarpara. Tassa inooriaaseq pitsaanerpaaq!” Ullumikkut Erica nuannaarluni Ebeyemi Marshallip Qeqertaani specialpioneritut kiffartorpoq. Soorunami nunami allami kiffartorneq aamma unamminiarnartoqarpoq. Unamminiarnartut taakkua ilaat pingasut Mikronesiamullu nuussimasut qanoq naammagalugit atorsimaneraat sammeriartigit.

Erica

Inooriaaseq. Simonip 22-nik ukiullip 2007-imi qeqertamut Palauimut tikittup ingerlaannaq paasivaa nunamini, Tuluit Nunaanni, aningaasarsiarisartakkaminut sanilliullugu annikitsuararsuarmik aningaasarsiorsinnaalluni. “Pisiarerusutakka tamakkerlugit pisiarisinnaannginneri ilinniartariaqarpara. Maanna nerisassat pisiarisartakkakka killeqarput pisiniarfilerigaangamalu akikinnersiuisarlunga. Pigisama ilaat aseroraangata atornikut kingoraartissatut pisiareriarlugit iluarsaannissaannut ikiortissarsiortarpunga.” Pilimanianngitsumik inuuneqarneq Simonimut qanoq sunniuteqarpa? Nammineq ima oqarpoq: “Inuunermi suut pingaaruteqarnerpaanerannik paasinninnissannut aningaasanillu annikitsunik atuisalernissannut iluaqutigaara. Arlaleriarlunga Jehovamit ersarissumik isumassorneqarnera misigereerpara. Maani ukiuni arfineq-marlunni kiffartorninni nerisassaqartuarlungalu siniffissaqartuarsimavunga.” Ilumut Guutip naalagaaffianik noqqaassutiginnikkusullutik pilimanianngitsumik inuusut Jehovap tapersersortarpai. — Matt 6:32, 33.

Angerlarsertarneq. Erica ima oqarpoq: “Ilaquttannut qanittumik attaveqartuugama angerlarsertarnerup kiffartorninnut ajortumik sunniuteqarnissaa ernumassutigaara.” Imminut piareersarniarluni qanoq iliuuseqarpa? “Nuunnginninni Napasuliaq Alapernaarsuiffik-mi angerlarsertarneq pillugu allaaserisat atuartarpakka. Atuartakkakka unamminiarnartumik tamatuminnga naammaginnillunga atuinissannut iluaqutigaakka. Allaaserisat ilaanni anaanaasup panini Jehovap isumassuisarnera pillugu ima uppernarsaavigaa: ‘Jehovap  uannit isumassorluarnerusinnaavaatit.’ Taamalu oqarnera nakussatsissutigingaarpara.” Hannah uinilu Patrick Majuromi Marshallip Qeqertaani kiffartorput. Hannah qatanngutini ilagiinniittut ilagisarnerisigut angerlarsernermini pinertusaartarpoq. Ima oqarpoq: “Nunarsuaq tamakkerlugu qatanngutigiissuarnut ilaanera pillugu Jehova qutsavigiuartarpara, taakkuami aamma ilaqutarigakkit. Taakkunannga ikiorneqarsimanngikkaluaruma sumiiffimmi pisariaqartitsiffiunerusumi kiffartorsinnaassanngikkaluarpunga.”

Simon

Naleqqussarniarneq. “Nunamut allamut tikinnermi pissutsit tamarmik allanngortarput,” taama Simon oqarpoq. “Ilaannikkut quiasaarnermi paasineqartarneq maqaasisarpara.” Erica ima oqarpoq: “Aallaqqaammut maluginiarneqanngitsutut misigivunga, tamannali nuunninnut suup pissutaaneranik eqqarsaatiginnilissutigaara. Imminut eqqarsaatigalunga nuunngilanga, Jehovamulli kiffartornermi iliuuseqarnerujumallunga nuuppunga.” Ima nangippoq: “Piffissap ingerlanerani ikinngutitaarpunga nuannaringaalikkannik.” Simonip Palaumiutut oqalunnermik tamaviaarluni ilinniarnini illoqarfimmi najukkamini qatanngutinut ‘ammanerulissutigaa’. (2 Kor 6:13) Palaumiutut ilinniarnini qatanngutinit nuannarisaalissutigaa. Aap, nunaserlaat qatanngutillu nunaqavissut suleqatigiinnertik ilagiinni ikinnguteqarlualernerup akissarsiassartaanik pissarsisarnertik nuannaarutigisarpaat. Sumiiffinni pisariaqartitsiffiunerusuni kajumillutik kiffartortut sunik allanik akissarsiaqartarpat?

‘NAAMMANGAARTUNIK KATERSUINEQ’

Apustili Paulusi ima allappoq: ‘Naammangaartunik siaruarterisoq aamma naammangaartunik katersuiumaarpoq.’ (2 Kor 9:6) Allassimaffimmi najoqqutassiaq aamma kiffartornermi iliuuseqarnerorusuttunut naleqquppoq. Mikronesiami ‘naammangaartunik katersuineq’ qanoq kinguneqarluarpa?

Patrick aamma Hannah

Mikronesiami Biibilimik atuaqqissaaqateqalernissamut inuillu ataasiakkaat Guutip oqaasianik ilinniarlutillu maleruaasut anersaakkut ineriartornerisa malinnaaffiginissaannut periarfissarpassuaqarpoq. Patrick aamma Hannah Angaurimi, qeqertaaqqami 320-nik inulimmi, aamma oqaluussipput. Qaammatini marlunni tassani oqaluussereerlutik anaanaq kisimiittoq naapippaat. Ingerlaannaq Biibilimik atuaqqissaaqatigineqartalernissaminut akuersivoq, sallusuissummik kajumilluni ilassinnippoq inuunerminilu allannguerujussuarluni. Hannah ima oqarpoq: “Atuaqqissaaqatigereerlugu angerlamut sikkilertilluta tamatigut imminut qiviariarluta oqartarpugut: ‘Jehova, qujanaq!’” Hannah ima nangippoq: “Nalunngilara Jehovap arnaq taanna qanorluunniit pisoqaraluarpat imminut qanillisittussaagaa, sumiiffimmili pisariaqartitsiffiunerusumi kiffartoratta eqqortuliorusuttoq taanna nassaaralugulu Jehovamik ilisarisimannilernissaanut ikiorsinnaavarput. Tamanna inuunitsinni akissarsiarisimasatsinnit tamanit annerpaavoq!” Ericap oqarneratut “Jehovamik ilisarisimannilerniartumik ikiuineq nalissaqanngitsumik nuannaalersitsisarpoq”.

PISARIAQARTITSIFFIUNERUSUMUT NUUSSINNAAVIT?

Guutip naalagaaffia pillugu oqaluussisartunik nunani amerlasuuni pisariaqartitsisoqarpoq. Sumiiffimmut pisariaqartitsiffiunerusumut nuukkusussinnaavit? Kiffartorninni iliuuseqarnerunissannik kissaateqarnerpit piviusunngortinnissaanut nakussatseqqullutit Jehovamut ikioqqugit. Nuukkusunnerit pillugu ilagiinni utoqqaanertat, ilagiinnik nakkutilliisoq imaluunniit nunami pisariaqartitsiffiunerusumi kiffartornissamik immikkut pisinnaatitaaffeqarsimasut ilaat oqaloqatigikkit. Pilersaarusiorlutit aallartikkuit nunami kiffartorfigerusutanni immikkoortortaqarfik akisussaasoq allaffigiuk paasissutissanillu nasseqqullutit. * Imaassinnaavoq qatanngutit angutit arnallu — inuusuttut utoqqaallu, kisimiittut aappallillu — tuusintillit assigalugit ‘naammangaartumik katersuinerup’ pilluarnartua misigisinnaalerit.

^ par. 17 Guutip naalagaaffianut kiffartorneq-mi aggusti 2011-moortumi allaaserisaq ‘Makedoniamut ikaarsinnaavit’? takuuk.